ꓪꓴ-ꓢ ꓠꓬ ꓵ ꓖꓴ ꓟꓽ ꓓ ꓠ ꓗꓪ ꓛꓲ ꓣꓳ ꓔꓯ ꓖꓽ ꓖꓶ_ ꓡꓳ꓾

ꓪꓴ-ꓢ ꓠꓬ ꓵ ꓖꓴ ꓟꓽ ꓓ ꓠ ꓗꓪ ꓛꓲ ꓣꓳ ꓔꓯ ꓖꓽ ꓖꓶ_ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓐꓰ ꓫꓱꓸ ꓤ ꓠꓲꓹ ꓐꓰ ꓛꓬ ꓢꓴ ꓔꓯ ꓖꓽ ꓖꓶ ꓖꓶ ꓠꓹ ꓟ ꓐꓯ ꓔ ꓡꓳ= 

ꓠꓽ ꓫꓵ ꓠꓬꓲ ꓕꓯ ꓢꓲ ꓫꓬ ꓢꓴ ꓒꓲ-ꓕꓱ ꓪꓽ ꓘꓴ ꓦꓲꓻ ꓓꓽ Angelus ꓪꓽ ꓘꓴ ꓙꓵꓹ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓶꓼ ꓓꓳ ꓫꓱꓹ ꓓꓳ ꓗꓪ ꓐꓰ ꓛꓬ ꓢꓴ ꓔꓯ ꓖꓽ ꓖꓶ ꓠꓯꓹ ꓟ ꓐꓰ ꓔꓱꓹ ꓕ ꓖꓶ_ ꓡꓳ=

ꓟ-ꓕꓲ 18ꓽ 21 ꓗꓪ ꓒꓲ-ꓕꓱ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓢꓲ ꓒꓽꓳ꓾ ꓥꓪ ꓬꓲꓼ ꓥꓪ ꓠꓬꓲ ꓡꓰ ꓥꓪ ꓔꓯ ꓛꓬ ꓡ ꓠꓬ꓾ ꓥꓪ ꓬꓲ ꓔꓯ ꓮ ꓟꓬ ꓧꓪꓹ ꓖꓽ ꓖꓶ ꓠꓯꓹ ꓡ? ꓫꓵꓽ ꓧꓪꓹ ꓛꓲ ꓖꓽ ꓖꓶ ꓗꓷ ꓠꓬ ꓡꓳꓼ_ ꓥꓳ ꓪ? ꓐꓰ ꓠ ꓠꓬꓲ_ ꓡꓳ= ꓬꓰ-ꓢꓴ ꓡꓰ ꓠꓴ ꓔꓯ ꓥꓪ ꓫꓵꓽ ꓧꓪꓹ_ ꓡꓰ ꓟꓽ ꓐꓯ꓾ ꓫꓵꓽ ꓧꓪꓹ ꓟ ꓫꓵꓽ ꓞꓲ ꓧꓪꓹ_ ꓟꓲ ꓖꓽ ꓖꓶ꓾ ꓐꓰ ꓐꓯ ꓔ ꓟ ꓥꓳ꓾

