ꓑꓶ ꓓꓳ ꓟꓵꓽ ꓗꓪ ꓐꓰ ꓢꓷ. ꓠꓲ, ꓙꓳ ꓒ ꓐꓴ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴ. ꓓꓵ ꓕꓱꓼ ꓡ ꓟ ꓑꓮꓲꓽ

ꓢꓷ. ꓠꓲ, ꓙꓳ ꓒ ꓐꓴ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴ. ꓓꓵ ꓕꓱꓼ ꓡ ꓟ ꓑꓮꓲꓽ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓐꓱ ꓓꓳ ꓟꓵꓽ ꓗꓪ ꓐꓰ ꓪ ꓔꓲ ꓢꓽ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴ. ꓓꓵ ꓕꓱꓼ ꓡ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ  ꓠꓬ ꓟ‐ꓕꓲ (2ꓽ 2‐12) ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓩꓴ‐ꓡꓲ ꓪ ꓔꓲ ꓠꓬ ꓬꓲ ꓙꓵꓽ ꓟ ꓙꓵ, ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓵꓻ ꓡ ꓥ ꓟ ꓔꓯ ꓟꓽ ꓢꓷ. ꓔ ꓟ ꓥ ꓡꓳ꓿ ꓪ ꓔꓲ ꓩꓴ‐ꓡꓲ ꓠꓯ, ꓗꓪ ꓮ ꓕꓯ ꓥ ꓟꓲ ꓙꓵꓽ ꓪ ꓙꓳˍ ꓠ, ꓟ ꓮ ꓕꓯ ꓥ ꓟꓲ ꓓꓵꓽ ꓙ ꓢꓴ ꓕꓲ ꓣꓳ ꓥ ꓡꓳ꓿

ꓙꓵꓽ ꓪ ꓔꓯ ꓡꓰ ꓪꓽ ꓠꓲ, ꓫꓵˍ ꓢꓴ ꓠꓬ ꓔꓱ ꓚꓵ, ꓟ ꓚꓱ, ꓔꓯ ꓟꓽ ꓟꓳ ꓪ ꓢꓴ ꓥ ꓡꓳ꓿  ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓥ ꓟꓲ ꓙꓵˍ ꓟ ꓐꓰ ꓟꓽ ꓙꓵˍ ꓟ ꓔꓯ ꓘꓶꓽ ꓗꓴ ꓠ, ,ꓟ ꓟ. ꓖꓶ ꓔ ꓟ ꓥ ꓡꓳ꓿ ꓝꓮꓲ ꓣꓳ ꓠꓬ ꓮ ꓡꓰ ꓫꓵˍ ꓚꓱ, ꓞꓳ ꓫꓱ, ꓔꓬ ꓟ ꓔꓯ ꓢꓲ ꓗꓴ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿

ꓐꓱ ꓓꓳ ꓟꓵꓽ ꓗꓪ ꓐꓰ ꓪ ꓔꓲ ꓢꓽ ꓣꓳ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓦꓵꓻ ꓡ ꓟ ꓔꓯ ꓪꓴ. ꓓꓵ ꓕꓱꓼ ꓠ, ꓟ ꓡ ꓗꓷ ꓟ ꓙꓵ, ꓕꓯ ꓬꓳ‐ꓢꓷ ꓐꓰ ꓟ‐ꓡꓲ ꓠꓬ ꓬꓲ ꓪ ꓔꓯ ꓠꓴ ꓪ ꓠꓬ ꓬꓴ‐ꓔ ꓞꓳ ꓫꓵꓽ ꓟꓽ ꓥ ꓟ ꓪꓴ. ꓠꓬꓲ ꓪꓴ. ꓓꓵ ꓕꓽ ꓕꓱꓼ ꓐꓰ ꓟꓽ ꓐꓯ ꓟꓽ ꓗꓽ ꓔ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓮ. ꓣꓳ ꓡꓳ. ꓒꓽ ꓐꓴ ꓐꓰ ꓫ. ꓢꓴ ꓟꓷꓼ ꓢꓴ ꓐꓴ ꓢꓲꓺ ꓒ ꓔꓯ ꓪꓴ. ꓓꓵ ꓕꓱꓼ ꓡ ꓟ ꓙꓵ, ꓕꓯ ꓥ ꓟꓲ ꓟꓽ ꓗꓽ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓦꓻ ꓡꓱ ꓟ ꓪꓴ‐ꓢ ꓠꓬ ꓞꓳ ꓫꓵꓽ ꓞꓳ ꓙꓲ ꓮ ꓙꓵꓽ ꓔꓯ ꓘꓳ, ꓣꓴ ꓟ ꓪꓴ‐ꓢ ꓥ ꓡꓳ꓿ ꓪꓴ‐ꓢ ꓤ ꓠꓬꓲ ꓒꓬꓱꓼ ꓡ ꓠ, ꓟ ꓐꓱ ꓶ ꓒꓴ ꓫꓵꓺ ꓐꓰ ꓞꓳ ꓐꓳ ꓞꓳ ꓫ. ꓟꓽ ꓘꓶꓽ ꓔ ꓟ ꓥ ꓡꓳ꓿ ꓞꓳ ꓫꓵꓽ ꓟꓽ ꓘꓶꓽ ꓟ ꓪꓴ‐ꓢ ꓥ ꓡꓳ꓿

ꓮ ꓙꓵꓽ ꓢꓴ ꓠꓬ ꓪꓴ‐ꓢ ꓤ ꓠꓬꓲ ꓥ ꓟ ꓔꓯ ꓠꓴ ꓥꓪ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓪꓴ‐ꓢ ꓔꓯ ꓧꓪ ꓓꓴ ꓬꓰ ꓡꓯ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳꓽ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