ꓣꓳ ꓢꓯꓸ ꓔꓬ ꓟ ꓤꓶꓻ ꓙꓻ ꓫꓱꓽ_ ꓟ ꓤꓶꓻ ꓗꓪ ꓕꓲ ꓣꓳ ꓕꓵꓼ ꓡꓰ ꓟꓽ ꓥ꓾

 ꓣꓳ ꓢꓯꓸ ꓔꓬ ꓟ ꓤꓶꓻ ꓙꓻ ꓫꓱꓽ_ ꓟ ꓤꓶꓻ ꓗꓪ ꓕꓲ ꓣꓳ ꓕꓵꓼ ꓡꓰ ꓟꓽ ꓥ꓾

ꓟ-ꓕꓲ 16ꓽ 13-20 ꓗꓪ “ꓡ-ꓞꓳ-ꓮ-ꓐꓲ ꓥꓪ ꓮꓽ ꓟ ꓥ ꓟ ꓔꓯ ꓢꓴ ꓮ ꓡꓲ ꓐꓯ_ ꓡ?” ꓐꓰ ꓬꓰ-ꓢꓴ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓠ ꓠꓬꓲ_ ꓡꓳ= ꓖꓳ ꓟ ꓡꓰ ꓐꓰ ꓣꓳ ꓚꓲꓸ ꓛꓬ ꓥ ꓟꓲ ꓠ ꓠꓬꓲ ꓓꓴ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ St. Peter ꓪꓽ ꓘꓴ ꓦꓲꓻ ꓓꓽ Angelus ꓪꓽ ꓘꓴ ꓙꓵꓹ ꓕꓯ ꓜꓲꓼ ꓡ ꓢꓴ ꓐꓴ ꓐꓯ ꓔ ꓡꓳ=

ꓢꓲ ꓒ ꓬꓰ-ꓢꓴ ꓠꓬ “ꓙꓲ ꓡꓳꓹ ꓬꓰ ꓢꓴ ꓟꓸ ꓒꓽ꓾ ꓙꓲ ꓡꓳꓹ ꓬꓰ ꓢꓴ ꓡ ꓞꓳ꓾ ꓔꓱꓹ ꓞꓳ ꓢꓴ꓾ ꓢꓯꓼ ꓙꓳ ꓢꓴ” ꓐꓰ ꓥ ꓡꓳ꓾ ꓬꓲꓸ ꓠꓬ ꓠꓬꓲꓸ ꓠꓬꓲ ꓣꓳ ꓐꓱ ꓶ ꓕꓱ ꓗꓪ ꓔꓬ ꓟ ꓥꓳ꓾ ꓣꓳ ꓐꓰ ꓠꓶꓽ ꓞꓹ ꓢꓲ ꓔꓬ ꓟ ꓪꓴ-ꓢ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓙꓲ ꓢꓴ ꓠꓬ ꓡꓳꓹ ꓬꓰ ꓟ ꓗꓪ ꓣꓳ ꓓꓵꓽ ꓙ ꓚꓵꓸ ꓔ ꓟ ꓗꓪ ꓐꓰ ꓟꓽ ꓥ꓾ ꓬꓲꓸ ꓠꓬ ꓠꓬꓲꓸ ꓠꓬꓲ ꓣꓳ ꓐꓰ ꓔꓬ ꓟ ꓪꓴ-ꓢ ꓥ ꓡꓳ ꓐꓰ ꓐꓯ ꓔ ꓡꓳ=

ꓢꓲ ꓒꓽ ꓬꓰ-ꓢꓴ ꓠꓬ ꓢꓯꓸ ꓔꓬ ꓢꓲ꓾ ꓣꓳ ꓒ ꓕꓲ ꓗꓪ ꓣꓳ ꓐꓰ ꓔꓬ ꓟ ꓥꓳ= ꓣꓳ ꓐꓰ ꓮ ꓕꓯ ꓟꓲ ꓔꓬ ꓢꓲ꓾ ꓣꓳ ꓢꓯꓸ ꓔꓬ ꓟ ꓤꓶꓻ꓾ ꓙꓻ ꓫꓱꓽ_ ꓟ ꓚꓱꓹ ꓗꓪ ꓬꓲꓸ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ ꓶꓼ ꓤ ꓫꓱꓸ ꓤ ꓠꓬ ꓣꓳ ꓠꓯꓼ ꓗꓪ ꓠꓬꓲ ꓟꓳ ꓓꓴ ꓡꓯꓽ ꓖꓶ_ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= “ꓬꓲꓸ ꓠꓬ ꓐꓲ ꓞꓲꓼ ꓟ ꓙ ꓜꓲꓼ ꓠꓲꓹ ꓢꓷꓸ ꓠꓲꓹ ꓐꓰ ꓙꓻ ꓖꓴ ꓧꓳꓽ ꓟꓳꓸ ꓖꓶ ꓢꓴ ꓥ ꓡꓳ꓾ ꓬꓲꓸ ꓠꓬ ꓫꓸ ꓔ ꓟ ꓚꓱꓹ ꓗꓪ ꓐꓰ ꓣꓳ ꓔꓯ ꓬꓰ ꓙ ꓡꓳꓸ ꓙ ꓧꓳꓽ ꓟꓳ ꓖꓶ ꓟ ꓔꓯ ꓬꓲ ꓠꓲꓹ ꓒꓴ ꓗꓹ ꓛꓲ ꓡꓳ=”

ꓙꓲ ꓢꓴ ꓢꓲ ꓤ ꓐꓴ ꓐꓱ ꓶ ꓠꓬ ꓣꓳ ꓢꓯꓸ ꓔꓬ ꓙ ꓫꓱꓽ_ ꓟ ꓗꓪ ꓮ ꓕꓯ ꓟꓲ ꓕꓲꓽ ꓣꓳ ꓕꓵꓼ ꓡꓰ ꓟꓽ ꓥ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓝꓮꓲ ꓬꓰ-ꓢꓴ ꓠꓬ ꓢꓲ ꓫꓬ ꓢꓴ ꓒꓲ-ꓕꓱ ꓐꓰ ꓬꓲꓸ ꓛꓳꓽ ꓒꓯꓹ ꓐꓴ ꓐꓰ ꓕꓲ ꓪꓼ ꓪꓴ-ꓢ ꓟꓬꓱꓽ ꓬꓰ ꓡꓳꓹ ꓡꓰ ꓟ ꓡꓰ ꓐꓰ ꓠꓬꓲꓸ ꓠꓬꓲ ꓥ ꓟꓲ ꓣꓳ ꓐꓰ ꓔꓬ ꓢꓲ꓾ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓬꓰ ꓙ ꓔ ꓙ ꓖꓶ ꓟ ꓔꓯ ꓐꓯ ꓔ ꓡꓳ=

ꓠꓬꓲꓸ ꓠꓬꓲ ꓪꓴ-ꓢ ꓶꓼ ꓓꓳꓽ ꓫꓱꓸ ꓓꓳꓽ ꓗꓪ ꓥ ꓟꓲ ꓒꓲ-ꓕꓱ ꓠꓬ ꓬꓲꓸ ꓚꓱꓹ ꓮ ꓙꓵ ꓢꓷꓸ ꓔ ꓢꓲ꓾ “ꓙꓲ ꓢꓴ ꓐꓰ ꓥ ꓟ ꓪꓴ-ꓢ ꓬꓲꓸ ꓤ ꓔꓲꓸ” ꓢꓲ ꓒꓽ ꓬꓰ-ꓢꓴ ꓠꓯꓼ ꓗꓪ ꓶꓼ ꓤ ꓫꓱꓸ ꓤ ꓗꓪ ꓐꓰ ꓚꓲꓸ ꓟꓶ ꓪ ꓟ ꓡꓳꓹ ꓬꓰ ꓟ ꓙꓵꓹ ꓗꓪ ꓡꓰ ꓐꓰ ꓟꓽ ꓥ꓾ ꓙꓲ ꓢꓴ ꓐꓯ_ ꓟ ꓚꓬꓴ ꓙ ꓢꓴ ꓟꓰꓢꓢꓲꓮꓧ ꓥ ꓡꓳ꓾ ꓢꓯꓸ ꓔꓬ ꓟ ꓪꓴ-ꓢ ꓬꓲꓸ ꓤ ꓔꓲꓸ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓚꓰꓼ ꓢꓲ꓾ ꓣꓳ ꓢꓯꓸ ꓔꓬ ꓙ ꓫꓱꓽ_ ꓟ ꓤꓶꓻ ꓗꓪ ꓡꓳꓸ ꓙ ꓐꓳ ꓙ ꓖꓶ_ ꓟ ꓡꓰ ꓐꓰ ꓟꓲ ꓠꓯ ꓡ ꓞꓳ ꓝꓴꓲ ꓔꓯ ꓬꓲ ꓫꓸ ꓙꓵ ꓢꓲ꓾ ꓘꓳꓹ ꓣꓴ ꓠꓹ ꓟ ꓬꓯꓼ ꓡ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓐꓰ ꓕꓲ ꓪ ꓔꓬ ꓠꓬ ꓣꓳ ꓠꓯꓼ ꓗꓪ ꓟꓽ ꓒꓬꓱꓼ ꓐ ꓡ ꓫꓵ ꓮ ꓫꓵ ꓟꓲ ꓟꓽ ꓙꓳ꓾

ꓔꓲꓺ ꓒ ꓪ ꓔꓲ ꓡꓰ “ꓙꓲ ꓢꓴ ꓢꓲ ꓤ ꓐꓴ ꓙꓻ ꓫꓱꓽ ꓟ ꓤꓶꓻ ꓗꓪ ꓮ ꓘꓶꓸ ꓟꓴ_ ꓟ ꓪꓽ ꓚꓲ ꓡꓰ ꓐꓰ ꓫꓸ ꓓꓴ ꓐꓰ ꓐꓲ ꓞꓹ ꓟ ꓥꓳ” ꓖ ꓕꓯ ꓣꓳ ꓑ ꓕꓲ ꓗꓪ ꓣꓳ ꓐꓰ ꓕꓲ ꓪꓼ ꓙ ꓫꓱꓽ ꓔꓬ ꓟ ꓢꓲ ꓒ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓓꓴ ꓬꓰ ꓡꓯ꓾ ꓬꓲꓸ ꓠꓬ ꓣꓳ ꓔꓳꓹ ꓜꓳ ꓔꓬ ꓟ ꓫꓸ ꓓꓴ ꓔꓯ ꓬꓲꓸ ꓡꓯ ꓒꓶ ꓗꓪ ꓑꓱꓸ ꓙ ꓖꓶ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓬꓲ ꓐꓰ ꓕꓲ ꓪꓼ ꓔꓬ ꓟ ꓡꓰ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓥ ꓟꓲ ꓬꓰ ꓙ ꓔꓳꓹ ꓙ ꓡꓯꓼ ꓘꓳ ꓢꓲ꓾ ꓣꓳ ꓙꓵꓻ ꓠꓲꓹ ꓚꓱꓹ ꓗꓪ ꓥ ꓟꓲ ꓟꓬ ꓠꓬꓲ ꓢꓯꓼ ꓕꓵꓼ ꓠꓹ ꓟ ꓥꓳ꓾ ꓬꓰ-ꓢꓴ ꓐꓰ ꓕꓲ ꓪꓼ ꓥ ꓠꓬ ꓣꓳ ꓟꓽ ꓒꓬꓱꓼ ꓡ ꓐꓰ ꓓꓵꓽ ꓙ ꓔ ꓟ ꓮ ꓙꓵꓽ ꓒꓬꓱꓼ ꓐ ꓡ ꓥꓳ꓾

ꓬꓲꓸ ꓟꓶꓽ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ-ꓢ ꓠꓯꓼ ꓗꓪ ꓙꓵꓻ ꓠꓲꓹ ꓟꓬ ꓠꓬꓲ ꓢꓯꓼ ꓕꓵꓼ ꓠꓹ ꓟ꓾ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓐꓰ ꓢꓮꓗꓣꓮꓟꓰꓠ ꓶꓼ ꓤ ꓫꓱꓸ ꓤ ꓘꓳꓹ ꓣꓴ ꓟꓶ ꓢꓴ ꓮ ꓙꓵ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓝꓮꓲ ꓫꓬꓹ ꓔꓱ ꓢꓲ꓾ ꓣꓳ ꓐꓰ ꓠꓶꓽ ꓞꓹ ꓟ ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵ ꓐꓰ ꓢꓲ ꓡꓲꓹ ꓗꓹ ꓛꓲ ꓛꓲ ꓐꓰ ꓔꓬ ꓢꓲ꓾ ꓪꓴ-ꓢ ꓡꓰ ꓧꓳꓽ ꓟꓳꓸ ꓖꓶ_ ꓟ ꓚꓱꓹ ꓔꓯ ꓣꓳ ꓛꓳ ꓢꓲ ꓢꓯꓸ ꓔꓬ ꓙꓻ ꓫꓱꓽ ꓠꓹ ꓟ ꓐꓱ ꓶ ꓐꓯ ꓔ ꓡꓳ=