ꓖꓷ-ꓓꓰ-ꓬꓴ ꓐꓰ ꓟꓯꓼ ꓒ 300

ꓖꓷ-ꓓꓰ-ꓬꓴ ꓐꓰ ꓬꓲ ꓟꓯꓼ 300 ꓣꓳ

ꓬꓲ-ꓢꓷ-ꓡꓰ ꓐꓴ ꓠꓬ ꓧꓶꓸ ꓕꓯ ꓟˍ ꓡꓰ ꓐꓰ ꓪꓴ-ꓢ ꓔꓯ ꓟꓽ ꓠ ꓡꓳꓸ= ꓬꓲ ꓪ ꓠꓬ ꓕꓲ ꓣꓳˍ ꓟ ꓪꓴ-ꓢ ꓔꓯ ꓪꓴꓸ ꓓꓵ ꓟꓽ ꓕꓱꓼ꓾ ꓬꓲ ꓙꓵꓽ ꓗ ꓔꓯ ꓟꓽ ꓒꓵꓽ ꓛꓳꓻ꓾ ꓑ-ꓡꓲ ꓢꓲꓺ ꓐꓬꓱꓽ ꓔꓯ ꓡꓰꓽ ꓣꓱꓽ ꓙ ꓗꓷꓳ= ꓕꓱ ꓟ ꓑꓶꓸ ꓓꓴ ꓪꓴ-ꓢ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓟ-ꓓꓲ-ꓬ ꓐꓴ ꓡꓯ ꓒꓯꓹ ꓗꓪ ꓡꓯꓼ ꓙꓱꓻ ꓗꓷꓳ= ꓖꓳ ꓡꓱ ꓠꓬꓲ ꓬꓲ-ꓢꓷ-ꓡꓰ ꓐꓴ ꓠꓬ ꓟ-ꓓꓲ-ꓬ ꓐꓴ ꓘꓶꓻ ꓙꓵˍ ꓟ ꓠꓯꓸꓼ ꓗꓪ 7 ꓘꓳꓼ ꓫꓸ ꓙꓵ ꓗꓷꓳ= ꓟ-ꓓꓲ-ꓬ ꓡ ꓞꓳ ꓐꓴ ꓠꓬ ꓮ-ꓟꓷ-ꓡꓷ-ꓘꓷ ꓡ ꓞꓳ ꓐꓰ ꓐꓶ ꓓꓳ ꓔꓯ ꓟꓳꓸ ꓗꓪ ꓔꓬ ꓢꓴ ꓐꓴ ꓐꓰ ꓪꓽ ꓡꓯ ꓘꓳ ꓢꓲ ꓬꓲ-ꓢꓷ-ꓡꓰ ꓐꓴ ꓦ ꓟꓲ ꓗꓪ ꓟ ꓜꓽ ꓪꓳꓽ ꓡꓳ ꓪꓳꓽ ꓮ ꓙꓵꓽꓒꓬꓹ ꓗꓷˍ ꓡꓳ= ꓬꓲ ꓪ ꓦꓵꓻ ꓔ ꓟ ꓮ ꓣꓳ꓾ ꓮ ꓠꓬꓲꓽ꓾ ꓕꓳꓽ ꓡ ꓟꓴꓽ ꓐꓰ ꓠꓱꓸ ꓐꓯꓼ ꓙꓱꓽ ꓤ ꓮ ꓙꓵꓽ ꓔꓯ ꓖꓼ ꓔꓯꓹ ꓙꓰˍ ꓡꓳ꓾ ꓬꓲ-ꓢꓷ-ꓡꓰ ꓐꓴ ꓐꓱ ꓶ ꓠꓬ ꓣꓱꓽ ꓓꓴ ꓮ ꓫꓵꓽˍ ꓟꓲ ꓟꓽ ꓙꓳ ꓗꓷ ꓡꓰˍ ꓡꓳ= ꓖꓳ ꓡꓱ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓡ ꓕꓯ ꓬꓲ ꓪ ꓐꓴ ꓠꓬ ꓪꓴ-ꓢ ꓔꓯ ꓘꓴ ꓓꓰˍ ꓡꓳ= ꓬꓲ ꓪ ꓮ ꓫꓵꓽ ꓑꓶꓸ ꓓꓴ ꓕꓱ ꓡꓱ ꓫꓸ ꓙꓵꓻ ꓔꓬ ꓪˍ ꓟ ꓔꓯ ꓐꓯ ꓟꓸ ꓖꓶ ꓠꓹ ꓟ ꓐꓱ ꓶ ꓪꓴ-ꓢ ꓠꓬ ꓬꓲ ꓪ ꓔꓬ ꓗꓪ ꓟꓷꓽ ꓠꓷꓹ ꓝ ꓒ ꓕꓲ ꓣꓳ ꓝꓲ ꓩꓴ ꓗꓷˍ ꓡꓳ= ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓐꓴ ꓝꓴꓲ ꓬꓰˍ ꓟ ꓑꓶꓸ ꓓꓴ ꓒꓬꓱꓼ ꓡ ꓟ ꓥ ꓡꓳ=

