ꓙ ꓣꓳ ꓠꓲꓹ ꓙꓳ ꓠꓹ ꓟ ꓐꓰ ꓟꓽ ꓙꓳ ꓢꓴ ꓔꓯ ꓖꓶꓽ ꓗꓴꓸ ꓠꓹ ꓟ ꓬꓰ-ꓢꓴ ꓢꓲꓺ ꓒꓽ ꓠꓬ ꓣꓳ ꓐꓴ ꓔꓯ ꓘꓴ ꓔꓬꓹ ꓡꓳ=

ꓕꓲꓽ ꓠ ꓡꓰ ꓕꓲꓽ ꓠꓽ ꓠ-ꓦꓬ-ꓠꓬꓲ ꓑ ꓫꓬꓼ ꓐꓴ ꓜꓲꓼ ꓡꓳˍ ꓟ ꓐꓰ Angelus ꓪꓽ ꓘꓴˍ ꓟ=

Wednesday, September 04, 2019

9 ꓦ ꓟ 1 ꓠꓬꓲ꓾ 2019

ꓕꓲꓽ ꓠꓽ ꓡꓰ ꓕꓲꓽ ꓠꓽ ꓞꓳ ꓜꓴꓻ ꓜꓲꓼ ꓡꓳꓽˍ ꓟ ꓠ-ꓦꓬ-ꓠꓬꓲ ꓜꓲꓼ ꓡꓳꓽˍ ꓟ ꓐꓰ Angelus ꓪꓽ ꓟ ꓘꓴ ꓢꓰꓼ ꓕꓯ ꓠꓽ-ꓦꓬ-ꓠꓬꓲ ꓢꓲꓽ ꓫꓬ ꓟꓸ ꓟꓲ ꓔꓯ ꓟꓳꓸꓼ ꓪꓴꓸ ꓔꓴ ꓢꓲ꓾ ꓪꓴ-ꓢ ꓬꓲ ꓠꓵ ꓠꓲꓹ ꓠꓯꓸꓼ ꓗꓪ ꓙꓳ ꓔꓬꓹ ꓢꓴ ꓮꓽ ꓙꓵꓽ ꓔꓯ ꓪꓴꓽ ꓓꓰˍ ꓟ ꓗꓹ ꓛꓲ ꓓꓴ ꓗꓪ ꓙ ꓖꓴ ꓒꓴ ꓢꓴ꓾ ꓙ ꓖꓴ ꓫꓬꓹ ꓢꓴ ꓒꓬꓱꓼ ꓡ ꓠꓹ ꓟ ꓐꓱ ꓶꓼ꓾ꓙ ꓣꓳ ꓠꓲꓹ ꓙꓳ ꓠꓹ ꓟ ꓐꓰ ꓟꓽ ꓙꓳ ꓢꓴ ꓔꓯ ꓖꓶꓽ ꓗꓴꓸ ꓠꓹ ꓟ ꓬꓰ-ꓢꓴ ꓢꓲꓺ ꓒꓽ ꓠꓬ ꓣꓳ ꓐꓴ ꓔꓯ ꓘꓴ ꓔꓬꓹ ꓡꓳ꓾ ꓐꓰ ꓟꓸ ꓟꓲ ꓒꓶꓻ ꓖꓶꓽ ꓗꓷꓳ=

ꓒ-ꓡꓲ-ꓢꓷ ꓕꓲꓽ ꓣꓳ ꓬꓲꓸ ꓜꓻ ꓜꓽ ꓖꓴ ꓗꓪ ꓬꓰ-ꓢꓴ ꓢꓲꓺ ꓒꓽ ꓔꓯ ꓘꓴ ꓔ ꓡꓳ= ꓖꓳ ꓗꓪ ꓛꓲ ꓡ ꓢꓴ ꓐꓴ ꓠꓬ ꓙꓲꓺˍ ꓟ ꓠꓬꓲ ꓖꓴ ꓗꓪ ꓡꓰꓽ ꓠꓬꓲ ꓔ ꓔꓬꓹ ꓟ ꓔꓯ ꓟꓳꓻ ꓗꓷ ꓢꓲ꓾ ꓬꓲ ꓛꓳ ꓒꓯꓹ ꓐꓴ ꓔꓯ ꓐꓯ ꓟꓸ ꓖꓶꓽ ꓗꓷꓳ=

