ꓑ-ꓡ ꓟꓸ ꓟꓲꓽ {2} ꓕꓱ

ꓗ ꓠꓯꓸ ꓠꓯꓼ ꓕꓯ ꓑ-ꓡ ꓠꓬ ꓬꓲ ꓕꓳꓽ ꓡ ꓟꓴꓽ ꓔꓯ ꓜꓶꓽ ꓢꓲ ꓟꓳ-ꓮ-ꓐꓷ ꓞꓳ ꓪꓴꓽ ꓐꓴ ꓐꓰ ꓕꓲ ꓪ ꓛꓳ ꓙꓰˍ ꓡꓳ=  ꓚꓵ ꓚꓵ ꓑ-ꓡ ꓠꓬ ꓪ ꓔꓲ ꓡꓰ ꓖꓶ ꓡˍ ꓟ ꓡꓯꓼ ꓫꓴ ꓟꓶ ꓠꓲꓹ ꓫꓵˍ ꓠꓬꓲ ꓛꓳ ꓙꓰˍ ꓟ ꓥ ꓡꓳ= ꓑ-ꓡ ꓓꓵꓽ ꓙ ꓔꓬ ꓟ ꓔꓯ ꓪꓴ-ꓢ ꓢꓷꓸ ꓡꓰ ꓕꓯ ꓑ-ꓡ ꓙꓰˍ ꓟ ꓙ ꓖꓴ ꓗꓪ ꓪꓴ-ꓢ ꓠꓬ ꓬꓲ ꓝꓲ ꓓꓴ ꓔꓯ ꓮ ꓕꓽ ꓔꓯꓹ ꓢꓲ ꓙ ꓖꓴ ꓗꓪ ꓗꓽ ꓔ ꓝꓲˍ ꓡꓳ= ꓕꓳꓽ ꓡ ꓟꓴꓽ ꓠꓬ ꓪꓴ-ꓢ ꓬꓲ ꓝꓲ ꓓꓴ ꓔꓯ ꓟꓳꓻ ꓡꓰ ꓕꓯ ꓦ ꓟꓲ ꓙ ꓖꓴ ꓗꓪ ꓙꓰˍ ꓡꓳ= ꓖꓳ ꓡꓱ ꓠꓬꓲ ꓑ-ꓡ ꓠꓬ ꓙ ꓖꓴ ꓓꓽ ꓟ ꓗꓪ ꓚꓱꓹ ꓬꓲꓼ ꓙꓰ ꓝꓲ ꓠꓹ ꓟ ꓕꓳꓽ ꓡ ꓟꓴꓽ ꓔꓯ ꓓꓶꓽˍ ꓡꓳ=

ꓪꓴ-ꓢ ꓬꓲ ꓝꓲ ꓓꓴ ꓠꓬ ꓝꓮꓲ ꓕꓲ ꓧꓪꓹ ꓓꓳ ꓡ ꓟ ꓔꓯ ꓕꓳꓽ ꓡ ꓟꓴꓽ ꓟꓳꓻ ꓡꓰ ꓕꓯ ꓬꓲ ꓠꓽ ꓮ ꓘꓶꓸ ꓙꓳꓺ ꓡꓰ ꓢꓲ ꓐꓱ ꓔꓯ ꓕꓲꓺ ꓙꓰ ꓢꓲ ꓐꓱ ꓘꓶꓽ ꓗꓪ ꓑ-ꓡ ꓛꓲ ꓒꓯꓹ ꓔꓯ ꓠꓬꓲꓸ ꓬꓯꓼ ꓡꓰꓳ= ꓖꓳ ꓡꓱ ꓠꓬꓲ ꓑ-ꓡ ꓠꓬ ꓬꓲ ꓕꓳꓽ ꓡ ꓟꓴꓽ ꓔꓯ ꓝꓮꓲ ꓕꓲ ꓧꓪꓹ ꓓꓶꓽˍ ꓡꓳ=

ꓪꓴ-ꓢ ꓬꓲ ꓝꓲ ꓓꓴ ꓠꓬ ꓟꓲ ꓕꓯꓽ ꓢꓲ ꓙꓰ ꓢꓲ ꓡꓯꓼ ꓶꓸ ꓡꓯꓼ ꓙ ꓚꓳ ꓙꓰ ꓖꓴ ꓟꓽ ꓙꓳ ꓮ ꓘꓶꓸ ꓠꓬꓱꓹˍ ꓟ ꓕꓲ ꓔꓳꓸ ꓗꓪ ꓦꓰꓼ ꓞꓹ ꓔꓬ ꓡꓳ= ꓖꓳ ꓟ ꓔꓯ ꓕꓳꓽ ꓶ ꓟꓴꓽ ꓟꓳꓻ ꓡꓰ ꓠꓬ ꓟꓬꓽ ꓠꓬꓲ ꓙꓳꓺ ꓛꓱꓽ ꓡꓰ ꓢꓲ ꓪꓴ-ꓢ ꓬꓲ ꓝꓲ ꓓꓴ ꓟꓲꓽ ꓙꓬꓽ ꓗꓪ ꓠꓬꓲ ꓔ ꓡꓰˍ ꓡꓳ= ꓖꓳ ꓕꓯ ꓑ-ꓡ ꓠꓽ ꓮ ꓘꓶꓸ ꓦꓶꓻ ꓔꓴ ꓡ ꓢꓲ ꓠꓬꓲ ꓬꓲ ꓕꓳꓽ ꓡ ꓟꓴꓽ ꓔꓯ ꓧꓶꓸ ꓕꓯ ꓟ ꓢꓶꓸ ꓟꓽ ꓞꓲꓺ ꓓꓶꓽˍ ꓡꓳ= ꓖꓳ ꓡꓱ ꓥ ꓟꓲ ꓑ-ꓡ ꓠꓽ ꓪꓴ-ꓢ ꓬꓲ ꓝꓲ ꓓꓴ ꓔꓯ ꓟꓽ ꓟꓳꓻ ꓡꓰ ꓢꓰꓽ=

ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓕꓳꓽ ꓡ ꓟꓴꓽ ꓔꓯ ꓞꓼ ꓐꓰ ꓫꓸ ꓕꓱ ꓓꓳꓻ ꓡ ꓝꓲ ꓢꓲ꓾ ꓬꓲ ꓡꓰ ꓑ-ꓡ ꓔꓯ ꓠꓴ ꓠꓬ ꓮ ꓡꓲ ꓗꓹ ꓠꓬꓲ ꓥꓪ ꓔꓯ ꓓꓶꓽˍ ꓡ? ꓠꓴ ꓥꓪ ꓔꓯ ꓢ ꓧꓪꓹ ꓓꓶꓽ ꓠ ꓗꓪ ꓛꓲ ꓥꓪ ꓮ ꓫꓵꓽ ꓬꓰ ꓛꓬꓻ ꓗꓷ ꓡ? ꓐꓰ ꓠ ꓠꓬꓲˍ ꓡꓳ= ꓑ-ꓡ ꓠꓽ ꓬꓲ ꓠꓲꓹ ꓟ ꓮ ꓘꓶꓸ ꓦꓶ ꓔꓬ ꓟ ꓑꓶꓸ ꓓꓴ ꓬꓲ ꓡꓰ ꓦꓵꓻ ꓔ ꓟ ꓙꓱꓽ ꓤ ꓥ ꓟ ꓕꓳꓽ ꓡ ꓟꓴꓽ ꓬꓲ ꓔꓯ ꓫꓸ ꓕꓱ ꓡ ꓔꓬ ꓟ ꓔꓯ ꓬꓲ ꓚꓬꓹ ꓟꓽ ꓪ ꓔꓬ= ꓑ-ꓡ ꓡꓰ ꓕꓳꓽ ꓡ ꓟꓴꓽ ꓔꓯ꓾ ꓠꓴ ꓠꓽ ꓥꓪ ꓔꓯ ꓟꓽ ꓒꓵꓽ ꓬꓰˍ ꓠꓬꓲ꓾ ꓥꓪ ꓡꓯ ꓒꓯꓹ ꓗꓪ ꓮ ꓕꓽ ꓔꓯꓹ ꓔ ꓕꓯ ꓠꓽ ꓥꓪ ꓠꓴ ꓔꓯ ꓮ ꓟꓶˍ ꓡꓰ ꓢꓰꓼ ꓗꓷ ꓓꓴ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓕꓳꓽ ꓡ ꓟꓴꓽ ꓡꓰ ꓬꓲ ꓔꓯ꓾ ꓥꓪ ꓠꓬ ꓠꓴ ꓮ ꓕꓯˍ ꓟꓲ ꓜꓶꓽ ꓔꓬ ꓟ ꓕꓳꓽ ꓡ ꓟꓴꓽ ꓟꓽ ꓥ ꓡ? ꓠꓴ ꓔꓯ ꓥꓪ ꓮ ꓕꓯ ꓕꓱ ꓡꓱ ꓬꓰ ꓖꓶ ꓠꓬꓲˍ ꓡ? ꓐꓰ ꓐꓯ ꓖꓶˍ ꓕꓯ ꓑ-ꓡ ꓡꓰ ꓮ ꓕꓯˍ ꓟꓲ ꓕꓱ ꓡꓱ ꓟꓽ ꓬꓰ ꓖꓶ ꓡ ꓠꓬꓲ꓾ ꓐꓯ ꓖꓶˍ ꓡꓳ=