ꓖꓳ ꓕꓲ ꓙꓵꓹ ꓗꓪ ꓖꓷ-ꓓꓰ-ꓬꓴ ꓟꓬꓱꓽ ꓔ ꓢꓴ ꓕꓲ ꓣꓳ ꓠꓬ ꓛꓱꓼ ꓡꓱꓼ ꓢꓶꓽ ꓠꓬꓲꓸ ꓖꓴ ꓗꓪ ꓫꓪ ꓓꓶꓽ ꓔꓬˍ ꓡꓳ= ꓢꓲ ꓒ ꓬꓲ ꓝꓲ ꓓꓴ ꓠꓬ ꓖꓷ-ꓓꓰ-ꓬꓴ ꓔꓬ ꓗꓪ ꓡ ꓢꓲ ꓬꓲ ꓔꓯ “ꓢꓯꓼ ꓙꓳ ꓪꓽ ꓠꓬꓲ ꓒꓽꓳ꓾ ꓪꓴ-ꓢ ꓠꓽ ꓠꓴ ꓐꓰ ꓔꓬ ꓡꓳ“ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓖꓷ-ꓓꓰ-ꓬꓴ ꓡꓰ “ꓪꓴ-ꓢ ꓥꓪ ꓐꓰ ꓔꓬ ꓠꓬ꓾ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓠꓴꓽ ꓔꓯ ꓕꓱ ꓟꓬ ꓫꓵꓽ ꓗꓷ ꓡꓰˍ ꓡ? ꓮ ꓫꓵꓽ ꓪꓴꓸ ꓠꓬꓲ ꓥꓪ ꓠꓴꓽ ꓠꓬ ꓟ-ꓓꓲ-ꓡ ꓡ ꓞꓳ ꓐꓴ ꓘꓶꓻ ꓙꓵˍ ꓟ ꓔꓯ ꓟꓶ ꓔꓬ ꓡ? ꓐꓰ ꓒꓳꓹ ꓖꓶˍ ꓡꓳ= ꓪꓴ-ꓢ ꓡꓰ ꓖꓷ-ꓓꓰ-ꓬꓴ ꓔꓯ “ꓙꓰ ꓢꓲ ꓟ-ꓓꓲ-ꓬ ꓐꓴ ꓡꓯ ꓒꓯꓹ ꓗꓪ ꓐꓰ ꓬꓲ-ꓢꓷ-ꓡꓰ ꓐꓴ ꓔꓯ ꓚꓬꓴꓸ ꓓꓳ ꓗꓷ” ꓐꓯ ꓖꓶˍ ꓡꓳ=

ꓪꓴ-ꓢ ꓡꓰ ꓕꓱ ꓡꓱ ꓐꓯ ꓖꓶ ꓡ ꓕꓯ ꓖꓷ-ꓓꓰ-ꓬꓴ ꓠꓬ ꓓꓵꓽ ꓙ ꓮ’ ꓡꓰ ꓢꓲ꓾ꓟ-ꓠ-ꓢꓲ ꓐꓴ ꓕꓲ ꓪꓳꓼ ꓗꓪ ꓣꓳ ꓓꓰ ꓡꓰˍ ꓟ ꓕꓲ ꓗꓪ ꓢꓴ ꓥ ꓟ ꓞꓲꓼ ꓣꓳ ꓢꓴ ꓕꓲ ꓣꓳ ꓠꓬ ꓮ ꓡꓰ ꓬꓰ ꓢꓲ ꓬꓲ-ꓢꓷ-ꓡꓰ ꓐꓴ ꓔꓯ ꓟ-ꓓꓲ-ꓬ ꓐꓴ ꓡꓯꓽ ꓒꓯꓹ ꓗꓪ ꓐꓰ ꓚꓬꓴꓸ ꓓꓳ ꓐ ꓡˍ ꓢꓰꓽ꓾ ꓐꓰ ꓪꓴ-ꓢ ꓔꓯ ꓐꓯ ꓖꓶˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓬꓲ ꓔꓯ ꓪꓴ-ꓢ ꓠꓬ ꓬꓲ ꓐꓰ ꓕꓲ ꓪ ꓔꓬ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓟ-ꓓꓲ-ꓬ ꓡ ꓞꓳ ꓔꓯ ꓓꓶꓽ ꓠꓹ ꓟ ꓪꓴ-ꓢ ꓠꓬ ꓬꓲ ꓔꓯ ꓢꓯꓼ ꓪ ꓖꓶ ꓢꓲ꓾ ꓬꓲ-ꓢꓷ-ꓡꓰ ꓐꓴ ꓔꓯ ꓧꓪꓸ ꓡꓰ ꓝꓲ ꓓꓴ ꓥꓳ=

