ꓚꓰꓼ ꓔꓸ ꓟ ꓮꓽ ꓙꓵꓽ ꓔꓯ ꓠꓴ ꓙꓵꓽ

ꓟꓶꓽ ꓘꓳꓼ ꓔꓯ ꓡꓳꓸ ꓠꓬꓲ

ꓪꓴ-ꓢ ꓚꓰꓼ ꓔꓸ ꓟ  ꓟꓳꓼꓡꓳ ꓐꓰ ꓢ-ꓘꓪꓸꓹ ꓟꓲ-ꓠꓯ ꓐꓰ ꓟꓲꓽ ꓪꓳꓼ ꓬꓵꓽ ꓡꓵꓽ ꓐꓱ  ꓐꓰ ꓪꓽ ꓚꓲ-ꓸ ꓬꓵ ꓙꓬ ꓐꓰ ꓟꓲꓽ ꓪꓳꓼ ꓗꓪ ꓟ ꓢꓯꓹ ꓫꓵꓽ ꓢꓯꓹ ꓙꓵꓽ ꓮꓽ ꓙꓵꓽ ꓔꓯꓹ ꓚꓰꓼ ꓔꓸ ꓡꓳ= ꓟꓲꓽ ꓪꓳꓼ ꓗꓪ ꓟ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰꓽ ꓧꓪ ꓟꓳ ꓟꓽ ꓖꓴ ꓡꓰ ꓗꓪ ꓛꓲꓽ ꓙꓳ ꓔꓬ ꓟ ꓠꓬ ꓬꓰꓸ ꓔꓱ ꓬꓰꓸ ꓒꓬꓱꓼ ꓡꓹˍꓟ  ꓟꓽ ꓥ-ꓸ ꓚꓰꓼ ꓢꓴ ꓢꓲ-ꓒꓽ ꓡꓰ ꓚꓰꓼ ꓔ ꓟ ꓥ ꓡꓳ= ꓪꓴ-ꓢ ꓡꓰꓽ ꓚꓰꓼ ꓔꓸ ꓟ ꓮꓽ ꓙꓵꓽ ꓠꓬ ꓕꓲꓽ ꓟ ꓡꓰꓽ ꓕꓲꓽ ꓟ ꓕꓲꓼ ꓫꓵꓽ ꓐꓰ ꓕꓲꓽ ꓫꓵꓽ ꓔꓳꓹ ꓙ ꓡꓯꓼ ꓘꓳ ꓠꓹˍꓟ  ꓬꓲꓸ ꓡꓰꓽ ꓙꓽ ꓖꓶꓽ ꓢꓲꓹ ꓚꓰꓼ ꓔꓸ ꓟ ꓥ ꓡꓳ= ꓖꓳ ꓡꓰ ꓢꓲꓹ ꓚꓰꓼ ꓔꓸ ꓟ ꓮꓽ ꓙꓵꓼ ꓔꓯ ꓬꓲꓸ ꓠꓲꓹ ꓡꓶ ꓢꓲꓼ ꓠꓲꓹ ꓟ ꓢ ꓔꓬ ꓡꓳ= ꓖꓳ ꓡꓰ ꓚꓰꓼ ꓔꓸ ꓟ  ꓗꓪ ꓒꓵꓽ ꓡꓳꓹ ꓬꓰ ꓟ ꓕꓲꓽ ꓫꓵꓽ ꓔꓯꓹˍꓟꓲ ꓬꓲꓸ ꓡꓰꓽ ꓚꓰꓼ ꓔꓸ ꓢꓰ ꓡꓳ-ꓸ ꓖꓳ ꓟ ꓠꓬ ꓬꓲꓸ ꓒꓬꓳꓽ ꓐꓰ ꓫꓱꓸꓹ ꓔꓸ ꓟ ꓟꓲ ꓠꓯ ꓡꓽ ꓞꓳ ꓥˍꓟꓲ ꓐꓸꓹ ꓡꓳ=

