‘’ꓣꓳꓽ ꓟꓹ ꓟ ꓣꓳꓽ ꓐꓴ ꓔꓯ ꓟꓴꓽ ꓗꓪ ꓗꓹ ꓘꓶꓽ ꓗꓪ ꓡꓳꓸ ꓠꓬꓹ ꓔꓬꓹ ꓡꓳ’’ ꓟꓹ ꓟ ꓟ-ꓡꓲ-ꓬ ꓟꓴꓽ ꓗꓪ ꓗꓪ ꓔꓯꓹ ꓓꓯꓺ ꓙꓰˍ ꓟ ꓟꓶˍ ꓟ ꓑꓮꓲꓽ ꓔꓲꓺ ꓒꓽ ꓪꓺ ꓔꓲꓸ ꓝꓣꓮꓠꓚꓲꓢ ꓶꓼ ꓓꓳꓽ ꓫꓱꓹ ꓓꓳꓽ=

‘’ꓣꓳꓽ ꓟꓹ ꓟ ꓣꓳꓽ ꓐꓴ ꓔꓯ ꓟꓴꓽ ꓗꓪ ꓗꓹ ꓘꓶꓽ ꓗꓪ ꓡꓳꓸ ꓠꓬꓹ ꓔꓬꓹ ꓡꓳ’’ ꓟꓹ ꓟ ꓟ-ꓡꓲ-ꓬ ꓟꓴꓽ ꓗꓪ ꓗꓪ ꓔꓯꓹ ꓓꓯꓺ ꓙꓰˍ ꓟ ꓟꓶˍ ꓟ ꓑꓮꓲꓽ ꓔꓲꓺ ꓒꓽ ꓪꓺ ꓔꓲꓸ ꓝꓣꓮꓠꓚꓲꓢ ꓶꓼ ꓓꓳꓽ ꓫꓱꓹ ꓓꓳꓽ=

8 ꓦꓻ ꓟ 15 ꓠꓬꓲ꓾ 2019

ꓟꓹ ꓟ ꓟ-ꓡꓲ-ꓬ ꓟꓴꓽ ꓗꓪ ꓗꓪ ꓔꓯꓹ ꓓꓯ ꓙꓰ ꓟꓶˍ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓮꓽ ꓙꓵꓽ ꓐꓱ ꓶꓼ ꓟꓴꓽ ꓗꓪ ꓗꓴꓷꓼ ꓙꓻ ꓖꓴ꓾ ꓟꓴꓽ ꓗꓪ ꓗꓹ ꓘꓶꓽ ꓒꓴꓺ ꓖꓶꓽ ꓗꓷ ꓟ ꓥ ꓡꓳ= ꓣꓳꓽ ꓟꓲ ꓠꓯ ꓞꓳ ꓤ ꓐꓴ ꓗꓪ ꓐꓰ ꓙꓳꓺ ꓛꓱꓽ ꓓꓴ ꓟꓽ ꓙꓳ ꓙꓳ꓾ ꓐꓲꓻ ꓜꓲꓼˍ ꓟ ꓙꓵꓻ ꓠꓲꓹ ꓐꓰ ꓮꓽ ꓟꓴꓸ ꓟꓴꓺ ꓗꓪ ꓡꓳꓸ ꓔ ꓢꓲ ꓟꓹ ꓟ ꓟ-ꓡꓲ ꓔꓯ ꓫꓸ ꓟꓳ ꓠꓹ ꓟ ꓡꓰꓽ ꓥ ꓡꓳ=

ꓟꓹ ꓟ ꓟ-ꓡꓲ-ꓬ ꓟꓴꓽ ꓗꓪ ꓗꓪ ꓔꓯꓹ ꓓꓯꓺ ꓙꓰˍ ꓟ ꓟꓶˍ ꓟ ꓑꓮꓲꓽ ꓦꓬꓼ ꓠꓬꓲ ꓡꓴ-ꓘ ꓢꓲꓽ ꓫꓬꓺ ꓕꓳꓽ ꓶꓽ ꓗꓪ꓾ ’’ꓥꓪ ꓦꓻ ꓠꓬ ꓪꓴ-ꓢ ꓔꓯ ꓫꓱꓸ ꓖꓶꓽˍ ꓥꓳ꓾ ꓥꓪ ꓶꓼ ꓟꓬꓻ ꓠꓬ ꓥꓪ ꓔꓯ ꓚꓬꓴꓸ ꓙ ꓗꓷ ꓟ ꓢꓲꓺ ꓒꓽ ꓠꓯꓸꓼ ꓗꓪ ꓠꓲꓹ ꓒꓴ ꓗꓹ ꓛꓲꓽˍ ꓡꓳ ꓾’’ ꓐꓰ ꓟꓹ ꓟ ꓟ-ꓡꓲ-ꓬ ꓡꓰ ꓐꓯ ꓗꓷꓳ=

