ꓟꓲꓺ ꓠꓯꓺ ꓠꓬ ꓫ ꓕꓱˍ ꓟ (Nature speaks)

ꓥꓪ ꓠꓬ ꓟꓲ ꓠꓯꓺ ꓥꓳ꓿ ꓕꓲꓽ ꓐꓱ ꓟ ꓠꓬ ꓥ ꓔꓯ ꓟ, ꓟ ꓟꓲꓺ ꓠꓯꓺ ꓐꓰ ꓘꓴˍ ꓡꓳ꓿ ꓥꓪ ꓠꓬ ꓮ ꓠꓱ ꓕꓯ ꓠꓴ ꓪ ꓞꓳ ꓤ ꓟꓽ ꓙꓳ ꓕꓯ ꓡꓰ ꓙꓳˍ ꓡꓳ꓿ ꓥꓪ ꓔꓯ ꓪꓳ ꓔ ꓢꓲ ꓢꓯ. ꓫꓵꓽ ꓢꓯ. ꓙꓰꓽ ꓮ ꓟꓬ, ꓙꓳ ꓢꓲ ꓗ ꓛꓲꓽ ꓔꓬ, ꓡꓳ꓿ ꓥꓪ ꓠꓬ ꓠꓴ ꓪ ꓞꓳ ꓤ ꓔꓯ ꓣꓱꓽ ꓟꓽ ꓞ꓾ ꓠꓴ ꓪ ꓟꓲꓺ ꓠꓯꓺ ꓞꓳ ꓤ ꓡꓰ ꓥꓪ ꓔꓯ ꓣꓱꓽ ꓞ ꓡꓳ꓿ ꓠꓴ ꓪ ꓠꓬ ꓥꓪ ꓔꓯ ꓟ, ꓟ ꓐꓰ ꓘꓴ ꓥˍ ꓟꓲ ꓥꓪ ꓔꓯ ꓟꓽ ꓟꓽ ꓚꓬ ꓬꓰˍ ꓡꓳ꓿ ꓠꓴ ꓪ ꓠꓬ ꓠꓴ ꓪ ꓐꓱ ꓶ ꓡꓰ ꓓꓵꓽ ꓙ ꓡꓳ꓿ ꓠꓴ ꓪ ꓠꓬ ꓮ ꓟꓶ ꓐꓱ ꓶ ꓡꓰꓽ ꓓꓵꓽ ꓙ ꓡꓳ꓿ ꓮ ꓫꓵꓺ ꓫꓵꓺ ꓟ ꓐꓱ ꓶ ꓟꓽ ꓓꓵ ꓙ꓿ ꓟꓬꓺ ꓠꓯꓺ ꓟ ꓗꓪ ꓐꓰ ꓠꓴ ꓪ ꓠꓬ ꓥꓪ ꓔꓯ ꓮ ꓤ ꓤ ꓢꓰꓼ ꓔꓬ, ꓡꓳ꓿

                ꓠꓴ ꓪ ꓠꓬ ꓥꓪ ꓡꓰ ꓖꓶꓽ ꓜ ꓖꓶꓽ ꓓꓳ ꓟ ꓗꓪ ꓐꓰ ꓢꓯ. ꓔꓬ, ꓥˍ ꓟꓲ ꓥꓪ ꓔꓯ ꓮ ꓔꓳ. ꓛꓴˍ ꓡꓳ꓿ ꓥꓪ ꓔꓯ ꓓꓵꓽ ꓘ ꓗꓷꓳ ꓡꓳ꓿ ꓥꓪ ꓔꓯ ꓘꓶˍ ꓡꓳ꓿ ꓥꓪ ꓔꓯ ꓘꓶ ꓙꓵˍ ꓟ ꓗꓪ ꓠꓴ ꓪ ꓠꓬ ꓘꓶꓽ ꓘ ꓡꓳ꓿ ꓥꓪ ꓔꓯ ꓧꓪ. ꓡꓰ ꓟ ꓗꓪ ꓠꓴ ꓪ ꓠꓬ ꓗ, ꓛꓲ ꓔꓬ, ꓡꓳ꓿ ꓠꓴ ꓪ ꓠꓬ ꓥꓪ ꓔꓯ ꓮ ꓡꓰ ꓘꓶ ꓛꓲ ꓫ. ꓙꓵ ꓠ, ꓛꓲ ꓬꓰˍ ꓥ ꓟꓲ ꓥꓪ ꓔꓯ ꓮ ꓡꓰ ꓟꓽ ꓗ꓿ ꓮ ꓫꓵꓽ ꓑꓶ. ꓓꓴ ꓥ ꓡ? ꓥꓪ ꓠꓬ ꓠꓴ ꓪ ꓐꓱ ꓶ ꓙꓳ ꓔꓬ, ꓡꓳ꓿

            ꓠꓴ ꓪ ꓬꓰ ꓗꓷ ꓟ ꓠꓴ ꓪ ꓶ ꓢꓴ ꓪ. ꓥꓳ꓿ ꓠꓴ ꓪ ꓥꓪ ꓔꓯ ꓢꓰꓼ ꓔꓬ, ꓠꓬ ꓫ ꓙꓵ ꓢꓴˍ ꓟꓲ ꓠꓴ ꓡꓰ ꓥꓳ꓿ ꓢ ꓖꓶ ꓟꓽ ꓦ ꓡꓰ ꓝꓲ ꓕꓯ ꓟꓽ ꓦ ꓟꓽ ꓡꓲ ꓕꓯ ꓥꓪ ꓔꓯ ꓕꓽ ꓙꓱꓽ꓿ ꓟꓽ ꓦ ꓡꓲ ꓝꓲ ꓟꓽ ꓥ ꓕꓯ ꓟꓽ ꓦ ꓡꓲˍ ꓥˍ ꓟꓲ ꓥꓪ ꓔꓯ ꓢꓲ. ꓕꓽ ꓧꓪ꓿ ꓛ ꓝꓲ. ꓕꓯ ꓬꓲ. ꓫꓳ. ꓟꓳ. ꓟꓽ ꓙꓳꓺ ꓙꓳꓺ ꓛ ꓕꓯˍ ꓟꓲ ꓥꓪ ꓔꓯ ꓕꓽ ꓐꓯꓺ꓿ ꓕꓱ ꓟ ꓮ ꓙꓵꓽ ꓠꓬ ꓠꓴ ꓪ ꓡꓰ ꓬꓰ ꓔ ꓟ ꓥꓳ꓿

            ꓥꓪ ꓠꓬ ꓠꓴ ꓪ ꓮ ꓡꓰ ꓘꓶ ꓛꓲ ꓥꓪ ꓔꓯ ꓘꓶ ꓥˍ ꓟꓲ ꓠꓴ ꓪ ꓐꓱ ꓶ ꓡꓰ ꓥꓪ ꓓꓵꓽ ꓙˍ ꓡꓳ꓿ ꓠꓴ ꓪ ꓔꓯ ꓮ ꓡꓰ ꓐꓰ ꓜꓽ ꓖꓶꓽ ꓜ ꓠ, ꓟ꓾ ꓮ ꓡꓰ ꓐꓰ ꓖꓶꓽ ꓖꓪ ꓠ, ꓟ ꓥꓪ ꓟꓽ ꓬꓲꓼ ꓔ ꓔ ꓓꓵꓽ ꓙ ꓡꓳ꓿ ꓠꓴ ꓪ ꓠꓬ ꓥꓪ ꓔꓯ ꓮ ꓡꓰ ꓐꓰ ꓢꓰꓼ ꓠ, ꓥ ꓟꓽ ꓬꓲꓼ ꓔ ꓔ ꓓꓵꓽ ꓙ ꓡꓳ꓿

            ꓟꓲꓺ ꓠꓯꓺ ꓞꓳ ꓤ ꓐꓴ‐ꓳ ꓙ ꓜꓲꓼ ꓡꓯ꓿ ꓥꓪ ꓔꓯ ꓫꓱ. ꓤ ꓡꓯ꓿