ꓣꓳ ꓗꓪ ꓐꓰ ꓢꓯꓸ ꓙꓰ ꓟ ꓗꓹ ꓛꓲ ꓡꓰ ꓟ ꓢꓲꓹ ꓜꓲꓻ ꓐꓱ ꓶ ꓣꓳ ꓗꓹ ꓛꓲ ꓓꓴ ꓙꓳ_ ꓟ ꓟꓽ ꓥ ꓡ꓾

ꓡ ꓞꓳ ꓕꓲ ꓣꓳ ꓠꓯꓼ ꓠꓯꓼ ꓕꓲ ꓙꓵꓹ ꓗꓪ ꓬꓲꓻ ꓡꓳꓽ ꓐꓱ ꓬꓲ ꓘꓶꓽ ꓗꓪꓙꓻ ꓖꓴ ꓫꓱꓽ ꓙꓰ_ ꓡꓳ= ꓕꓱ ꓡꓱ ꓐꓰ ꓙꓻ ꓖꓴ ꓫꓱꓽ ꓙꓰ ꓟ ꓗꓪ ꓮ ꓟꓲ ꓟꓶꓽ ꓘꓶꓼ ꓕꓯ ꓟꓶ ꓦ ꓓꓽ ꓟ ꓟꓲ ꓦꓲ ꓓꓽ ꓟ ꓙꓱꓼ ꓢꓲ꓾ ꓟꓲ ꓠꓯ ꓕꓯ ꓢꓲ ꓗꓪ ꓚꓰꓹ ꓔ ꓟ ꓗꓴ ꓤ ꓥꓪꓸ ꓮ ꓟꓬꓹ ꓚꓰꓹ ꓔ ꓟ ꓟꓳ_ ꓡꓳ= ꓬꓲ ꓠꓬ ꓕꓱ ꓡꓱ ꓚꓰꓹ ꓔ ꓟ ꓗꓴ ꓤ ꓥꓪꓸ ꓔꓯ ꓫꓱꓸ ꓤ ꓟ ꓑꓶ ꓓꓴ ꓬꓲ ꓐ ꓡ ꓟꓬ ꓛꓲ ꓗꓴ ꓤ ꓥꓪꓸ ꓔꓯ ꓬꓲꓻ ꓡꓳꓽ ꓐꓱ ꓘꓶꓽ ꓗꓪ ꓧꓳꓽ ꓖꓶ_ ꓡꓳ= ꓬꓲ ꓠꓬ ꓗꓴ ꓤ ꓥꓪꓸ ꓔꓯ ꓫꓱꓸ ꓤ ꓟ ꓑꓶ ꓓꓴ ꓡꓳꓸ ꓧꓳꓽ ꓖꓶ_ ꓟ ꓥ ꓡꓳ= ꓕꓱ ꓗꓪ ꓠꓱꓸ ꓐꓯꓼ ꓡ ꓞꓳ ꓕꓲ ꓣꓳ ꓬꓲ ꓔꓯ ꓟꓳ ꓕꓯ ꓮ ꓐꓲ ꓤ꓾ꓳ ꓠꓴ ꓮ ꓫꓵ ꓑꓶ ꓓꓴ ꓕꓱ ꓟꓬ ꓛꓲ ꓬꓲꓸ ꓟꓶꓽ ꓬꓲ ꓔꓴ ꓙꓳ_ ꓟ ꓗꓴ ꓤ ꓥꓪꓸ ꓔꓯ ꓬꓲ ꓙꓬ ꓘꓴꓽ ꓗꓪ ꓡꓳ ꓧꓳꓽ ꓔꓬ ꓡ? ꓮ ꓙꓵ ꓔꓯ ꓠꓴ ꓡꓳ ꓧꓳꓽ ꓟꓽ ꓐ ꓡ꓾ ꓖꓳ ꓡꓱ ꓠꓬꓲ ꓪꓴꓽ ꓧꓶ ꓟ ꓡꓰ ꓥꓳ꓾ ꓐꓰ ꓬꓲ ꓔꓯ ꓐꓯ ꓖꓶ_ ꓡꓳ= ꓖꓳ ꓕꓯ ꓡ ꓞꓳ ꓮ ꓐꓲ ꓖꓳ ꓕꓲ ꓣꓳ ꓟ ꓠꓬ ꓥꓪ ꓠꓬ ꓥꓪ ꓡꓳ ꓧꓳꓽ ꓟꓽ ꓘꓴ ꓟ ꓗꓴ ꓤ ꓥꓪꓸ ꓐꓱ ꓶ ꓥꓪ ꓟꓽ ꓓꓵ ꓙ꓾ ꓥꓪ ꓡꓰ ꓬꓲ ꓙꓬ ꓗꓪ ꓡꓳ ꓧꓳꓽ ꓗꓷ ꓟ ꓗꓪ ꓐꓰ ꓢꓯꓸ ꓙꓰ ꓟ ꓗꓴ ꓤ ꓥꓪꓸ ꓐꓱ ꓶ ꓡꓰ ꓥꓪ ꓓꓵ ꓙ ꓡꓳ꓾ ꓐꓰ ꓐꓯ ꓖꓶ_ ꓡꓳ= ꓕꓱ ꓡꓱ ꓐꓰ ꓡꓳꓸ ꓠꓬꓲ ꓕꓯ ꓮ ꓟꓬ ꓚꓰꓹ ꓔ ꓟ ꓬꓲ ꓔꓴ ꓬꓲ ꓟꓯꓼ ꓕꓱ ꓡꓱ ꓐꓰ ꓟꓲ ꓠꓯ ꓕꓯ ꓢꓲ ꓗꓪ ꓬꓲ ꓙꓬ ꓙꓵ_ ꓟ ꓑꓶ ꓓꓴ ꓚꓰꓹ ꓔ ꓟ ꓗꓴ ꓤ ꓥꓪꓸ ꓔꓯ ꓠꓬ ꓮ ꓙꓵ ꓬꓲ ꓡꓳ ꓧꓳꓽ ꓟꓽ ꓐ ꓡ꓾ ꓬꓲꓸ ꓬꓲ ꓙꓬ ꓗꓪ ꓡꓳ ꓧꓳꓽ ꓗꓷ ꓟ ꓗꓪ ꓐꓰ ꓢꓯꓸ ꓙꓰ ꓟ ꓗꓴ ꓤ ꓥꓪꓸ ꓐꓱ ꓶ ꓠꓬ ꓗꓹ ꓛꓲ ꓓꓴ ꓥ ꓡꓳ=