ꓠꓬꓲꓸ ꓠꓬꓲ ꓟ ꓦꓬꓼ ꓠꓬꓲ ꓗꓪ ꓖꓳ ꓟ ꓡꓰ ꓐꓰ ꓣꓱꓽ ꓬꓰ ꓔꓬꓹ ꓟ ꓠꓬ ꓜꓻ ꓜꓽ ꓑꓮꓲ ꓗꓪ ꓡꓰꓽ ꓟꓽ ꓥ ꓥ꓾ ꓠꓱꓸ ꓐꓯꓼ ꓗꓪ ꓟꓲ ꓒꓬꓱꓼ ꓔꓬꓹ ꓫꓵꓽ ꓥꓳ= ꓞꓳ ꓤ ꓐꓴ ꓠꓬ ꓠꓱꓸ ꓐꓯꓼ ꓕꓯꓽ ꓢꓲ ꓚꓲꓸ ꓛꓬ ꓡꓰꓽ ꓪꓴꓽ ꓓꓰˍ ꓟ ꓔꓯ ꓟꓳꓸ ꓖꓶꓽ ꓠꓹ ꓟ ꓙꓲꓻ ꓟ ꓠꓬꓲ ꓖꓴ ꓔꓯ ꓧꓪꓻ ꓔꓬꓹ ꓡꓳ=ꓚꓵꓺ ꓚꓵꓺ ꓠꓬ ꓠꓬꓲ ꓖꓴ ꓔꓯ ꓟꓶꓽ ꓢꓲꓼ ꓢꓴ ꓐꓰ ꓠꓬꓲ ꓖꓴ ꓟꓶꓻ ꓠꓲꓹ ꓫꓵˍ ꓟ ꓠꓲꓹ ꓟ ꓙꓳ ꓢꓴ ꓐꓴ ꓪꓴꓸ ꓠꓬꓲ ꓕꓲꓽ ꓠꓲꓹ ꓕꓲꓽ ꓪꓺꓽ ꓥ ꓟ꓾ ꓠꓬꓲ ꓢ ꓫꓵꓸ ꓠꓵ ꓠꓲꓹ ꓔꓯ ꓐꓬ ꓡꓰ ꓝꓲˍ ꓡꓳ= ꓘꓴ-ꓜꓲ-ꓞꓳ ꓗꓪ꓾ ꓗꓴꓷꓼ ꓗꓪ꓾ ꓞꓳ ꓜꓴꓻ ꓕꓲꓽ ꓜꓴꓻ ꓗꓪ ꓖꓳ ꓟ ꓡꓰ ꓗꓹ ꓟ ꓞꓳ ꓤ ꓙꓳˍ ꓠꓬ ꓕꓲꓽ ꓜꓴꓻ ꓡꓱꓸꓼ ꓔꓯ ꓟꓽ ꓙꓲꓻ ꓗꓷ ꓡꓰ ꓝꓲ ꓐ ꓡˍ ꓡꓳ=

ꓠꓬꓲꓸ ꓠꓬꓲ ꓢꓲꓽ ꓫꓬ ꓟꓸ ꓟꓲ ꓗꓪ ꓐꓰ ꓬꓰ-ꓢꓴ ꓘ-ꓣꓲ-ꓢ-ꓔꓴ ꓠꓬ ꓣꓳ ꓤꓶꓻ ꓗꓪ ꓢꓯꓸ ꓔꓬꓹ ꓠꓹ ꓟ ꓬꓲꓸ ꓝꓳꓹ ꓟꓶ ꓥ ꓟ ꓙ ꓣꓳ ꓠꓲꓹ ꓙꓳ ꓠꓹ ꓟ ꓐꓰ ꓟꓽ ꓙꓳ ꓢꓴ ꓔꓯ ꓖꓶꓽ ꓗꓴꓸ ꓠꓹ ꓟ ꓐꓯ ꓢꓲ꓾ ꓣꓳꓽ ꓔꓯ ꓟꓸ ꓖꓶꓽ ꓔꓬꓹ ꓟ ꓥ ꓡꓳ=