ꓬꓲ ꓪ ꓖꓳ ꓡꓱ ꓫꓸ ꓕꓱ ꓓꓳ ꓡꓰ ꓗ ꓠꓯꓸ ꓪꓴ-ꓢ ꓡꓰ ꓑ-ꓡ ꓟꓬ ꓢꓶꓽ ꓔꓯ ꓒꓴ ꓖꓶ ꓗꓷ ꓠꓬꓲ ꓪꓴ-ꓢ ꓝꓲ ꓓꓴ ꓠꓬ ꓮ ꓕꓽ ꓔꓯꓹ ꓔ ꓢꓲ ꓙ ꓖꓴ ꓗꓪ ꓦꓰꓼ ꓔꓬ ꓟ ꓔꓯ ꓟꓳꓻ ꓡꓰꓳ= ꓖꓳ ꓡꓱ ꓠꓬꓲ ꓑ-ꓡ ꓠꓽ ꓟꓲ ꓛꓬ ꓗꓪ ꓟꓳꓼ ꓡꓰꓳ= ꓪꓴ-ꓢ ꓝꓲ ꓓꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓠꓴ ꓕꓳꓽ ꓡ ꓟꓴꓽ ꓔꓯ ꓓꓶꓽˍ ꓡ? ꓠꓴ ꓔꓯ ꓥꓪ ꓙꓰ ꓝꓲ ꓠꓲꓹ ꓟꓽ ꓫꓵ ꓟ ꓔꓯ ꓠꓴ ꓟꓽ ꓚꓬꓹ ꓪ ꓔꓬ ꓫꓵꓽ ꓥ ꓡ? ꓠꓴ ꓕꓳꓽ ꓡ ꓟꓴꓽ ꓥꓪ ꓔꓯ ꓟꓳꓻ ꓡꓰ ꓢꓲ ꓬꓲ ꓡꓰ ꓗ ꓠꓯꓸ ꓢꓲ ꓗꓪ ꓟꓽ ꓙꓵꓺ ꓙꓰ ꓠꓬ꓾ ꓠꓴ ꓟꓽ ꓙꓲ ꓟꓽ ꓙꓳꓽ ꓟ ꓗꓪ ꓙꓰˍ ꓟ ꓑꓶꓸ ꓓꓴ ꓠꓴ ꓠꓬ ꓫꓵꓻˍ ꓡꓳ ꓫꓵꓽ ꓥꓳ= ꓠꓴ ꓕꓳꓽ ꓡ ꓟꓴꓽ ꓕꓲ ꓟˍ ꓡꓰꓽ ꓜꓰ ꓡꓰˍ ꓥꓳ꓾ ꓐꓯ ꓖꓶˍ ꓡꓳ=

ꓖꓳ ꓕꓯ ꓑ-ꓡ ꓡꓰ ꓥꓪ ꓠꓽ ꓝꓴꓲꓸ ꓬꓰ ꓗꓷꓳ= ꓠꓴ ꓠꓬ ꓥꓪ ꓔꓯ ꓗꓽ ꓠꓹ ꓟ ꓙ ꓖꓴ ꓗꓪ ꓦꓰꓼ ꓔꓬ ꓟ ꓔꓯ ꓥꓪ ꓠꓽ ꓟꓽ ꓢꓷꓸ= ꓠꓴ ꓥꓪ ꓔꓯ ꓙꓰ ꓝꓲ ꓠꓲꓹ ꓟꓽ ꓫꓵ ꓠꓬ ꓥꓪ ꓠꓽ ꓚꓱꓹ ꓬꓲꓼ ꓙꓰ ꓛꓵˍ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓝꓲ ꓓꓴ ꓡꓰ ꓬꓲ ꓔꓯ ꓠꓴ ꓠꓬ ꓬꓲ ꓪ ꓐꓰ ꓕꓲ ꓛꓳˍ ꓙꓰ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓴ ꓔꓯ ꓐꓯ ꓝꓲˍ ꓟ ꓡꓰ ꓐꓯ꓾ ꓐꓰ ꓐꓯ ꓖꓶ ꓗꓷ ꓠꓬꓲ ꓑ-ꓡ ꓠꓬ ꓪ ꓔꓲ ꓑ-ꓡ-ꓘꓷ ꓬꓲ ꓞꓳ ꓪꓴꓽ ꓐꓴ ꓐꓰ ꓕꓲ ꓪ ꓛꓳ ꓙꓰˍ ꓡꓳ=

