ꓟꓵꓽ ꓘꓳꓼ ꓐꓰ ꓫꓸ ꓕꓱ_ ꓟ

ꓕꓱ ꓕꓲ ꓫꓵ ꓠ ꓗꓪ ꓠꓬ ꓢꓳꓚꓲꓮꓡ ꓟꓰꓓꓲꓮ ꓐꓯ_ ꓟ ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓮ ꓫꓵ ꓥ ꓟꓲ ꓢ ꓢ ꓡꓰ ꓢꓷꓸ ꓓ_ ꓫꓵ꓾ ꓢ ꓢ ꓡꓰ ꓗꓹ ꓛꓲ ꓐ ꓡ ꓫꓵ꓾ ꓲꓠꓔꓰꓣꓠꓰꓔ ꓗꓪ ꓐꓰ ꓟꓳ ꓪ ꓟ꓾ ꓢꓴ ꓡꓰ ꓗꓼ ꓟꓳꓸ ꓖꓶ ꓡ ꓟ꓾ ꓐꓯ ꓟꓳꓸ ꓖꓶ ꓡ ꓟ ꓔꓯ ꓣꓳ ꓠꓹ ꓠꓹ ꓢꓲ ꓠꓬꓲ ꓣꓳ ꓤꓶꓻ ꓔꓯ ꓮ ꓤ ꓤ ꓐꓬ ꓡꓰ ꓝꓲ ꓫꓵ ꓮ ꓟꓬꓹ ꓙꓳ_ ꓡꓳ= ꓕꓱ ꓡꓱ ꓐꓰ ꓣꓳ ꓟꓽ ꓙ ꓜꓲꓼ ꓐꓰ ꓔꓬ ꓕꓯ ꓣꓳ ꓣꓱ ꓔꓬ ꓟ ꓑꓧꓳꓠꓰ ꓣꓳ ꓣꓱ ꓔꓬ ꓟ ꓢꓳꓚꓲꓮꓡ ꓟꓰꓓꓲꓮ ꓮ ꓙꓵ ꓠꓬ ꓬꓲ ꓪ ꓮ ꓡꓰ ꓟꓳꓸ ꓖꓶ ꓡ ꓠꓬ ꓮ ꓡꓰ ꓣꓳ ꓛꓳ ꓫꓱꓽ ꓪ ꓫꓵ ꓣꓳ ꓟꓽ ꓚꓬꓹ ꓪ ꓪ ꓐꓰ ꓣꓳ ꓛꓳ ꓫꓱꓽ ꓡꓰ ꓗꓴꓸ ꓡꓳ= ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓮꓽ ꓟ ꓥ ꓟꓲ ꓮ ꓡꓰ ꓫꓵ ꓥ ꓟꓲ ꓚꓲꓸ ꓛꓬ ꓐꓱ ꓶ ꓡꓰ ꓓꓵꓽ ꓙ ꓢꓲ ꓠꓬꓲ ꓢꓳꓚꓲꓮ ꓟꓰꓓꓲꓮ ꓗꓪ ꓒꓴ ꓧꓪ ꓠꓹ ꓟ ꓐꓵ ꓞꓶ ꓡꓵꓸ ꓟ ꓖꓶ꓾ ꓜ ꓟꓸ ꓖꓶ ꓓꓳ ꓟꓸ ꓖꓶ ꓗꓹ ꓛꓲ ꓟꓸ ꓖꓶ ꓕꓱ ꓡꓱ ꓬꓰ ꓔꓬ ꓟ ꓑꓶ ꓓꓴ ꓕꓲ ꓧꓪꓹ ꓧꓪꓹ ꓣꓳ ꓠꓬ ꓬꓲ ꓪ ꓮ ꓡꓰ ꓟꓳꓸ ꓖꓶ ꓡ ꓟ ꓡꓰ ꓮ ꓡꓰ ꓡꓳꓸ ꓠꓬꓲ ꓢꓲ ꓠꓬꓲ ꓕꓱ ꓡꓰ ꓐꓰ ꓛꓳ ꓙꓳ ꓔꓬ ꓕꓯ ꓚꓵ ꓚꓵ ꓣꓳ ꓤꓶꓻ ꓐꓱ ꓶ ꓟꓲ ꓠꓯ ꓐꓱ ꓶ ꓣꓳꓸ ꓚꓵ ꓟ ꓔꓯ ꓣꓳ ꓟꓲ ꓡꓰ ꓗꓴꓸ ꓡꓳ= ꓣꓳ ꓠꓬ ꓮꓚꓔꓲꓦꓰ ꓡꓲꓝꓰ ꓐꓯ_ ꓟ ꓣꓳ ꓚꓲ ꓛꓬ ꓣꓳ ꓪꓴꓸ ꓠꓶꓸ ꓗꓪ ꓐꓰ ꓓꓵ ꓙ ꓟ ꓟꓽ ꓬꓰ ꓬꓰ ꓐꓰ ꓢꓴ ꓡꓰ ꓮ ꓡꓰ ꓟꓳꓸ ꓖꓶ ꓡ ꓮ ꓡꓰ ꓐꓰ ꓖꓳ ꓟ ꓔꓯ ꓡꓰ ꓓꓵ ꓙ ꓢꓲ ꓠꓬꓲ ꓣꓳ ꓠꓲꓹ ꓟ ꓥ ꓟꓲ ꓖꓳ ꓗꓪ ꓐ ꓣꓳ ꓫꓵ ꓗꓷ ꓡꓰ ꓗꓴꓸ_ ꓡꓳ= ꓖꓳ ꓡꓱ ꓐꓰ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓡꓱ ꓟꓽ ꓗꓷ ꓡꓰ ꓠꓹ ꓟ ꓚꓲꓸ ꓛꓬ ꓤꓶꓻ ꓗꓪ ꓮ ꓡꓰ ꓟ ꓣꓳꓸ ꓚꓵꓸ_ ꓡ꓾ ꓣꓳ ꓤꓶꓻ ꓗꓪ ꓮ ꓡꓰ ꓟ ꓠꓬ ꓟꓬ ꓠꓬꓲ ꓣꓳꓸ ꓚꓵ_ ꓡ ꓐꓯ_ ꓟ ꓔꓯ ꓚꓲꓸ ꓛꓬ ꓢꓲꓺ ꓢꓲ ꓙꓲ_ ꓟ ꓔꓯ ꓠ ꓠꓹ ꓗꓴꓸ ꓠꓹ ꓟ ꓣꓳꓸ ꓚꓵ_ ꓡꓳ=

ꓮ ꓡꓲꓳ ꓐꓯ ꓠꓬ ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓣꓳ ꓟꓵꓽ ꓘꓳꓼ ꓐꓬ ꓡꓰ ꓔꓬ ꓟ ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓟꓬ ꓠꓯꓸ ꓟ ꓗꓪ ꓐꓰ ꓐꓬ ꓡꓰ ꓔꓬ ꓟ ꓔꓯ ꓢꓳꓚꓲꓮꓡ ꓟꓰꓓꓲꓮ ꓗꓪ ꓮ ꓘꓶꓸ ꓟꓽ ꓟꓳꓸ ꓖꓶ ꓡ꓾ ꓚꓵ ꓚꓵ ꓞꓳ ꓤ ꓤꓶꓻ ꓐꓬ ꓡꓰ ꓔꓬ ꓟ ꓟꓲ ꓠꓯ ꓠꓬ ꓮ ꓤ ꓤ ꓞꓻ ꓡꓰ ꓔꓬ ꓢꓲ ꓠꓬꓲ ꓞꓳ ꓤ ꓤꓶꓻ ꓠꓬ ꓙꓳ ꓓꓴ ꓦꓬꓼ ꓠꓬꓲ ꓗꓪ ꓔꓳꓹ ꓜꓳ ꓔꓬ ꓟ ꓛꓲ ꓡ ꓥ ꓟꓲ ꓢꓳꓚꓲꓮꓡ ꓟꓰꓓꓲꓮ ꓠꓬ ꓕꓱ ꓟ ꓔꓯ ꓟꓽ ꓟꓳꓸ ꓖꓶ꓾ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓪ ꓒꓴ ꓡꓰ ꓧꓪ ꓟ ꓾ ꓞꓳ ꓤ ꓠꓲꓹ ꓟ ꓔꓯ ꓮ ꓡꓰ ꓐꓰ ꓚꓵꓹ ꓖꓶ ꓠꓹ ꓟ ꓕꓱ ꓡꓱ ꓐꓰ ꓚꓳꓠꓔꓮꓠꓔ ꓐꓯ_ ꓟ ꓚꓱꓹ ꓐꓳ ꓢꓲ ꓠꓬꓲ ꓒꓴ ꓧꓪ ꓔꓬ ꓟ ꓡꓰ ꓥ ꓡꓳ= ꓣꓳ ꓠꓬ ꓮ ꓔꓳ ꓔꓳ ꓗꓳꓸ ꓙꓰ ꓕꓯ ꓠꓬ ꓬꓲ ꓪ ꓮ ꓡꓰ ꓬꓰ ꓡ ꓠꓬ ꓖꓳ ꓡꓱ ꓗꓷ ꓡꓰ ꓫꓵ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓵꓽ ꓘꓳꓼ ꓐꓰ ꓫꓸ ꓕꓱ_ ꓟ ꓚꓱꓹ ꓗꓪ ꓚꓵ ꓚꓵ ꓢꓷꓸ ꓠꓲꓹ ꓖꓶ ꓐ ꓡ ꓟ ꓢꓴ ꓫꓸ ꓕꓱ ꓡꓯꓽ ꓘꓳ_ ꓟ ꓡꓳꓸ ꓠꓬꓲ ꓝꓮꓲ ꓣꓳ ꓮ ꓫꓵ ꓠꓲꓹ ꓫꓵ_ ꓟ ꓮ ꓫꓵ ꓚꓲ ꓛꓬ ꓠꓲꓹ ꓡꓶꓽ ꓪꓴꓸ ꓠꓶꓸ ꓗꓪ ꓐꓰ ꓓꓵ ꓙ ꓢꓲ ꓠꓬꓲ ꓡꓳꓸ ꓠꓬꓲ ꓠꓹ ꓟ ꓣꓳꓸ ꓚꓵ_ ꓡꓳ= ꓟꓽ ꓥ ꓐꓯ ꓠꓬ ꓬꓲ ꓪ ꓡꓰ ꓡꓳꓸ ꓟꓳꓸ ꓖꓶ ꓡ ꓟ ꓬꓲ ꓪ ꓡꓰ ꓠꓲꓹ ꓫꓵ_ ꓟ ꓔꓯ ꓣꓳ ꓕꓱ ꓡꓱ ꓐꓰ ꓐ ꓬꓰ ꓠꓹ ꓟ ꓗꓷ ꓡꓰ ꓗꓴꓸ_ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓵꓽ ꓘꓳꓼ ꓐꓰ ꓫꓸ ꓕꓱ_ ꓟ ꓚꓱꓹ ꓗꓪ ꓣꓳ ꓔꓯ ꓢꓷꓸ ꓠꓲꓹ ꓖꓶꓽ ꓟꓽ ꓐ ꓡ ꓟ ꓢꓳꓚꓲꓮꓡ ꓟꓰꓓꓲꓮ ꓕꓱ ꓐꓱ ꓔꓯ ꓟꓽ ꓡꓳꓸ ꓠꓬꓲ ꓠꓬꓲ ꓐꓰ ꓚꓵ ꓚꓵ ꓢꓷꓸ ꓠꓲꓹ ꓖꓶ ꓐ ꓡ ꓟ ꓣꓳꓸ ꓚꓵ_ ꓟ ꓔꓯ ꓡꓳꓸ ꓠꓬꓲ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=