ꓪꓴ-ꓢ ꓡꓰ ꓬꓲ ꓔꓯ ꓕꓱ ꓟ ꓚꓵ ꓚꓵ ꓬꓰ ꓝꓲ ꓠꓲꓹ ꓫꓵˍ ꓕꓯ ꓠꓽ ꓪꓴ-ꓢ ꓥ ꓟ ꓔꓯ ꓟꓳꓸ ꓖꓶ ꓠꓹ ꓟ ꓢꓷꓸ ꓡꓰ ꓓꓴ ꓕꓲ ꓟ ꓓꓰꓽˍ ꓡꓳ= ꓖꓷ-ꓓꓰ-ꓬꓴ ꓠꓬ ꓪꓴ-ꓢ ꓐꓱ ꓶ ꓔꓲ ꓓꓴ ꓕꓲ ꓟ ꓬꓰ ꓖꓶˍ ꓡꓳ= ꓖꓷ-ꓓꓰ-ꓬꓴ ꓛꓲ ꓡ ꓕꓯ ꓪꓴ-ꓢ ꓬꓲ ꓝꓲ ꓓꓴ ꓡꓰ ꓬꓲ ꓔꓯ ꓖꓷ-ꓓꓰ-ꓬꓴ ꓔꓯꓹ ꓡ ꓟ ꓧꓪꓽ ꓐꓰ ꓑ ꓑ ꓔꓯ ꓡꓳ ꓓꓰ ꓑꓸ ꓗꓪ ꓲ’ ꓔ ꓢꓲ ꓧꓪꓽ ꓪꓴꓽ ꓬꓲꓻ ꓧꓳꓸ ꓕꓲꓽ ꓗꓷ ꓝꓲˍ ꓡꓳ= ꓬꓲ ꓡꓰ ꓖꓳ ꓡꓱ ꓬꓰ ꓗꓷ ꓕꓯ ꓡꓳ ꓓꓰ ꓑꓸ ꓔꓯ ꓮ ꓔꓳꓸ ꓐꓬ ꓔꓴ ꓡ ꓢꓲ ꓧꓪꓽ ꓐꓰ ꓑ ꓑ ꓔꓯ ꓛꓴꓻ ꓖꓴ ꓡꓰ ꓝꓲˍ ꓡꓳ= ꓖꓳ ꓕꓲ ꓝꓲꓸ ꓗꓪ ꓟꓴ ꓗꓪ ꓝꓲ ꓓꓴ ꓠꓬ ꓖꓷ-ꓓꓰ-ꓬꓴ ꓟꓲ ꓙꓬ ꓗꓪ ꓐꓰ ꓟꓶꓽ ꓡꓰˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓡꓰ ꓖꓷ-ꓓꓰ-ꓬꓴ ꓔꓯ ꓟꓳꓸ ꓖꓶ ꓗꓷ ꓟ ꓪꓽ ꓠꓬꓲˍ ꓟ ꓢꓷꓸ ꓡꓰ ꓓꓴ ꓥ ꓡꓳ=