ꓬꓲꓸ ꓪꓴꓸ ꓕꓲꓽ ꓟ ꓠꓬ ꓾ ꓬꓰ-ꓢꓴ ꓙꓲ ꓢꓴ ꓠꓬ ꓑꓮꓲ ꓕꓲꓽ ꓟ ꓗꓪ ꓘꓴ ꓟꓶˍ ꓠꓬ ꓱꓽ ꓱꓸˍ ꓗꓪ ꓠꓬꓲ ꓖꓴ ꓣꓴ ꓠꓹ ꓟ꓾ ꓮ ꓟꓴ ꓟ ꓗꓪ ꓣꓴ ꓗꓷ ꓠꓬ ꓣꓳꓽ ꓕꓯꓽ ꓢꓲ ꓪꓴꓽ ꓢꓴ ꓡˍ ꓕꓯ ꓞꓳ ꓤ ꓮꓽ ꓟꓬ ꓟ ꓟꓲꓽ ꓙꓬꓼ ꓗꓪ ꓤˍ ꓪ ꓡꓰ ꓠꓬ ꓫꓸ ꓔꓳ ꓡꓰ ꓓꓴ ꓥꓳ=ꓱꓽ ꓱˍ ꓗꓹ ꓟ ꓗꓪ ꓠꓴ ꓪ ꓔꓬꓹ ꓟ ꓔꓯ ꓑꓮꓲ ꓬꓰ ꓢꓴ ꓟꓳ ꓗꓷ ꓠꓬ ꓠꓴ ꓪ ꓔꓯ ꓙꓲˍ ꓟ ꓠꓬꓲ ꓖꓴ ꓗꓪ ꓧꓳꓽ ꓙꓰ ꓡˍ ꓕꓯ ꓠꓴ ꓪ ꓟꓬꓱꓻ ꓓꓳꓽ ꓙꓳˍ ꓥꓳ=ꓮ ꓡꓲ ꓗꓪ ꓔꓬꓹ ꓥˍ ꓟꓲ ꓚꓲꓸ ꓛꓬꓼ ꓤꓶꓻ ꓔꓯ ꓙ ꓣꓳ ꓠꓲꓹ ꓐꓰ ꓪꓴꓸ ꓔꓴ ꓠꓹ ꓟ꓾ ꓙ ꓣꓳˍ ꓟ ꓠꓬ ꓔꓱꓹ ꓟ ꓥ ꓢꓲ ꓔꓱꓹ ꓟ ꓞꓳ ꓙꓳ ꓚꓱꓹ ꓔꓯ ꓟꓲ ꓒꓬꓱꓼ ꓡ ꓝꓲˍ ꓡꓳ=

ꓠꓬꓲꓽ ꓙꓰꓽ ꓕꓲꓽ ꓙꓰꓽ ꓟ ꓠꓬ ꓑꓮꓲ ꓬꓰ ꓖꓴ ꓗꓪ ꓟꓬ-ꓢꓲꓽ ꓠꓬꓲ ꓟꓽ ꓟꓳꓻ ꓢꓴ꓾ ꓛꓲ ꓫꓳꓸ ꓢꓴ꓾ ꓛꓲ ꓫꓵꓺ ꓡꓯꓼ ꓫꓵꓺ ꓢꓴ ꓐꓰ ꓟꓽ ꓙꓳ ꓞꓳ ꓫ ꓐꓴ ꓔꓯ ꓘꓴ ꓢꓲ ꓟꓸ ꓖꓶꓽˍ ꓡꓳ= ꓚꓲꓸ ꓛꓬꓼ ꓐꓱ ꓶꓽ ꓮꓸ ꓫꓵꓽ ꓟꓲ ꓬꓰ ꓖꓶꓽ ꓟꓽ ꓐ ꓡ ꓢꓴ ꓔꓯ ꓖꓶꓽ ꓜꓽ ꓖꓶꓽ ꓓꓳꓻˍ ꓟ ꓠꓬ ꓪꓴ-ꓢ ꓠꓲꓹ ꓫꓵˍ ꓟ ꓥ ꓡꓳ=ꓞꓳ ꓤ ꓗꓪ ꓐꓰ ꓡꓹ ꓟ ꓟꓽ ꓥ꓾ ꓪꓴ-ꓢ ꓗꓪ ꓐꓰ ꓟꓶˍ ꓟ ꓟꓬꓱꓽ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓬꓲꓸ ꓠꓵ ꓠꓲꓹ ꓠꓯꓸꓼ ꓗꓪ ꓔꓬꓹ ꓟ ꓞꓳ ꓤ ꓮ ꓙꓵꓽ ꓔꓯ ꓪꓴꓽ ꓓꓰˍ ꓟ ꓗꓹ ꓛꓲꓽ ꓓꓴ ꓗꓪ ꓙ ꓖꓴ ꓒꓴ ꓖꓶꓽ ꓢꓴ ꓒꓬꓱꓼ ꓡ ꓠꓹ ꓟ ꓐꓱ ꓶꓼ ꓙ ꓣꓳ ꓠꓲꓹ ꓙꓳ ꓠꓹ ꓟ ꓐꓰ ꓟꓽ ꓙꓳ ꓢꓴ ꓔꓯ ꓖꓶꓽ ꓗꓴꓸ ꓠꓹ ꓟ ꓬꓰ-ꓢꓴ ꓢꓲꓺ ꓒꓽ ꓠꓬ ꓣꓳ ꓐꓴ ꓔꓯ ꓘꓴ ꓔꓬꓹ ꓟ ꓔꓯ ꓐꓯ ꓟꓸ ꓖꓶꓽ ꓗꓷ ꓟ ꓥꓳ=

Credit to Vatican News

https://bit.ly/2ZJ7tGL