ꓣꓳ ꓘꓴ ꓜꓲꓼ ꓞꓳ ꓠꓬ ꓟꓵꓽ ꓘꓳꓼ ꓒꓳꓹ ꓡꓶꓸ ꓔꓬ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓫꓵ ꓙꓵꓻ ꓠꓲꓹ ꓮ ꓡꓰ ꓫꓵ ꓔꓱꓹ ꓚꓵ_ ꓟ ꓗꓪ ꓦꓰꓼ ꓞꓹ ꓡ꓾

ꓣꓳ ꓘꓴ ꓜꓲꓼ ꓞꓳ ꓠꓬ ꓟꓵꓽ ꓘꓳꓼ ꓒꓳꓹ ꓡꓶꓸ ꓔꓬ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓫꓵ ꓙꓵꓻ ꓠꓲꓹ ꓮ ꓡꓰ ꓫꓵ ꓔꓱꓹ ꓚꓵ_ ꓟ ꓗꓪ ꓦꓰꓼ ꓞꓹ ꓡ ꓐꓯ_ ꓟ ꓔꓯ ꓕꓱ ꓕꓲ ꓠꓽ ꓟꓵꓽ ꓘꓳꓼ ꓒꓳꓹ ꓚꓱꓹ ꓗꓪ ꓠ ꓠꓹ ꓓꓴ ꓬꓰ ꓡꓯ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓠꓬ ꓪ ꓜꓲ ꓪꓴꓽ ꓡ ꓫꓵ ꓟꓽ ꓙꓳ꓾ꓟꓴ ꓡ ꓫꓵ ꓟꓽ ꓙꓳ꓾ ꓮꓽ ꓠꓱ ꓟꓵꓽ ꓚꓰꓼ ꓟꓲ ꓚꓰꓼ ꓕꓯ ꓡꓰ ꓮ ꓟꓶ ꓡꓰ ꓥꓳ꓾ ꓖꓳ ꓡꓱ ꓥ ꓟꓲ ꓞꓳ ꓤ ꓠꓬ ꓕꓲ ꓠꓬꓲ ꓒꓳꓹ ꓕꓲ ꓠꓬꓲ ꓟꓬ ꓡ ꓔꓬ ꓡꓳ꓾ ꓐꓷ ꓡ ꓔꓬ ꓡꓳ꓾ ꓞꓳ ꓤ ꓟꓬ ꓡ ꓟ ꓡꓰ ꓐꓰ ꓣꓳ ꓟꓲ ꓠꓯ ꓕꓱ ꓟ ꓔꓯ ꓣꓱꓽ_ ꓟ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓟ ꓗꓪ ꓪ ꓜꓲ ꓟꓲ ꓠꓯ ꓔꓯ ꓫꓬꓹ ꓫꓵ꓾ ꓟꓲ ꓠꓯ ꓔꓯ ꓜꓲ ꓫꓵ ꓞꓳ ꓤ ꓟꓬ ꓡ_ ꓡꓳ= ꓚꓲ ꓛꓬ ꓟꓬ ꓠꓯꓸ ꓟ ꓗꓪ ꓐꓰ ꓥ ꓟꓲ ꓟꓬ ꓦꓶꓸ ꓟ ꓗꓪ ꓐꓰ ꓥ ꓟꓲ ꓞꓳ ꓤ ꓠꓬ ꓬꓲ ꓜꓲ ꓟꓬ ꓡ ꓟ ꓡꓰ ꓐꓰ ꓟꓲ ꓠꓯ ꓔꓯ ꓠꓻ ꓡꓰ ꓝꓲ_ ꓟ ꓟꓵꓽ ꓮ ꓟꓬꓹ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓰ ꓢꓴ ꓟꓬ ꓡ ꓔꓬ ꓡꓳ꓾ ꓟꓲ ꓠꓯ ꓠꓬ ꓪꓴꓽ ꓡ ꓟ ꓟꓽ ꓙꓳ ꓥ ꓟꓲ ꓞꓳ ꓤ ꓠꓬ ꓟꓬ ꓡ ꓐꓷ ꓡ ꓢꓲ ꓠꓬꓲ ꓟꓲ ꓠꓯ ꓔꓯ ꓠꓻ ꓡꓰ ꓝꓲ ꓔꓬ ꓫꓵ ꓦꓬꓼ ꓠꓬꓲ ꓥ ꓡꓳ=ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓟꓲ ꓠꓯ ꓕꓱ ꓟ ꓔꓯ ꓚꓰꓼ ꓕꓯ ꓞꓳ ꓤ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓖꓶ ꓔ ꓡꓳ= ꓖꓳ ꓟ ꓑꓶ ꓓꓴ ꓣꓳ ꓚꓲ ꓛꓬ ꓘꓴ ꓜꓲꓼ ꓞꓳ ꓣꓳ ꓠꓬ ꓟꓽ ꓪ ꓟ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓙꓰ ꓔꓬ ꓟ ꓡꓰ ꓐꓰ ꓚꓲ ꓛꓬ ꓘꓴ ꓜꓲꓼ ꓞꓳ ꓪꓴꓸ ꓓꓴ ꓣꓱꓽ ꓢꓴ ꓥ ꓠꓬ ꓚꓲ ꓛꓬ ꓘꓴ ꓜꓲꓼ ꓞꓳ ꓠꓬ ꓕꓱ ꓕꓲ ꓚꓱꓹ ꓑꓶ ꓓꓴ ꓟꓵꓽ ꓘꓳꓼ ꓚꓱꓹ ꓔꓯ ꓟꓳꓸ ꓥ ꓟꓲ ꓦꓰꓼ ꓞꓹ ꓓꓴ ꓕꓲ ꓟ ꓙꓳ ꓠ ꓔ ꓡꓳ= ꓚꓲ ꓛꓬ ꓘꓴ ꓜꓲꓼ ꓞꓳ ꓠꓬ ꓕꓱ ꓡꓱ ꓐꓰ ꓟꓵꓽ ꓘꓳꓼ ꓒꓳꓹ ꓡꓶꓸ ꓔꓬ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓐꓰ ꓙꓳꓺ ꓗ ꓠꓹ ꓟ꓾ ꓕꓲ ꓚꓱꓹ ꓐꓯ ꓠꓬ ꓞꓳ ꓤ ꓮ ꓟꓬꓹ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓢꓷꓸ ꓡꓰ ꓠꓹ ꓟ ꓐꓱ ꓶ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓶꓻ ꓙꓳ_ ꓡꓳ= ꓮ ꓡꓰ ꓐꓰ ꓙꓳꓺ ꓗ ꓠꓹ ꓟ ꓐꓰ ꓮ ꓡꓰ ꓐꓰ ꓗꓪ ꓫꓵ ꓠꓹ ꓟ ꓘꓴ ꓜꓲꓼ ꓞꓳ ꓟꓸ ꓒꓽ ꓣꓱꓽ ꓢꓴ ꓗꓪ ꓐꓰ ꓝꓮꓲ ꓚꓲ ꓛꓬ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓔꓯ ꓟꓸ ꓖꓶ ꓠꓹ ꓟ ꓐꓱ ꓶ ꓥ ꓡꓳ꓾

ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓥ ꓕ ꓑꓳꓸ ꓟꓵꓽ ꓘꓳꓼ ꓒꓳꓹ ꓡꓶꓸ ꓚꓱꓹ ꓗꓪ ꓮ ꓡꓰ ꓐꓰꓦꓰꓼ ꓞꓹ ꓠꓯꓹ ꓡ꓾ ꓟꓵꓽ ꓗꓳꓸ ꓓꓵ ꓓꓵ ꓗꓪ ꓟ ꓘꓴ ꓜꓲꓼ ꓞꓳ ꓠꓬ ꓮ ꓡꓰ ꓐꓰ ꓦꓰꓼ ꓞꓹ ꓔꓬ ꓗꓴ ꓡ ꓐꓰ ꓣꓳ ꓡꓳꓸ ꓠꓬꓲ ꓕꓯ ꓬꓲꓸ ꓪꓴꓸ ꓕꓯ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓟꓵꓽ ꓘꓳꓼ ꓕꓱ ꓟ ꓔꓯ ꓠꓲꓹ ꓠꓵ ꓠꓹ ꓟ꓾ ꓗꓪ ꓫꓵ ꓠꓹ ꓟ꓾ ꓦꓰꓼ ꓞꓹ ꓔꓬ ꓡꓳ= ꓝꓮꓲꓦꓰꓼ ꓞꓹ ꓔꓬ ꓟ ꓡꓰ ꓟꓽ ꓞꓲ ꓟꓵꓽ ꓘꓳꓼ ꓕꓱ ꓟ ꓪ ꓜꓲ ꓐꓲ ꓡ ꓠꓹ ꓟ ꓪ ꓜꓲ ꓠꓲꓹ ꓛꓵꓼ ꓡ ꓠꓹ ꓟ ꓐꓱ ꓶ ꓢꓲꓹ ꓜꓲ ꓢꓲꓹ ꓟꓲ ꓔꓷ ꓠꓬꓲ ꓝꓮꓲ ꓚꓲ ꓛꓬ ꓢꓲ ꓤ ꓐꓴ ꓔꓯ ꓟꓬ ꓢꓷ ꓒꓴ ꓖꓶ_ ꓟ꓾ ꓚꓲ ꓛꓬ ꓢꓲ ꓤ ꓐꓴ ꓔꓯ ꓟꓵꓽ ꓘꓳꓼ ꓚꓳꓸ ꓗꓴꓸ ꓙꓰ ꓙꓳ ꓢꓲ ꓟꓬ ꓢꓷ ꓒꓴ ꓖꓶ_ ꓟ꓾ ꓚꓵ ꓚꓵ ꓟꓵꓽ ꓘꓳꓼ ꓔꓯ ꓠꓲꓹ ꓫꓵ ꓠꓹ ꓟ ꓗꓪ ꓫꓵ ꓠꓹ ꓟ ꓠꓬ ꓮ ꓘꓶꓸ ꓣꓳꓸ ꓚꓵ_ ꓡꓳ꓾ ꓐꓯ_ ꓟ ꓬꓲ ꓪ ꓔꓬ ꓪ ꓡꓰ ꓠꓹ ꓟ ꓐꓱ ꓶ ꓘꓴ ꓜꓲꓼ ꓞꓳ ꓪꓴꓸ ꓓꓴ ꓣꓱꓽ ꓢꓴ ꓬꓲ ꓚꓲ ꓛꓬ ꓡꓰ ꓢꓯꓼ ꓕꓵꓼ ꓟ ꓕꓱ ꓡꓱ ꓬꓰ ꓢꓲ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓬꓲ ꓪ ꓔꓳꓹ ꓙ ꓔꓬ ꓡꓳ꓾ ꓐꓯ_ ꓟ ꓔꓯ ꓡꓳꓸ ꓟꓳ_ ꓡꓳ=

ꓣꓳ ꓘ-ꓕꓳ-ꓡꓲ ꓘꓴ ꓜꓲꓼ ꓞꓳ ꓥ ꓟꓲ ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ꓾ ꓝꓮꓲ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲ ꓪ ꓐꓴ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓣꓳ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓢꓲꓹ ꓜꓲ ꓔꓷ ꓠꓬꓲ ꓢꓲꓹ ꓜꓲ ꓔꓯ ꓒꓵ ꓠꓬꓲ ꓝꓮꓲ ꓟꓽ ꓣꓱꓽ ꓟꓽ ꓓ ꓟ ꓡꓰ ꓣꓱꓽ ꓢꓲ ꓠꓬꓲ ꓮ ꓫꓵ ꓔꓯ ꓥ ꓟꓲ ꓢꓲ ꓣꓱꓽ ꓗꓴꓸ ꓠꓹ ꓟ ꓕꓱ ꓡꓱ ꓐꓰ ꓙ ꓖꓴ ꓟꓸ ꓖꓶ ꓔ ꓟ ꓟꓲ ꓙꓳ_ ꓡꓳ꓾ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓡꓰ ꓫꓵ ꓘꓴ ꓜꓲꓼ ꓞꓳ ꓥ ꓟꓲ ꓪꓴ-ꓢ ꓐꓯ ꓘꓶꓽ ꓔꓯ ꓟꓸ ꓖꓶ ꓕꓲ ꓗꓼ ꓟꓽ ꓠꓽ ꓡꓰ ꓡꓰ ꓐꓰ ꓟꓲ ꓠꓯ ꓕꓱ ꓟ ꓔꓯ ꓮ ꓡꓰ ꓐꓰ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓥ ꓟꓲ ꓟꓸ ꓖꓶ ꓠꓹ ꓟ ꓪꓴ-ꓢ ꓠꓲꓹ ꓡꓶꓽ ꓙꓳ_ ꓡꓳ꓾ ꓐꓰ ꓓꓵꓽ ꓙ_ ꓡꓳ= ꓖꓳ ꓡꓱ ꓠꓬꓲ ꓠꓴ ꓥꓪ ꓮ ꓙꓵ ꓚꓲ ꓛꓬ ꓗꓴꓷꓼ ꓚꓲ ꓛꓬ ꓟꓵꓽ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ꓾ ꓟꓹ ꓟ ꓟꓲ ꓠꓯ ꓔꓯ ꓫ ꓟꓳ ꓗꓴꓸ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=