ꓖꓳ ꓕꓲ ꓦꓬꓽ ꓗꓪ ꓪꓴ-ꓢ ꓡꓰ ꓖꓷ-ꓓꓰ-ꓬꓴ ꓔꓯ ꓬꓲ ꓐꓹ ꓐ ꓡꓰ ꓫꓬꓹ ꓔ ꓟ ꓑ-ꓡꓲ ꓢꓲꓺ ꓐꓬꓱꓽ ꓔꓯ ꓒꓬꓹ ꓩꓴ ꓗꓷ ꓢꓲ꓾ ꓖꓳ ꓟ ꓒ ꓕꓲ ꓗꓪ ꓟ ꓬꓯ-ꓫꓵ-ꓕꓷ ꓢꓲꓺ ꓟ ꓐꓬꓱꓽ ꓬꓲꓻ ꓘꓴ ꓔꓯ ꓘꓷꓹ ꓩꓴ ꓗꓷ ꓠꓹ ꓟ ꓐꓯ ꓖꓶˍ ꓡꓳ= ꓢꓲꓺ ꓐꓬꓱꓽ ꓕꓱ ꓕꓷꓹ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓫꓸ ꓙꓵꓻ ꓡꓰ ꓝꓲˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ-ꓢꓷ-ꓡꓰ ꓐꓴ ꓠꓬ ꓔꓱꓹ ꓚꓵˍ ꓟ ꓪꓴ-ꓢ ꓔꓯ ꓟꓽ ꓦ ꓡꓱ ꓡꓱ꓾ ꓢꓲꓺ ꓐꓬꓱꓽ ꓠꓬ ꓬꓲ ꓪ ꓐꓴ ꓔꓯ ꓚꓵ ꓚꓵ ꓚꓬꓴꓸ ꓙ ꓖꓶ ꓐ ꓡˍ ꓡꓳ ꓐꓰ ꓙꓵꓻ ꓔꓬ ꓢꓰꓽ ꓡꓳ=

ꓖꓷ-ꓓꓰ-ꓬꓴ ꓠꓬ ꓙꓳꓺ ꓔꓬ ꓢꓰꓽ ꓡꓳ꓾ ꓖꓳ ꓡꓱ ꓠꓬꓲ ꓢꓷꓸ ꓡꓰ ꓓꓴ ꓝꓮꓲ ꓕꓲ ꓙꓰꓽ ꓟꓳꓸ ꓖꓶ ꓠꓹ ꓟ ꓓꓰꓽˍ ꓡꓳ= ꓕꓱ ꓕꓲ ꓙꓵꓹ ꓗꓪ ꓬꓲ ꓠꓬ ꓮ ꓣꓳ ꓟꓵ ꓕꓲ ꓘꓴꓸ ꓔꓯꓹ ꓡˍ ꓡꓳ=  ꓫꓪ ꓓꓶꓽ ꓓꓰ ꓕꓱ ꓟ ꓗꓪ ꓟ ꓮ ꓣꓳ ꓟꓵ ꓕꓲ ꓘꓴꓸ ꓔꓯˍ ꓡꓰꓽ ꓬꓹ ꓚꓵꓸ ꓒꓼ ꓞꓹ ꓢꓲ꓾ ꓚꓳ ꓡꓳ ꓡꓳ ꓟ ꓟꓲ ꓛꓬ ꓗꓪ ꓟꓽ ꓒꓼ ꓞꓹ ꓠꓬ꓾ ꓠꓴ ꓡꓰ ꓥꓪ ꓔꓯ ꓬꓲ-ꓢꓷ-ꓡꓰ ꓔꓯ ꓚꓬꓴ ꓢꓴ ꓬꓰ ꓝꓲˍ ꓟ ꓥꓪ ꓢꓷꓸ ꓡꓰˍ ꓥꓳ꓾ ꓐꓯ ꓖꓶˍ ꓡꓳ=

ꓝꓮꓲ ꓕꓲ ꓠꓯꓼ ꓗꓪ ꓠꓬ ꓖꓷ-ꓓꓰ-ꓬꓴ ꓓꓰꓽ ꓔ ꓟ ꓡꓰꓽ ꓒꓬꓱꓼ ꓡˍ ꓡꓳ= ꓮ ꓣꓳ ꓟꓵ ꓠꓬ ꓬꓹ ꓚꓵꓸ ꓒꓼ ꓞꓹ ꓢꓲ ꓚꓳ ꓡꓳ ꓗꓪ ꓟ ꓟꓲ ꓛꓬ ꓠꓬ ꓟꓽ ꓒꓼ ꓞꓹ ꓟ ꓔꓯ ꓬꓲ ꓡꓰ ꓡꓳꓸ ꓟꓳˍ ꓡꓳ= ꓪꓴ-ꓢ ꓠꓬ ꓬꓲ ꓓꓰꓽ ꓘꓶꓽ ꓔꓯ ꓠ ꓠꓹ ꓢꓲ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓗꓷꓳ= ꓖꓳ ꓡꓱ ꓥˍ ꓟꓲ ꓖꓷ-ꓓꓰ-ꓬꓴ ꓠꓬ ꓙꓳꓺ ꓔꓬ ꓢꓰꓽ ꓡꓳ=