ꓟꓲ ꓠꓯ ꓡꓽ ꓞꓳ ꓕꓱ ꓟ ꓔꓯ ꓟꓳꓹ ꓕꓲꓽ ꓜꓶꓽ ꓐꓰ ꓕꓲꓽ ꓜꓶ ꓗꓪ ꓟ ꓢꓷꓹ ꓠꓲꓹ ꓙꓳ ꓒꓽ ꓐꓴ ꓡꓰꓽ ꓮꓽ ꓟꓬꓸ ꓚꓵꓹ ꓚ ꓠꓬ ꓡꓳꓹ ꓬꓰ ꓳ= ꓟꓬꓽ ꓠꓬꓲ ꓟꓲ ꓠꓯ ꓡꓽ ꓞꓳ ꓠꓬ ꓮ ꓡꓰ ꓗꓪ ꓐꓰ  ꓒꓬꓳꓼ ꓡꓹˍꓟ ꓔꓯꓼ ꓚꓵꓹ ꓚ ꓔꓬ ꓟ ꓥꓳ-ꓸ  1800 ꓘꓳꓼ ꓘꓴ ꓕꓯꓽ ꓢꓓꓸ ꓠꓲꓹ ꓙꓳ ꓒꓽ ꓚꓧꓮꓣꓡꓢ- ꓓ-ꓪꓲꓠ  ꓡꓰꓽ ꓚꓵꓼ ꓚ ꓔꓸ ꓟ ꓠꓬ-ꓸ ꓟꓲ ꓠꓯ ꓞꓳ-ꓤ ꓠꓬ  ꓠꓱꓸ ꓐꓯꓼ ꓢꓯꓹ ꓫꓵꓽ ꓢꓯꓹ ꓙꓵꓽ ꓗꓪ ꓐꓰ  ꓕꓲꓽ ꓜꓶ ꓐꓰ ꓕꓲꓽ ꓜꓶ ꓒꓳꓸꓹ ꓡꓶꓹ ꓢꓲꓼ ꓒꓬꓳꓼ ꓡꓹˍꓟ ꓥꓳ ꓐꓰ ꓐꓯ ꓔꓳꓸ ꓔ ꓡꓳ-ꓸ

ꓖꓳ ꓡꓰ ꓥꓹˍꓟꓲ ꓚꓰꓼ ꓢꓴ ꓢꓲ-ꓒ ꓔꓯ ꓪꓴꓸ ꓓꓵ ꓕꓵꓼ ꓔꓬ ꓢꓴ ꓐꓴ ꓠꓬ ꓞꓳ-ꓤ ꓠꓬ  ꓪꓴ-ꓢ ꓗꓪ ꓐꓰ ꓡꓹˍꓟ ꓔꓯ ꓘꓴ ꓣꓴ ꓔꓸ ꓟ ꓥ ꓡꓳ=

ꓓꓽ ꓪꓴꓹ ꓞꓳ-ꓤ: ꓥꓹˍꓟ ꓮꓸ-ꓓꓯ ꓐꓯꓹˍꓟ ꓔꓯ ꓦꓲ-ꓐꓱ-ꓣꓴ ꓥꓳꓽ ꓗꓪ ꓐꓰ ꓟꓸ ꓟꓲꓽ ꓒꓳꓼ ꓠꓬꓲ ꓠꓬꓟꓲ-ꓠꓯ ꓞꓳ ꓤ ꓜꓴ ꓐꓯꓹˍꓟ ꓥ ꓡꓳ-ꓸ ꓡꓽ ꓞꓳ ꓕꓲꓽ ꓣꓳ ꓔꓯꓹ ꓡꓰꓽ ꓟꓽ ꓥ ꓡꓽ ꓞꓳ ꓮꓽ ꓟꓬꓸ ꓔꓯꓼ ꓐꓯꓹˍꓟ ꓥ ꓡꓳ= ꓮ-ꓓꓯ ꓗꓪ ꓐꓰ ꓟꓲ-ꓠꓯ ꓡꓽ ꓞꓳ ꓒꓬꓳꓼ ꓡꓹ ꓟ ꓥ ꓠꓬꓲ  ꓡꓽ ꓞꓳ ꓖꓳ ꓟ ꓠꓬ ꓚꓰꓼ ꓢꓲ-ꓒ ꓪꓴ-ꓢ ꓗꓪ ꓐꓰ  ꓥ ꓡꓳꓸꓹ ꓐꓰꓼ ꓐꓯ ꓓ ꓟ ꓥꓳ=

