ꓣꓳ‐ꓟ ꓪ ꓔꓲ ꓐꓴ ꓡꓰ ꓪꓴ‐ꓢ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓓꓴ ꓟꓶ ꓓꓴ ꓮ ꓟꓬ, ꓛꓲ ꓬꓰ ꓟ ꓚꓱ,

ꓣꓳ‐ꓟ ꓪ ꓔꓲ ꓐꓴ ꓡꓰ ꓪꓴ‐ꓢ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓓꓴ ꓟꓶ ꓓꓴ ꓮ ꓟꓬ, ꓛꓲ ꓬꓰ ꓟ ꓚꓱ,

ꓮꓓ (250) ꓘꓳꓼ ꓟꓽ ꓛꓲ ꓢꓲ ꓕꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓗꓴꓷꓼ ꓬꓲ. ꓔꓶ. ꓮ ꓟꓬ, ꓗꓪ ꓫ. ꓓꓴ ꓟꓶ ꓓꓴ ꓮ ꓟꓬ, ꓖꓶ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓣꓳ‐ꓟ ꓗꓴꓷꓼ ꓗꓪ ꓪ ꓔꓲ ꓙꓵꓽ ꓢꓴ ꓠꓬ ꓰꓟꓑꓰꓣꓳꓣ ꓓꓰꓚꓲꓴꓢ ꓥ ꓡꓳ꓿ ꓪ ꓔꓲ ꓠꓬ ꓬꓲ. ꓡꓰ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓟ ꓙꓵ, ꓕꓯ ꓙꓲ‐‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓠ, ꓟ ꓟꓯꓼ ꓜꓴꓻ ꓔꓯ ꓒꓴ ꓗꓷ ꓟ ꓥ ꓡꓳ꓿ ꓪ ꓔꓲ ꓰꓟꓑꓣꓳꓣ ꓠꓰꓣꓳ ꓡꓰ ꓣꓳ‐ꓟ ꓗꓴꓷꓼ ꓔꓯ ꓙꓵꓽ ꓟ (64‐68) ꓘꓳꓼ ꓕꓯ ꓣꓳ‐ꓟ ꓕꓲ ꓗꓴꓷꓼ ꓡꓱ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓥ ꓡꓳ꓿

ꓝꓮꓲ ꓪ ꓔꓲ ꓰꓟꓑꓰꓣꓳꓣ ꓓꓳꓟꓲꓔꓲꓮꓠ (65‐69) ꓘꓳꓼ ꓔꓯ ꓣꓳ‐ꓟ ꓗꓴꓷꓼ ꓗꓪ ꓙꓵꓽ ꓐꓴ ꓗꓪ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓙꓵ, ꓟꓲ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓐꓴ ꓔꓯ ꓢꓰꓼ ꓥ ꓐꓯ ꓠꓬ ꓬꓲ. ꓪ ꓠꓬ ꓪꓴ‐ꓢ ꓦꓻ ꓡꓰ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓒꓬꓱꓼ ꓡ ꓟ ꓪꓴ. ꓠꓬꓲ ꓥ ꓡꓳ꓿ ꓪ‐ꓔꓲ ꓬꓲ ꓮ‐ꓬꓲ ꓕꓲ ꓣꓳ ꓔꓯ ꓥ ꓟꓲ ꓢꓰꓼ ꓗꓷ ꓟ ꓥ ꓡꓳ꓿ ꓝꓮꓲ ꓪ ꓔꓲ ꓬꓲ ꓦꓲꓻ ꓢꓲꓽ ꓟ ꓔꓯ ꓥ ꓟꓲ ꓡ ꓞꓳ ꓟꓽ ꓔꓬ ꓟ ꓟꓵꓽ ꓗꓪ ꓔꓬ ꓗꓷ ꓝꓲ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓠꓬ ꓝꓲ ꓓꓴ ꓬꓳ‐ꓦ ꓔꓯ ꓗꓴꓷꓼ ꓙꓵꓽ ꓢꓴ  ꓪ ꓔꓲ ꓐꓴ ꓡꓰ ꓮ ꓟꓬ, ꓛꓲ ꓞ, ꓟ ꓮ.‐ꓔꓳ. ꓐꓱ ꓗꓪ ꓞꓲ; ꓩꓴ ꓥ ꓟꓲ ꓝꓲ ꓓꓴ ꓬꓳ‐ꓦ ꓠꓬ ꓟꓽ ꓫꓵꓻ ꓟ ꓪꓴ. ꓠꓬꓲ ꓑꓮMOꓢ ꓟꓬꓱꓺ ꓔ ꓟ ꓟꓵꓽ ꓗꓪ ꓔꓬ ꓝꓲ ꓟ ꓥ ꓡꓳ꓿

ꓣꓳ‐ꓟ ꓪ ꓔꓲ ꓰꓟꓑꓰꓣꓳꓣ ꓔꓣꓮꓙꓮꓠ (98‐117) ꓙꓵꓽ ꓟ ꓙꓵ, ꓕꓯ ꓝꓲ ꓓꓴ ꓒꓲ‐ꓕꓱ ꓔꓯ ꓢꓰꓼ ꓗꓷ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓢꓴ (ꓔꓧꓰ ꓐꓲꓢꓧꓲꓑ ꓳꓝ ꓙꓰꓣꓴꓢꓮꓡꓰꓟ ) ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓓꓽ ꓪꓴ. ꓕꓲ ꓣꓳ ꓟ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ ꓟꓲ ꓥ ꓡꓳ꓿ ꓖꓳ ꓗ. ꓠꓯ ꓡꓲ ꓣꓳ ꓕꓲ ꓣꓳ ꓔꓲꓺ ꓒ ꓪ ꓔꓲ ꓥ ꓟ (ꓢꓔ.ꓚꓡꓰꓟꓰꓠꓔ) ꓔꓯ ꓥ ꓟꓲ ꓣꓳ‐ꓟ ꓪ ꓔꓲ ꓡꓰ ꓙꓵ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷ ꓟ ꓔꓯ ꓔꓳ, ꓜꓳ ꓡꓰꓳ꓿ ꓙꓲꓻ ꓫꓬ ꓢꓴ ꓮꓠꓔꓲꓳꓚꓧ ꓡꓳ ꓒꓱ ꓗꓪ ꓐꓰ ꓲꓖꓠꓮꓔꓲꓴꓢ ꓔꓯ ꓥ ꓟꓲ ꓡ‐ꓟ ꓜ ꓖꓶ ꓜꓽ ꓖꓶ ꓟ ꓔꓯ ꓔꓳ, ꓜꓳ ꓡꓰꓳ꓿ ꓖꓳ ꓕꓲ ꓙꓵ, ꓗꓪ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓐꓴ ꓠꓬ ꓗꓴꓷꓼ ꓫꓵꓽ ꓪꓴꓽ ꓫꓬ, ꓒꓽ ꓕꓯ ꓢꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓠ, ꓟ ꓠꓲ, ꓟ ꓐꓽ ꓢꓴ ꓐꓴ ꓥ ꓡꓳ꓿

ꓝꓮꓲ ꓣꓳ‐ꓟ ꓪ ꓔꓲ ꓰꓟꓑꓰꓣꓳꓣ ꓔꓣꓮꓙꓮꓠ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟꓽ ꓠꓽ ꓠꓬꓲꓽ ꓠꓬꓲ ꓟꓽ ꓢꓰꓼ ꓠ, ꓟ ꓕꓳꓽ ꓶ ꓗꓪ ꓐꓳ ꓗꓷ ꓟ ꓥ ꓡꓳ꓿ ꓕꓱ ꓡꓱ ꓪ ꓔꓲ ꓡꓰ ꓙꓵꓽ ꓪ ꓐꓯ ꓑꓶ ꓔ ꓟ ꓔꓯ ꓟꓽ ꓠꓽ ꓡꓳ ꓢꓴ ꓐꓴ ꓔꓯ ꓝꓴꓲ ꓖꓶ ꓓꓴ ꓥ ꓡꓳ ꓐꓰ ꓐꓯ ꓔ ꓡꓳ꓿  ꓪ ꓔꓲ ꓰꓟꓑꓰꓣꓳꓣ ꓮꓠꓔꓳꓠꓲꓟꓴꓢ ꓑꓲꓴꓢ (156)   ꓠꓬ ꓙꓲꓻ ꓫꓬ ꓢꓴ ꓑꓳꓡꓬꓚꓮꓣꓑ ꓔꓯ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓗꓷꓳ꓿ ꓙꓲꓻ ꓫꓬ ꓢꓴ ꓑꓳꓡꓬꓚꓮꓣꓑ ꓔꓯ ꓟꓽ ꓢꓰꓼ ꓟ ꓙꓵ, ꓔꓯ ꓞꓳꓻ ꓔ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓙꓲꓻ ꓫꓬ ꓢꓴ ꓑꓳꓡꓬꓚꓮꓣꓑ ꓔꓯ ꓟꓽ ꓢꓰꓼ ꓠ, ꓟ ꓓꓰꓽ ꓗꓷ ꓟ ꓥ ꓡꓳ꓿ ꓣꓳ‐ꓟ ꓪ ꓔꓲ ꓐꓴ ꓡꓰ ꓙꓲꓻ ꓫꓬ ꓢꓴ ꓑꓳꓡꓬꓚꓮꓣꓑ ꓔꓯ ꓮ.‐ꓔꓳ ꓛꓴ ꓢꓰꓼ ꓗꓷ ꓟ ꓥ ꓡꓳ꓿

ꓣꓳ‐ꓟ ꓪ ꓔꓲ ꓰꓟꓑꓰꓣꓳꓣ ꓟꓮꓣꓚꓴꓢ ꓮꓴꓣꓰꓡꓲꓴꓢ (161‐180) ꓠꓬ ꓗꓴꓷꓼ ꓙꓵꓽ ꓟ ꓙꓵ, ꓔꓯ ꓟꓲ ꓠꓯ ꓢꓷ. ꓠꓲ, ꓣꓱ ꓢꓲ ꓠꓬꓲ ꓙꓵꓽ ꓢꓴ ꓪ ꓔꓲ ꓥ ꓡꓳ꓿ ꓪ ꓔꓲ ꓠꓬ ꓟꓲ ꓠꓯ ꓢꓷ. ꓠꓲ, ꓮ ꓟꓬ, ꓓꓻ ꓒꓽ ꓕꓲ ꓣꓳ ꓥ ꓟ ꓬꓲ. ꓡꓰ ꓐꓳ ꓔ ꓟ ꓕꓳꓽ ꓶ ꓗꓪ ꓐꓰ ꓢꓷ. ꓪ ꓓ ꓡꓳ꓿ ꓪ ꓔꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ. ꓓꓴ ꓟꓷꓼ ꓢꓴ ꓕꓲ ꓫꓵꓽ ꓟꓲ ꓟꓽ ꓖꓶ ꓢꓴ ꓥ ꓟꓲ ꓬꓲ. ꓠꓬ ꓙꓲ‐ꓢꓴ ꓢꓲꓺꓤ  ꓐꓴ ꓔꓯ ꓡꓳ. ꓛꓳ ꓟꓽ ꓠꓲ, ꓫꓵꓺ ꓢꓴ ꓕꓲ ꓣꓳ ꓥ ꓡꓳ꓿ ꓮ ꓫꓵꓽ ꓑꓶ. ꓢꓴ ꓥ ꓐꓯ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓡꓰ ꓮ ꓕꓯ ꓥ ꓟꓲ ꓢꓰꓼ ꓟ ꓐꓰ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ. ꓡꓰ ꓐꓳ ꓔ ꓟ ꓕꓳ ꓶ ꓗꓪ ꓮ ꓟ ꓥ ꓟꓲ ꓜꓴꓻ ꓒꓴ ꓟꓽ ꓓ ꓐꓰ ꓐꓳ ꓔ ꓟ ꓥ ꓡꓳ꓿ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓪ ꓔꓲ ꓐꓴ ꓫꓵꓽ ꓤ ꓪꓳꓽ ꓤ ꓐꓴ ꓔꓯ ꓡ ꓞꓳ ꓟꓽ ꓔꓬ ꓟ ꓟꓵꓽ ꓗꓪ ꓔꓬ ꓝꓲ ꓢꓲ ꓠꓬꓲ ꓑ ꓫꓬ ꓐꓴ ꓔꓯ ꓠꓬ ꓢꓰꓼ ꓠ, ꓟ ꓕꓳ ꓶ ꓗꓪ ꓐꓳ ꓔ ꓟ ꓥ ꓡꓳ꓿