ꓖꓳ ꓡꓱ ꓠꓬꓲ ꓖꓷ-ꓓꓰ-ꓬꓴ ꓠꓬ ꓢꓷꓸ ꓡꓰ ꓓꓴ ꓝꓮꓲ ꓕꓲ ꓟ ꓓꓰꓽˍ ꓡꓳ= ꓕꓱ ꓕꓲ ꓙꓵꓹ ꓗꓪ ꓬꓲ ꓡꓰ ꓟꓲ ꓛꓬ ꓔꓯ ꓬꓹ ꓚꓵꓸ ꓒꓼ ꓞꓹ ꓝꓲ ꓢꓲ ꓮ ꓣꓳ ꓟꓵ ꓔꓯ ꓟꓽ ꓒꓼ ꓡꓰ ꓝꓲ ꓠꓹ ꓟ ꓓꓰꓽˍ ꓡꓳ= ꓝꓮꓲ ꓕꓲ ꓠꓯꓼ ꓗꓪ ꓬꓲ ꓡꓳꓸ ꓠꓬꓲ ꓗꓷ ꓠꓬ ꓬꓲ ꓓꓰꓽ ꓔ ꓟ ꓡꓰ ꓐꓰ ꓮ ꓣꓳ ꓟꓵ ꓗꓪ ꓬꓹ ꓚꓵꓸ ꓟꓽ ꓒꓼ ꓡꓰ ꓡꓰ ꓕꓲ ꓚꓳ ꓡꓳ ꓗꓪ ꓟ ꓟꓲ ꓛꓬ ꓗꓪˍ ꓡꓰꓽ ꓒꓼ ꓞꓹ ꓟ ꓔꓯ ꓟꓳˍ ꓡꓳ= ꓖꓳ ꓡꓱ ꓢꓲ ꓪꓴ-ꓢ ꓠꓬ ꓬꓲ ꓔꓯ ꓟ-ꓓꓲ-ꓬ ꓐꓴ ꓡꓯꓽ ꓒꓯꓹ ꓗꓪ ꓐꓰ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓚꓬꓴꓸ ꓓꓳ ꓠꓹ ꓟ ꓪꓴ-ꓢ ꓡꓰ ꓬꓲ ꓔꓯ ꓚꓵ ꓚꓵ ꓣꓱꓽ ꓠꓹ ꓟ ꓔꓯ ꓢꓷꓸ ꓡꓰꓳ=

ꓝꓮꓲ ꓕꓲ ꓠꓯꓼ ꓗꓪ ꓖꓷ-ꓓꓰ-ꓬꓴ ꓐꓰ ꓟꓯꓼ ꓜꓴ ꓬꓲꓸ ꓟꓶꓽ ꓣꓳ ꓟꓽ ꓞꓲꓺ ꓐꓴ ꓠꓬ ꓕꓲ ꓪ ꓜꓲꓼ ꓡꓳꓽ ꓢꓲ ꓪꓴ-ꓢ ꓡꓰ ꓐꓯ ꓖꓶ ꓡˍ ꓟ ꓔꓯ ꓦꓴꓻ ꓠꓬꓹ ꓔꓬ ꓡꓳ= ꓪꓴ-ꓢ ꓠꓬ ꓖꓷ-ꓓꓰ-ꓬꓴ ꓔꓯ ꓧꓪꓸ ꓡꓰˍ ꓟ ꓕꓱ ꓟ ꓠꓬ ꓪꓴ-ꓢ ꓪꓽ ꓠꓬꓲˍ ꓟ ꓗꓪ ꓐꓰ ꓥ ꓟ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ= ꓖꓳ ꓡꓱ ꓠꓬꓲ ꓠꓴ ꓟꓯꓼ ꓟꓬꓽ ꓡꓰꓳ= ꓟ-ꓓꓲ-ꓬ ꓡ ꓞꓳ ꓔꓯ ꓧꓪꓸ ꓡꓰ ꓠꓬ ꓬꓲ-ꓢꓷ-ꓡꓰ ꓐꓴ ꓠꓽ ꓥꓪ ꓠꓴꓽ ꓡ ꓞꓳ ꓟꓬꓽˍ ꓠꓬꓲ ꓟ-ꓓꓲ-ꓬ ꓡ ꓞꓳ ꓔꓯ ꓧꓪꓸ ꓡꓰꓳ ꓐꓰ ꓐꓯ ꓡˍ ꓥꓳ꓾ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓖꓷ-ꓓꓰ-ꓬꓴ ꓔꓯ ꓪꓴ-ꓢ ꓡꓰ ꓢꓰꓼ ꓡꓯ ꓘꓳ ꓟꓽ ꓑꓶꓸ ꓢꓴ ꓐꓴ ꓔꓯ ꓬꓲꓼ ꓙꓰ ꓝꓲ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓕꓯ ꓟꓯꓼ 32000 ꓣꓳ ꓗꓪ ꓟ 22000 ꓣꓳ ꓬꓲꓼ ꓙꓰ ꓗꓷ ꓠꓬꓲ ꓟꓯꓼ 10000 ꓣꓳˍ ꓡꓰꓽ ꓜꓰꓻ ꓡꓰˍ ꓡꓳ= ꓟ-ꓓꓲ-ꓬ ꓡ ꓞꓳ ꓔꓯ ꓢꓰꓼ ꓓꓴ ꓐꓱ ꓶ ꓟꓯꓼ 10000 ꓣꓳ ꓠꓬ ꓮ ꓘꓶꓸ ꓠꓲˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓠꓴ ꓟꓯꓼ ꓟꓬꓽ ꓓꓹ ꓢꓰꓽ ꓡꓳ꓾ ꓐꓯ ꓢꓲ ꓬꓲ ꓪ ꓔꓯ ꓬꓲꓻ ꓙꓬ ꓡꓳ ꓗꓪ ꓧꓳꓽ ꓬꓯꓼ ꓙꓰ ꓝꓲˍ ꓡꓳ= ꓪꓴ-ꓢ ꓡꓰ ꓖꓷ-ꓓꓰ-ꓬꓴ ꓔꓯ ꓛꓲ ꓝꓲꓸ ꓖꓶꓽ ꓢꓲ ꓟꓷ ꓠꓷꓹ ꓡꓰ ꓬꓲꓻ ꓙꓬ ꓛꓵꓼ ꓓꓳ ꓢꓴ ꓮ ꓙꓵꓽ ꓔꓯ ꓬꓲꓼ ꓙꓰ ꓝꓲ ꓢꓲ꓾ ꓡꓯꓼ ꓚꓳꓸ ꓡꓰ ꓬꓲꓻ ꓙꓬ ꓱꓹ ꓓꓳ ꓢꓴ ꓐꓴ ꓔꓯ ꓠꓬ ꓔꓲꓹ ꓬꓰ ꓝꓲ꓾ ꓐꓯ ꓖꓶˍ ꓡꓳ= ꓖꓷ-ꓓꓰ-ꓬꓴ ꓡꓰ ꓖꓳ ꓡꓱ ꓬꓰ ꓗꓷ ꓕꓯ ꓟꓯꓼ 10000 ꓣꓳ ꓘꓴꓽ ꓗꓪ 300 ꓣꓳ ꓡꓰꓽ ꓜꓰꓻ ꓞꓹ ꓡꓳ= ꓧꓪꓸ ꓡꓰˍ ꓟ ꓕꓱ ꓟ ꓠꓬ ꓞꓳ ꓤ ꓪꓽ ꓠꓬꓲˍ ꓟ ꓗꓪ ꓐꓰ ꓟꓽ ꓥ꓾ ꓪꓴ-ꓢ ꓬꓲ ꓪꓽ ꓠꓬꓲˍ ꓟ ꓗꓪ ꓐꓰ ꓥ ꓡꓳ꓾ ꓐꓯ ꓟ ꓔꓯ ꓖꓷ-ꓓꓰ-ꓬꓴ ꓔꓯ ꓚꓵ ꓚꓵ ꓟꓸ ꓖꓶ ꓠꓲꓹ ꓫꓵˍ ꓡꓳ=

ꓖꓳ ꓕꓲ ꓦꓬꓽ ꓗꓪ ꓖꓷ-ꓓꓰ-ꓬꓴ ꓐꓰ ꓬꓲ ꓟꓯꓼ ꓜꓴ ꓐꓴ ꓠꓬ ꓟ-ꓓꓲ-ꓬ ꓐꓴ ꓟꓯꓼ ꓒꓱ ꓔꓯ ꓡꓳꓸ ꓔꓬ ꓡꓳ= ꓖꓷ-ꓓꓰ-ꓬꓴ ꓪꓴ-ꓢ ꓔꓯ ꓙꓵꓻˍ ꓐꓯ ꓥˍ ꓟꓲ ꓟ-ꓓꓲ-ꓬ ꓡ ꓞꓳ ꓐꓴ ꓠꓽ ꓮ ꓘꓶꓸ ꓟꓬꓽˍ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓖꓷ-ꓓꓰ-ꓬꓴ ꓔꓯ ꓬꓲ ꓪ ꓐꓴ ꓟꓯꓼ ꓒꓱ ꓗꓪ ꓙꓰ ꓢꓲ ꓘꓳ ꓫꓱ ꓫꓱˍ ꓐꓰ ꓙꓰ ꓠꓹ ꓟ ꓐꓯ ꓖꓶˍ ꓡꓳ=