ꓠꓬꓲꓸ ꓠꓬꓲ ꓟꓵꓽ ꓘꓳꓼ ꓐꓰ ꓫꓸ ꓕꓱ ꓟ ꓙꓵꓹ ꓗꓪ ꓥ ꓟꓲ ꓕꓱ ꓟ ꓡꓰ ꓐꓰ ꓣꓳ ꓬꓰ ꓔꓬ ꓟ ꓮ ꓔꓲꓸ ꓤ ꓥ ꓟꓲ ꓣꓳ ꓔꓶꓻ ꓗꓷ ꓟ ꓢꓲꓹ ꓜꓲ ꓕꓲ ꓜꓲ ꓣꓳ ꓗꓪ ꓐꓰ ꓢꓯꓸ ꓗꓷ ꓟ ꓢꓲꓹ ꓜꓲ ꓕꓲ ꓜꓲ ꓥ ꓠꓬ ꓣꓳ ꓟꓽ ꓘꓶꓹ ꓘꓶꓹ ꓐꓰ ꓔꓬ ꓝꓲ ꓟ ꓢꓲꓹ ꓜꓲ ꓐꓱ ꓶ ꓠꓲꓹ ꓘꓪ ꓫꓵ ꓓꓴ ꓗꓹ ꓛꓲ ꓓꓴ ꓟꓽ ꓥ ꓡ꓾ ꓣꓳ ꓬꓰ ꓗꓷ ꓟ ꓠꓬ ꓮ ꓔꓲꓸ ꓤ ꓥ ꓡꓳ꓾ ꓣꓳ ꓠꓬ ꓣꓳ ꓦꓲꓻ ꓘꓴ ꓗꓪ ꓐꓰ ꓬꓰ ꓐ ꓡ ꓟ ꓠꓬ ꓮ ꓔꓲꓸ ꓤ ꓡꓰ ꓥ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓕꓲ ꓟꓲ ꓠꓯ ꓡꓱꓼ ꓔꓯ ꓠꓲꓹ ꓛꓵꓼ ꓐ ꓡ ꓠ ꓬꓰ ꓟꓽ ꓐ ꓡ ꓟꓲ ꓚꓲꓸ ꓛꓬ ꓦꓲꓻ ꓚꓲꓸ ꓛꓬ ꓐꓱ ꓗꓪ ꓠꓲꓹ ꓛꓵꓼ ꓛꓵꓼ ꓐꓰ ꓗꓷ ꓐ ꓡ ꓥꓳ ꓐꓯ ꓠꓬ ꓐꓯ ꓡꓳꓹ ꓬꓰ ꓟ ꓟꓸ ꓟꓲ ꓗꓪ ꓐ ꓙ ꓟ ꓡꓰ ꓐꓰ ꓣꓳ ꓗꓪ ꓐꓰ ꓢꓯꓸ ꓙꓰ ꓟ ꓗꓹ ꓛꓲ ꓡꓰ ꓟ ꓢꓲꓹ ꓜꓲ ꓐꓱ ꓶ ꓣꓳ ꓗꓹ ꓛꓲ ꓓꓴ ꓙꓳ_ ꓟ ꓟꓽ ꓥ ꓡ꓾ ꓖꓳ ꓡꓱ ꓠꓬ ꓣꓳ ꓐ ꓡ ꓟꓬ ꓛꓲ ꓟꓲ ꓠꓯ ꓕꓱ ꓟ ꓔꓯ ꓠꓲꓹ ꓠꓵ ꓠꓹ ꓟ ꓢꓯꓼ ꓕꓵꓼ ꓡꓯ꓾ ꓕꓱ ꓟ ꓠꓬ ꓣꓳ ꓔꓯ ꓖꓶ ꓜ ꓖꓶ ꓓꓳ ꓔꓬ ꓡꓳ ꓐꓰ ꓓꓵ ꓙ ꓠꓬꓲ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓗꓪꓼ ꓫꓵ ꓠꓹ ꓟ ꓐꓱ ꓶ ꓣꓳ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓼ ꓕꓵꓼ ꓠꓹ ꓟ ꓢꓯꓼ ꓕꓵꓼ ꓟ ꓚꓳ ꓑꓸ ꓪꓴ-ꓢ ꓠꓲꓹ ꓡꓶꓽ ꓛꓳ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ=