ꓪꓳꓽ ꓜꓲꓽ ꓛꓵꓺ ꓬꓲ ꓫꓵꓽ ꓫꓵꓽ ꓙꓲꓻ ꓖꓴ ꓙꓳˍ ꓟ ꓚꓱꓹ

ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓚꓱꓹ ꓐꓴ ꓔꓯ ꓐꓯ ꓟꓸ ꓖꓶˍ ꓟ ꓙꓵꓹ ꓗꓪ ꓐꓰ ꓠꓬꓲꓸ ꓠꓬꓲ ꓗꓪ ꓠꓬ ꓪꓳꓽ ꓙꓲꓽ ꓫꓵꓽ ꓫꓵꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

ꓡꓳ-ꓟꓲꓽ ꓥꓳꓽ ꓗꓪ ꓐꓰ ꓟꓴꓠ-ꓡ-ꓴꓸꓼ-ꓠꓲ (ꓘ-ꓚꓬꓯꓼ-ꓴꓸꓼ) ꓐꓰ ꓘꓴˍ ꓟ ꓪꓳꓽ ꓙꓲꓽ ꓫꓵꓽ ꓫꓵꓽ ꓠꓬ ꓞꓳ ꓤ ꓐꓴ ꓔꓯ ꓙꓲꓻ ꓖꓴ ꓮ ꓟꓬꓹ ꓖꓶ ꓐ ꓡˍ ꓟ ꓪꓳꓽ ꓒꓬꓽ ꓐꓴ ꓘꓴꓽ ꓗꓪ ꓟ ꓕꓲ ꓙꓰꓽ ꓥ ꓡꓳ= ꓪꓳꓽ ꓙꓲꓽ ꓕꓱ ꓟ ꓔꓯ ꓚꓬꓸ ꓜꓽ꓾ ꓡꓱꓺ ꓜꓽ꓾ ꓬꓲ ꓜꓲꓽ ꓜꓽˍ ꓟ ꓐꓰ ꓒꓬꓮꓪ-ꓬꓰ ꓫꓬꓹ ꓢꓲ ꓓꓳꓻ ꓐ ꓡˍ ꓟ ꓥ ꓡꓳ= ꓪꓳꓽ ꓙꓲꓽ ꓫꓵꓽ ꓗꓪ ꓝꓲꓐꓰꓣ ꓢꓯꓼ ꓐꓰ ꓧꓪꓽ ꓖꓳ ꓓꓱꓽ ꓔꓯ ꓙꓲꓻ ꓓꓴ ꓖꓶˍ ꓟ ꓮꓠꓔꓲꓳꓫꓲꓓꓮꓠꓔꓢ ꓥˍ ꓟꓲ ꓮ ꓟꓬꓹ ꓓꓵˍ ꓡꓳ=

ꓫꓵꓽ ꓘꓴꓽ ꓗꓪ ꓟ ꓗꓳ-ꓡꓯꓸ-ꓢ-ꓕ-ꓣꓮꓪ ꓔꓯ ꓥˍ ꓟꓲ ꓬꓯꓼ ꓡꓰ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓒꓸˍ ꓟ (ꓘꓪꓽˍ ꓟ) ꓔꓯˍ ꓟꓲ ꓝꓱ ꓡꓰ ꓝꓲ ꓐ ꓡˍ ꓡꓳ= ꓟꓬ-ꓢꓶꓽ ꓔꓬꓹ ꓢꓻ ꓓꓴ ꓐꓱ ꓶ ꓬꓳꓸ ꓚꓵˍ ꓟ ꓢꓯꓼ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ ꓐꓰˍ ꓟꓲ ꓐꓯ ꓓꓻˍ ꓡꓳ=

ꓪꓳꓽ ꓙꓲꓽ ꓫꓵꓽ ꓫꓵꓽ ꓗꓪ ꓚꓮꓠꓚꓰꓣ ꓠꓻ꓾ ꓠꓲꓹ ꓟ ꓐꓰ ꓫꓵꓽ ꓓꓯꓻˍ ꓟ ꓔꓯ ꓗꓽ ꓕꓸ ꓐ ꓡˍ ꓟ ꓮꓠꓔꓲꓳꓫꓲꓓꓮꓠꓔ ꓐꓴ ꓡꓰꓽ ꓟꓽ ꓞꓲ꓾ ꓦꓲꓔꓮꓟꓲꓠ ꓬꓲ ꓫꓵꓽ ꓬꓲ ꓙꓰꓽ꓾ ꓝꓲꓐꓰꓣ ꓢꓯꓼ꓾ ꓗ-ꓢꓲ ꓢꓯꓼ꓾ ꓑꓳꓔꓮꓢꓢꓲꓴꓟ ꓢꓯꓼ꓾ ꓕꓱ ꓟꓬ ꓫꓵꓽ ꓢꓯꓼ ꓓˍ ꓟ ꓑꓶꓸ ꓓꓴ ꓕꓲ ꓠꓬꓲ ꓐꓱ ꓶ ꓖꓳ ꓓꓱꓽ ꓗꓪ ꓣꓱꓽ ꓞꓹ ꓟ ꓢꓯꓼ ꓔꓯ ꓐꓲ ꓡꓰ ꓝꓲˍ ꓟ ꓑꓶꓸ ꓓꓴ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓔꓯ ꓜꓽ ꓖꓶ ꓠ ꓗꓹ ꓟ ꓥ ꓡꓳ=

ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓡꓰ ꓖꓶˍ ꓟ ꓙꓲꓻ ꓖꓴ ꓐꓴ ꓠꓬ ꓮ ꓫꓵꓽ ꓥ ꓡ?