ꓖꓷ-ꓓꓰ-ꓬꓴ ꓙꓰ ꓢꓲ ꓬꓲ ꓟꓯꓼ ꓜꓴ ꓔꓬ ꓗꓪ ꓬꓲꓼ ꓡ ꓗꓷ ꓠꓬ ꓬꓲ ꓠꓲꓹ ꓪꓴꓽ ꓪꓴꓽ ꓗꓷ ꓡꓰˍ ꓡꓳ= ꓪꓴ-ꓢ ꓠꓬ ꓬꓲ ꓠꓲꓹ ꓟ ꓔꓯ ꓝꓮꓲ ꓕꓲ ꓧꓪꓹ ꓢꓯꓼ ꓡꓴꓽ ꓖꓶ ꓗꓷꓳ= ꓖꓳ ꓗ ꓠꓯꓸ ꓖꓷ-ꓓꓰ-ꓬꓴ ꓠꓬ ꓬꓲ ꓟꓯꓼ ꓜꓴ ꓐꓴ ꓐꓰ ꓕꓲ ꓪ ꓟ-ꓓꓲ-ꓬ ꓔꓯ ꓓꓶꓽ ꓙꓰ ꓠꓹ ꓟ ꓙꓽ ꓖꓶˍ ꓡꓳ= ꓬꓲ ꓡꓰ ꓬꓲ ꓟꓯꓼ ꓐꓴ ꓔꓯ ꓐꓵ ꓛꓲ ꓕꓲ ꓣꓳ ꓕꓲ ꓗꓸ꓾ ꓮ ꓔꓳꓸ ꓧꓷꓹ ꓕꓲ ꓣꓳ ꓕꓲ ꓟ ꓐꓰ ꓮ ꓔꓳꓸ ꓧꓷꓹ ꓔꓯ ꓝꓴꓸ ꓓꓴ ꓠꓱꓸ ꓐꓬꓻ ꓕꓲ ꓣꓳ ꓕꓲ ꓟ ꓖꓶˍ ꓡꓳ=

ꓠꓯ ꓞꓲꓹ ꓟ ꓟꓶꓽ ꓘꓶꓽ ꓗꓪ ꓬꓲ ꓪ ꓐꓴ ꓠꓬ ꓟ-ꓓꓲ-ꓬ ꓟꓯꓼ ꓒꓱ ꓕꓲ ꓚꓳ ꓡꓳ ꓗꓪ ꓦꓰꓼ ꓞꓹ ꓔꓬ ꓡꓳ= ꓖꓷ-ꓓꓰ-ꓬꓴ ꓡꓰ ꓐꓵ ꓛꓲ ꓟꓵ ꓗꓷˍ ꓕꓯ ꓕꓱ ꓟ ꓠꓬ ꓮ ꓟˍ ꓟꓲ ꓚꓲ ꓛꓬ ꓐꓵ ꓛꓲ ꓔꓯ ꓟꓵ ꓠꓹ ꓟ ꓬꓲ ꓢꓷꓸ ꓡꓰ ꓓꓴ ꓥ ꓡꓳ= ꓖꓳ ꓗ ꓠꓯꓸ ꓬꓲ ꓪ ꓠꓬ ꓬꓲ ꓪ ꓔꓯꓹ ꓔ ꓟ ꓠꓱꓸ ꓐꓬꓻ ꓔꓯ ꓲ’ꓼ ꓛꓱꓼ ꓗꓷ ꓢꓲ꓾ “ꓪꓴ-ꓢ ꓐꓰ ꓖꓷ-ꓓꓰ-ꓬꓴ ꓐꓱ ꓶ” ꓐꓯ ꓢꓲ ꓘꓴ ꓔꓴ ꓠꓯꓹ ꓟ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ=