ꓣꓳꓽ ꓐꓴ ꓤꓶꓻ ꓗꓪ ꓐꓲꓻˍ ꓟ ꓙꓲꓻˍ ꓟ ꓕꓲꓽ ꓫꓵꓽ ꓫꓵꓽ  ꓙꓳ ꓡˍ ꓠꓬ ꓣꓳꓽ ꓐꓴ ꓗꓹ ꓛꓲꓽˍ ꓥꓳ꓾ ꓣꓳꓽ ꓠꓲꓹ ꓒꓴ ꓗꓹ ꓛꓲꓽˍ ꓟ ꓠꓬ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ ꓗꓹ ꓛꓲꓽˍ ꓟ ꓡꓰꓽ ꓟꓽ ꓐꓲꓺ ꓜꓲꓼ ꓾ ꓣꓳꓽ ꓕꓲꓽ ꓖꓳ ꓓꓱꓽ ꓕꓲꓽ ꓶꓼ ꓟꓬꓻ ꓡꓱꓸꓼ ꓠꓲꓹ ꓒꓴ ꓗꓹ ꓛꓲꓽˍ ꓟ ꓔꓯ ꓟꓳꓸ ꓖꓶꓽ ꓠ ꓗˍ ꓡꓳ=

ꓟ-ꓡꓲ ꓠꓬ ꓪꓴ-ꓢ ꓗꓪ ꓐꓰ ꓠꓲꓹ ꓒꓴ ꓗꓹ ꓛꓲꓽ ꓗꓷꓳ꓾ ꓕꓱꓻ ꓟ ꓠꓬ ꓣꓳꓽ ꓐꓴ ꓔꓯ ꓣꓳꓽ ꓟꓹ ꓟ ꓡꓰ ꓐꓰ ꓪꓴ-ꓢ ꓠꓯꓸꓼ ꓗꓪ ꓠꓲꓹ ꓒꓴ ꓗꓹ ꓛꓲꓽ ꓠꓹ ꓟ ꓪꓴ-ꓢ ꓙꓽ ꓖꓶꓽ ꓔ ꓟ ꓪꓴꓽ ꓓꓰˍ ꓟ ꓶꓼ ꓤ ꓫꓱꓹ ꓤ ꓐꓱ ꓶꓼ ꓠꓲꓹ ꓒꓴ ꓠꓹ ꓟ ꓟꓸ ꓖꓶꓽ ꓔꓬꓹ ꓟ ꓥ ꓡꓳ=

ꓪꓴ-ꓢ ꓬꓲꓸ ꓪꓴꓽ ꓓꓰˍ ꓟ꓾ ꓙꓲˍ ꓟ ꓔꓯ ꓣꓳ ꓫꓱꓸ ꓖꓶꓽ ꓗꓴꓸ ꓠꓯˍ ꓡꓳ= ꓟꓹ ꓟ ꓹ ꓟ-ꓡꓲ ꓠꓬ ꓣꓳꓽ ꓐꓴ ꓔꓯ꓾ ꓣꓳꓽ ꓤꓶꓻ ꓗꓪ ꓪꓴ-ꓢ ꓕꓲꓽ ꓣꓳˍ ꓟ ꓡꓰꓽ ꓪꓴꓽ ꓓꓰ ꓡꓰ ꓢꓴ ꓥ ꓟ꓾ ꓪꓴꓽꓢ ꓔꓯ ꓮꓽ ꓙꓵꓽ ꓟ ꓕꓯꓽ ꓢꓲ ꓬꓲꓸ ꓪꓴꓸ ꓖꓶꓽ ꓠꓹ ꓟ ꓔꓯ꓾ ꓟꓸ ꓖꓶꓽ ꓔꓬꓹ ꓟ ꓔꓯ ꓢꓷꓸ ꓠ ꓗˍ ꓡꓳ=

ꓤꓶꓻ ꓗꓪ ꓠꓬꓲꓺ ꓟꓽ ꓟꓵꓺ ꓟ ꓦꓯꓸ ꓠꓲꓹ ꓙꓵꓽˍ ꓟ꓾ ꓢꓴ ꓔꓯ ꓐꓯꓻ ꓟꓴ ꓘꓶꓽˍ ꓟ꓾ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓟꓽ ꓧꓳꓹ ꓟ꓾ ꓠꓱꓸ ꓐꓯꓼ ꓢꓴ ꓔꓯ ꓠꓬꓲꓺ ꓟꓽ ꓟꓵꓺ ꓟ ꓾ ꓫꓵꓽ ꓪꓴꓽ ꓕꓱ ꓟ ꓪꓴꓸ ꓠꓬꓲ ꓙꓻ ꓖꓴꓺ ꓟꓽ ꓒꓲꓼ ꓬꓰ ꓠꓹ ꓟ ꓙꓽ ꓖꓶꓽ ꓠ ꓗˍ ꓡꓳ=

ꓣꓳꓽ ꓤꓶꓻ ꓐꓱ ꓶꓼ ꓟꓽ ꓬꓳꓸ ꓚꓰˍ ꓫꓵꓽ ꓗꓸ ꓠꓯꓸ ꓢꓲꓺ ꓗꓪ ꓡꓰꓽ ꓖꓼ ꓢꓲ ꓙꓻ ꓖꓴ ꓟꓽ ꓒꓲꓼ ꓬꓰ ꓝꓲ ꓠꓹ ꓟˍ ꓟꓲ ꓙꓽ ꓖꓶꓼ ꓢꓲ꓾ ꓟꓹ ꓟ ꓟ-ꓡꓲ ꓡꓰ ꓐꓰ ꓪꓴ-ꓢ ꓠꓬ ꓣꓳꓽ ꓤꓶꓻ ꓔꓯ ꓐꓲꓻ ꓜꓲꓼ ꓡꓰ ꓝꓲˍ ꓥꓳ ꓐꓰ ꓙꓵꓻ ꓢꓲ꓾ ꓪꓴ-ꓢ ꓔꓯ ꓥꓳ ꓡꓳꓸ ꓠꓯˍ ꓡꓳ=

ꓟꓹ ꓟ ꓟ-ꓡꓲ-ꓬ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓦꓻ ꓐꓰ ꓕꓲꓽ ꓛꓳꓺˍ ꓖꓳꓺ ꓓꓱꓽ ꓔꓯ ꓔꓯꓹ ꓓꓯꓺ ꓗꓷ ꓟꓶˍ ꓟ ꓣꓳꓽ ꓟꓲ ꓠꓯ ꓞꓳ ꓤ ꓟ ꓗꓪ ꓞꓳ ꓤ ꓕꓲꓽ ꓣꓳ ꓥ ꓡꓳ=ꓖꓳ ꓟ ꓪꓴꓸ ꓠꓬꓲ ꓣꓳꓽ ꓐꓴ ꓟꓹ ꓟ ꓟ-ꓡꓲ-ꓬ ꓔꓯ ꓟꓴꓽ ꓗꓪ ꓗꓴꓷꓼ ꓗꓹ ꓘꓶꓽ ꓐꓰ ꓐꓯ ꓟ ꓥꓳ= ꓣꓳꓽ ꓢꓷꓸ ꓔ ꓠ ꓗˍ ꓟ ꓠꓬ꓾ ꓣꓳꓽ ꓟꓹ ꓟ ꓟ-ꓡꓲ-ꓬ ꓠꓬ ꓟꓴꓽ ꓗꓪ ꓗꓴꓷꓼ ꓗꓹ ꓘꓶꓽ ꓗꓪ ꓐꓰ ꓬꓲꓸ ꓤ ꓠꓱ ꓐꓴ ꓥ ꓟ ꓣꓳꓽ ꓐꓴ ꓔꓯ ꓟꓹ ꓟ ꓕꓲꓽ ꓣꓳ ꓡꓰ ꓐꓰ ꓡꓳꓸ ꓠꓬꓹ ꓔꓬꓹ ꓟ ꓢꓷꓸ ꓔ ꓠꓯꓹ ꓡꓳ=

