ꓢꓲꓽ ꓫꓬ ꓢꓴ Bernadetta Soubirous ꓑꓮꓲ꓿ (St. Benedette Lourdes)

#creditphotos #St.Bernadette Lourdes #Saint

Saturday, February 11, 2023

ꓙꓲꓻ ꓫꓬ ꓢꓴ Bernadetta Soubirous ꓑꓮꓲ꓿

ꓙꓲꓻ ꓫꓬ ꓢꓴ Bernadetta ꓑꓲ‐ꓔꓲ ꓗꓴꓷꓼ Lourdes ꓡꓳ ꓒꓱ ꓗꓪ ꓬꓲ. ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓬꓲ. ꓐ, ꓐꓽ ꓐꓰ ꓟ, ꓟ ꓠꓬ ꓮ ꓘꓶ. ꓫ. ꓢꓴ ꓕꓲ ꓦꓲꓻ ꓢꓴ ꓥ ꓡꓳ꓿ 1844 ꓘꓳꓼ 2 ꓦ 11 ꓠꓬꓲ ꓕꓯ ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓐꓰ ꓬꓲ. ꓛꓳ ꓐꓯ ꓐꓴ ꓠꓬꓲꓽ ꓣꓳ ꓐꓰ ꓢꓲꓽ ꓚꓳ. ꓧꓪꓽ ꓠ, ꓟ ꓬꓲꓻ ꓙꓬ ꓘꓶꓽ ꓗꓪ ꓙꓰ ꓗꓷ ꓕꓯ ꓟꓲ ꓦꓲ ꓓꓽ ꓙꓶꓽ ꓡ ꓡꓳ꓿

ꓖꓳ ꓡꓱ ꓢꓲꓽ ꓫꓬ ꓢꓴ ꓐ‐ꓠꓯ‐ꓓꓯ ꓠꓬ ꓭ ꓘꓴꓽ ꓕꓲ ꓟ ꓗꓪ ꓙꓰ ꓢꓲ ꓠꓬꓲ ꓔꓬ ꓗꓷꓳ꓿ ꓖꓳ ꓕꓯ ꓭ ꓛꓲ ꓠꓬ ꓟꓲꓽ ꓟꓲ ꓡꓰ ꓐꓰ ꓡꓯ ꓡ ꓟ ꓔꓯ ꓡꓳ. ꓟꓳ ꓢꓲ ꓠꓬꓲ ꓤ ꓟꓶ ꓤ ꓕꓲ ꓣꓳ ꓣꓳ‐ꓢ‐ꓡꓲ ꓓꓯ ꓔ ꓟ ꓔꓯ ꓡꓳ. ꓟꓳ ꓗꓷꓳ꓿

ꓮ ꓘꓶ. ꓡꓳ ꓐꓲ. ꓟ ꓤ ꓟꓶ ꓤ ꓠꓬ ꓣꓳ‐ꓢ‐ꓡꓲ ꓪꓽ ꓘꓴ ꓠ, ꓟ ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓔꓯ ꓘꓴ ꓗꓷꓳ꓿ ꓝꓴꓲ ꓬꓰ ꓔꓬ ꓢꓴ ꓐꓴ ꓔꓯ ꓪꓽ ꓘꓴ ꓙ ꓖꓶ ꓗꓷ ꓢꓲ ꓠꓬꓲ ꓭ ꓛꓲ ꓒ ꓕꓲ ꓗꓪ ꓪꓽ ꓘꓴ ꓦꓲꓻꓕ ꓕꓲ ꓦꓲꓻ ꓫꓬ, ꓠ, ꓟ ꓔꓲꓺ ꓒ ꓔꓯ ꓐꓯ ꓝꓲ ꓗꓷꓳ꓿

ꓭ ꓛꓲ ꓒ ꓕꓲ ꓗꓪ ꓐꓰ ꓬꓲꓻ ꓙꓬ ꓓꓳꓺ ꓡ ꓢꓲ ꓠꓬꓲ ꓬꓲ ꓔꓯ ꓓꓳꓻ ꓝꓲꓳ꓿ ꓬꓲ ꓟꓬꓱꓺ ꓔꓯ ꓠꓽ ꓠꓬꓲˍ ꓗꓷ ꓕꓯ ꓥꓪ ꓠꓬ ꓮ‐ꓓꓯ ꓐꓰ ꓰ‐ꓪ ꓬꓰ ꓗꓷ ꓟ ꓝꓴꓲ ꓟꓽ ꓙꓳ ꓢꓴ ꓥ ꓡꓳ ꓐꓰ ꓐꓯ ꓟ. ꓖꓶ ꓗꓷꓳ꓿

ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓠꓬ 1866 ꓘꓳꓼ ꓕꓯ ꓔꓲꓺ ꓟ ꓜꓴꓻ ꓗꓪ ꓓꓵꓽ ꓡꓰꓳ꓿ ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓠꓬ ꓔꓲꓺ ꓒ ꓜꓴꓻ ꓗꓪ ꓔꓬ ꓗꓷ ꓟ ꓙꓵ, ꓗꓪ ꓮ ꓘꓶ. ꓛꓲ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ. ꓛꓳ ꓒꓯ ꓐꓴ ꓬꓲ. ꓔꓯ ꓮ ꓘꓶ. ꓟꓬꓱꓺ ꓓꓳ ꓖꓶ ꓟ ꓥ ꓡꓳ꓿ ꓙꓲꓻ ꓫꓬ ꓐ‐ꓠꓯ‐ꓓꓯ ꓠꓬ ꓟ. ꓟ ꓟ‐ꓡꓲ ꓠꓬ ꓬꓲ. ꓔꓯ ꓮ ꓔꓯ ꓥ ꓟꓲ ꓪꓽ ꓘꓴ ꓠ, ꓟ ꓟ. ꓖꓶ ꓟ ꓔꓯ ꓐꓯ ꓟ. ꓖꓶ ꓟ ꓥ ꓡꓳ꓿

ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓠꓬ 1879 ꓘꓳꓼ ꓬꓲ. ꓞꓲꓼ 35 ꓘꓳꓼ ꓕꓯ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳꓽ ꓓꓱ ꓡꓳ ꓬꓰꓳ꓿ ꓬꓲ. ꓠꓬ ꓣꓳ‐ꓢ‐ꓡꓲ ꓪꓽ ꓘꓴ ꓔꓬ ꓟ ꓙꓵ, ꓕꓯ ꓧꓪꓽ ꓖꓳꓽ ꓓꓱ ꓡꓳ ꓬꓰ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ ꓐ‐ꓠꓯ‐ꓓꓯ ꓟꓲ ꓠꓯ ꓗꓪ ꓧꓪꓽ ꓖꓳꓽ ꓓꓱ ꓡꓳ ꓬꓰ ꓗ, ꓠꓯ ꓟꓽ ꓫꓵˍ ꓟ ꓙꓵ, ꓕꓯ ꓬꓲ. ꓔꓯ ꓔꓵ ꓗꓷ ꓟ ꓡꓯꓼ ꓜꓳꓼ ꓗꓪ ꓧꓪꓽ ꓖꓳꓽ ꓓꓱ ꓔꓯ ꓡꓳ. ꓠꓬꓲˍ ꓕꓯ ꓟꓽ ꓐꓬ ꓡꓰ ꓙꓳ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓔꓲꓺ ꓒ ꓪ ꓔꓲ Pius 11 ꓠꓬ 1933 ꓘꓳꓼ ꓙꓲꓻ ꓫꓬ ꓢꓴ ꓟꓬꓱꓽ ꓓꓳꓽ ꓖꓶ ꓗꓷ ꓟ ꓥ ꓡꓳ꓿ ꓮ ꓟꓶ ꓟ ꓙꓵ, ꓗꓪ ꓑꓲ‐ꓔꓲ ꓗꓴꓷꓼ Lourders ꓡꓳ ꓒꓱ ꓗꓪ ꓟꓵꓽ ꓗꓳ ꓓꓵ ꓓꓵ ꓗꓪ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟꓬ, ꓡ ꓢꓲ ꓠꓬꓲ ꓪꓽ ꓘꓴ ꓡ ꓟ ꓙꓳ ꓟ ꓥ ꓡꓳ꓿ ꓠꓻ ꓓꓴ ꓙꓳ ꓢꓴ ꓥ ꓟꓲ ꓠꓻ ꓓꓴ ꓓꓽ ꓡꓰ ꓟ ꓮ ꓟꓬ, ꓙꓳ ꓟ ꓥ ꓡꓳ꓿