Liguori ꓡꓳ ꓒꓱ ꓗꓪ ꓙꓲꓻ ꓫꓬ ꓢꓴ Alphonsus ꓑꓮꓲ꓿ (St.Alphonsus of Liguori)

Liguori ꓡꓳ ꓒꓱ ꓗꓪ ꓙꓲꓻ ꓫꓬ ꓢꓴ Alphonsus ꓑꓮꓲ꓿

Liguori ꓡꓳ ꓒꓱ ꓗꓪ ꓐꓰ ꓙꓲꓻ ꓫꓬ ꓢꓴ Alphonsus ꓠꓬ Redemptorists ꓔꓲꓺ ꓒ ꓜꓴꓻ ꓔꓯ ꓒꓴ ꓖꓶ ꓢꓴ ꓥ ꓡꓳ꓿ ꓬꓲ. ꓔꓯ AD ꓮꓓ 1696 ꓘꓳꓼ ꓕꓯ ꓲꓔꓮꓡꓬ ꓗꓴꓷꓼ Naples ꓡꓳ ꓒꓱ ꓗꓪ ꓬꓲ ꓔꓯ ꓦꓵꓻ ꓗꓷ ꓟ ꓥ ꓡꓳ꓿ ꓙꓲꓻ ꓫꓬ ꓢꓴ Alphonsus ꓠꓬ ꓗꓴꓷꓼ ꓘꓴꓽ ꓗꓪ ꓮ ꓟꓬ, ꓙꓲꓻ ꓟ ꓟꓲ ꓠꓯ ꓢꓳꓻ ꓦꓲꓻ ꓗꓪ ꓢꓳꓻ ꓣꓴ ꓪ ꓢꓴ ꓥ ꓡꓳ꓿ ꓬꓲ. ꓞꓲꓼ (16) ꓘꓳꓼ ꓕꓯ ꓙꓲꓻ ꓫꓬ ꓢꓴ Alphonsus ꓠꓬ ꓟꓲ ꓠꓯ ꓡ ꓞꓳ ꓛꓳꓽ ꓚꓱ, ꓗꓪ ꓐꓰ ꓢꓷ. ꓠꓲ, ꓙꓵꓽ ꓪꓴ. ꓚꓴꓽ ꓘꓳ ꓣꓴ ꓪ ꓡꓰꓳ꓿

1723 ꓘꓳꓼ ꓕꓯ ꓬꓲ. ꓟꓬꓱꓽ ꓬꓰ ꓔꓬ ꓟ ꓔꓶ. ꓗꓪ ꓫꓵꓽ ꓪꓴꓽ ꓙꓳˍ ꓡꓰꓳ꓿ ꓬꓲ. ꓠꓬ ꓪꓴ‐ꓢ ꓐꓯ ꓘꓶꓽ ꓟꓲ ꓠꓯ  ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓡꓳ. ꓗꓷ ꓢꓲ ꓠꓬꓲ ꓥꓪ ꓗ. ꓠꓯ ꓛꓳꓽ ꓡꓯ ꓐꓰ ꓐꓯ ꓔ ꓡꓳ ꓪꓴ‐ꓢ ꓐꓯ ꓘꓶꓽ ꓔꓯ ꓑ ꓙ ꓗꓷ ꓗ. ꓠꓯ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓓꓵ ꓙ ꓗꓷꓳ꓿

1726 ꓘꓳꓼ ꓕꓯ ꓪꓴ‐ꓢ ꓐꓯ ꓘꓶꓽ ꓣꓳ ꓣꓴ ꓪ ꓡꓰ ꓢꓲ ꓠꓬꓲ ꓔꓲꓺ ꓒ ꓒꓬꓱꓼ ꓡ ꓪ꓿ ꓬꓲ. ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓡ ꓞꓳ ꓮ ꓟꓬ, ꓐꓱ ꓶ ꓚꓺ ꓟ. ꓖꓶ ꓢꓴ ꓥ ꓡꓳ꓿ ꓬꓲ ꓠꓬ ꓪꓴ‐ꓢ ꓟꓬꓱꓽ ꓟꓯ ꓟ ꓙꓵ, ꓕꓯ ꓦꓻ ꓕꓲ ꓒꓳ ꓗꓪ ꓟꓲ ꓠꓯ ꓢꓷ. ꓠꓲ, ꓚꓱ, ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ  ꓟ. ꓖꓶ ꓟ ꓡꓰ ꓐꓰ ꓦꓻ ꓚꓬꓴ ꓙ ꓠ, ꓟ ꓟꓬꓱꓽ ꓗꓪ ꓥ ꓟꓲ ꓮ ꓘꓶ. ꓛꓲ ꓢꓯꓼ ꓕꓵꓼ ꓗꓷꓳ꓿ ꓝꓴꓲ ꓬꓰ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓓꓵ ꓙ ꓒꓳ ꓡꓶꓻ ꓡ ꓠ, ꓟ ꓟ. ꓟꓲꓽ ꓮ ꓟꓬ, ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓲꓻ ꓫꓬ ꓢꓴ Alphonsus ꓠꓬ 1732 ꓘꓳꓼ ꓕꓯ Redeemer ꓚꓬꓴ ꓙ ꓟ ꓟꓬꓱꓽ ꓐꓰ ꓟꓬꓱꓺ ꓔ ꓟ ꓔꓲꓺ ꓒ ꓜꓴꓻ ꓔꓯ ꓒꓴ ꓖꓶ ꓗꓷꓳ꓿

