ꓘꓪꓽ ꓘꓪꓽ ꓢꓶꓽ ꓙꓲꓻ ꓖꓴ ꓙꓳˍ ꓟ

ꓘꓪꓽ ꓘꓪꓽ ꓢꓶꓽ ꓙꓲꓻ ꓖꓴ ꓙꓳˍ ꓟ

ꓕꓱ ꓕꓲ ꓠꓽ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱꓹ ꓔꓯ ꓐꓯ ꓟꓸ ꓖꓶˍ ꓟ ꓙꓵꓹ ꓗꓪ ꓘꓪꓽ ꓘꓪꓽ ꓢꓶꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓠꓲꓹ ꓫꓵˍ ꓡꓳ=

ꓘꓪꓽ ꓘꓪꓽ ꓢꓶꓽ ꓕꓱ ꓟ ꓔꓯ ꓠꓬ ꓮꓽ ꓟˍ ꓟꓲ ꓟꓳꓻ ꓠꓬꓲˍ ꓥꓳ꓾ ꓢꓷꓸˍ ꓥꓳ= ꓘꓪꓽ ꓘꓪꓽ ꓢꓶꓽ ꓕꓱ ꓟ ꓮ ꓡꓲ ꓟꓬ ꓗꓪ ꓛꓲ ꓙꓲꓻ ꓖꓴ ꓙꓳˍ ꓟ ꓔꓯ ꓟꓬꓽ ꓠꓬꓲ ꓠꓬ ꓟꓽ ꓢꓷꓸ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓮ ꓡꓲ ꓟꓬ ꓗꓪ ꓛꓲ ꓙꓲꓻ ꓖꓴ ꓙꓳˍ ꓡ? ꓐꓯ ꓟ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

(1) ꓚꓮꓠꓚꓰꓣ ꓔꓯ ꓗꓽ ꓔꓸ ꓙ ꓖꓶˍ ꓡꓳ= ꓘꓪꓽ ꓘꓪꓽ ꓢꓶꓽ ꓠꓬ ꓚꓮꓠꓚꓰꓣ ꓔꓯ ꓗꓽ ꓕꓸ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ ꓚꓮꓠꓚꓰꓣ ꓠꓻ ꓫꓬꓹ ꓕꓯ ꓥˍ ꓟꓲ ꓣꓱꓽ ꓬꓯꓼˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓓꓴ ꓐꓱ ꓶ ꓬꓲ ꓢꓯꓼ ꓮ ꓟꓬꓹ ꓓꓵˍ ꓟ ꓡꓰꓽ ꓟꓽ ꓞꓲꓺ ꓚꓮꓠꓚꓰꓣ ꓚꓰꓡꓡ ꓐꓴ ꓟꓽ ꓟꓬꓽ ꓡ ꓠꓹ ꓟ ꓐꓱ ꓶˍ ꓟꓲ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ= ꓘꓪꓽ ꓘꓪꓽ ꓢꓶꓽ ꓕꓱ ꓟ ꓔꓯ ꓮ ꓠꓱ ꓟ ꓦꓬꓼ ꓠꓬꓲ ꓕꓯ ꓡꓰ ꓚꓮꓠꓚꓰꓣ ꓠꓻ ꓗꓽ ꓕꓸ ꓠꓹ ꓟ ꓐꓱ ꓶ ꓣꓱꓽ ꓩꓴ ꓡ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

(2)   ꓖꓳ ꓓꓱꓽ ꓗꓪ ꓘꓳꓼ ꓠꓻ ꓡˍ ꓟ ꓔꓯ ꓓꓻ ꓡꓰ ꓝꓲˍ ꓡꓳ= ꓘꓪꓽ ꓘꓪꓽ ꓢꓶꓽ ꓠꓬ ꓖꓳ ꓓꓱꓽ ꓠꓻˍ ꓟ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ= ꓘꓪꓽ ꓘꓪꓽ ꓢꓶꓽ ꓗꓪ ꓐꓹˍ ꓟ ꓬꓲ ꓢꓯꓼ ꓕꓲ ꓙꓰꓽ ꓠꓬ ꓖꓳ ꓓꓱꓽ ꓠꓻˍ ꓟ ꓔꓯ ꓓꓻ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ꓾ ꓳˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓟ ꓢꓯꓼ ꓙꓳˍ ꓡꓳ=

(3) ꓳ ꓡˍ ꓟ ꓔꓯˍ ꓟꓲ ꓓꓻ ꓡꓰ ꓝꓲˍ ꓡꓳ= ꓕꓲ ꓐꓱ ꓡꓯ ꓐꓲꓺ ꓠꓻˍ ꓟ꓾ ꓟꓶꓽ ꓠꓷꓹ ꓘꓴꓽ ꓗꓪ ꓬꓲ ꓑꓺ ꓓꓲꓻ ꓢꓲ ꓳ ꓠꓻˍ ꓟ ꓔꓯ ꓓꓻ ꓡꓰ ꓠꓹ ꓟ ꓐꓱ ꓶ ꓘꓪꓽ ꓘꓪꓽ ꓢꓶꓽ ꓔꓯ ꓜꓽ ꓐ ꓡˍ ꓡꓳ= ꓕꓲ ꓫꓵꓽ ꓫꓵꓽ ꓑꓶꓸ ꓓꓴ ꓠꓻ ꓓꓴ ꓡꓰ ꓢꓲ ꓠꓻ ꓡˍ ꓟ ꓐꓱ ꓶˍ ꓟꓲ ꓘꓪꓽ ꓘꓪꓽ ꓢꓶꓽ ꓜꓽ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

4 ꓬꓲ ꓑꓺ ꓐꓴ ꓔꓯ ꓥˍ ꓟꓲ ꓓꓻ ꓡꓰ ꓝꓲˍ ꓡꓳ= ꓧꓪꓽ ꓗꓴꓹ ꓙꓲꓻ ꓗꓪ ꓒꓬꓱꓼ ꓡˍ ꓟ ꓬꓲ ꓑꓺ ꓐꓴ ꓓꓻ ꓡꓰ ꓠꓹ ꓟ ꓐꓱ ꓶ ꓘꓪꓽ ꓘꓪꓽ ꓢꓶꓽ ꓔꓯ ꓜꓽ ꓐ ꓡˍ ꓟ ꓥ ꓡꓳ=

(5) ꓛꓴꓻ ꓢꓯꓼ ꓔꓯ ꓥ ꓟꓲ ꓞꓰꓻ ꓡꓰ ꓝꓲ ꓐ ꓡˍ ꓡꓳ= ꓘꓪꓽ ꓘꓪꓽ ꓢꓶꓽ ꓔꓯ ꓜꓽ ꓖꓶˍ ꓟ ꓠꓬ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓢꓯꓼ ꓙꓳ ꓡ ꓝꓲ ꓢꓲ ꓠꓻ ꓤ ꓒꓬꓽ ꓤ ꓐꓴ ꓔꓯ ꓓꓻ ꓡꓰ ꓝꓲ ꓐ ꓡˍ ꓡꓳ= ꓫꓬ ꓫꓬ ꓡꓰꓽ ꓞꓲꓽ ꓢꓲ ꓚꓬꓸ ꓔ ꓟ ꓘꓪꓽ ꓘꓪꓽ ꓢꓶꓽ ꓪꓳꓽ ꓬꓲꓻ ꓓꓳꓻ ꓖꓶˍ ꓕꓯ ꓛꓴꓻ ꓢꓯꓼ ꓞꓰꓻ ꓡꓰ ꓠꓹ ꓟ ꓐꓱ ꓶ ꓮ ꓟꓬꓹ ꓬꓰ ꓙ ꓖꓶˍ ꓡꓳ=