ꓢꓲ ꓒꓽ ꓬꓰ-ꓢꓴ ꓡꓰ ꓬꓲ ꓔꓯ ꓐꓯ ꓟ ꓠꓬ꓾ ꓠꓴ ꓖꓽ ꓖꓶ_ ꓕꓯ ꓟꓽ ꓵ ꓵ ꓖꓽ ꓖꓶ ꓠꓯꓹ ꓟ꓾ ꓕꓱ ꓟ ꓠꓬ ꓮ ꓙꓵ ꓔꓯ ꓖꓽ ꓖꓶ꓾ ꓮ ꓕꓯ ꓟꓲ ꓖꓽ ꓖꓶ ꓐꓰ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓵ ꓖꓴ ꓟꓽ ꓓ ꓠ ꓗꓪ ꓛꓲ ꓖꓽ ꓖꓶ_ ꓟ ꓥꓳ= ꓪꓴ-ꓢ ꓠꓬ ꓠꓵ ꓠꓲꓹ ꓐꓰ ꓫꓱꓸ ꓤ ꓠꓲꓹ ꓐꓰ ꓬꓰ ꓖꓶ_ ꓟ ꓥ ꓡꓳ꓾ ꓣꓳ ꓠꓬ ꓬꓲ ꓔꓯ ꓝꓮꓲ ꓬꓲ ꓡꓰ ꓐꓰ ꓖꓶ ꓟꓽ ꓐ ꓡ ꓖꓳ ꓡꓱ ꓥ ꓟꓲ ꓣꓳ ꓬꓲꓼ ꓠꓬꓲ ꓤ ꓐꓴ ꓔꓯ ꓖꓽ ꓖꓶ ꓠꓲꓹ ꓐꓰ ꓬꓲ ꓔꓯ ꓔꓯꓺ ꓢꓳ ꓠꓹ ꓟ ꓥꓳ꓾ ꓐ ꓡ ꓟꓬ ꓛꓲ ꓛꓬ ꓢꓴ ꓔꓯ ꓖꓽ ꓖꓶ ꓠꓹ ꓟ ꓥꓳ= ꓕꓱ ꓟ ꓠꓬ ꓣꓳ ꓙꓲ ꓢꓴ ꓢꓲ ꓤ ꓐꓴ ꓐꓱ ꓶ ꓮ ꓘꓶꓸ ꓣꓳꓸ ꓚꓵ ꓓꓰ ꓡꓰ_ ꓟ ꓚꓱꓹ ꓥ ꓡꓳ꓾ ꓪꓴ-ꓢ ꓠꓬ ꓣꓳ ꓐꓱ ꓶ ꓬꓲꓸ ꓢꓯꓼ ꓟꓬ ꓖꓶ ꓗꓷ ꓟ ꓥꓳ꓾ ꓪꓴꓽ ꓓꓰ ꓡꓰ_ ꓟ ꓬꓲꓸ ꓫꓱꓸ ꓤ ꓠꓲꓹ ꓕꓱ ꓟ ꓔꓯ ꓣꓳ ꓬꓲꓸ ꓒꓵꓽ ꓖꓶ ꓟꓽ ꓐ ꓡ꓾

ꓖꓳ ꓟ ꓑꓶ ꓓꓴ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓝꓴꓲ ꓖꓽ ꓖꓶ ꓡꓯꓼ ꓘꓳ ꓢꓲ꓾ ꓢꓯꓸ ꓔꓬ ꓟ ꓤꓶꓻ ꓗꓪ ꓙꓲ_ ꓟ ꓬꓲꓸ ꓫꓵꓸ ꓫꓵꓸ ꓢꓲ ꓪꓴ-ꓢ ꓬꓲꓸ ꓫꓱꓸ ꓤ ꓠꓲꓹ ꓕꓱ ꓟ ꓔꓯ ꓢꓷꓸ ꓙ ꓟꓳ ꓙ ꓠꓹ ꓟ ꓥꓳ꓾ ꓕꓱ ꓟ ꓠꓬ ꓝꓴꓲ ꓖꓽ ꓖꓶ ꓟ ꓗꓪ ꓥꓳ ꓡꓳꓸ ꓓꓴ ꓟꓽ ꓙꓳ꓾ ꓟꓽ ꓖꓽ ꓖꓶ ꓠꓬ ꓢꓲ ꓡꓲꓹ ꓗꓹ ꓛꓲ ꓓꓴ ꓥ ꓟꓲ ꓟꓽ ꓙꓳ꓾ ꓐꓰ ꓐꓯ ꓔ ꓡꓳ= ꓝꓴꓲ ꓖꓽ ꓖꓶ_ ꓟ ꓠꓬ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓜꓳ ꓟ ꓗꓪ ꓐꓰ ꓟꓽ ꓢꓲ ꓫꓬ ꓟ ꓟꓲꓽ ꓦꓲꓻ ꓔꓯ ꓝꓮꓲ ꓫꓬ ꓡꓰ ꓓꓴ ꓬꓰ ꓖꓶ_ ꓟ ꓳꓫꓬꓖꓰꓠ ꓟꓲꓽ ꓦꓲꓻ ꓡꓰ ꓐꓰ ꓥꓳ꓾ ꓞꓳ ꓜꓴ ꓗꓪ ꓥ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓜꓳ ꓡꓯ ꓘꓳ ꓠꓲꓹ ꓦꓶ ꓡꓯꓼ ꓘꓳ ꓢꓲ꓾ ꓟꓽ ꓢꓲ ꓫꓬ ꓟ ꓔꓯ ꓫꓬ ꓓ ꓡꓰ ꓠꓹ ꓟ ꓬꓰ ꓖꓶ_ ꓟ ꓚꓱꓹ ꓥ ꓡꓳ꓾

ꓔꓲꓺ ꓒ ꓪ ꓔꓲ ꓡꓰ ꓣꓳ ꓚꓲꓸ ꓛꓬ ꓠ ꓠꓬꓲ ꓔꓱꓹ ꓕ ꓠꓹ ꓟ ꓐꓯ ꓔ ꓡꓳ= ꓪꓴ-ꓢ ꓗꓪ ꓐꓰ ꓪꓴꓽ ꓓꓰ ꓡꓰ_ ꓟ ꓖꓽ ꓖꓶ ꓟ ꓡꓯꓼ ꓫꓴꓻ ꓔꓯ ꓪ ꓟꓶ_ꓡꓳ ꓐꓰ ꓙꓵꓻ ꓡ? ꓣꓳ ꓛꓬ ꓥꓳꓽ ꓡꓰ ꓕꓯ ꓢꓴ ꓡꓰ ꓣꓳ ꓔꓯ ꓟꓽ ꓖꓽ ꓖꓶ ꓐ ꓡ ꓟ꓾ ꓣꓳ ꓚꓲ ꓛꓬ ꓥ ꓟꓲ ꓟꓽ ꓖꓽ ꓖꓶ ꓐ ꓡ ꓫꓵ ꓥ ꓟꓲ ꓪꓴ-ꓢ ꓡꓰ ꓣꓳ ꓔꓯ ꓖꓽ ꓖꓶ ꓡ ꓥꓳ ꓐꓰ ꓢꓷꓸ ꓟ ꓔꓯ ꓣꓳ ꓠꓲꓹ ꓡꓱ ꓗꓹ ꓛꓲ ꓡ? ꓐꓰ ꓥ ꓡꓳ꓾

ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓯꓼ ꓗꓪ ꓣꓳ ꓔꓯ ꓛꓬ ꓥꓳꓽ ꓡ ꓟ꓾ ꓣꓳ ꓔꓯ ꓠꓻ ꓡꓰ ꓝꓲ ꓢꓴ ꓔꓯ ꓓꓵꓽ ꓙ ꓢꓲ꓾ ꓬꓲ ꓪ ꓔꓯ ꓝꓴꓲ ꓖꓽ ꓖꓶ ꓖꓶ ꓠꓹ ꓟ ꓐꓱ ꓶ ꓢꓯꓼ ꓪ ꓡꓵꓽ ꓖꓶ ꓠꓹ ꓟ ꓪꓴ-ꓢ ꓠꓯꓼ ꓗꓪ ꓶꓽ ꓓꓰ ꓪꓽ ꓘꓴ ꓠꓹ ꓟ ꓥ ꓡꓳ꓾ ꓪꓴ-ꓢ ꓠꓵ ꓠꓲꓹ ꓗꓪ ꓐꓰ ꓖꓽ ꓖꓶ ꓓꓴ ꓬꓰ ꓡꓯ꓾ ꓕꓱ ꓟ ꓠꓬ ꓣꓳ ꓠꓲꓹ ꓟ ꓔꓯ ꓢꓲ ꓡꓲꓹ ꓗꓹ ꓛꓲ ꓡꓰ ꓝꓲ_ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ=