ꓪꓴ-ꓢ ꓠꓬ ꓣꓳ ꓔꓯ ꓝꓴꓲ ꓗꓪ ꓐꓰ ꓡꓲꓹ ꓙꓰ ꓡꓰ ꓝꓲ ꓟ ꓐꓰ ꓚꓬꓴ ꓙ ꓟ ꓥꓳ꓾

ꓪꓴ-ꓢ ꓠꓬ ꓣꓳ ꓔꓯ ꓝꓴꓲ ꓗꓪ ꓐꓰ ꓡꓲꓹ ꓙꓰ ꓡꓰ ꓝꓲ ꓟ ꓐꓰ ꓚꓬꓴ ꓙ ꓟ ꓥꓳ꓾

ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓠꓽ ꓦꓬꓼ ꓠꓬꓲ ꓟꓲ-ꓢ ꓪꓽ ꓘꓴ ꓙꓵꓹ ꓕꓯ ꓪꓴ-ꓢ ꓠꓬ ꓣꓳ ꓔꓯ ꓮ ꓘꓶꓸ ꓠꓲꓹ ꓠꓵ_ ꓟ ꓑꓶ ꓓꓴ ꓝꓴꓲ ꓓꓰ ꓝꓲ_ ꓟ ꓟꓽ ꓬꓰ꓾ ꓬꓲ ꓠꓬ ꓣꓳ ꓔꓯ ꓕꓲ ꓣꓳ ꓡꓲ ꓟꓽ ꓒꓰꓹ ꓡꓰ ꓝꓲ ꓝꓲ ꓚꓬꓴ ꓙ ꓠꓹ ꓟ ꓡꓰ ꓓꓵꓽ ꓙ_ ꓡꓳ=

ꓣꓳ ꓠꓬ ꓝꓴꓲ ꓑꓶ ꓓꓴ ꓟꓽ ꓥ ꓠꓬ ꓥꓳꓽ ꓡꓰ ꓟ ꓑꓶ ꓓꓴ ꓠꓲꓹ ꓟ ꓣꓳꓺ ꓔꓬ ꓟ ꓠꓲꓹ ꓟ ꓐꓬ ꓔꓬ ꓟ ꓙꓳ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓐꓱ ꓶ ꓠꓲꓹ ꓟ ꓗꓳꓸ ꓖꓶ ꓢꓲ꓾ ꓚꓬꓴ ꓙ ꓠꓹ ꓟ ꓮ ꓕꓯ ꓟꓲ ꓔꓬ ꓟ ꓥꓳ= ꓔꓲꓺ ꓒ ꓪ ꓔꓲ ꓡꓰ ꓖꓳ ꓕꓲ ꓫꓵ ꓠꓽ ꓢꓲ ꓬ ꓕꓳ ꓶ ꓬꓳ-ꓦ ꓕꓳ ꓶ ꓗꓪ ꓐꓰ ꓠꓲ-ꓗꓳ-ꓓꓲ-ꓟꓴ ꓚꓱꓹ ꓔꓯ ꓟꓳꓸ ꓔꓱꓹ ꓕ ꓖꓶ_ ꓡꓳ= ꓒ-ꓡꓲ-ꓢꓷ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓢꓷꓸ ꓡꓰ ꓓꓴ ꓔꓯ ꓟꓳ ꓡꓰ ꓢꓲ꓾ ꓬꓲ ꓠꓬ ꓪꓴ-ꓢ ꓗꓪ ꓐꓰ ꓡ ꓟ ꓟꓸ ꓒ ꓕꓲ ꓣꓳ ꓐꓰ ꓢꓷꓸ ꓔ ꓟ ꓚꓱꓹ ꓔꓯ ꓐꓯ ꓡꓳꓹ ꓬꓰ ꓟ ꓥꓳ= ꓖꓳ ꓟ ꓑꓶ ꓓꓴ ꓠꓲ-ꓗꓳ-ꓓꓲ-ꓟꓴ ꓠꓬ ꓬꓰ-ꓢꓴ ꓠꓯꓼ ꓗꓪ ꓡ ꓟ ꓔꓯ ꓠꓱꓸ ꓐꓯꓼ ꓢꓴ ꓟꓽ ꓢꓷꓸ ꓠꓹ ꓟ ꓐꓱ ꓶ ꓢ ꓘꓪ ꓕꓯ ꓙꓰ ꓢꓲ ꓜꓲ ꓬꓰ ꓟ ꓚꓱꓹ ꓥ ꓡꓳ= ꓪꓴ-ꓢ ꓠꓬ ꓬꓲ ꓔꓯ ꓘꓳꓹ ꓣꓴ ꓢꓲ ꓬꓲ ꓐꓰ ꓫꓸ ꓕꓱ ꓢꓲ ꓬꓲ ꓠꓬ ꓣꓳ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓡ ꓟ ꓟꓽ ꓥ ꓐꓰ ꓣꓳ ꓔꓯ ꓚꓬꓴ ꓙ ꓠꓹ ꓟ ꓐꓱ ꓶ ꓡ ꓟ ꓥ ꓡꓳ꓾ ꓐꓰ ꓐꓯ ꓖꓶ_ ꓟ ꓥꓳ=