ꓣꓳꓽ ꓙꓲ-ꓢꓴ-ꓢꓲ-ꓤ ꓐꓴ ꓤꓶꓻ ꓠꓬ ꓟꓴꓽ ꓗꓪ ꓗꓴꓷꓼ ꓔꓯꓸ ꓟꓳꓸꓼ ꓪꓴꓸ ꓔꓴꓺ ꓢꓲ ꓙꓻ ꓫꓱꓽ ꓔꓬꓹ ꓢꓴ ꓡꓰꓽ ꓥ ꓡꓳ꓾ ꓖꓳ ꓟ ꓪꓴꓸ ꓠꓬꓲ ꓣꓳꓽ ꓐꓴ ꓥꓳ ꓡꓳꓸ ꓔꓬꓹ ꓟ ꓕꓲꓽ ꓞꓲꓼ ꓕꓲꓽ ꓑ ꓟ ꓗꓴꓷꓼ ꓗꓪ ꓔꓱꓹ ꓔꓱꓹ ꓫꓱꓽ ꓙꓰˍ ꓠ꓾ ꓬꓰ-ꓢꓴ ꓬꓲꓸ ꓟꓹ ꓟ ꓟ-ꓡꓲ-ꓬ ꓬꓰ ꓙˍ ꓟ ꓔꓯ ꓓꓰꓽ ꓢꓲ ꓛꓳ ꓫꓱꓽ ꓠ ꓗˍ ꓡꓳ=

ꓕꓲꓽ ꓞꓲꓼ ꓕꓲꓽ ꓑ ꓟ ꓤꓶꓻ ꓔꓯ ꓟꓲꓺ ꓡꓲꓹ ꓔꓬꓹ ꓢꓴ ꓐꓴ꓾ ꓟꓴꓽ ꓗꓪ ꓗꓴꓷꓼ ꓔꓯ ꓟꓳꓸꓼ ꓥꓳ ꓡꓳꓸ ꓔ ꓟ ꓟꓽ ꓙꓳ ꓢꓴ ꓐꓴ ꓠꓬ ꓟꓲ ꓠꓯ ꓗꓪ ꓟ ꓖꓴꓺ ꓙꓴꓽ ꓔꓯꓸ ꓡꓰꓽ ꓡꓳꓸ ꓢꓲ꓾ ꓟꓴꓽ ꓗꓪ ꓗꓴꓷꓼ ꓔꓯ ꓟꓲꓺ ꓡꓲꓹ ꓔꓬꓹ ꓡꓳ꓾ ꓠꓬꓲꓸ ꓠꓬꓲ ꓟꓹ ꓟ ꓟ-ꓡꓲ-ꓬ ꓟꓴꓽ ꓗꓪ ꓗꓴꓷꓼ ꓗꓪ ꓔꓯꓹ ꓓꓯꓺ ꓙꓰ ꓟꓶˍ ꓟ ꓑꓮꓲꓽ ꓠꓬ ꓣꓳꓽ ꓐꓴ ꓟꓽ ꓙꓵꓻ ꓟ ꓠꓲꓹ ꓟ ꓔꓯ ꓒꓬꓹ ꓗꓷ ꓢꓲ꓾ ꓣꓳꓽ ꓟꓹ ꓟ ꓙꓰ ꓗꓷ ꓟ ꓟꓴꓽ ꓗꓪ ꓗꓴꓷꓼ ꓔꓯ ꓠꓲꓹ ꓥꓳ ꓠꓹ ꓟ ꓾ ꓟꓹ ꓟ ꓟ-ꓡꓲ ꓗꓪ ꓐꓰ ꓝ ꓢꓲ ꓟꓴꓽ ꓗꓪ ꓗ ꓘꓶꓽ ꓒꓴ ꓗꓷ ꓟ ꓔꓯ ꓟꓸ ꓖꓶꓽ ꓔꓬꓹ ꓟ ꓥꓳ=

ꓖꓳ ꓡꓱ ꓠꓬꓲ ꓟꓴꓽ ꓗꓪ ꓗꓴꓷꓼ ꓠꓬ ꓣꓳꓽ ꓐꓴ ꓐꓱ ꓶꓼ ꓗꓶꓹ ꓶꓽ ꓡꓰ ꓔꓬꓹ ꓟ ꓟꓽ ꓥ꓾ ꓙꓳꓺ ꓛꓱꓽ ꓡꓰ ꓝꓲˍ ꓟ ꓟꓽ ꓥ꓾ ꓮ ꓡꓲꓳ ꓐꓯ ꓠꓬ ꓣꓳꓽ ꓟꓹ ꓟ ꓠꓬ ꓣꓳꓽ ꓔꓯ ꓖꓳ ꓗꓪ ꓡꓳꓸ ꓠꓬꓹ ꓔꓬꓹ ꓡꓳ=