ꓪꓴ-ꓢ ꓠꓬ ꓬꓲꓸ ꓒꓬꓳꓽ ꓐꓰ  ꓕꓲꓽ ꓡꓰꓼ ꓟꓲ ꓠꓯ ꓞꓳ ꓤ ꓔꓯꓸ ꓚꓰꓼ ꓔ ꓟ ꓠꓬ ꓬꓲꓸ ꓓꓵꓽ ꓙ ꓔꓸ ꓟ ꓟꓬꓱꓽ  ꓐꓰ ꓙꓽ ꓖꓶꓽ ꓔꓸ ꓟ  ꓚꓱꓹ ꓙꓳ ꓔꓬ ꓡꓳ= ꓖꓳ ꓟ  ꓠꓬ ꓟꓳꓽ ꓗꓪ ꓗꓴꓷꓼ ꓗꓪ ꓬꓲꓸ ꓐꓰ ꓕꓲꓽ ꓪꓼ ꓕꓲꓽ ꓝꓲꓼ ꓕꓲꓽ  ꓑ ꓔꓬ ꓠꓹˍꓟ  ꓐꓱ ꓶꓽ ꓟꓲ ꓠꓯ  ꓡꓽ ꓞꓳ ꓔꓯ ꓝꓮꓲ ꓘꓴ ꓔꓬ ꓟ ꓥ ꓡꓳ-ꓸ  ꓖꓳ ꓡꓰ ꓘꓴˍꓟ ꓠꓬ ꓟꓲ-ꓠꓯ ꓡꓽ ꓞꓳ ꓔꓯꓼ ꓠꓵˍꓟ ꓪꓴꓸ ꓠꓬꓲ ꓥ ꓡꓳ-ꓸ ꓚꓵꓽ ꓚꓵꓽ ꓡꓽ ꓞꓳ ꓐꓯˍ ꓟ ꓠꓬ ꓪꓴ-ꓢ ꓡꓰꓽ ꓠꓵ ꓠꓲꓹ ꓗꓪ ꓐꓰ ꓟꓲ-ꓠꓯ ꓗꓪ ꓒꓬꓳꓼ ꓡˍ ꓟ-ꓸ ꓚꓰꓼ ꓔꓸ ꓟ ꓮꓽ ꓙꓵꓽ ꓕꓯꓽ ꓢꓲ ꓒꓵꓽ ꓡꓳꓹ ꓬꓰ ˍꓟ ꓕꓲꓽ ꓟ ꓥ ꓡꓳ=

ꓞꓳ-ꓤꓽ ꓠꓬ ꓪꓴ-ꓢ ꓒꓬꓳꓽ ꓐꓰ ꓪꓽ ꓡꓰꓸꓹ ꓠ ꓚꓰꓼ ꓔꓸ ꓥ ꓐꓯꓹ ꓠꓬ ꓞꓳ-ꓤꓽ ꓐꓰ ꓪꓴ-ꓢ ꓮ ꓡꓰ ꓕꓲꓽ ꓒꓳꓹ ꓗꓪ ꓫꓱꓸ ꓔꓸ ꓡꓽ? ꓠ ꓠꓬꓲ ꓓꓴ ꓙꓳ ꓡ ꓥꓳ-ꓸꓪꓴ-ꓢ ꓡꓰ ꓞꓳ-ꓤꓽ ꓔꓯꓼ ꓬꓲꓸ ꓐꓰ ꓪꓽ ꓡꓰ ꓠ ꓚꓰꓼ ꓔꓸ ꓔꓯꓽ ꓧꓪꓽ ꓖꓳ ꓓꓱꓽ ꓗꓪ ꓟꓽ ꓥ ꓦ ꓕꓲꓽ ꓒꓳꓼ ꓗꓪ ꓪꓽ ꓡꓰ ꓠ ꓚꓰꓼ ꓔꓸ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ-ꓤ  ꓠꓬ ꓠꓱꓸ ꓐꓯꓼ ꓚꓰꓼ ꓫꓵꓽ ꓐꓰ ꓟꓽ ꓪꓽ ꓟꓽ ꓫꓱꓸꓹ-ꓸ  ꓟꓲ ꓓꓳꓽ ꓙꓳˍꓟ  ꓐꓲ ꓜꓲꓼˍꓟ ꓞꓳ-ꓤꓽ ꓒꓬꓳꓼ ꓡꓸꓹ ꓟ ꓥ ꓡꓳ-ꓸ ꓚꓲꓸ ꓛꓬꓽ ꓙꓽ ꓜꓲꓼ ꓠꓲꓹ ꓒꓴ ꓒꓴ ꓡꓯꓽ ꓡꓯꓽ ꓘꓴ ꓣꓴ ꓓꓽ ꓢꓴ-ꓸ  ꓣꓳꓽ ꓚꓲꓸ ꓛꓬꓽꓸꓹ ꓠꓱꓸ ꓐꓯꓼ ꓕꓲꓽ ꓣꓳ ꓕꓲꓽ ꓜꓴ ꓐꓰ ꓪꓽ ꓡꓯꓼ ꓘꓳ ꓢꓲ ꓔꓳꓸꓹ ꓙ  ꓢꓯꓹ ꓔꓬ ꓐ  ꓡ ꓢꓴˍ ꓟꓲ ꓒꓬꓳꓼ ꓡ  ꓡꓳ-ꓸ

