ꓞꓳ ꓡꓱ ꓐꓴꓳ꓾ꓬꓰ-ꓢꓴ ꓢꓲꓺ ꓒ ꓠꓬ ꓬꓲꓸ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓠꓴ ꓪ ꓡꓯꓽ ꓒꓯꓹ ꓗꓪ ꓠꓲꓹ ꓪꓴꓽ ꓪꓴꓽˍ ꓐꓰ ꓡꓯꓼ ꓙꓱꓻ ꓔ ꓡꓳ=

ꓔꓲꓺ ꓒ ꓪ ꓔꓲ Francis ꓡꓰ ꓞꓳ ꓡꓱ ꓤ ꓐꓴ ꓐꓰ ꓜꓲꓼ ꓡꓳꓽˍ ꓟ=

ꓞꓳ ꓡꓱ ꓐꓴꓳ꓾ꓬꓰ-ꓢꓴ ꓢꓲꓺ ꓒ ꓠꓬ ꓬꓲꓸ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓠꓴ ꓪ ꓡꓯꓽ ꓒꓯꓹ ꓗꓪ ꓠꓲꓹ ꓪꓴꓽ ꓪꓴꓽˍ ꓐꓰ ꓡꓯꓼ ꓙꓱꓻ ꓔ ꓡꓳ=

9 ꓦ ꓟ 7 ꓠꓬꓲ꓾ 2019

Madagascar ꓗꓴꓷꓼ ꓗꓪ ꓮꓸ ꓣꓳ ꓡꓳꓸ ꓚꓳꓻ ꓙꓰˍ ꓔꓬꓹ ꓟ ꓔꓲꓺ ꓒ ꓪ ꓔꓲ Francis ꓡꓰ ꓞꓳ ꓡꓱ ꓐꓴ ꓐꓰ ꓜꓲꓼ ꓡꓳꓽˍ ꓟ ꓗꓪ ꓬꓰ-ꓢꓴ ꓢꓲꓺ ꓒ ꓠꓬ ꓬꓲꓸ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓠꓴ ꓪ ꓡꓯꓽ ꓒꓯꓹ ꓗꓪ ꓠꓲꓹ ꓪꓴꓽ ꓪꓴꓽˍ ꓐꓰ ꓡꓯꓼ ꓙꓱꓻ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓐꓲꓺ ꓙꓲˍ ꓟ ꓗꓸ ꓠꓯꓸꓼ ꓛꓳ ꓢꓴ ꓒꓬꓱꓼ ꓡ ꓠ ꓢꓯꓼ ꓕꓵꓼ ꓠ ꓗˍ ꓡꓳ ꓐꓰ꓾ ꓐꓯ ꓗꓷꓳ=

ꓬꓰ-ꓢꓴ ꓢꓲꓺ ꓒ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓴ ꓪ ꓮꓸ ꓫꓵꓽ ꓔꓯ ꓧꓪꓺ ꓔꓬꓹ ꓡ? ꓐꓰ ꓠ ꓠꓬꓲꓺ ꓗꓷꓳ꓾  ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹ ꓣꓳ ꓔꓯ ꓥˍ ꓟꓲ ꓠꓴ ꓪ ꓮꓸ ꓫꓵꓽ ꓔꓯ ꓧꓪꓺ ꓔꓬꓹ ꓡ ꓐꓯ ꓢꓲ꓾ ꓠꓺ ꓠꓬꓲꓺ ꓔꓬꓹ ꓡꓳ=

ꓞꓳ ꓡꓱ ꓐꓴꓳ꓾ ꓠꓴ ꓪ ꓧꓪꓺ ꓔꓬꓹ ꓟ ꓔꓯ ꓪꓴ-ꓢ ꓢꓷˍ ꓡꓳ=

ꓠꓴ ꓪ ꓧꓪꓺ ꓔꓬꓹ ꓟ ꓗꓹ ꓛꓲ ꓓꓴ ꓐꓯ ꓟ ꓔꓯ ꓐꓲꓺ ꓐꓲꓺ ꓙꓲꓻ ꓙꓲꓻ ꓡꓰꓽ ꓖꓶꓽ ꓠꓹ ꓟ꓾ ꓗꓹ ꓛꓲ ꓓꓴ ꓖꓳ ꓟ ꓔꓯ ꓮ ꓡꓲ ꓕꓲꓽ ꓫꓵꓽ ꓟ ꓡꓰ ꓣꓴꓺ ꓔꓯꓹ ꓙꓰ ꓟꓽ ꓐ ꓡ ꓟ ꓡꓰ ꓐꓰ꓾ ꓠꓴ ꓪ ꓥˍ ꓟꓲ ꓗꓹ ꓛꓲˍ ꓟ ꓔꓯ ꓟꓶ ꓠꓹ ꓟ ꓚꓰꓼ ꓔ ꓟ ꓟꓶ ꓢꓴ ꓡꓰꓽ ꓥ ꓡꓳ=

ꓠꓴ ꓪ ꓙꓵꓻ ꓠꓲꓹ ꓗꓪ ꓐꓰ ꓟꓶꓼ ꓢꓲꓼ ꓢꓲ ꓧꓪꓺ ꓔ ꓟ ꓮꓽ ꓙꓵꓽ ꓠꓬ ꓠꓴ ꓐꓰ ꓥꓪ ꓔꓬꓹ ꓟ ꓟꓲ ꓠꓯꓺ ꓔꓯ ꓪꓺ ꓙꓲ ꓙꓲꓻ ꓠꓹ ꓟ ꓫꓬꓹ ꓖꓶꓽˍ ꓥꓳ= ꓠꓱꓸ ꓐꓯꓼ ꓢꓴ ꓙꓲꓻ ꓖꓴ ꓐꓱ ꓶꓼ ꓣꓳ ꓬꓰ ꓖꓶꓽ ꓗꓷ ꓟ ꓠꓬ ꓣꓳꓽ ꓤꓶꓻ ꓔꓯ ꓒꓳꓹ ꓡꓶꓸ ꓡꓰ ꓝꓲˍ ꓡꓳ= ꓣꓳ ꓡꓳꓸ ꓟꓳˍ ꓟ ꓾ ꓐꓯ ꓟꓴ ꓞꓶꓹ ꓟ ꓔꓯ ꓒꓳꓹ ꓡꓶꓸ ꓖꓶꓽ ꓔꓬꓹ ꓟ ꓥꓳ=

ꓬꓰ-ꓢꓴ ꓢꓲꓺ ꓒꓽ ꓠꓬ ꓠꓴ ꓪ ꓟꓬꓱꓻ ꓡꓰ ꓐꓰ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓔꓯ ꓘꓴ ꓔꓬꓹ ꓡꓳ= ꓠꓴ ꓪ ꓬꓰ ꓐ ꓡꓹ ꓟ꓾ ꓠꓴ ꓪ ꓝꓴꓲꓸ꓾ ꓠꓴ ꓪ ꓛꓳꓸ ꓛꓬ ꓗꓷ ꓟ ꓔꓯ ꓡꓳꓸ ꓢꓲ꓾ ꓘꓴ ꓔꓬꓹ ꓟ ꓟꓽ ꓥ꓾ ꓠꓴ ꓪ ꓠꓬ ꓘꓴ-ꓜꓲ-ꓞꓳ ꓜꓻ ꓟꓲꓺ ꓗꓪ ꓦ ꓡꓱ ꓐꓳ ꓢꓴ ꓡꓰ ꓐꓰ ꓘꓴ ꓟꓶ ꓢꓴ ꓥꓳ=

ꓞꓳ ꓡꓱ ꓕꓲꓽ ꓣꓳ ꓐꓱ ꓓꓴꓽ ꓗꓪ ꓐꓱ ꓟꓶˍ ꓟ ꓠꓬ ꓬꓲꓸ ꓟꓽ ꓙꓲꓻ ꓟ ꓪꓴꓸ ꓠꓬꓲ ꓐꓱ ꓟꓶˍ ꓟ ꓟꓽ ꓥ= ꓟꓽ ꓙꓲꓻ ꓟ ꓗꓪ ꓛꓳ ꓫꓱꓽ ꓗꓷ ꓟ ꓪꓴꓸ ꓠꓬꓲ ꓥ ꓡꓳ=ꓬꓲꓸ ꓛꓬ ꓗꓷ ꓥꓳꓽ ꓗꓷ ꓟ ꓔꓯ ꓢꓷꓸ ꓢꓲ ꓝꓴꓲꓸ ꓪꓽ ꓒꓵꓽ ꓚꓱꓹ ꓗꓷꓳ= ꓮ ꓟꓶ  ꓫꓵꓼˍ ꓟ ꓠꓲꓹ ꓟ ꓡꓰ ꓪꓴꓸ ꓔꓴ ꓙꓰ ꓠꓹ ꓟ ꓙ ꓖꓶꓽ ꓔ ꓡꓳ=

ꓖꓳ ꓟ ꓪꓴꓸ ꓠꓬꓲ ꓮ ꓡꓰ ꓐꓰ ꓔꓳꓹ ꓜꓳꓽ ꓡˍ ꓟꓲ꓾ ꓮ ꓫꓵꓽ ꓛꓬ ꓗꓷˍ ꓥ ꓟꓲ꓾ ꓮ ꓕꓯˍ ꓟꓲ ꓠꓲꓹ ꓟ ꓕꓽ ꓙꓬ ꓡꓰ꓾ ꓠꓲꓹ ꓪꓴꓽ ꓪꓴꓽ ꓡꓰ ꓙ ꓫꓱꓽ ꓙꓰ=

ꓪꓴ-ꓢ ꓠꓬ ꓠꓴ ꓪ ꓕꓽ ꓙꓳ꓾ ꓠꓱꓸ ꓐꓯꓼ ꓔꓯ ꓣꓱꓽ ꓙ ꓔꓳꓹ ꓙ ꓗꓷ ꓟ꓾ ꓙꓲˍ ꓟ ꓬꓰˍ ꓟ ꓠꓬ ꓠꓴ ꓪ ꓡꓯꓽ ꓒꓯꓹ ꓟꓽ ꓫꓬ ꓗꓷ ꓡꓰˍ ꓥ ꓟꓲ ꓾ ꓟꓽ ꓙꓳꓺ ꓙꓳꓺ ꓐꓰ ꓝ ꓢꓲ ꓣꓱꓽ ꓬꓰ=

ꓪꓴ-ꓢ ꓠꓬ ꓠꓴ ꓪ ꓔꓯ ꓦ ꓡꓱ ꓐꓳˍ ꓡꓳ꓾ ꓕꓲꓽ ꓑꓹ ꓗꓪ ꓡꓰꓽ ꓠꓴ ꓪ ꓚꓲꓸ ꓛꓬ ꓠꓬ ꓚꓲꓸ ꓛꓬ ꓔꓯ ꓙꓵꓻ ꓠꓹ ꓟ ꓓꓰꓽ ꓔꓬꓹ ꓡꓳ= ꓕꓲꓽ ꓠꓲꓹ ꓕꓲꓽ ꓪꓽ ꓡꓯꓽ ꓒꓯꓹ ꓖꓳ ꓢꓲ ꓚ ꓟꓲꓽ ꓕꓳꓽ ꓶꓽ ꓗꓪ ꓬꓲꓸ ꓫꓵꓼ ꓐꓳ ꓠꓯˍ ꓡꓳ= ꓖꓳ ꓗꓪ ꓥꓪ ꓠꓬ ꓪꓴ-ꓢ ꓬꓲ ꓟꓬꓱꓽ ꓐꓬꓱꓽ ꓘꓶꓽ ꓗꓪ ꓣꓱꓽ ꓬꓯꓼ ꓢꓴ ꓕꓲꓽ ꓣꓳ ꓥ ꓡꓳ ꓐꓰ ꓓꓵꓽ ꓙ ꓔ ꓠ ꓗˍ ꓡꓳ=

ꓠꓴ ꓪ ꓫꓱꓽ ꓔꓬꓹ ꓟ  ꓚꓱꓹ ꓗꓪ ꓠꓴ ꓪ ꓮ ꓕꓯˍ ꓟꓲ ꓕꓲꓽ ꓣꓳ ꓔꓵꓸꓼ ꓫꓱꓽ ꓙꓰ ꓔꓬꓹ ꓟ ꓟꓽ ꓥ= ꓪꓴ-ꓢ ꓠꓬ ꓠꓴ ꓪ ꓐꓰ ꓕꓲꓽ ꓡꓰꓹ ꓔꓬꓹ ꓡꓳ= ꓟꓹ ꓟ ꓟ-ꓡꓲ ꓔꓯ ꓔꓯꓺ ꓢꓳ ꓢꓲ꓾ ꓪꓴ-ꓢ ꓬꓲꓸ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓛꓳ ꓫꓱꓽ ꓐ ꓡ ꓠ ꓛꓲ ꓾ ꓣꓳ ꓟꓹ ꓟ ꓬꓲꓸ ꓥꓪ ꓔꓯ ꓕꓱ ꓡꓱ ꓒꓬꓱꓼ ꓡ ꓝꓲ꓾ ꓐꓯ ꓟ ꓫꓸ ꓕꓱꓻ ꓘꓶꓽ ꓡꓰ ꓐꓰ ꓟꓲ ꓠꓯꓺ ꓕꓲꓽ ꓟ ꓡꓱꓸꓼ ꓐꓱ ꓶꓼ ꓙꓲˍ ꓟ ꓔꓯ ꓖꓶꓽ ꓠ ꓗˍ ꓡꓳ=

ꓟꓲ ꓠꓯꓺ ꓔꓯ ꓠꓬꓲ ꓟꓳ ꓓꓴ ꓖꓶꓽ ꓢꓴ ꓒꓬꓱꓼ ꓠꓯˍ ꓡꓳ꓾ ꓠꓬꓲ ꓟꓳ ꓓꓴ ꓖꓳ ꓟ ꓠꓬ ꓥꓳ ꓡꓳꓸ ꓓꓴ ꓟꓬ ꓡꓴꓺ ꓗꓪ ꓐꓬ ꓔꓬꓹ ꓝꓲ꓾ ꓐꓰ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓞꓳ ꓡꓱ ꓐꓴ ꓐꓰ ꓜꓲꓼ ꓡꓯꓽ ꓘꓳˍ ꓕꓯ ꓐꓯ ꓖꓶꓽ ꓗꓷ ꓟ ꓥꓳ=

Credit to Vatican News

https://bit.ly/2lJ5fc8

Add new comment

13 + 6 =

Please wait while the page is loading