ꓪꓽ ꓘꓴ_ ꓟ ꓠꓬ ꓠꓲꓹ ꓟ ꓔꓯ ꓔꓱ ꓔꓱ_ ꓐꓰ ꓢꓷꓸ ꓠꓹ ꓟ ꓐꓱ ꓶ ꓮ ꓘꓶꓸ ꓣꓳꓸ ꓚꓵ_ ꓟ ꓥ ꓡꓳ꓾

• ꓪꓽ ꓘꓴ_ ꓟ ꓠꓬ ꓠꓲꓹ ꓟ ꓔꓯ ꓔꓱ ꓔꓱ_ ꓐꓰ ꓢꓷꓸ ꓠꓹ ꓟ ꓐꓱ ꓶ ꓮ ꓘꓶꓸ ꓣꓳꓸ ꓚꓵ_ ꓟ ꓥ ꓡꓳ꓾

9 ꓦ 28 ꓠꓬꓲ ꓠꓽ ꓢ ꓠꓬꓲ ꓡ ꓞꓳ ꓐꓴ ꓐꓰ ꓜꓲ ꓡꓯ ꓘꓳ_ ꓟ ꓙꓵꓹ ꓕꓯ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ_ ꓟ ꓠꓬ ꓠꓲꓹ ꓟ ꓔꓯ ꓔꓱ ꓔꓱ_ ꓐꓰ ꓢꓷꓸ ꓠꓹ ꓟ ꓐꓱ ꓶ ꓟꓽ ꓔꓬ ꓟꓽ ꓓ ꓟ ꓥ ꓡꓳ ꓐꓰ ꓐꓯ ꓔ ꓡꓳ=

ꓪꓴ-ꓢ ꓐꓰ ꓠꓶꓽ ꓞꓹ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓠꓲꓹ ꓟ ꓘꓴꓽ ꓗꓪ ꓐꓰ ꓪꓽ ꓘꓴ ꓠꓹ ꓟ ꓠꓬ ꓮ ꓘꓶꓸ ꓣꓳꓸ ꓚꓵ_ ꓟ ꓔꓯ ꓐꓯ ꓔ ꓟ ꓥꓳ= ꓪꓽ ꓘꓴ_ ꓕꓯ ꓠꓵ ꓠꓲꓹ ꓙꓳ ꓠꓹ ꓟ ꓥ ꓡꓳ=

ꓪꓽ ꓘꓴ_ ꓟ ꓗꓪ ꓐꓰ ꓣꓳ ꓓꓵꓽ ꓙ_ ꓟ ꓓꓰꓽ ꓢ ꓟꓬ ꓠꓬꓲ ꓶꓼ ꓤ ꓫꓱꓸ ꓤ ꓟꓶ_ ꓟ꓾ ꓪꓴ-ꓢ ꓐꓰ ꓠꓲꓹ ꓟ ꓘꓴꓽ ꓗꓪ ꓐꓰ ꓠꓶꓽ ꓞꓹ ꓡꓰ ꓝꓲ_ ꓟ ꓥꓳ= ꓢꓲ ꓫꓬ ꓢꓴ ꓐꓴ ꓙꓻ ꓫꓱ_ ꓟ ꓤꓶꓻ ꓗꓪ ꓮ ꓘꓶꓸ ꓣꓳꓸ ꓚꓵ_ ꓟ ꓠꓬ ꓪꓴ-ꓢ ꓐꓰ ꓠꓶꓽ ꓞꓹ ꓢꓲ ꓔꓬ ꓟ ꓥꓳ꓾ ꓬꓲ ꓔꓯ ꓙꓵꓻ ꓠꓲꓹ ꓪꓴꓽ_ ꓟ ꓥꓳ= ꓕꓱ ꓟ ꓚꓱꓹ ꓟꓬ ꓠꓬꓲ ꓙꓳ ꓡꓰ ꓠꓬ ꓪꓴ-ꓢ ꓔꓯ ꓟꓬ ꓠꓬꓲ ꓫꓱꓸ ꓖꓶ_ ꓟ ꓥ ꓡꓳ= 

ꓟꓲ ꓠꓯ ꓡ ꓞꓳ ꓥ ꓟ ꓪꓴꓸ ꓠꓬꓲ ꓠꓲꓹ ꓟ ꓠꓬꓲꓽ ꓫꓵꓽ ꓗꓷ_ ꓟ ꓙꓵꓹ ꓕꓯ ꓣꓳ ꓢꓲ_ ꓟ ꓮ ꓙꓵ ꓠꓬ ꓔꓱ_ ꓟ ꓡꓰ ꓟꓽ ꓥ꓾ ꓢꓲ ꓫꓬ ꓢꓴ ꓒꓳ-ꓡꓳ ꓡꓰ ꓐꓯ ꓔ ꓟ ꓗꓪ ꓣꓳ ꓬꓰ ꓠꓹ ꓟꓔꓯ ꓢꓷꓸ ꓥ ꓟꓲ ꓟꓽ ꓬꓰ ꓛꓱꓼ_ ꓟ ꓚꓱꓹ ꓥ ꓟꓲ ꓮ ꓟꓬꓹ ꓙꓳ_ ꓡꓳ꓾ ꓐꓰ ꓥ ꓡꓳ=

ꓪꓴ-ꓢ ꓠꓲꓹ ꓫꓵ_ ꓟ ꓡꓰ ꓐꓰ ꓮ ꓙꓵ ꓔꓯ ꓛꓳ ꓠꓹ ꓟ ꓠꓬ ꓣꓳ ꓐꓱ ꓶ ꓥ ꓟꓲ ꓟꓽ ꓢ ꓟ ꓥꓳ꓾ ꓢꓲ ꓫꓬ ꓢꓴ ꓟ-ꓘꓳ ꓕꓳ ꓶ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓯ ꓔ ꓟ ꓡꓰ ꓐꓰ ꓢ-ꓓꓯ ꓐꓰ ꓪꓴ-ꓢ ꓔꓯ ꓕꓽ ꓥꓳꓽ ꓡꓰ ꓝꓲ=

ꓟꓲ ꓠꓯ ꓒꓴ ꓫꓵꓺ ꓠꓲꓹ ꓥꓳꓽ ꓢꓴ ꓠꓬ ꓬꓰ-ꓢꓴ ꓔꓯ ꓘꓳꓹ ꓣꓴ ꓟꓽ ꓐ ꓡ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲ ꓠꓯꓼ ꓗꓪ ꓢ-ꓓꓯ ꓔꓬ ꓟ ꓑꓶ ꓓꓴ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ Francis ꓡꓰ ꓐꓯ ꓔ ꓡꓳ= ꓢꓲ ꓫꓬ ꓢꓴ ꓟ-ꓕꓲ ꓶꓼ ꓓꓳ ꓫꓱꓸ ꓓꓳ ꓗꓪ ꓥ ꓟꓲ ꓐꓳ ꓢ ꓔꓬ ꓢ ꓢꓴ ꓞꓳ ꓡꓱ ꓕꓲ ꓣꓳ ꓠꓬ ꓟꓲ ꓠꓯ ꓒꓴ ꓫꓵꓺ ꓔꓯ ꓠꓲꓹ ꓥꓳ_ ꓟ ꓑꓶ ꓓꓴ ꓬꓰ-ꓢꓴ ꓠꓯꓼ ꓗꓪ ꓛꓳ ꓠꓹ ꓟ ꓐꓱ ꓶ ꓘꓴ_ ꓕꓯ ꓠꓲꓹ ꓟꓽ ꓫꓵ ꓐꓰ ꓐꓯ ꓢꓲ ꓓꓳ ꓙꓰ_ ꓟ ꓥꓳ= ꓕꓱ ꓟ ꓠꓬ ꓪꓴ-ꓢ ꓐꓰ ꓶꓽ ꓡꓰ_ ꓟ ꓥ ꓡꓳ=

ꓪꓽ ꓘꓴ_ ꓟ ꓠꓬ ꓕꓱ ꓟꓽ ꓙꓲ_ ꓟ ꓚꓱꓹ ꓗꓪ ꓐꓰ ꓗꓳꓸ ꓙꓰ ꓠꓹ ꓟ꓾ ꓟꓶꓽ ꓡꓰ ꓠꓹ ꓟ꓾ ꓪꓴ-ꓢ ꓐꓰ ꓠꓶꓽ ꓞꓹ ꓡꓰ ꓝꓲ_ ꓟ ꓥꓳ=