ꓕꓱ ꓔꓲꓺ ꓒ ꓜꓴꓻ ꓠꓬ ꓡꓳ ꓒꓱ ꓞꓳ ꓘ, ꓮ ꓟꓬ, ꓗꓪ ꓙꓰ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓢꓷ. ꓠ, ꓟ ꓟ. ꓟꓲ ꓓꓵ ꓙ ꓒꓳ ꓡꓶꓻ ꓡ ꓠ, ꓟ ꓟ. ꓟꓲꓽ ꓮ ꓟꓬ, ꓚꓺ ꓗꓷꓳ꓿ 1748 ꓘꓳꓼ ꓕꓯ ꓬꓲ ꓡꓰ ꓐꓳ ꓔ ꓟ Moral Theology ꓓꓵ ꓙ ꓢꓪ ꓠꓬꓲ ꓓꓴ ꓢꓷ. ꓠꓲ, ꓕꓳ ꓶ ꓑꓷꓠ ꓔꓯ ꓐꓳ ꓖꓶ ꓗꓷꓳ꓿ ꓔꓲꓺ ꓒ ꓪ ꓔꓲ  ꓥ ꓟꓲ ꓕꓱ ꓕꓳ ꓶ ꓔꓯ ꓟꓬꓱꓺ ꓓꓳꓽ ꓖꓶ ꓟ ꓥ ꓡꓳ꓿

1756 ꓘꓳꓼ ꓕꓯ St. Agatha ꓪꓽ ꓘꓴ ꓦꓲꓻ ꓗꓪ ꓔꓲꓺ ꓒ ꓓꓽ ꓒꓬꓱꓼ ꓡ ꓪ꓿ ꓙꓲꓻ ꓫꓬ ꓢꓴ Alphonsus ꓠꓬ ꓔꓲꓺ ꓒ ꓓꓽ ꓕꓲ ꓪ ꓒꓬꓱꓼ ꓗꓷ ꓗ. ꓠꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓬ ꓟ ꓔꓶ. ꓡꓳ ꓒꓱ ꓞꓳ ꓘ, ꓮ ꓟꓬ, ꓗꓪ ꓙꓰ ꓢꓲ ꓠꓬꓲ ꓙꓲ‐ꓢꓴ ꓢꓲꓻ ꓤ ꓐꓴ ꓪꓴ‐ꓢ ꓟꓬꓱꓽ ꓗꓪ ꓮ ꓡꓰ ꓐꓰ ꓐ ꓠ, ꓟ ꓐꓰ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓪꓽ ꓡꓯ ꓘꓳ ꓠ, ꓟ ꓚꓱ, ꓗꓪ ꓮ ꓘꓶ. ꓢꓯꓼ ꓕꓵꓼ ꓗꓷꓳ꓿

ꓔꓲꓺ ꓒ ꓓ ꓠꓬ ꓟꓲ‐ꓢ ꓔꓲ ꓟ ꓪꓽ ꓘꓴ ꓓꓴ ꓔꓯ ꓬꓲ. ꓙꓵ, 15 ꓧꓶꓽ ꓞꓼ ꓞꓼ ꓬꓰ ꓢꓴ ꓐꓴ ꓔꓯ ꓟꓲ‐ꓢ ꓔꓲ ꓟ ꓪꓽ ꓘꓴ ꓓꓴ ꓔꓯ ꓟꓬꓱꓽ ꓠꓽ ꓝꓲ ꓟ ꓥ ꓡꓳ꓿ ꓬꓲ ꓠꓯ, ꓗꓪ ꓙꓳˍ ꓟ ꓮ ꓙꓵꓽ ꓔꓯ ꓪꓴꓽ ꓗꓷ ꓢꓲ ꓠꓬꓲ ꓫ. ꓢꓴ ꓟꓷꓼ ꓢꓴ ꓐꓴ ꓔꓯ ꓖꓶ ꓗꓷ ꓟ ꓥ ꓡꓳ꓿ ꓬꓲ. ꓞꓲꓼ ꓪꓴꓽ ꓡ ꓟ ꓙꓵ, ꓕꓯ ꓬꓲ ꓠꓯ, ꓗꓪ ꓠꓻ ꓓꓴ ꓑꓬ ꓓꓴ ꓙꓳˍ ꓡ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓫ. ꓡꓰꓳ꓿ 1787 ꓘꓳꓼ ꓕꓯ ꓙꓲꓻ ꓫꓬ ꓢꓴ Alphonsus ꓠꓬ ꓟꓲ ꓠꓯ ꓗꓪ ꓐꓰ ꓧꓪꓽ ꓖꓳ ꓓꓱ ꓡꓳ. ꓬꓰ ꓪ꓿