(6) ꓐꓰꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓥ ꓟꓲ ꓖꓼ ꓓꓳ ꓖꓶ ꓐ ꓡˍ ꓡꓳ= ꓘꓪꓽ ꓘꓪꓽ ꓢꓶꓽ ꓗꓪ ꓐꓰꓚꓔꓰꓣꓲꓮ ꓐꓶꓽ ꓓꓲꓻ ꓐꓴ ꓔꓯ ꓖꓼ ꓓꓳ ꓖꓶ ꓐ ꓡˍ ꓟ ꓢꓯꓼ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓗꓪ ꓠꓻ ꓐꓶꓽ ꓓꓲꓻ ꓗꓽ ꓕꓸ ꓠꓹ ꓟ ꓐꓱ ꓶ ꓜꓽ ꓐ ꓡˍ ꓟ ꓥ ꓡꓳ= ꓝꓮꓲ ꓘꓪꓽ ꓘꓪꓽ ꓢꓶꓽ ꓜꓽˍ ꓟ ꓗꓪ ꓐꓰ ꓦꓲꓔꓮꓟꓲꓠ ꓚ ꓞꓹ ꓟ ꓑꓶꓸ ꓓꓴ ꓒꓬꓱꓼ ꓡˍ ꓟ ꓠꓻ ꓐꓴ ꓔꓯ ꓥ ꓟꓲ ꓗꓽ ꓕꓸ ꓠꓹ ꓟ ꓐꓱ ꓶ ꓬꓰ ꓙ ꓖꓶ ꓐ ꓡˍ ꓡꓳ= ꓮꓠꓔꓲꓳꓫꓲꓓꓮꓠꓔ ꓢꓯꓼ ꓥ ꓟꓲ ꓮ ꓟꓬꓹ ꓙꓳˍ ꓟ ꓪꓴꓸ ꓠꓬꓲ ꓬꓲꓸ ꓐꓽ ꓗꓪ ꓐꓰ ꓓꓵꓽ ꓡˍ ꓟ ꓠꓻ ꓤ ꓒꓬꓽ ꓤ ꓐꓴ ꓔꓯ ꓗꓽ ꓕꓸ ꓙ ꓖꓶ ꓐ ꓡˍ ꓟ ꓥ ꓡꓳ=

(7) ꓪꓳꓻ ꓐꓵꓼ ꓔꓯ ꓞꓰꓻ ꓡꓰ ꓝꓲ ꓐ ꓡˍ ꓡꓳ= ꓘꓪꓽ ꓘꓪꓽ ꓢꓶꓽ ꓠꓬ ꓦꓰꓽ ꓛꓲꓽ ꓗꓪ ꓟ ꓪꓳꓻ ꓐꓵꓼ ꓞꓰꓻ ꓡꓰ ꓓꓴ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓪꓳꓻ ꓐꓵꓼ ꓞꓰꓻ ꓡꓰ ꓓꓴ ꓠꓯꓻ ꓞꓲꓼ ꓜꓽ ꓠꓲꓹ ꓟꓽ ꓫꓵ ꓢꓴ ꓐꓱ ꓶ ꓘꓪꓽ ꓘꓪꓽ ꓢꓶꓽ ꓜꓽˍ ꓠꓬ ꓙꓲˍ ꓡꓳ꓾ ꓐꓰ ꓢꓷꓸ ꓪ ꓡꓳ=

(8) ꓘꓪꓽ ꓘꓪꓽ ꓢꓶꓽ ꓔꓯ ꓮ ꓕꓯ ꓟꓲ ꓜꓽ ꓖꓶˍ ꓕꓯ ꓟꓬ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓪꓽ ꓠꓬꓲ ꓡ ꓝꓲˍ ꓡꓳ=

ꓮ ꓟꓶ ꓐꓯ ꓖꓶ ꓗꓷ ꓟ ꓠꓬ ꓘꓪꓽ ꓘꓪꓽ ꓜꓽˍ ꓟ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓟꓬ ꓗꓪ ꓛꓲ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓳꓸ ꓖꓶ ꓩꓴ ꓡ ꓗꓷ ꓟ ꓥ ꓡꓳ=