ꓬꓲ ꓪ ꓥˍ ꓟꓲ ꓖꓷ-ꓓꓰ-ꓬꓴ ꓐꓯ ꓔ ꓟˍ ꓡꓰ ꓐꓰ꓾ ꓟꓯꓼ 300 ꓣꓳ ꓟ ꓠꓬ ꓬꓲ ꓪ ꓐꓵ ꓛꓲ ꓔꓯ ꓟꓵ ꓔꓴ ꓡ ꓢꓲ ꓠꓱꓸ ꓐꓬꓻ ꓔꓯ ꓲ’ꓼ ꓛꓱꓼ ꓗꓷˍ ꓡꓳ= ꓠꓱꓸ ꓐꓬꓻ ꓲ’ꓼ ꓛꓱꓼˍ ꓕꓯ ꓓꓳꓻ ꓡ ꓟ ꓢꓯꓼ ꓠꓬ ꓡꓳ ꓖꓳ ꓕꓲ ꓟ ꓡꓱꓸꓼ ꓗꓪ ꓐꓲ ꓞꓹ ꓢꓲ꓾ ꓬꓲꓼ ꓟꓶ ꓔꓬ ꓟ ꓟ-ꓓꓲ-ꓬ ꓡ ꓞꓳ ꓐꓴ ꓠꓬ ꓧꓪꓸ ꓛꓲꓽ ꓡ ꓢꓲ ꓠꓬꓲ ꓙꓳꓺ ꓔꓬ ꓖꓴˍ ꓡꓳ= ꓬꓲ ꓪ ꓠꓬ ꓬꓲ-ꓢꓷ-ꓡꓰ ꓐꓴ ꓐꓰ ꓢꓰꓼ ꓡꓯ ꓘꓳ ꓔꓬ ꓡꓳ ꓐꓰ ꓓꓵꓽ ꓙ ꓢꓲ ꓬꓲ ꓪ ꓛꓳ ꓬꓲ ꓪ ꓢꓰꓼ ꓡꓯ ꓘꓳ ꓢꓲ ꓠꓬꓲ꓾ ꓕꓲ ꓐꓱ ꓠꓬ ꓒ ꓕꓲ ꓗꓪ ꓟ ꓡꓳ ꓒꓱ ꓐꓴ ꓗꓪ ꓛꓰꓹ ꓙꓰˍ ꓡꓳ=

ꓖꓷ-ꓓꓰ-ꓬꓴ ꓐꓰ ꓬꓲ ꓟꓯꓼ 300 ꓣꓳ ꓐꓴ ꓠꓬ ꓛꓰꓹ ꓙꓰ ꓟ ꓟ-ꓓꓲ-ꓬ ꓡ ꓞꓳ ꓐꓴ ꓔꓯ ꓖꓼ ꓢꓲ ꓢꓰꓼ ꓗꓷ ꓢꓲ ꓠꓬꓲ꓾ ꓖꓳ ꓕꓲ ꓠꓬꓲ ꓗꓪ ꓪꓴ-ꓢ ꓠꓬ ꓟ-ꓓꓲ-ꓬ ꓡ ꓞꓳ ꓐꓴ ꓔꓯ ꓬꓲ-ꓢꓷ-ꓡꓰ ꓐꓴ ꓡꓯꓽ ꓒꓯꓹ ꓗꓪ ꓡꓯꓼ ꓙꓱ ꓗꓷˍ ꓡꓳ=

ꓪꓴ-ꓢ ꓠꓬ ꓪꓴ-ꓢ ꓚꓵ ꓚꓵ ꓥ ꓟ ꓐꓰ ꓬꓲ ꓠꓬ ꓬꓲ ꓑ ꓫꓬ ꓐꓴ ꓔꓯ ꓶꓼ ꓤ ꓫꓱꓹ ꓤ ꓖꓶ ꓢꓲ ꓬꓰ ꓙ ꓖꓶ ꓠꓲꓹ ꓫꓵˍ ꓟ ꓔꓯ ꓝꓮꓲ ꓕꓲ ꓧꓪꓹ ꓢꓷꓸ ꓡꓰ ꓝꓲ ꓗꓷꓳ= ꓬꓲ-ꓢꓷ-ꓡꓰ ꓮ ꓙꓵꓽ ꓥˍ ꓟꓲ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓪꓴꓸ ꓓꓵ ꓕꓱꓼ ꓢꓲ ꓬꓲ ꓕꓲ ꓣꓳ ꓔꓯ ꓡꓰꓽ ꓣꓱꓽ ꓙ ꓠꓯꓹ ꓟ ꓔꓯ ꓥˍꓟꓲ ꓟꓳꓸ ꓖꓶ ꓗꓷꓳ=