ꓔꓲꓸꓹꓒꓽ ꓪ ꓔꓲꓸ ꓙꓳꓧꓠ-ꓑꓮꓴꓡ ꓡꓰꓽ ꓐꓯ ꓔꓸ ꓟ ꓠꓬ “ ꓟꓲ-ꓠꓯ ꓞꓳ ꓤꓽ  ꓐꓱ ꓶꓽ ꓚꓰꓼ ꓢꓴ ꓢꓲ-ꓒ ꓡꓰꓽ ꓖꓶꓽ ꓔꓸ ꓟ  ꓪꓴꓽ ꓓꓰ ꓡꓰˍꓟ ꓠꓬ  ꓪꓴꓽ ꓓꓰ ꓡꓰ ꓟ ꓡꓽ ꓞꓳ ꓟꓲ  ꓓꓳꓽꓔꓯ ꓖꓶꓽ ꓔꓸ ꓟ ꓥꓳ=”  ꓐꓰꓼ ꓞꓳ-ꓤ  ꓟꓲ  ꓓꓳꓽ ꓔꓯ ꓐꓯ ꓟꓳꓸ ꓔꓸ ꓡꓳ=

ꓟꓲ ꓓꓳꓽ ꓙꓳˍꓟ ꓡꓽ ꓞꓳ ꓐꓯꓸˍꓟ ꓔꓯ ꓬꓰ-ꓡꓲ-ꓟꓲ ꓕꓳꓽ ꓶ 1ꓽ5 ꓗꓪ ꓦꓰꓼ ꓛꓲ ꓗꓪ ꓥꓪ ꓠꓴ ꓔꓯ ꓟꓽ ꓜꓯꓸꓹ ꓢꓰ ꓕꓯ ꓡꓰ ꓥꓪ ꓠꓴ ꓔꓯ ꓢꓷꓸˍꓡꓳ= ꓤ  ꓘꓶꓸꓹ ꓗꓪ ꓐꓰ ꓠꓴ ꓔꓯ ꓟꓽ ꓦꓵ ꓓꓳ ꓡ ꓢꓰꓽ ꓕꓯ ꓡꓰ ꓥꓪ ꓠꓴꓸꓹ ꓔꓯ ꓢꓲ ꓫꓬ ꓡꓰ ꓝꓲꓳ= ꓐꓰ ꓐꓯ ꓔꓸ ꓡꓳ-ꓸ ꓖꓳ ꓟ ꓪꓴꓸ ꓠꓬꓲ ꓣꓳꓽ ꓞꓳ ꓤꓽ ꓠꓬ ꓟꓲ-ꓠꓯ ꓗꓪ ꓟꓽ ꓦꓵ ꓢꓰꓽ ꓕꓯꓽ ꓡꓰ ꓪꓴ-ꓢ ꓬꓲꓸ ꓠꓲꓹ ꓟ ꓘꓴꓽ ꓗꓪ ꓦꓵ ꓔꓸ ꓟ ꓔꓯ ꓣꓳꓽ ꓡꓳꓸ ꓟꓳˍ ꓡꓳ-ꓸ ꓟꓲ-ꓠꓯ ꓡꓽ ꓞꓳ ꓮꓽ ꓙꓵꓽ ꓠꓬ ꓬꓲꓸ ꓠꓯꓼˍꓗꓪ ꓐꓰ ꓒꓬꓳꓼ ꓡꓸˍꓟ-ꓸ ꓠꓵ ꓠꓲꓹ ꓠꓯꓼˍ ꓗꓪ  ꓒꓬꓳꓼ ꓡꓸˍꓟ ꓪꓴꓸ ꓠꓬꓲ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓠꓬ ꓮꓸ ꓓꓰꓽ ꓒꓵꓽˍꓟ ꓜꓶ ꓬꓲꓸ ꓒꓵꓽ ꓢꓳꓼ ꓖꓴ ꓟꓽ ꓓˍꓟ  ꓡꓽ ꓞꓳ ꓥ ꓡꓳ=

ꓚꓰꓼ ꓢꓲ-ꓒ  ꓠꓬ ꓚꓰꓼ ꓔꓸ ꓟ ꓮꓽ ꓙꓵꓽ ꓖꓴ ꓡꓰ ꓕꓯꓽ ꓢꓲꓼ  ꓡꓽ ꓞꓳ ꓔꓯꓸ ꓚꓰꓼˍ ꓡꓳ-ꓸ ꓖꓳ ꓟ ꓠꓬ ꓚꓰꓼ ꓔꓸ ꓟ  ꓮꓽ ꓙꓵꓽ ꓕꓯꓽ ꓢꓲ ꓪꓴꓸꓹˍꓟ ꓚꓰꓼ ꓔꓸ ꓟ ꓮꓽ ꓙꓵꓽ ꓔꓯꓼ ꓗꓪꓽ ꓫꓵꓽ ꓠꓸꓹˍ ꓟ ꓥ ꓡꓳ=  ꓚꓰꓼ ꓢꓲ-ꓒ  ꓠꓬ  ꓞꓳ-ꓤ ꓔꓯꓸ ꓚꓰꓼˍꓟ ꓠꓬ ꓣꓱꓽ ꓬꓯꓼˍꓟ ꓪꓴꓸ ꓠꓬꓲ ꓟꓽ ꓥ-ꓸ ꓬꓲꓸ ꓐꓰ ꓕꓲꓽ ꓪꓼ ꓕꓲꓽ ꓝꓲꓼ ꓢꓯꓼ ꓟꓬ ꓔꓯ ꓘꓴ ꓣꓴ ꓝꓲ ꓠꓹˍꓟ ꓡꓯꓽ ꓫꓴ ꓥꓳ=

ꓡꓽ ꓞꓳ ꓮꓽ ꓙꓵꓽ ꓠꓬ ꓒꓵꓽ ꓖꓴ ꓡꓰ ꓟ ꓥꓹˍꓠꓬꓲ  ꓪꓴꓽ ꓢꓴ ꓣꓳ ꓢꓴ ꓟꓽ ꓙꓳ ꓮꓽ ꓙꓵꓽ ꓕꓲꓽ ꓡꓰꓼ ꓒꓵꓽ ꓢꓴ ꓥ ꓡꓳ-ꓸ ꓧꓪꓽ ꓖꓳ ꓓꓱꓽ ꓙꓳˍ ꓟ ꓪꓴꓸ ꓠꓬꓲ ꓢꓯꓼ ꓐꓽ ꓥꓳꓽ ꓛꓬ ꓗꓴˍꓟꓲ  ꓖꓳ ꓟ ꓠꓬ ꓚꓰꓼ ꓔꓸ ꓟ ꓗꓪ ꓟꓽ ꓐ ꓔꓬ-ꓸ  ꓒꓵꓽ ꓖꓴ ꓡꓰ ꓟ ꓐꓶꓹ ꓓꓴ ꓪꓴ-ꓢ ꓔꓯꓹ ꓓꓽ ꓔꓳꓹ ꓡꓹˍꓟ ꓪꓴꓸ ꓠꓬꓲ ꓝꓴꓲꓸ ꓐꓯˍꓟ ꓒꓬꓱꓼ ꓡ ꓡꓳ-ꓸ ꓖꓳ ꓡꓰ ꓥꓹˍꓟꓲ ꓔꓱꓹˍꓟ ꓠꓲꓹ ꓟ ꓠꓯꓼ ꓗꓪ ꓪꓴ-ꓢ ꓐꓰ ꓝꓮꓲ ꓕꓲꓽ ꓠꓲꓹ ꓕꓲꓼ ꓪꓼ ꓗꓶ ꓡꓰ ꓠˍꓟ ꓠꓲꓹ ꓟ ꓠꓬ ꓮꓽ ꓕꓯꓽˍꓟꓲ ꓙꓳ ꓔꓬ ꓡꓳ=  ꓖꓳ ꓟ ꓡꓰꓽ ꓐꓰ ꓞꓳ-ꓤ ꓐꓰ ꓞꓳ-ꓤ ꓠꓯꓼˍꓗꓪ  ꓕꓲꓽ ꓠꓲꓸ ꓕꓲꓽ ꓪꓼ ꓪꓽ ꓡꓯꓼ ꓘꓳ ꓠꓲꓸ ꓗꓴ ꓟꓬ ꓗꓴ  ꓓꓴ ꓙꓵꓽ ꓙꓳˍꓡꓳ=