ꓑ-ꓡ ꓡ ꓔꓬ ꓟ ꓔꓯ ꓪ ꓔꓲ ꓑ-ꓡ-ꓘꓷ ꓑ ꓙꓽ ꓡꓰ ꓕꓯ ꓪ ꓔꓲ ꓠꓬ ꓑ-ꓡ ꓔꓯ ꓞꓵꓺ ꓡ ꓢꓲ ꓑ-ꓡ ꓔꓯ ꓟꓳꓻ ꓗꓷ ꓠꓬ꓾ ꓠꓴ ꓔꓯ ꓥꓪ ꓬꓲ ꓪꓴꓸ ꓕꓲ ꓧꓪꓹ ꓘꓴ ꓩꓴ ꓡ ꓕꓯ ꓮ ꓡꓲ ꓗꓹ ꓠꓬꓲ ꓠꓴ ꓮ ꓟꓲꓸ ꓟꓽ ꓡ ꓡ? ꓠꓴ ꓔꓯ ꓥꓪ ꓡꓯꓼ ꓫꓴ ꓖꓶ ꓟꓽ ꓘꓴꓻ ꓓꓵꓽ ꓙˍ ꓡ? ꓐꓰ ꓠ ꓠꓬꓲˍ ꓡꓳ= ꓑ-ꓡ ꓡꓰ ꓪ ꓔꓲ ꓔꓯ ꓮ ꓟꓶ ꓥꓪ ꓕꓱ ꓗꓪ ꓛꓲꓺ ꓡꓺꓳ= ꓖꓳ ꓡꓱ ꓥˍ ꓟꓲ ꓥꓪ ꓚꓲ ꓛꓬ ꓠꓽ ꓮ ꓫꓵꓽ ꓬꓰ ꓟꓽ ꓐ ꓡ= ꓪꓴ-ꓢ ꓡꓰ ꓥꓪ ꓔꓯ ꓐꓯ ꓝꓲˍ ꓟ ꓡꓰꓽ ꓐꓯ ꓐ ꓡˍ ꓡꓳ꓾ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓪ ꓔꓲ ꓡꓰ ꓑ-ꓡ ꓔꓯ ꓪ ꓚꓲ ꓗꓪ ꓧꓳꓽ ꓔꓯꓹ ꓙꓰˍ ꓡꓳ= ꓖꓳ ꓗꓪ ꓐꓰ ꓙꓪꓻ ꓬꓲ-ꓢꓷ-ꓡꓰ ꓡ ꓞꓳ ꓕꓲ ꓐꓱ ꓔꓯ ꓟꓳꓻ ꓐ ꓡˍ ꓡꓳ=

ꓑ-ꓡ ꓓꓰꓽ ꓔ ꓟˍ ꓡꓰ ꓐꓰ ꓬꓲ ꓪ ꓐꓴ ꓠꓬ ꓔꓲ ꓖꓴ ꓕꓲ ꓟ ꓙ ꓖꓶ ꓢꓲ ꓛꓴ ꓔꓲˍ ꓡꓳ= ꓝꓮꓲ ꓪ ꓔꓲ ꓡꓰ ꓑ-ꓡ ꓔꓯ꓾ ꓖꓳ꓾ ꓬꓲ ꓪ ꓐꓴ ꓖꓳ ꓗꓪ ꓔꓬ ꓡꓳ= ꓬꓲ ꓪ ꓔꓯ ꓙꓱꓽ ꓗꓷ꓾ ꓐꓯ ꓡꓳ= ꓪꓴ-ꓢ ꓡꓰ ꓑ-ꓡ ꓟꓷꓽ ꓠꓷꓹ ꓔꓯ ꓒꓴ ꓗꓷ ꓢꓲ ꓕꓱ ꓡꓱ ꓐꓯ ꓡꓳ= ꓪꓴ-ꓢ ꓡꓰ ꓟꓽ ꓠꓲꓹ ꓫꓵ ꓟ ꓥꓶˍ ꓟ ꓔꓯ ꓥꓪ ꓮ ꓡꓲ ꓬꓰ ꓢꓲ ꓙꓱꓽ ꓐ ꓡˍ ꓢꓰꓽ= ꓪ ꓚꓲ ꓪꓴꓸ ꓓꓵ ꓗꓪ ꓐꓰ ꓬꓲ ꓪ ꓔꓯ ꓥꓪ ꓟꓳꓻˍ ꓡꓳ= ꓬꓲ ꓪ ꓔꓱꓹ ꓬꓲ ꓪ ꓔꓬ ꓟ ꓡ ꓞꓳ ꓕꓲ ꓪꓳꓼ ꓔꓯ ꓥꓪ ꓟꓳꓻˍ ꓡꓳ= ꓬꓲ ꓪ ꓐꓴ ꓔꓯ ꓵ ꓖꓴ ꓡꓰ ꓘꓴꓻ ꓢꓴ ꓟꓽ ꓙꓳ= ꓠꓴ ꓪ ꓮ ꓙꓵꓽ ꓶꓼ ꓙꓳ ꓫꓱꓹ ꓙꓳ ꓝꓲ꓾ ꓐꓰ ꓐꓯ ꓖꓶˍ ꓡꓳ=

ꓑ-ꓡ ꓕꓱ ꓡꓱ ꓐꓯ ꓔꓬ ꓟ ꓔꓯ ꓪ ꓔꓲ ꓑ-ꓡ-ꓘꓷ ꓑ ꓙꓽ ꓡꓰ ꓠꓬ꓾ ꓠꓴ ꓠꓬ ꓥꓪ ꓔꓯ ꓮ ꓡꓲ ꓕꓱ ꓡꓱ ꓬꓰ ꓖꓶ ꓡˍ ꓡ? ꓬꓲ ꓪ ꓔꓯ ꓙꓱꓽ ꓕꓼ ꓠꓹ ꓟ ꓠꓴ ꓔꓯ ꓥꓪ ꓕꓱ ꓗꓪ ꓘꓴꓻ ꓔ ꓟ ꓥ ꓡꓳ= ꓮ ꓫꓵꓽ ꓑꓶꓸ ꓓꓴ ꓬꓲ ꓪ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓔꓬ ꓡ? ꓐꓰ ꓠꓻ ꓠꓬꓲˍ ꓡꓳ= ꓖꓳ ꓕꓯ ꓑ-ꓡ ꓡꓰ ꓪꓴ-ꓢ ꓥꓪ ꓔꓯ ꓐꓯ ꓝꓲˍ ꓟˍ ꓡꓰꓽ ꓐꓯ ꓠ ꓗꓹ ꓡꓳ ꓟꓽ ꓥ ꓡ? ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓪ ꓔꓲ ꓡꓰ ꓑ-ꓡ ꓔꓯ ꓡꓯ꓾ ꓬꓲ-ꓢꓷ-ꓡꓰ ꓝꓮꓲ ꓕꓲ ꓐꓱ ꓔꓯ ꓟꓳꓻˍ ꓟ ꓠꓱꓸ ꓐꓯꓼ ꓕꓲ ꓖ ꓗꓪ ꓙꓰ ꓢꓲ ꓬꓲ ꓪ ꓔꓯ ꓥꓪ ꓐꓱ ꓶ ꓙꓱꓽ ꓕꓼ ꓙ ꓡꓯ꓾ ꓐꓯ ꓡꓳ= ꓖꓳ ꓡꓱ ꓢꓲ ꓠꓬꓲ ꓪ ꓔꓲ ꓑ-ꓡ-ꓘꓷ ꓐꓰ ꓑ-ꓡ ꓐꓴ ꓠꓬ ꓪ ꓚꓲ ꓝꓮꓲ ꓕꓲ ꓟ ꓗꓪ ꓙꓰˍ ꓡꓳ= ꓖꓳ ꓗꓪ ꓔꓲ ꓖꓴ ꓔꓯ ꓝꓮꓲ ꓕꓲ ꓧꓪꓹ ꓙ ꓖꓶ ꓢꓲ ꓛꓴ ꓔꓲˍ ꓡꓳ= ꓪ ꓔꓲ ꓑ-ꓡ-ꓘꓷ ꓡꓰ ꓮ ꓟꓶ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓙꓱꓽ ꓕꓼ ꓗꓷ꓾ ꓐꓯ ꓖꓶˍ ꓡꓳ= ꓪꓴ-ꓢ ꓡꓰ ꓑ-ꓡ ꓟꓷꓽ ꓠꓷꓹ ꓗꓪ ꓬꓲ ꓐꓯ ꓘꓶꓽ ꓧꓳꓽ ꓖꓶ ꓗꓷ ꓠꓬ꓾ ꓑ-ꓡ ꓡꓰ ꓕꓱ ꓡꓱ ꓐꓯ ꓡꓳ= ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓠꓴ ꓪ ꓠꓬ ꓶꓼ ꓙꓳ ꓫꓱꓹ ꓙꓳ ꓝꓲ= ꓢꓲ ꓒ ꓠꓴ ꓪ ꓪꓴ-ꓢ ꓠꓬ ꓠꓴ ꓪ ꓐꓰ ꓕꓲ ꓪ ꓔꓬ ꓡꓳ= ꓪꓴ-ꓢ ꓠꓬ ꓬꓲ ꓪ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓪꓽ ꓠꓬꓲ ꓠꓬꓲˍ ꓡꓰꓽ ꓧꓳꓽ ꓓꓳ ꓡꓺꓳ= ꓬꓲ-ꓢꓷ-ꓡꓰ ꓐꓴ ꓔꓯ ꓘꓶꓻ ꓟꓬꓱꓽ ꓡꓰ ꓧꓪꓸ ꓟꓽ ꓘꓴ= ꓬ-ꓗꓴ ꓔꓯ ꓥꓺ ꓟꓬꓱꓽ ꓡꓰ ꓔꓳꓹ ꓟꓽ ꓘꓴ= ꓪꓴ-ꓢ ꓡꓰ ꓬꓲ ꓪ ꓐꓱ ꓶ ꓮ ꓡꓲ ꓬꓰ ꓗꓷ ꓟ ꓔꓯ ꓡꓳꓸ ꓠꓬꓲ꓾ ꓐꓯ ꓖꓶˍ ꓡꓳ= ꓖꓳ ꓕꓯ ꓪ ꓔꓲ ꓑ-ꓡ-ꓘꓷ ꓡꓰ ꓑ-ꓡ ꓔꓯ ꓾ꓧꓰꓬ꓾ ꓠꓴ ꓬꓲ ꓪ ꓔꓯ ꓙꓱꓽ ꓕꓼ ꓠꓲꓹ ꓟꓽ ꓫꓵ ꓠꓬ ꓕꓽ ꓙꓱꓽ꓾ ꓖꓳ ꓡꓱ ꓥ ꓟꓲ ꓶꓼ ꓘꓶꓽ ꓠꓬ ꓕꓽ ꓖꓶ꓾ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬ ꓑ-ꓡ ꓡꓰ ꓥꓪ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓬꓰ ꓝꓲˍ ꓟˍ ꓡꓰꓽ ꓬꓰˍ ꓥꓳ ꓐꓰ ꓠꓴ ꓔꓯ ꓐꓯ ꓖꓶ ꓗꓷꓳ ꓟꓽ ꓥ ꓡ? ꓐꓰ ꓐꓯ ꓖꓶˍ ꓡꓳ= ꓖꓳ ꓗ ꓠꓯꓸ ꓪ ꓔꓲ ꓡꓰ ꓑ-ꓡ ꓔꓯ ꓡꓯ꓾ ꓥꓪ ꓠꓬ ꓠꓴ ꓔꓯ ꓝꓮꓲ ꓕꓲ ꓖ ꓗꓪ ꓧꓳꓽ ꓔꓯꓹ ꓙꓰˍ ꓥꓳ= ꓖꓳ ꓗꓪ ꓐꓰ ꓠꓴ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓙꓱꓽ ꓕꓼ  ꓠꓹ ꓟ ꓪꓴ-ꓢ ꓠꓲꓹ ꓒꓴˍ ꓟꓽ ꓢꓷ? ꓐꓯ ꓖꓶ ꓗꓷ ꓢꓲ ꓪ ꓜꓲ ꓟꓴˍ ꓟ ꓪ ꓚꓲ ꓗꓪ ꓑ-ꓡ ꓔꓯ ꓧꓳꓽ ꓔꓯꓹ ꓙꓰˍ ꓡꓳ= ꓖꓳ ꓗꓪ ꓬꓲ ꓪ ꓠꓬ ꓔꓲ ꓖꓴ ꓫꓬꓹ ꓢꓲ ꓝꓮꓲ ꓕꓲ ꓧꓪ ꓹ ꓛꓴ ꓔꓲˍ ꓡꓳ=

