ꓢꓲꓺ ꓡꓲꓺˍ ꓟ ꓚꓱꓹ ꓗꓪ ꓠꓲꓹ ꓒꓴ ꓒꓴˍ ꓐꓰ ꓙ ꓫꓱꓽ ꓙꓰ ꓠꓹ ꓟ Mozambique ꓗꓴꓷꓼ ꓞꓳ ꓡꓱ ꓤ ꓐꓴ ꓔꓯ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ ꓕꓵꓼ ꓪꓽ ꓖꓶꓽˍ ꓟ=

Mozambique ꓗꓴꓷꓼ ꓗꓪ ꓟ ꓞꓳ ꓡꓱ ꓐꓴ ꓐꓰ ꓔꓲꓺ ꓒ ꓪꓺ ꓔꓲ ꓝꓣꓮꓠꓚꓲꓢ ꓐꓰ ꓜꓲꓼ ꓡꓯꓽ ꓘꓳˍ ꓟ=

ꓢꓲꓺ ꓡꓲꓺˍ ꓟ ꓚꓱꓹ ꓗꓪ ꓠꓲꓹ ꓒꓴ ꓒꓴˍ ꓐꓰ ꓙ ꓫꓱꓽ ꓙꓰ ꓠꓹ ꓟ Mozambique ꓗꓴꓷꓼ ꓞꓳ ꓡꓱ ꓤ ꓐꓴ ꓔꓯ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ ꓕꓵꓼ ꓪꓽ ꓖꓶꓽˍ ꓟ=

9 ꓦ ꓟ 5 ꓠꓬꓲ꓾ 2019

Mozambique  ꓗꓴꓷꓼ ꓞꓳ ꓡꓱ ꓐꓴ ꓐꓰ ꓔꓲꓺ ꓒ ꓪꓺ ꓔꓲ ꓝꓣꓮꓠꓚꓲꓢ ꓜꓲꓺ ꓡꓯꓽ ꓘꓳˍ ꓟ ꓗꓪ ꓢꓲꓺ ꓡꓲꓺˍ ꓟ ꓚꓱꓹ ꓗꓪ ꓠꓲꓹ ꓒꓴ ꓒꓴˍ ꓐꓰ ꓙ ꓫꓱꓽ ꓙꓰ ꓠꓹ ꓟ Mozambique ꓗꓴꓷꓼ ꓞꓳ ꓡꓱ ꓤ ꓐꓴ ꓔꓯ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ ꓕꓵꓼ ꓪꓽ ꓖꓶꓽˍ ꓗꓷꓳ=

ꓓꓵꓽ ꓙ ꓔ ꓟ ꓔꓯ ꓮ ꓡꓲ ꓐꓰ ꓬꓰ ꓓꓴ?꓾ ꓚꓲꓸ ꓛꓬ ꓗꓴꓷꓼ ꓗꓪ ꓔꓳꓹ ꓜꓳꓽ ꓔꓬꓹ ꓟ ꓫꓸ ꓙꓵ ꓓꓴ ꓔꓯ ꓮ ꓡꓲ ꓐꓰ ꓣꓱꓽ ꓬꓰ ꓓꓴ?꓾ Mozambique ꓗꓴꓷꓼ ꓚ ꓟꓲ ꓕꓳꓽ ꓶꓽ ꓬꓲꓸ ꓫꓵꓼ ꓗꓪ ꓮ ꓡꓲ ꓐꓰ ꓐꓳ ꓠꓯ ꓡ? ꓐꓯˍ ꓟ ꓠ ꓠꓬꓲ ꓘꓶꓽ 3 ꓫꓵꓽ ꓐꓰ ꓞꓳ ꓡꓱ ꓐꓴ ꓔꓯ ꓢꓯꓼ ꓖꓶꓽ ꓗꓷꓳ=

ꓠꓴ ꓪ ꓥꓪ ꓔꓯ ꓘꓳꓹ ꓣꓴˍ ꓟ ꓐꓰ ꓗꓴꓷꓼ ꓗꓪ ꓚꓳꓻ ꓙꓰ ꓔꓬꓹ ꓟ ꓦꓬꓼ ꓠꓬꓲ ꓕꓲꓽ ꓟ ꓡꓱꓸꓼ ꓗꓪ ꓠꓴ ꓪ ꓐꓴ ꓜꓲꓺ ꓡꓯꓽ ꓘꓳ ꓢꓲ ꓕꓲꓽ ꓠꓲꓹ ꓕꓲꓽ ꓪꓺꓽ ꓬꓰˍ ꓟ꓾ ꓠꓴ ꓪ ꓬꓰ ꓔ ꓟ ꓟꓬꓱꓽ꓾ ꓟꓴꓽ ꓖꓪ ꓚꓱꓹ꓾ ꓠꓴ ꓪ ꓡꓲꓽ ꓒꓰ ꓐꓰ ꓛꓲ ꓡꓵꓺ ꓡꓯꓽ ꓡꓵꓺ ꓟꓳꓸ ꓖꓶꓽ ꓡˍ ꓟ ꓗꓪ ꓐꓰ ꓠ ꓠꓬꓲ ꓘꓶꓽ ꓢ ꓘꓶꓽ ꓔꓯ ꓒꓳꓹ ꓖꓶꓽˍ ꓟ ꓒꓳꓹ ꓘꓶꓽ ꓐꓹ ꓡꓳ= ꓚꓳꓻ ꓙꓰˍ ꓟ ꓦꓬꓼ ꓠꓬꓲ ꓗꓪ ꓠꓴ ꓪ ꓔꓶꓻ ꓙꓱꓼ꓾ ꓟꓲꓽ ꓕꓯꓽ ꓢꓲ ꓟ ꓦꓬꓼ ꓠꓬꓲ꓾ ꓥꓳ ꓡꓳꓸ ꓓꓴ ꓐꓹ ꓡꓳ= ꓕꓱ ꓟ ꓔꓯ ꓕꓲꓽ ꓪꓺꓽ ꓫꓬꓹ ꓔꓶꓻ ꓢꓲ꓾ ꓐꓬꓱꓼ ꓡꓱꓼ ꓡꓱꓼˍ ꓟ ꓟꓲꓽ ꓕꓯꓽ ꓢꓲ ꓟ ꓤꓶ ꓔꓯ ꓫꓬꓹ ꓠꓯˍ ꓡꓳ=

ꓠꓲꓹ ꓟ ꓙꓬˍ ꓟ ꓐꓰ ꓠꓲꓹ ꓟ ꓫꓸ ꓟ  2 ꓙꓰꓽ ꓟ ꓠꓬ ꓞꓳ ꓤ ꓔꓯ ꓫꓸ ꓡꓰ ꓝꓲˍ ꓡꓳ=ꓞꓳ ꓤ ꓔꓯ ꓢꓹ ꓟ ꓙ ꓖꓴ ꓗꓪ ꓧꓳꓽ ꓙꓰ ꓢꓲ꓾ ꓛꓳꓸ ꓡꓰ ꓝꓲˍ ꓡꓳ=ꓢꓯꓼ ꓕꓵꓼ ꓠꓲꓹ ꓫꓵˍ ꓟ ꓠꓲꓹ ꓟ ꓠꓬ ꓞꓳ ꓤ ꓔꓯ ꓪꓴꓽ ꓟꓴ ꓡ ꓝꓲˍ ꓡꓳ= ꓮ ꓡꓲ ꓗꓪ ꓛꓲ ꓫꓸ ꓙꓵˍ ꓟꓲ ꓠꓲꓹ ꓪꓴꓽ ꓪꓴꓽ ꓡꓰ ꓠꓴ ꓪ ꓔꓶꓻ ꓙꓱꓼ ꓔꓯ ꓡꓯꓼ ꓫꓵꓺ ꓪꓴꓽ ꓡ ꓝꓲˍ ꓡꓳ= ꓚꓲꓸ ꓛꓬꓼ ꓧꓪꓸ ꓒꓱꓽ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓧꓹ ꓙꓰˍ ꓟ ꓕꓽ ꓗꓷ ꓡꓰ ꓝꓲ=

ꓞꓳ ꓜꓴꓻ ꓐꓰ ꓕꓲꓽ ꓪꓺꓽ ꓬꓰˍ ꓟ ꓔꓯ ꓢꓳꓻ ꓣꓴ ꓡꓯ= ꓙꓵꓻ ꓚꓱꓹ ꓟꓽ ꓪꓽ ꓡꓯꓽ ꓘꓳ  ꓟ ꓾ ꓡꓲꓽ ꓒꓰꓽ ꓟꓽ ꓪꓽ ꓡꓯꓽ ꓘꓳ ꓟ꓾ ꓫꓸ ꓕꓱꓻ ꓚꓱꓸ ꓟꓽ ꓪꓽ ꓟ ꓠꓬ ꓣꓳꓽ ꓐꓴ ꓐꓱ ꓶ ꓙꓳꓺ ꓗꓽ ꓓꓴ ꓕꓽ ꓒꓬꓱꓼ ꓡ ꓝꓲ=ꓟꓽ ꓫꓱꓸ ꓡꓯꓽ ꓘꓳ ꓟꓽ ꓪꓽ ꓡꓯꓽ ꓘꓳ ꓟ ꓔꓯ ꓕꓲꓽ ꓡꓰꓺꓽ ꓬꓰ ꓢꓲ ꓪ ꓙꓲ ꓐꓲꓻˍ ꓟ꓾ ꓕꓷꓹ ꓟ ꓪꓽ ꓠꓬꓲˍ ꓟ ꓢꓯꓼ ꓪꓽ ꓒꓬꓱꓼ ꓡ ꓠꓹ ꓟ ꓫꓬꓹ ꓠ ꓗˍ ꓡꓳ=ꓞ ꓞ ꓙꓰ ꓠꓲꓹ ꓫꓵˍ ꓠꓬ ꓕꓲꓽ ꓣꓳ ꓔꓵꓸꓼ ꓙꓰ= ꓶꓽ ꓤ ꓗꓪ ꓙꓰ ꓠꓲꓹ ꓫꓵˍ ꓠꓬ ꓞꓳ ꓜꓴꓻ ꓐꓰ ꓕꓲꓽ ꓪꓺꓽ ꓙꓰ= ꓪ ꓙꓲ ꓕꓷ ꓞ ꓢꓲ ꓬꓲꓸ ꓦꓬꓼ ꓠꓬꓲ ꓟꓶ ꓫꓵꓺ ꓡꓰˍ ꓗꓪ ꓛꓲ ꓕꓷ ꓞˍ ꓟ ꓢꓲꓺ ꓡꓲꓺˍ ꓟ ꓔꓯ ꓟꓶ ꓠꓲꓹ ꓫꓵˍ ꓠꓬ ꓞꓳ ꓜꓴꓻ ꓐꓰ ꓕꓲꓽ ꓪꓺꓽ ꓬꓰ ꓗꓴꓸ ꓠꓹ ꓟ ꓢꓯꓼ ꓕꓵꓼ ꓙꓰ=

ꓞꓳ ꓪꓴꓽ ꓞꓳ ꓔꓲꓺ ꓐꓴ ꓔꓬꓹ ꓗꓪ ꓐꓰ ꓚꓴꓽ ꓬꓲꓸ ꓓꓰꓽ=ꓬꓲ ꓪ ꓐꓴ ꓠꓬ ꓣꓳꓽ ꓐꓱ ꓶ ꓬꓲꓻ ꓙꓬꓻ ꓚꓰꓺ ꓡꓰ ꓐꓰ ꓫꓸ ꓙꓵ ꓓꓴ ꓔꓳꓹ ꓜꓳꓽˍ ꓟ ꓗꓪ ꓢꓯꓸ ꓔꓬꓹ ꓠꓹ ꓟ ꓚꓴꓽ ꓬꓲꓸ ꓖꓶꓽ ꓐ ꓡꓹ ꓡꓳ= ꓬꓲ ꓪ ꓟꓽ ꓫꓵꓺ ꓕꓯ ꓡꓰ ꓬꓲ ꓪ ꓔꓯ ꓙꓳꓺ ꓒꓵꓽ ꓢꓲ ꓬꓲꓸ ꓪ ꓐꓴ ꓗꓪ ꓐꓰ ꓢꓷꓸ ꓠꓲꓹ ꓔꓯ ꓢꓳꓻ ꓣꓴ ꓠꓯˍ ꓡꓳ=

ꓠꓬꓲꓽ ꓢ ꓫꓵꓸ ꓠꓲꓹ ꓟ ꓡꓰ ꓠꓵ ꓠꓲꓹ ꓔꓯ ꓫꓬꓹ ꓟ꓾ ꓟꓲ ꓠꓯ ꓔꓯ ꓚꓬꓴꓸ ꓙˍ ꓟ꓾ ꓕꓲꓽ ꓦꓲ ꓡ ꓞꓳ ꓐꓴ꓾ ꓞꓳ ꓫꓵꓽ ꓐꓴ꓾ ꓗꓴꓷꓼ ꓗꓪ ꓟ ꓞꓳ ꓤ ꓮꓽ ꓙꓵꓽ ꓠꓬ ꓕꓲꓽ ꓠꓲꓹ ꓕꓲꓽ ꓪꓺꓽ ꓐꓰ ꓫꓬꓹ ꓔꓶꓻ ꓠ ꓗˍ ꓡꓳ=

ꓪꓴ-ꓢ ꓬꓲꓸ ꓠꓵ ꓠꓲꓹ ꓔꓯ ꓘꓳꓹ ꓣꓴ ꓢꓲ꓾ ꓢꓲꓺ ꓡꓲꓺˍ ꓟ ꓙ ꓖꓴ ꓠꓯꓸꓼ ꓗꓪ ꓠꓲꓹ ꓒꓴ ꓒꓴˍ ꓐꓰ ꓞꓳ ꓫꓱꓽ ꓠꓹ ꓟ Mozambique ꓗꓴꓷꓼ ꓗꓪ ꓟ ꓞꓳ ꓡꓱꓻ ꓐꓴ ꓔꓯ ꓔꓲꓺ ꓒꓽ ꓪꓺ ꓔꓲ ꓝꓣꓮꓠꓚꓲꓢ ꓡꓰ ꓢꓯꓽ ꓖꓶꓽ ꓕꓵꓼ ꓪꓽ ꓖꓶꓽ ꓗꓷꓳ=

Credit to Vatican News

https://bit.ly/2IFEUva

 

Add new comment

1 + 1 =

Please wait while the page is loading