ꓠꓴꓻ ꓠꓬ ꓪꓴ-ꓢ ꓐꓱ ꓶꓼ ꓒꓵꓽ ꓓꓰꓺ ꓡꓰˍ ꓟ ꓕꓲꓽ ꓫꓵꓽ ꓥ꓾ ꓕꓲꓽ ꓞꓲꓼ ꓕꓲꓽ ꓑ ꓟ ꓗꓹ ꓛꓲꓽ ꓓꓴ ꓔꓯ ꓪꓴ-ꓢ ꓐꓰ ꓕꓲꓽ ꓪꓺꓽ ꓟꓶ ꓠꓹ ꓟ ꓚꓰꓼ ꓔ ꓟ ꓥ ꓡꓳ꓾ ꓐꓯˍ ꓟ ꓒꓵꓽ ꓶꓼ ꓔꓯ ꓣꓳꓽ ꓟꓹ ꓟ ꓟ-ꓡꓲ-ꓬ ꓠꓬ ꓮ ꓕꓯꓹ ꓟꓲ ꓟꓸ ꓖꓶꓽ ꓔꓬꓹ ꓟ ꓥꓳ=

 ꓣꓳꓽ ꓣꓳ-ꓢ-ꓣꓲ ꓪꓽ ꓘꓴˍ ꓕ ꓑꓳꓸꓼ꓾ ꓣꓳꓽ ꓥꓳ ꓡꓳꓸ ꓔꓬꓹ ꓟ ꓟꓴꓽ ꓗꓪ ꓗꓴꓷꓼ ꓗꓪ ꓞꓲꓺ ꓧꓽ ꓕꓲꓽ ꓧꓽ ꓕꓳꓼ ꓙꓰ ꓔꓬꓹꓹ ꓟ ꓔꓯ ꓓꓵꓽ ꓙ ꓟꓶ ꓠ ꓔ ꓡꓳ=

ꓟꓽ ꓞꓽ ꓣꓳꓺ ꓓꓰˍ ꓟ꓾ ꓠꓬꓲꓺ ꓟꓽ ꓟꓵꓺ ꓟ ꓟꓲ ꓠꓯ ꓙꓳ ꓫꓵꓽ ꓔꓯ ꓒꓬꓹ ꓗꓷ ꓢꓲ꓾ ꓪꓴꓽˍ ꓟ ꓟꓴꓽ ꓗꓪ ꓗꓴꓷꓼ ꓔꓯ ꓥꓳ ꓡꓳꓸ ꓡꓯ꓾ ꓣꓳꓽ ꓐꓴ ꓕꓲꓽ ꓞꓲꓼ ꓕꓲꓽ ꓑ ꓟ ꓦꓲꓻ ꓗꓪ ꓟꓹ ꓟ ꓟ-ꓡꓲ ꓬꓲꓸ ꓐꓲꓻ ꓜꓲꓼˍ ꓟ ꓠꓵ ꓠꓲꓹ ꓡꓰ ꓬꓲꓸ ꓤ ꓠꓱ ꓐꓴ ꓔꓯ ꓡꓳꓸ ꓠꓬꓹ ꓔꓬꓹ ꓡꓳ ꓐꓰ ꓢꓷꓸ ꓔ ꓢꓲ꓾ ꓚꓲꓸ ꓛꓬꓼ ꓤꓶꓻ ꓔꓯ ꓙꓻ ꓫꓱꓽ ꓙꓰ꓾ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ 8 ꓦꓻ ꓟ 15 ꓠꓬꓲ ꓠꓽ-ꓡꓲꓸ-ꓠꓬꓲ ꓟꓳꓼ ꓡꓳꓺ Angelus ꓪꓽ ꓘꓴˍ ꓕꓯ ꓐꓯ ꓟꓸ ꓖꓶꓽ ꓗꓷ ꓟ ꓥ ꓡꓳ=

Photo credit to Vatican News

https://bit.ly/2Ky2MLK