1. ꓚꓮꓠꓚꓰꓣ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶ ꓐ ꓡˍ ꓡꓳ=

ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓗꓪ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓒꓬꓱꓼ ꓡ ꓝꓲˍ ꓟ ꓮꓠꓔꓲꓳꓫꓲꓓꓮꓠꓔ ꓐꓴˍ ꓡꓰꓽ ꓟꓽ ꓞꓲ ꓦꓲꓔꓮꓟꓲꓠ ꓐꓰ ꓟꓲꓠꓰꓣꓮꓡ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓥ ꓡꓳ= ꓚꓮꓠꓚꓰꓣ ꓠꓻ ꓟꓽ ꓒꓬꓱꓼ ꓡ ꓠ ꓗꓽ ꓕꓸ ꓙ ꓖꓶˍ ꓟ ꓚꓮꓣꓳꓔꓰꓠꓳꓲꓓꓢ ꓐꓰ ꓘꓴˍ ꓟ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓖꓶ ꓠ ꓔ ꓡꓳ= ꓪꓳꓽ ꓙꓲꓽ ꓛꓵ ꓕꓱ ꓟ ꓠꓬ ꓬꓲꓸ ꓪꓴꓻ ꓓꓽ ꓟ ꓚꓮꓠꓚꓰꓣ꓾ ꓐꓵꓼ ꓟꓵ ꓚꓮꓠꓚꓰꓣ꓾ ꓫꓵꓽ ꓚꓮꓠꓚꓰꓣ ꓐꓴ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=

1. ꓠꓬꓲ ꓟꓳꓻ ꓓꓴ ꓔꓯ ꓫꓬꓽ ꓡꓰ ꓝꓲˍ ꓡꓳ=

ꓦꓲꓔꓮꓟꓲꓠ (ꓮ) ꓮ ꓟꓬꓹ ꓙꓳˍ ꓟ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓔꓯ ꓟꓬ ꓢꓶꓽ ꓐꓱ ꓶ ꓮ ꓘꓶꓸ ꓙꓲꓻˍ ꓟ ꓠꓯꓻ ꓞꓲꓼ ꓕꓲ ꓙꓰꓽ ꓥ ꓡꓳ ꓐꓰ ꓮ ꓟꓬꓹ ꓢꓷꓸ ꓔ ꓟ ꓥ ꓡꓳ= ꓪꓳꓽ ꓙꓲꓽ ꓛꓵ ꓕꓱ ꓟ ꓠꓬ ꓟꓬ ꓢꓶꓽ ꓢꓯꓼ ꓔꓯ ꓪꓽ ꓠꓬꓲ ꓡ ꓝꓲˍ ꓡꓳ꓾ ꓫꓬꓽ ꓫꓬꓽ ꓡꓰꓽ ꓟꓳꓻ ꓝꓲˍ ꓡꓳ꓾ ꓟꓶꓽ ꓘꓶꓼ ꓕꓯ ꓥˍ ꓟꓲ ꓫꓬꓽ ꓫꓬꓽ ꓡꓰꓽ ꓟꓳꓻ ꓡꓰ ꓠ ꓬꓰ ꓙ ꓖꓶ ꓐ ꓡˍ ꓡꓳ= ꓦꓲꓔꓮꓟꓲꓠ ꓮ ꓢꓯꓼ ꓣꓱꓽ ꓞꓹ ꓟ ꓤ ꓠꓱ ꓤ ꓐꓴ ꓔꓯ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓝꓲˍ ꓟ ꓗꓪ ꓐꓰ ꓞꓲꓼ ꓣꓳˍ ꓕꓯ ꓟꓬ ꓢꓶꓽ ꓢꓯꓼ ꓐꓽˍ ꓟ꓾ ꓟꓬ ꓢꓶꓽ ꓶꓺ ꓡꓰˍ ꓟ ꓟꓽ ꓒꓬꓱꓼ ꓡ ꓠ ꓬꓰ ꓙ ꓖꓶ ꓐ ꓡˍ ꓡꓳ=

1. ꓢꓰꓹ-ꓛꓬꓳ ꓔꓯ ꓥˍ ꓟꓲ ꓔꓲꓺ ꓟꓴˍ ꓗꓷ ꓡꓰ ꓝꓲˍ ꓡꓳ=

ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓗꓪ ꓫꓵꓽ ꓘꓴꓽ ꓗꓪ ꓟ ꓞꓼ ꓛꓵꓻ ꓢꓯꓼ ꓔꓯ ꓔꓲꓺ ꓟꓴ ꓗꓷ ꓡꓰ ꓝꓲˍ ꓟ꓾ ꓞꓼ ꓛꓵꓻ ꓢꓯꓼ ꓔꓯ ꓙꓵꓽ ꓐ ꓡˍ ꓟ ꓮꓠꓔꓲꓳꓫꓲꓓꓮꓠꓔ ꓐꓰ ꓟꓲꓠꓰꓣꓮꓡ ꓢꓯꓼ ꓮ ꓟꓬꓹ ꓙꓳˍ ꓟ ꓑꓶ ꓓꓴ ꓢꓰꓹ-ꓛꓬꓳ ꓠꓻ ꓙꓳ ꓢꓴ ꓐꓴ ꓮ ꓕꓯ ꓟꓲ ꓜꓽ ꓖꓶ ꓠꓯꓹ ꓟ ꓜꓽ ꓓꓴ ꓕꓲ ꓙꓰꓽ ꓥ ꓡꓳ=

1. ꓫꓵꓽ ꓓꓯꓻ ꓠꓻ ꓙꓳ ꓢꓴ ꓐꓴ ꓐꓱ ꓶˍ ꓟ ꓮ ꓘꓶꓸ ꓙꓲꓻˍ ꓟ ꓥ ꓡꓳ=

ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓗꓪ ꓝꓲꓐꓰꓣ ꓢꓯꓼ ꓮ ꓟꓬꓹ ꓙꓳ ꓢꓲ ꓑꓳꓔꓮꓢꓢꓲꓴꓟ ꓥˍ ꓟꓲ ꓓˍ ꓟ ꓑꓶꓸ ꓓꓴ ꓫꓵꓽ ꓓꓯꓻˍ ꓟ ꓔꓯ ꓙꓵꓽ ꓐ ꓡˍ ꓟ ꓡꓰꓽ ꓟꓽ ꓞꓲ ꓫꓵꓽ ꓓꓯꓻˍ ꓟ ꓑꓶꓸ ꓓꓴ ꓗ ꓠꓯꓸ ꓕꓯ ꓒꓬꓱꓼ ꓡˍ ꓟ ꓠꓲꓹ ꓟ ꓠꓻ ꓟꓽ ꓒꓬꓱꓼ ꓡ ꓠˍ ꓟꓲ ꓗꓽ ꓕꓸ ꓙ ꓖꓶˍ ꓡꓳ=

1. ꓖꓳ ꓓꓱꓽ ꓗꓪ ꓢꓯꓼ ꓙꓳ ꓡ ꓝꓲˍ ꓡꓳ=

ꓪꓳꓽ ꓙꓲꓽ ꓛꓵ ꓫꓵꓽ ꓫꓵꓽ ꓗꓪ ꓧꓪꓽ ꓖꓳ ꓓꓱꓽ ꓬꓲ ꓘꓴꓽ ꓗꓪ ꓟ ꓢꓯꓼ ꓐꓴ ꓔꓯ ꓮ ꓟꓬꓹ ꓡꓴꓽ ꓖꓶˍ ꓟ ꓦꓲꓔꓮꓟꓲꓠ ꓚ ꓢꓯꓼ ꓮ ꓟꓬꓹ ꓓꓵˍ ꓡꓳ= ꓦꓲꓔꓮꓟꓲꓠ ꓚ ꓠꓬ ꓢꓯꓼ ꓙꓳ ꓡ ꓝꓲˍ ꓡꓳ꓾ ꓖꓳ ꓓꓱꓽ ꓠꓯꓸꓼ ꓗꓪ ꓓꓵꓽ ꓡˍ ꓟ ꓠꓻ ꓐꓴ ꓔꓯ ꓖꓼ ꓓꓳ ꓖꓶ ꓐ ꓡˍ ꓡꓳ= ꓙꓬꓻ ꓝꓲꓸ ꓗꓪ ꓒꓬꓱꓼ ꓡ ꓗꓴꓸˍ ꓟ ꓙꓬꓻ ꓓꓵꓽ ꓡꓰˍ ꓟ ꓔꓯˍ ꓟꓲ ꓓꓻ ꓡꓰ ꓝꓲ ꓐ ꓡˍ ꓟ ꓪꓴꓸ ꓠꓬꓲ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓔꓯ ꓮ ꓕꓯˍ ꓟꓲ ꓜꓽ ꓖꓶ ꓠꓯꓹ ꓟ ꓥ ꓡꓳ=

ꓕꓱ ꓟ ꓠꓬ ꓟꓴꓠ-ꓡ-ꓴꓸꓼ-ꓠꓲ (ꓘ-ꓚꓬꓯꓼ-ꓴꓸꓼ) ꓐꓰ ꓘꓴˍ ꓟ ꓪꓳꓽ ꓙꓲꓽ ꓛꓵ ꓬꓲ ꓫꓵꓽ ꓫꓵꓽ ꓙꓲꓻ ꓖꓴ ꓙꓳˍ ꓟ ꓚꓱꓹ ꓐꓴ ꓥ ꓡꓳ=