ꓔꓲꓺ ꓒ ꓪ ꓔꓲ ꓡꓰ “ ꓣꓳ ꓠꓬ ꓕꓱ ꓟ ꓔꓯ ꓕꓲ ꓑꓹ ꓤ ꓓꓵꓽ ꓙ ꓓꓴ ꓬꓰ ꓡꓯ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓐꓯ ꓟꓴ ꓘꓶꓽ ꓠꓹ ꓟ ꓐꓱ ꓶ ꓟꓽ ꓥ ꓾ ꓚꓬꓴ ꓙ ꓠꓹ ꓟ ꓐꓱ ꓶ ꓡ ꓟ ꓥ ꓡꓳ꓾” ꓣꓳ ꓮ ꓙꓵ ꓠꓬ ꓐꓲ ꓜꓲꓼ ꓡꓰ ꓫꓵ ꓟꓽ ꓙꓳ꓾ ꓖꓳ ꓟ ꓑꓶ ꓓꓴ ꓣꓳ ꓠꓬ “ ꓝꓴꓲ ꓙꓳ ꓢꓴ ꓡꓰ ꓥꓳ꓾” ꓖꓳ ꓡꓱ ꓥ ꓟꓲ  ꓪꓴ-ꓢ ꓐꓰ ꓣꓳ ꓠꓵ ꓠꓲꓹ ꓚꓱꓹ ꓠꓬꓲ ꓗꓳꓸ ꓚ ꓗꓪ ꓮ ꓫꓵ ꓐꓰ ꓟꓲ ꓐꓬ ꓡꓰ ꓝꓲ ꓟꓽ ꓓ꓾ ꓪꓴ-ꓢ ꓟꓲ ꓙꓬ ꓗꓪ ꓣꓳ ꓠꓬ ꓮ ꓫꓵ ꓔꓯ ꓡꓲ ꓘꓳ ꓫꓱꓸ ꓫꓱꓸ ꓬꓰ_ ꓟ ꓾ ꓐꓲꓸ ꓞꓹ ꓢꓲ ꓬꓰ ꓟꓽ ꓛꓵ ꓟ ꓐꓰ ꓬꓲ ꓠꓬ ꓣꓳ ꓔꓯ ꓝꓴꓲ ꓡꓰ ꓓꓰ_ ꓟ ꓟꓽ ꓬꓰ ꓬꓰ꓾ ꓚꓬꓴ ꓙ ꓠꓹ ꓟ ꓡꓰ ꓬꓰ_ ꓟ ꓔꓯ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓫꓸ ꓠꓹ ꓟ ꓐꓱ ꓶ ꓕꓲ ꓣꓳ ꓡꓲ ꓕꓲ ꓣꓳ ꓞꓳꓸ ꓡꓰ ꓢꓲ ꓟꓶꓽ ꓡꓰ ꓠꓹ ꓟ ꓔꓯ ꓟꓽ ꓠꓲꓹ ꓫꓵ ꓟ ꓔꓯ ꓐꓯ ꓔ ꓡꓳ=

ꓣꓳ ꓠꓬ ꓠꓱꓸ ꓐꓯꓼ ꓢꓴ ꓔꓯ ꓮ ꓟꓬꓹ ꓧꓪꓹ ꓝꓴꓲ ꓡꓰ ꓐꓯ ꓟ꓾ ꓢꓴ ꓚꓱꓹ ꓡꓰ ꓐꓯ_ ꓟ ꓙꓳ ꓡꓰ ꓥ ꓟꓲ ꓣꓳ ꓢꓯꓸ ꓔꓬ ꓙꓻ ꓫꓱꓽ_ ꓟ ꓤꓶꓻ ꓗꓪ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓠꓵ ꓠꓲꓹ ꓟꓸ ꓖꓶ ꓟ ꓡꓰ ꓐꓰ ꓣꓳ ꓥ ꓟꓲ ꓠꓱꓸ ꓐꓯꓼ ꓢꓴ ꓔꓯ ꓠꓵ ꓠꓲꓹ ꓐꓰ ꓙꓻ ꓡꓯꓽ ꓘꓳ ꓐ ꓡ ꓠꓹ ꓟ ꓐꓱ ꓶ ꓪꓴ-ꓢ ꓠꓯꓼ ꓗꓪ ꓪꓽ ꓘꓴ ꓠꓹ ꓟ ꓔꓯ ꓢꓯꓼ ꓖꓶ ꓔ ꓡꓳ=

ꓪꓴ-ꓢ ꓠꓬ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓔꓯ ꓡꓳꓸ ꓠꓬꓲ ꓔꓬ ꓟ ꓥ ꓡꓳ꓾ ꓕꓱ ꓟ ꓠꓬ ꓣꓳ ꓔꓯ ꓫꓸ ꓡꓰ ꓝꓲ ꓐꓰ ꓟꓽ ꓥ꓾ ꓬꓲ ꓠꓬ ꓣꓳ ꓐꓱ ꓶ ꓠꓬꓲ ꓟꓳ ꓓꓴ ꓡꓯ ꓖꓶ ꓢꓲ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓙꓲ_ ꓟ ꓚꓱꓹ ꓐꓰ ꓟꓽ ꓙꓲ_ ꓟ ꓔꓯ ꓢꓷꓸ ꓡꓰ ꓝꓲ_ ꓟ ꓐꓰ ꓬꓲ ꓶꓼ ꓤ ꓫꓱꓸ ꓤ ꓗꓪ ꓐꓰ ꓣꓳ ꓠꓬ ꓒꓳꓹ ꓡꓶꓸ ꓡꓰ ꓝꓲ_ ꓟ ꓚꓱꓹ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓠꓱꓸ ꓐꓯꓼ ꓛꓳ ꓒꓯꓹ ꓔꓯ ꓥ ꓟꓲ ꓠꓲꓹ ꓠꓵ ꓠꓹ ꓟ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓢꓲ ꓙꓻ ꓡꓯꓽ ꓘꓳ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓪꓽ ꓘꓴ ꓙ ꓢꓲ ꓬꓲꓸ ꓟꓶꓽ ꓢꓰꓼ ꓗꓷ ꓟ ꓥꓳ=