ꓬꓴ-ꓔ ꓡ ꓞꓳ ꓐꓴ ꓔꓯ ꓐ-ꓐꓲ-ꓡꓶꓽ ꓗꓪ ꓡꓳꓽ ꓔꓯꓹ ꓙꓰˍ ꓟ

ꓗꓳꓸ ꓗꓷ ꓟ ꓮ ꓟꓬꓹ ꓘꓳꓼ ꓕꓯ ꓡꓰ ꓟꓷꓽ ꓠꓷꓹ ꓝ ꓒ ꓐꓴ ꓗꓪ ꓐꓰ ꓙꓳꓺ ꓗꓽ ꓓꓴ ꓮ ꓟꓬꓹ ꓓꓳꓻ ꓡꓻ ꓗꓷꓳ= ꓪꓴ-ꓢ ꓠꓬ ꓬꓲ ꓑ ꓫꓬ ꓐꓴ ꓔꓯ ꓬꓲ ꓪ ꓐꓴ ꓝꓴꓲꓸ ꓬꓰˍ ꓟ ꓗꓪ ꓐꓰ ꓡꓲꓹ ꓙꓰ ꓟꓶ ꓠꓹ ꓟ ꓪꓴ-ꓢ ꓠꓬ ꓠꓲꓹ ꓟ ꓫꓵꓺ ꓢꓲ ꓡꓳꓸ ꓠꓬꓹ ꓗꓷꓳ= ꓟꓷꓽ ꓠꓷꓹ ꓝ ꓒ ꓬꓰ-ꓡꓲ-ꓟꓲ ꓠꓬ ꓬꓴ-ꓔ ꓟꓵꓽ ꓔꓯ ꓥꓶˍ ꓟ ꓟꓬꓱꓽ ꓬꓰˍ ꓟ ꓔꓯ ꓟꓽ ꓠꓽ ꓗꓷ ꓕꓯ ꓠꓽ ꓮ ꓡꓰ ꓫꓵꓽ ꓙꓳꓺ ꓓꓴ ꓔꓳꓹ ꓜꓳꓽ ꓡ ꓟ ꓔꓯ ꓐꓯ ꓟꓳꓸ ꓖꓶ ꓗꓷꓳ= (ꓬꓰ-ꓡꓲ-ꓟꓲ 25ꓽ1-14)

ꓖꓳ ꓡꓱ ꓥˍ ꓟꓲ ꓬꓴ-ꓔ ꓡ ꓞꓳ ꓐꓴ ꓠꓬ ꓠꓲꓹ ꓟ ꓩꓴ ꓢꓲ ꓥꓶˍ ꓟ ꓔꓯ ꓡꓰꓽ ꓬꓰˍ ꓡꓳ= ꓬꓴ-ꓔ ꓪ ꓔꓲ ꓬꓳ-ꓢꓲ-ꓬ ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓕꓲ ꓗꓴꓷꓼ ꓡꓱꓸꓼ ꓗꓪ ꓠꓲꓹ ꓟ ꓡꓶꓸˍ ꓟ ꓔꓯ ꓬꓰ ꓢꓲ ꓢꓯꓼ ꓕꓵꓼ ꓗꓷ ꓥˍ ꓟꓲ꓾ ꓗꓴꓷꓼ ꓠꓬ ꓮ ꓟꓬꓹ ꓘꓳꓼ ꓐꓬ ꓡꓰˍ ꓟ ꓫꓵꓽ ꓪꓴ ꓔꓯ ꓔꓳꓹ ꓜꓳꓽ ꓪ ꓡꓰ ꓗꓷꓳ= ꓪ ꓔꓲ ꓬꓳ-ꓢꓲ-ꓬ ꓫꓵꓻ ꓗꓷˍ ꓕꓯ ꓑ ꓫꓬ ꓐꓴ ꓠꓬ ꓠꓲꓽ ꓐꓬꓱꓽ ꓢꓲꓺ ꓐꓬꓱꓽ ꓔꓯ ꓦ ꓡꓱ ꓢꓲ ꓢꓲ ꓒ ꓪꓴ-ꓢ ꓔꓯ ꓟꓽ ꓠ ꓡꓳꓸ ꓢꓲ ꓚꓲꓸ ꓛꓬ ꓚꓱꓹ ꓐꓰꓽ ꓗꓪ ꓡꓰꓽ ꓚꓱꓹ ꓬꓲꓼ ꓙꓰ ꓗꓷꓳ=

ꓖꓳ ꓡꓱ ꓠꓬꓲ ꓐꓯ ꓟꓴ ꓘꓶꓽˍ ꓟ ꓦꓬꓼ ꓠꓬꓲ ꓛꓲꓺ ꓡꓺꓳ= ꓪꓴ-ꓢ ꓠꓬ ꓬꓲ ꓡ ꓞꓳ ꓐꓴ ꓔꓯ ꓬꓴ-ꓔ ꓟꓵꓽ ꓗꓪ ꓐꓰ ꓐ-ꓐꓲ-ꓡꓶ ꓗꓪ ꓬꓲ ꓘꓳꓼ 70 ꓘꓳꓼ ꓗꓪ ꓛꓲꓺ ꓡꓳꓽ ꓔꓯꓹ ꓙꓰ ꓠꓹ ꓟ ꓐ-ꓐꓲ-ꓡꓶ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓔꓯ ꓣꓱꓽ ꓗꓷꓳ=

ꓬꓰ-ꓧꓳ-ꓬ-ꓘꓷ-ꓟꓷ ꓪ ꓔꓲ ꓣꓱꓽˍ ꓟ ꓦꓬꓼ ꓠꓬꓲ ꓕꓯ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓬꓴ-ꓔ ꓟꓵꓽ ꓗꓪ ꓙꓰˍ ꓡꓳ= ꓬꓲ ꓠꓬ ꓪ ꓔꓲ ꓬꓰ-ꓧꓳ-ꓬ-ꓘꓷ-ꓟꓷ ꓔꓯ ꓧꓳꓹ ꓚꓺ ꓡꓰ ꓞꓳꓹ ꓢꓲ ꓐ-ꓐꓲ-ꓡꓶ ꓗꓪ ꓣꓴ ꓔꓯꓹ ꓙꓰˍ ꓡꓳ= ꓬꓴ-ꓔ ꓟꓵꓽ ꓗꓪ ꓟ ꓡ ꓞꓳ ꓮ ꓟꓬꓹ ꓔꓯ ꓥˍ ꓟꓲ ꓡꓳꓽ ꓔꓯꓹ ꓙꓰꓳ꓾ ꓪꓴ-ꓢ ꓦꓲ ꓗꓪ ꓐꓰ ꓒꓵꓽˍ ꓡꓳ ꓫꓵꓽ ꓮ ꓙꓵꓽ ꓔꓯ ꓥˍ ꓟꓲ ꓣꓴ ꓔꓯꓹ ꓙꓰ ꓗꓷ ꓢꓲ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓜꓷ-ꓓꓳ-ꓘꓷ-ꓬ ꓔꓯ ꓬꓴ-ꓔ ꓪ ꓔꓲ ꓣꓱꓽ ꓝꓲˍ ꓡꓳ=

ꓬꓴ-ꓔ ꓡ ꓞꓳ ꓐꓴ ꓠꓬ ꓪꓴ-ꓢ ꓔꓯ ꓒꓳꓹ ꓔꓳꓹ ꓗꓷꓳ= ꓜꓷ-ꓓꓷ-ꓘꓷ-ꓬ ꓥˍ ꓟꓲ ꓠꓱ-ꓐꓴ-ꓘꓹ-ꓠꓱ-ꓤ ꓔꓯ ꓒꓳꓹ ꓔꓳꓹ ꓗꓷ ꓢꓲ꓾ ꓪꓴ-ꓢ ꓠꓬ ꓬꓲ ꓦꓶꓻ ꓠꓲꓹ ꓔꓯ ꓬꓴ-ꓔ ꓡ ꓞꓳ ꓐꓴ ꓕꓯꓽ ꓢꓲ ꓗꓪ ꓬꓯꓼ ꓡ ꓝꓲꓳ= ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓢꓴ ꓐꓴ ꓔꓯ ꓟꓽ ꓫꓱꓸ ꓤ ꓖꓶ= ꓐ-ꓐꓲ-ꓡꓶ ꓡ ꓞꓳ ꓐꓴ ꓠꓬ ꓪꓴ-ꓢ ꓦꓲ ꓐꓰ ꓪ ꓔꓲ ꓦꓲ ꓔꓯ ꓮ ꓔꓳꓸ ꓛꓴ ꓗꓷꓳ= ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓚꓬꓹ ꓔꓯ ꓥˍ ꓟꓲ ꓒꓬꓹ ꓦ ꓗꓷꓳ= ꓠꓱ-ꓐꓴ-ꓘꓹ-ꓠꓱ-ꓤ ꓬꓲ ꓟꓯꓼ ꓜꓴꓻ ꓐꓴ ꓠꓬ ꓡ ꓞꓳ ꓮ ꓟꓬꓹ ꓔꓯ ꓚꓳ ꓑꓸ ꓬꓰ ꓝꓲ ꓠꓹ ꓟ ꓐ-ꓐꓲ-ꓡꓶ ꓗꓪ ꓡꓳꓽ ꓔꓯꓹ ꓙꓰ ꓗꓷꓳ= ꓫꓸ ꓟ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓡꓰꓽ ꓬꓲ ꓪ ꓟꓵꓽ ꓗꓪ ꓔꓲꓹ ꓢꓲ ꓟꓬꓱꓽ ꓬꓰ ꓝꓲˍ ꓡꓳ= ꓬꓴ-ꓔ ꓡ ꓞꓳ ꓐꓴ ꓠꓬ ꓐ-ꓐꓲ-ꓡꓶ ꓗꓪ ꓚꓳ ꓑ ꓬꓰ ꓢꓲ ꓪ ꓔꓲ ꓔꓯ ꓬꓲ ꓘꓳꓼ 70 ꓘꓳꓼ ꓛꓲꓺ ꓣꓱꓽ ꓙ ꓠ ꓗꓷ ꓡꓰꓳ=

ꓪꓴ-ꓢ ꓠꓬ ꓬꓲ ꓡ ꓞꓳ ꓐꓴ ꓔꓯ ꓬꓲ ꓪ ꓛꓬꓻ ꓗꓷ ꓟ ꓝꓴꓲꓸ ꓐꓱ ꓶ꓾ ꓬꓲ ꓔꓯ ꓟꓽ ꓠ ꓡꓳꓸ ꓟ ꓝꓴꓲꓸ ꓐꓱ ꓶ ꓝꓴꓲꓸ ꓖꓶꓽ ꓙꓵꓽ ꓪ ꓙꓳˍ ꓥ ꓟꓲ꓾ ꓬꓲ ꓡ ꓞꓳ ꓐꓴ ꓔꓯ ꓕꓲ ꓞꓲꓼ ꓕꓲ ꓑ ꓟꓽ ꓡꓳ ꓒꓰꓹ ꓗꓷ= ꓗ ꓠꓯꓸ ꓕꓯ ꓪ ꓔꓲ ꓠꓲꓹ ꓟ ꓔꓯ ꓠꓴꓽ ꓡꓰ ꓝꓲ ꓢꓲ ꓠꓬꓲ ꓬꓲ ꓡ ꓞꓳ ꓐꓴ ꓔꓯ ꓬꓲ ꓪ ꓟꓵꓽ ꓗꓪ ꓬꓲꓼ ꓡ ꓝꓲˍ ꓡꓳ= ꓝꓮꓲ ꓠꓬ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓗꓪ ꓐꓰ ꓪ ꓔꓲ ꓕꓲ ꓣꓳ ꓔꓯ ꓖꓶˍ ꓥꓳ ꓐꓰ ꓪꓵꓼ ꓘꓶꓽ ꓖꓶ ꓔ ꓟ ꓔꓯ ꓥˍ ꓟꓲ ꓐꓲ ꓡꓰ ꓝꓲˍ ꓡꓳ= ꓡꓳꓹ ꓬꓰˍ ꓕꓯ ꓪꓴ-ꓢ ꓠꓬ ꓣꓳ ꓝꓴꓲꓸ ꓐꓱ ꓶ ꓬꓲ ꓤ ꓔꓲꓸ ꓬꓰ-ꓢꓴ ꓙꓲ-ꓢꓴ ꓢꓯꓼ ꓟꓬ ꓐꓰ ꓑ ꓗꓷꓳ= ꓡꓳꓹ ꓬꓰˍ ꓗꓪ ꓪꓴ-ꓢ ꓠꓬ ꓬꓲ ꓔꓯ ꓕꓲ ꓞꓲꓼ ꓕꓲ ꓑ ꓟ ꓪ ꓔꓲ ꓒꓬꓱꓼ ꓡ ꓝꓲ ꓗꓷꓳ=