ꓮ ꓡꓰ ꓫꓵ ꓦ ꓡꓱ ꓚꓱꓹ ꓗꓪ ꓥ ꓟꓲ ꓮ ꓡꓲ ꓫꓵ ꓞꓳ ꓫꓵ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ꓾ ꓓꓵꓽ ꓙ ꓗꓴꓸ ꓠꓹ ꓟ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓶꓻ ꓙꓳ_ ꓡꓳ꓾

ꓟꓲ ꓠꓯ ꓕꓱ ꓟ ꓗꓪ ꓠꓬ ꓞꓳ ꓫꓵ ꓞꓳ ꓙꓰ ꓮ ꓟꓬꓹ ꓦ ꓡꓱ ꓫꓵ ꓦ ꓡꓱ ꓚꓱꓹ ꓮ ꓟꓬꓹ ꓔꓬ ꓟ ꓑꓶ ꓓꓴ ꓦ ꓡꓱ ꓫꓵ ꓦ ꓡꓱ ꓚꓱꓹ ꓗꓪ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓙ ꓖꓴ ꓟꓳꓸ ꓖꓶ_ ꓟ ꓔꓯ ꓣꓳ ꓟꓳ ꓪ ꓡꓳ= ꓐꓴ-ꓓ ꓦ ꓡꓱ ꓢꓴ ꓥ ꓟꓲ ꓪꓴ-ꓢ ꓦ ꓡꓱ ꓢꓴ ꓥ ꓟꓲ ꓟꓴ-ꓢꓡꓲ ꓦ ꓡꓱ ꓢꓴ ꓥ ꓟꓲ ꓧꓲ-ꓓꓴ ꓦ ꓡꓱ ꓢꓴ ꓥ ꓟꓲ ꓮ ꓡꓲ ꓫꓵ ꓦ ꓡꓱ ꓢꓴ ꓥ ꓟꓲ ꓟꓹ ꓟ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ ꓶꓻ ꓙꓳ_ ꓡꓳ= ꓕꓱ ꓟ ꓡꓰ ꓟꓽ ꓞꓲ ꓚꓲ ꓛꓬ ꓦ ꓡꓱ ꓚꓱꓹ ꓥ ꓟꓲ ꓕꓱ ꓟ ꓔꓯ ꓢꓯꓼ ꓖꓶ ꓔ ꓫꓵ ꓡꓳ= ꓣꓳ ꓙꓲ ꓢꓴ ꓢꓲ ꓤ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓥ ꓟꓲ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓙꓳ_ ꓟ ꓡꓰ ꓐꓰ ꓝꓮꓲ ꓢꓲ ꓫꓬ ꓕꓳ ꓶ ꓗꓪ ꓪꓴ-ꓢ ꓡꓰ ꓣꓳ ꓔꓯ ꓶꓻ ꓖꓶ ꓔ ꓟ ꓡꓰ ꓐꓰ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ꓾ ꓔꓶ ꓜ ꓔꓶ ꓓꓳ ꓠꓹ ꓟ ꓕꓱ ꓡꓱ ꓐꓰ ꓶꓻ ꓙꓳ_ ꓡꓳ= ꓕꓱ ꓟ ꓡꓰ ꓟꓽ ꓞꓲ ꓣꓳ ꓐꓴ-ꓓ ꓦ ꓡꓱ ꓚꓱꓹ ꓔꓯ ꓡꓳꓸ ꓠꓬꓲ ꓥ ꓟꓲ ꓞꓳ ꓤ ꓐꓯ_ ꓟ ꓠꓬ ꓡꓲ ꓫꓵ ꓗꓪ ꓐꓰ ꓒꓬꓱꓼ ꓡ ꓡꓳ ꓐꓰ ꓙꓵꓻ ꓡꓳ= ꓟꓲ ꓦꓲꓻ꓾ ꓮꓸ ꓔꓳꓸ꓾ ꓟꓲ ꓠꓯ꓾ꓬꓲ ꓙꓬ ꓕꓱ ꓡꓱ ꓫꓵ ꓗꓪ ꓐꓰ ꓒꓬꓱꓼ ꓡ ꓡꓳ ꓐꓰ ꓙꓵꓻ ꓡꓳ= ꓖꓳ ꓡꓱ ꓠꓬꓲ ꓮ ꓫꓵ ꓗꓪ ꓐꓰ ꓕꓱ ꓟ ꓗꓪ ꓐꓰ ꓗꓳꓸ ꓡ ꓫꓵ ꓟꓽ ꓙꓳ꓾ ꓐꓰ ꓬꓲ ꓪ ꓙꓵꓻ ꓡꓳ꓾ ꓕꓱ ꓟ ꓡꓰ ꓐꓰ ꓬꓲ ꓪ ꓦ ꓡꓱ ꓔꓬ ꓟ ꓐꓴ-ꓓ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓮ ꓡꓲ ꓠꓲꓹ ꓠꓵ ꓐꓯ_ ꓟ ꓬꓲ ꓜꓲ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓣꓳ ꓟꓳ ꓡꓳ=ꓢꓲꓹ ꓜꓲ ꓢꓲꓹ ꓟꓰ ꓔꓯ ꓬꓲ ꓠꓲꓹ ꓠꓵꓻ ꓡꓳ꓾ ꓢꓲꓹ ꓜꓲ ꓢꓲꓹ ꓟꓰ ꓙꓱ ꓤ ꓙꓱ ꓟꓰ ꓔꓯ ꓬꓲ ꓠꓲꓹ ꓠꓵ_ ꓡꓳ= ꓕꓱ ꓟ ꓡꓰ ꓟꓽ ꓞꓲ ꓞꓳ ꓤ ꓔꓯ ꓥ ꓟꓲ ꓬꓲ ꓠꓵ ꓠꓲꓹ ꓟꓳꓸ ꓖꓶ ꓔꓲꓸ ꓡꓳ= ꓕꓱ ꓟ ꓡꓰ ꓐꓰ ꓠꓯꓸ ꓐꓯ ꓮ ꓡꓲ ꓫꓵ ꓦ ꓡꓱ ꓚꓱꓹ ꓔꓯ ꓡꓳꓸ ꓠꓬꓲ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓠꓹ ꓟ꓾ ꓟꓲ ꓠꓯ ꓕꓱ ꓟ ꓠꓬ ꓣꓳ ꓟꓹ ꓟ ꓟꓲ ꓠꓯ ꓥ ꓟ꓾ ꓣꓳ ꓔꓯ ꓖꓶ  ꓜ ꓖꓶ ꓓꓳ ꓔꓬ ꓟ ꓥ ꓟ꓾ꓕꓱ ꓡꓱ ꓫꓵ ꓦ ꓡꓱ ꓚꓱꓹ ꓙꓵꓻ ꓚꓱꓹ ꓗꓪ ꓐꓰ ꓟꓳꓸ ꓖꓶ ꓔꓬ ꓡꓳ= ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓔꓯ ꓠꓬꓲ ꓡꓳꓸ ꓗꓪ ꓫꓵ ꓗꓪ ꓠꓬ ꓞꓳ ꓫꓵ ꓟꓽ ꓘꓶꓽ꓾ ꓦ ꓡꓱ ꓚꓱꓹ ꓟꓽ ꓘꓶꓽ꓾ꓮ ꓙꓵ ꓕꓱ ꓡꓱ ꓐꓰ ꓢꓯꓼ ꓕꓵꓼ ꓠꓹ ꓟ ꓣꓳꓸ ꓚꓵ_ ꓡꓳ=

ꓕꓱ ꓡꓱ ꓐꓰ ꓬꓰ_ ꓟ ꓗꓪ ꓐꓰ ꓣꓳ ꓐꓱ ꓶ ꓡꓰ ꓟꓽ ꓞꓲ ꓶ ꓤ ꓫꓱꓸ ꓤ ꓐꓱ ꓶ ꓣꓳ ꓓꓵꓽ ꓙ ꓟ ꓥ ꓡꓳ= ꓟꓲ ꓠꓯ ꓕꓱ ꓟ ꓗꓪ ꓣꓳ ꓛꓲ ꓡ ꓟ ꓠꓬ ꓠꓵ ꓠꓲꓹ ꓟꓳꓸ ꓖꓶ ꓠꓹ ꓟ ꓡꓰ ꓟꓽ ꓥ ꓡ꓾ ꓣꓳ ꓐꓱ ꓶ ꓡꓰ ꓓꓵ ꓙ ꓕꓯ ꓣꓳ ꓦꓲ ꓘꓴ ꓐꓱ ꓶ ꓡꓰ ꓓꓵ ꓙ ꓕꓯ ꓣꓳ ꓠꓬ ꓙꓱ ꓤ ꓐꓰ ꓪ_ ꓟ ꓞꓳ ꓤ ꓔꓯ ꓫꓱꓹ ꓡꓳ= ꓮ ꓫꓵ ꓑꓶ ꓓꓴ ꓥ ꓡ ꓐꓯ ꓠꓬ꓾ ꓙꓱ ꓤ ꓙꓱ ꓟꓲ ꓠꓬ ꓬꓲ ꓪ ꓐꓱ ꓶ ꓡꓰ ꓬꓲ ꓪ ꓓꓵꓽ ꓙ ꓡꓳ= ꓬꓲ ꓪ ꓠꓲꓹ ꓟ ꓠꓯꓼ ꓗꓪ ꓓꓳ ꓡ ꓟ ꓡꓰ ꓬꓲ ꓪ ꓢꓯꓼ ꓕꓵꓼ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓞꓳ ꓤ ꓠꓬ ꓕꓱ ꓡꓱ ꓟꓽ ꓥ꓾ ꓞꓳ ꓤ ꓠꓬ ꓠꓲꓹ ꓠꓵꓻ ꓗꓴꓸ_ ꓡꓳ꓾ ꓬꓲ ꓪ ꓐꓱ ꓶ ꓡꓰ ꓟꓽ ꓞꓲ ꓠꓱꓸ ꓐꓯꓼ ꓐꓱ ꓶ ꓥ ꓟꓲ ꓓꓵꓽ ꓙ ꓗꓴꓸ_ ꓡꓳ= ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓟꓲ ꓠꓯ ꓕꓱ ꓟ ꓗꓪ ꓐꓰ ꓖꓶ ꓡ ꓟ ꓐꓰ ꓟꓽ ꓥ ꓥ ꓐꓰ ꓣꓳ ꓮ ꓫꓵ ꓟꓲ ꓟꓽ ꓟꓶ꓾ ꓓꓵꓽ ꓙ ꓔꓬ ꓟ꓾ ꓖꓪ ꓔꓬ ꓟ꓾ ꓣꓱꓽ ꓔꓬ ꓟ ꓮ ꓙꓵ ꓠꓬ ꓟꓲ ꓠꓯ ꓕꓱ ꓟ ꓗꓪ ꓐꓰ ꓓꓳꓺ ꓡ ꓡꓳ= ꓟꓲ ꓠꓯ ꓕꓱ ꓟ ꓔꓯ ꓣꓳ ꓫ ꓟꓳ ꓟ ꓗꓪ ꓐꓰ ꓟꓲ ꓠꓯ ꓕꓱ ꓟ ꓔꓯ ꓣꓳ ꓠꓲꓹ ꓠꓵ ꓟ ꓗꓪ ꓐꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓰ_ ꓟ ꓕꓲ ꓫꓵ ꓫꓵ ꓗꓪ ꓬꓲ ꓔꓯ ꓬꓰ ꓙ ꓖꓶ_ ꓫꓵ꓾ ꓬꓲ ꓔꓯ ꓫꓱꓸ ꓤ ꓖꓶ_ ꓫꓵ꓾ ꓕꓲꓲ ꓫꓵ ꓫꓵ ꓬꓰ ꓔꓬ ꓡ ꓐꓰ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ= ꓔꓯꓺ ꓥꓳꓽ ꓮꓸ ꓔꓳꓸ ꓔꓯ ꓢꓲ ꓣꓱꓽ_ ꓟ꓾ ꓬꓲꓻ ꓙꓬ ꓔꓯ ꓢꓲ ꓣꓱꓽ_ ꓟ꓾ ꓮ ꓟꓶ ꓤꓶꓻ ꓦꓬꓼ ꓠꓬꓲ ꓗꓪ ꓮ ꓫꓵ ꓔꓯ ꓥ ꓟꓲ ꓟꓽ ꓣꓱꓽ ꓟꓽ ꓓ ꓟ ꓡꓰ ꓣꓱꓽ_ ꓟ꓾ ꓮ ꓟꓬꓹ ꓮ ꓟꓬꓹ ꓟꓽ ꓪꓴꓻ ꓟ꓾ ꓕꓱ ꓡꓱ ꓕꓱ ꓟ ꓥ ꓟꓲ ꓣꓳ ꓟꓲ ꓠꓯ ꓔꓯ ꓠꓬꓲ ꓡꓳꓸ ꓔꓬ ꓟ꓾ ꓗꓪ ꓫꓵ ꓔꓬ ꓟ ꓥ ꓡꓳ= ꓢꓲꓹ ꓠꓯ ꓙꓰ ꓢꓲ ꓢꓲꓹ ꓜꓲ ꓟꓽ ꓘꓶꓹ ꓟ ꓡꓰ ꓟꓽ ꓥ꓾ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓣꓱꓽ ꓔꓬ ꓟ ꓣꓱꓽ ꓫꓵ ꓣꓱꓽ ꓙꓰ ꓔꓯ ꓣꓱꓽ ꓟꓽ ꓞ ꓞ ꓟꓽ ꓣꓱꓽ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓠꓵ ꓠꓲꓹ ꓟꓳꓸ ꓖꓶ ꓔꓬ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓐꓯ ꓖꓶ ꓠꓹ ꓫꓵ ꓟ ꓠꓬ꓾ ꓮ ꓡꓰ ꓫꓵ ꓦ ꓡꓱ ꓚꓱꓹ ꓗꓪ ꓥ ꓟꓲ ꓮ ꓡꓲ ꓫꓵ ꓞꓳ ꓫꓵ ꓥ ꓟꓲ ꓟꓲ ꓠꓯ ꓕꓱ ꓟ ꓔꓯ ꓠꓬ ꓠꓲꓹ ꓠꓵ ꓗꓴꓸ ꓠꓹ ꓟ꓾ ꓓꓵꓽ ꓙ ꓗꓴꓸ ꓠꓹ ꓟ ꓣꓳꓸ ꓚꓵ ꓓꓰ ꓡꓰ_ ꓟ ꓥ ꓐꓰ ꓐꓯ ꓖꓶ ꓠꓲꓹ ꓫꓵ ꓟ ꓥꓳ=