ꓑ-ꓡ ꓠꓬ ꓙꓪꓻ ꓡꓲ ꓛꓲ ꓟꓲ ꓗꓪ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓬꓲ ꓔꓱꓹ ꓬꓲ ꓔꓬ ꓟ ꓔꓯ ꓡꓳꓸ ꓠꓬꓲ ꓔꓬ ꓕꓯ ꓪꓴ-ꓢ ꓦ ꓬꓲ ꓔꓯ ꓬꓯꓼ ꓡ ꓡꓳ= ꓖꓳ ꓡꓱ ꓢꓲ ꓑ-ꓡ ꓡꓰ ꓕꓱ ꓡꓱ ꓐꓯ ꓡꓳ= ꓬ-ꓗꓴꓳ ꓠꓴ ꓟꓶ ꓔꓶꓸ ꓦꓲ ꓠꓬ ꓮ ꓘꓶꓸ ꓐꓲˍ ꓡꓳ= ꓬꓲ-ꓢꓷ-ꓡꓰꓳ ꓠꓴ ꓔꓬ ꓖꓴ ꓠꓽ ꓮ ꓓꓲ ꓙꓲˍ ꓡꓳ= ꓬꓲ ꓪ ꓠꓬ ꓒꓬꓱ ꓞꓹ ꓟ ꓡꓳ ꓖꓳˍ ꓡꓰ ꓐꓰ꓾ ꓪꓴ-ꓢ ꓡꓰ ꓔꓶ ꓔ ꓟ ꓬꓲꓻ ꓙꓬ ꓘꓶꓽ ꓗꓪ ꓟ ꓐꓱˍ ꓡꓰ ꓐꓰ ꓗꓹ ꓡꓳ= ꓬꓲ ꓪ ꓟꓵꓽ ꓗꓪ ꓠꓬ ꓮ ꓕꓯ ꓟꓲ ꓬꓲꓻ ꓙꓬ ꓟꓽ ꓫꓱ ꓡꓰ= ꓬꓲ ꓪ ꓦ ꓟꓲ ꓗꓪˍ ꓟꓲ ꓬꓲꓻ ꓙꓬ ꓟꓽ ꓖꓳꓽ ꓡꓰ= ꓬꓲ ꓪ ꓪ ꓔꓲ ꓠꓬ ꓪꓽ ꓠꓬꓲ ꓓꓰ ꓡꓰ ꓢꓴ ꓒꓬꓱꓼ ꓡˍ ꓥꓳ= ꓪ ꓔꓲ ꓟꓵꓽ ꓥˍ ꓟꓲ ꓮ ꓘꓶꓸ ꓟꓬꓱ ꓓꓳꓽ ꓙꓳ ꓡˍ ꓥꓳ= ꓬꓲ ꓪ ꓐꓴ ꓔꓯ ꓮꓽ ꓟ ꓡꓰ ꓔꓳꓹ ꓐ ꓡˍ ꓢꓰꓽ? ꓠꓴ ꓪ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓢꓴ ꓠꓬ ꓶꓼ ꓙꓳ ꓝꓲ= ꓝꓮꓲ ꓠꓴ ꓪ ꓔꓯ ꓙꓱꓽ ꓕꓼ ꓢꓴ ꓙꓱꓽ ꓘꓶꓽ ꓶꓻ ꓡꓰ ꓝꓲ꓾ ꓐꓰ ꓐꓯ ꓖꓶˍ ꓡꓳ=

ꓖꓳ ꓟ ꓔꓯ ꓑ ꓙꓽ ꓡꓰ ꓕꓯ ꓪ ꓔꓲ ꓑ-ꓡ-ꓘꓷ ꓠꓬ ꓮ ꓘꓶꓸ ꓠꓲꓹ ꓟ ꓦꓶ ꓔꓴ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓡꓰ ꓑ-ꓡ ꓔꓯ ꓥꓪ ꓠꓬ ꓬꓲ ꓪ ꓔꓯ ꓙꓱꓽ ꓕꓼ ꓠꓹ ꓟ ꓝꓲ ꓩꓴ ꓗꓷˍ ꓥ ꓟꓲ ꓠꓴ ꓠꓬ ꓬꓲ ꓪ ꓔꓯ ꓢ ꓧꓪꓹ ꓡꓱꓸꓼ ꓶꓼ ꓥꓳꓽ ꓙꓱꓽ ꓖꓶ ꓗꓷꓳ= ꓠꓴ ꓠꓬ ꓠꓴ ꓟꓵꓽ ꓗꓪ ꓮ ꓟꓲꓸ ꓬꓲꓼ ꓙꓰ= ꓥꓪ ꓠꓬ ꓠꓴ ꓔꓯ ꓡꓯꓼ ꓫꓴ ꓓꓽ ꓟ ꓖꓶ ꓠꓹ ꓟ ꓐꓯ ꓖꓶ ꓔˍ ꓟꓲ ꓮ ꓟꓶ ꓥꓪ ꓠꓴ ꓔꓯ ꓮ ꓫꓵꓽˍ ꓟꓲ ꓖꓶ ꓟꓽ ꓐ ꓡꓺꓳ= ꓠꓴ ꓠꓲꓹ ꓞꓼ ꓬꓲꓼ ꓙꓰˍ ꓨ꓾ ꓐꓯ ꓖꓶˍ ꓡꓳ=