ꓕꓱ  ꓗꓪ  ꓝ ꓢꓲꓼ ꓐꓯ ꓠꓲꓹ ꓫꓵˍꓟ ꓠꓬ ꓞꓳ ꓤꓽ ꓔꓯ ꓞꓳ ꓤꓽ ꓡꓰ ꓐꓰ ꓟꓽ ꓞꓲ  ꓡꓽ ꓞꓳ ꓘꓴ ꓠꓯꓼˍꓗꓪ ꓟ ꓪꓴ-ꓢ  ꓒꓬꓱꓽ ꓔꓯ ꓡꓳꓸ ꓠꓬꓲ  ꓢꓲꓼ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓟꓽ ꓥꓳ ꓡꓰ ꓠꓹˍꓟ  ꓤ ꓟꓳ  ꓛꓲˍꓡꓳ-ꓸ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓟꓽ ꓪꓽ ꓡꓯꓼ ꓘꓳˍꓠꓬ  ꓠꓱꓹ ꓐꓯꓼ ꓚꓰꓼ ꓔꓸ ꓟ ꓯꓽ ꓙꓵꓽ ꓐꓰˍꓟꓲ  ꓛꓴꓽ ꓙꓳ ꓓꓴ ꓒꓬꓳꓼ ꓡ ꓥꓳ-ꓸ ꓖꓳ ꓡꓰ ꓗꓸ ꓠꓯꓸ  ꓚꓰꓼ ꓔꓸ ꓟ ꓟꓲꓽ ꓦꓲ ꓬꓵ ꓙꓬ ꓟꓶꓽ ꓘꓳꓼ ꓐꓰ  ꓢꓲꓸꓹ ꓜꓲ ꓡꓳꓸꓹꓜꓲ ꓮꓽ ꓙꓵꓽ ꓠꓬ ꓟꓲ-ꓠꓯ ꓡꓽ ꓞꓳ ꓪꓴꓸ ꓠꓬꓲ  ꓐꓬ ꓡꓰˍꓡ ꓥꓳ=

ꓪꓴ-ꓢ ꓡꓰꓽ ꓚꓰꓼ ꓔꓸ ꓟ  ꓠꓲꓹ ꓡꓶꓽ ꓠꓬ ꓞꓳ ꓤꓽ ꓐꓰ ꓪꓴ-ꓢ-ꓸ ꓡꓽ ꓞꓳ  ꓐꓰ ꓡꓽ ꓞꓳ-ꓸ ꓡꓽ ꓞꓳ ꓐꓰ ꓟꓲ-ꓠꓯ ꓗꓪ ꓟ ꓢꓲꓸꓹ ꓜꓲ ꓡꓲꓸꓹ ꓜꓲ ꓐꓰ ꓟꓶꓽ ꓘꓳꓼ ꓕꓱ  ꓟꓬ ꓫꓵꓽ ꓮ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓬꓲꓸꓚꓱꓸꓹ ꓜꓳꓽ ꓜꓳꓽ ꓪꓽ ꓡꓯꓼ ꓘꓳ ꓢꓲꓸꓹ ꓢꓯꓸ ꓔꓬ ꓠꓹˍꓟ ꓣꓳꓸ ꓚꓲꓹˍꓡꓳ= ꓪꓴ-ꓢ ꓠꓬ ꓞꓳ ꓤꓽ ꓔꓯꓼ ꓚꓰꓼ ꓢꓲ ꓟꓲ-ꓠꓯ ꓗꓴꓷꓼ ꓔꓯ ꓙꓵꓽ ꓓꓴ ꓙꓵꓽ ꓪꓽ ꓖꓶꓽ ꓔꓸ ꓡꓳ-ꓸ ꓖꓳ ꓡꓰ ꓢꓲꓼ ꓪꓴ-ꓢ ꓡꓰꓽ ꓖꓶꓽ ꓔꓸ ꓟ ꓟꓲ-ꓠꓯ ꓕꓱ  ꓟ ꓟꓼ ꓐꓬ ꓡꓰ ꓠꓹˍꓟ ꓠꓬ ꓣꓳꓽ ꓟꓲ-ꓠꓯ ꓞꓳ ꓤꓽ ꓐꓴ ꓶꓽ ꓥ ꓡꓳ-ꓸ ꓟꓲ-ꓠꓯ ꓕꓱ ꓟ ꓠꓬ ꓣꓳꓽ ꓐꓴ ꓔꓬ ꓟ ꓦꓲ ꓕꓲꓽ ꓟꓼ ꓡꓰꓽ ꓐꓰ  ꓗꓸꓹ ꓠꓬꓲ  ꓦꓲ ꓕꓱ ꓟ ꓗꓹ ꓚꓲꓽ ꓡ ꓠꓹˍꓟ ꓣꓳꓽ ꓐꓴ ꓮꓽ ꓙꓵꓽ ꓤ ꓟꓳ ꓫꓯꓼˍꓔꓱ ꓓꓴ ꓙꓵꓽ ꓙꓳ ꓔꓬ ꓡꓳ-ꓸ