ꓖꓳ ꓕꓯ ꓑ-ꓡ ꓡꓰ ꓪ ꓔꓲ ꓔꓯ ꓠꓴ ꓠꓬ ꓒꓴ ꓐꓰ ꓫꓵꓺ ꓐꓲ ꓓꓹ ꓟ ꓪ ꓔꓲ ꓙ ꓥꓪ ꓔꓯ ꓖꓶ ꓡˍ ꓥ ꓟꓲ ꓥꓪ ꓠꓬ ꓥꓪ ꓪꓴ-ꓢ ꓔꓯ ꓟꓽ ꓠ ꓠꓹ ꓐꓰ ꓬꓰ ꓟꓽ ꓐ ꓡ꓾ ꓐꓰ ꓠꓴ ꓝꓲ ꓓꓴ ꓔꓯ ꓐꓯ ꓖꓶ ꓗꓷꓳ ꓟꓽ ꓥ ꓡ? ꓪꓴ-ꓢ ꓥꓪ ꓔꓯ ꓮ ꓡꓲ ꓐꓯ ꓝꓲˍ ꓠꓬ ꓥꓪ ꓖꓳ ꓡꓱ ꓐꓯ ꓗꓷꓳ= ꓥꓪ ꓠꓬ ꓥꓪ ꓦꓲ ꓗꓪ ꓬꓲꓼ ꓙꓰˍ ꓥꓳ꓾ ꓖꓳ ꓡꓱ ꓥˍ ꓟꓲ ꓠꓴ ꓐꓰ ꓠꓴ ꓗꓴꓷꓼ ꓠꓬ ꓕꓲ ꓠꓬꓲ ꓙꓳˍ ꓕꓯ ꓐꓬ ꓡꓰˍ ꓥꓳ ꓐꓰ ꓠꓴ ꓔꓯ ꓥꓪ ꓐꓯ ꓖꓶ ꓠꓲꓹ ꓫꓵˍ ꓡꓳ꓾ ꓐꓰ ꓐꓯ ꓖꓶˍ ꓡꓳ=

ꓝꓮꓲ ꓑ-ꓡ ꓡꓰ ꓝꓸ ꓢꓲ ꓕꓱ ꓡꓱ ꓟꓷꓽ ꓠꓷꓹ ꓝ ꓡꓳ= ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓗꓴꓷꓼ ꓔꓯ ꓟꓳˍ ꓡꓳ= ꓬ-ꓗꓴ ꓗꓪ ꓐꓰ ꓗꓴ ꓤ ꓕꓲ ꓢꓶꓽ ꓓꓳ ꓡˍ ꓥꓳ= ꓬꓲ-ꓢꓷ-ꓡꓰ ꓗꓪ ꓐꓰ ꓙꓵꓽ ꓓ ꓕꓲ ꓕꓷꓹ ꓔꓴ ꓡ ꓢꓲ꓾ ꓬꓲ ꓡꓰ ꓟꓳ-ꓮ-ꓐꓷ ꓟꓵꓽ ꓔꓯ ꓔꓲꓸ ꓐꓶꓽ ꓡꓰ ꓝꓲˍ ꓥꓳ=  ꓬꓲ-ꓓꓳ-ꓟꓷ ꓐꓰ ꓫꓲ-ꓷ ꓔꓯˍ ꓟꓲ ꓧꓪꓸ ꓡꓰˍ ꓥꓳ= ꓮ-ꓟꓷ-ꓡꓷ-ꓘꓷˍ ꓟꓲ ꓕꓲ ꓞꓲꓼ ꓕꓲ ꓑ ꓛꓴ ꓛꓰꓹ ꓡꓰˍ ꓥꓳ= ꓬꓲ-ꓢꓷ-ꓡꓰ ꓠꓬ ꓢꓯꓼ ꓙꓳ ꓪꓽ ꓠꓬꓲˍ ꓥꓳ=

ꓖꓳ ꓗ ꓠꓯꓸ ꓑ-ꓡ ꓠꓬ ꓔꓴ ꓢꓲ ꓬꓲ ꓔꓬ ꓖꓴ ꓗꓪ ꓬꓲꓼ ꓙꓰˍ ꓡꓳ꓾ ꓪ ꓔꓲ ꓑ-ꓡ-ꓘꓷ ꓥˍ ꓟꓲ ꓬꓲꓼ ꓙꓰˍ ꓗꓷꓳ=