ꓖꓳ ꓟ ꓪꓴꓸ ꓠꓬꓲ ꓣꓳꓽ ꓤꓶ  ꓕꓯꓽ ꓟꓲ-ꓠꓯ ꓗꓴꓷꓼ ꓐꓰ ꓚꓰꓼ ꓔꓸ ꓟ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓒꓬꓳꓼ ꓡ ꓠꓹˍꓟ  ꓣꓳꓽ ꓢꓯꓼ ꓕꓵꓼ ꓠ  ꓗꓸꓹ ꓡꓳ= ꓟꓲꓽ ꓕꓯꓽ ꓢꓲ  ꓗꓪ ꓟ ꓣꓳꓽ ꓡꓲ-ꓑ ꓡꓲ-ꓒꓲꓽ ꓕꓲꓽ ꓤꓶ  ꓐꓱꓽ ꓶꓽ ꓓꓵꓽ ꓙꓽ ꓔꓸ ꓢꓲꓼ ꓚꓰꓼ ꓢꓴ ꓪꓴ-ꓢ ꓡꓰꓽ ꓖꓶꓽ ꓔꓸ ꓟ  ꓙꓵꓽ ꓪꓽ ꓖꓶꓽ ꓔꓸ ꓟ ꓢꓲ-ꓜꓲ ꓡꓳ-ꓜꓲ ꓬꓵ-ꓙꓬ ꓐꓰ  ꓟꓵꓽ  ꓔꓯ ꓪꓽ ꓜꓲ  ꓐꓲ ꓜꓲꓼ ꓡꓰ ꓗꓪ ꓛꓲ ꓢꓯꓼ ꓕꓵꓼ ꓠ ꓗ ꓡꓳ=

ꓟꓶꓽ ꓘꓳꓼ ꓠꓬ ꓬꓲꓸ ꓙꓵꓸꓹ ꓜꓳꓽ ꓜꓳꓽ ꓐꓰ ꓟꓲꓽ ꓬꓰ ꓡꓳꓸ ꓬꓰ ꓐ ꓡ ꓠꓹˍꓟ ꓮꓽ ꓘꓶꓸ ꓣꓳ ꓚꓵꓸꓹ ꓔꓬ ꓡꓳ= ꓚꓰꓼ ꓔꓸ ꓟ ꓮꓽ ꓙꓵꓽ ꓔꓯ ꓒꓵꓽ ꓗ ꓬꓰ ꓢꓲꓼ ꓚꓰꓼ ꓢꓴ ꓢꓲ-ꓒꓽ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ  ꓫꓱꓸ ꓖꓶꓽ ꓐ ꓪ ꓝꓲ=

ꓑꓰꓔꓰꓣ ꓥꓪ-ꓬꓳ-ꓢꓷ

Refar to Loutado'si

Add new comment

10 + 0 =