ꓒꓴ ꓤ ꓫꓵ ꓤ ꓔꓯ ꓦ ꓡꓱ ꓟꓽ ꓓ ꓟ

ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶꓽ

ꓡꓴ-ꓘ 12ꓽ 13-21

ꓒꓴ ꓤ ꓫꓵ ꓤ ꓔꓯ ꓦ ꓡꓱ ꓟꓽ ꓓ ꓟ

ꓞꓳ ꓜꓴ ꓗꓪ ꓟ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ꓾ ꓟꓹ ꓒꓽꓳ꓾ ꓥꓪ ꓔꓯ ꓡꓯꓼ ꓪ ꓐꓱ ꓖꓶ ꓡ ꓠꓹ ꓟ ꓥꓪ ꓮ ꓬꓲꓼ ꓔꓯ ꓐꓯ ꓙ ꓡꓯ꓾ ꓐꓯˍ ꓡꓳ=ꓬꓰ-ꓢꓴ ꓠꓬ ꓬꓲ ꓔꓯ ꓾ ꓞꓳ ꓤꓽꓳ꓾ ꓮꓽ ꓟ ꓡꓰ ꓥꓪ ꓔꓯ ꓠꓴ ꓪ ꓐꓯ ꓟꓴ ꓞꓷꓹ ꓢꓴ ꓢꓲꓽ ꓒˍ ꓐꓰ ꓡꓯꓼ ꓪ ꓐꓱ ꓖꓶ ꓢꓴ ꓣꓱ ꓝꓲˍ ꓡ? ꓐꓯ ꓖꓶˍ ꓡꓳ=ꓬꓰ-ꓢꓴ ꓠꓬ ꓬꓲ ꓪ ꓔꓯ꓾ ꓠꓲꓹ ꓦꓯꓸˍ ꓟ ꓮꓽ ꓙꓵꓽ ꓔꓯ ꓧꓪꓸ ꓛꓲꓽ ꓐꓰ ꓤ ꓟꓳ= ꓮꓡꓲꓳ ꓐꓯ ꓠꓬ ꓞꓳ ꓤ ꓠꓽ ꓬꓲ ꓖꓴꓽ ꓙꓴꓽ ꓮ ꓟꓬꓹ ꓙꓳˍ ꓟ ꓗꓪ ꓐꓰ ꓢꓯꓸ ꓔꓬꓹ ꓟꓶˍ ꓟ ꓟꓽ ꓥ꓾ ꓐꓯˍ ꓡꓳ=

ꓬꓲ ꓠꓬ ꓔꓯ ꓥꓳꓽ ꓕꓲꓽ ꓟ ꓗꓪ ꓐꓰ ꓬꓲ ꓪ ꓔꓯ꓾ ꓞꓳ ꓐꓳ ꓕꓲ ꓣꓳ ꓠꓬ ꓬꓲ ꓦ ꓟꓲ ꓗꓪ ꓐꓰ ꓜ ꓪꓳꓽ ꓡꓳ ꓪꓳꓽ ꓮꓽ ꓟꓬꓹ ꓫ ꓟꓶˍ ꓡꓳ= ꓖꓳ ꓡꓱ ꓠꓬ ꓬꓲ ꓠꓽ ꓾ ꓥꓪ ꓜꓽ ꓫꓵꓽ ꓫꓽ ꓙꓰꓽ ꓗꓶ ꓖꓴ ꓟꓽ ꓡꓳꓼ ꓠꓬꓲ ꓮ ꓡꓲ ꓬꓰ ꓢꓰ꓾ ꓐꓰ ꓓꓵꓽ ꓙˍ ꓡꓳ=

ꓝꓮꓲ ꓬꓲ ꓡꓰˍ ꓥꓪ ꓠꓽ ꓕꓱ ꓡꓱ ꓬꓰˍ ꓥꓳ꓾ ꓥꓪ ꓜ ꓗꓹ ꓕꓱ ꓟꓬ ꓟ ꓒꓬꓹ ꓗꓷ ꓢꓲ ꓪ ꓜꓲ ꓪꓴꓽˍ ꓟ ꓜ ꓗꓹ ꓫꓬꓹ ꓢꓲ ꓠꓬꓲ꓾ꓖꓳ ꓗꓪ ꓥꓪ ꓜꓽ ꓫꓵꓽ ꓜꓽ ꓙꓰˍ ꓐꓰ ꓖꓴꓽ ꓙꓴꓽ ꓫ ꓗꓶ ꓔ ꓥꓳ= ꓖꓳ ꓗ ꓠꓯꓸ ꓥꓪ ꓠꓬ ꓥꓪ ꓶ ꓟꓬ ꓔꓯ꓾ ꓶ ꓟꓬꓳ ꓾ ꓠꓴ ꓐꓱ ꓶ ꓮꓽ ꓟꓹ ꓘꓳꓼ ꓣꓱꓽ ꓓꓴ ꓫ ꓗꓶ ꓔ ꓡꓳ=ꓖꓳ ꓡꓱ ꓠꓬꓲ  ꓠꓴ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ ꓠꓲꓹ ꓒꓴ ꓒꓴ ꓐꓰ ꓙꓳ ꓢ ꓔꓬ꓾ ꓐꓯ ꓖꓶˍ ꓥꓳ꓾ ꓐꓯˍ ꓡꓳ=

ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓽ ꓬꓲ ꓔꓯ ꓾ ꓞꓳ ꓙꓲꓽꓳ꓾ ꓠꓬꓲꓸ ꓟꓶꓽ ꓘꓶꓼ ꓠꓴ ꓶ ꓟꓬ ꓔꓯ ꓥꓪ ꓧꓪ ꓡˍ ꓥꓳ= ꓖꓳ ꓡꓱ ꓠꓬ ꓠꓴ ꓡꓰ ꓙꓽ ꓖꓶ ꓔ ꓟ꓾ ꓮꓽ ꓟ ꓔꓯꓸ ꓟ ꓗꓷ ꓡꓰˍ ꓥꓳ ꓪ? ꓐꓰ ꓐꓯ ꓖꓶˍ ꓡꓳ= ꓚꓲ ꓛꓬ ꓐꓱ ꓶˍ ꓡꓰꓽ ꓒꓵꓽ ꓡꓽ ꓫ ꓗꓶ ꓔ ꓢꓲ ꓪꓴ-ꓢ ꓔꓯ ꓟꓳꓸ ꓟꓽ ꓐꓳ ꓟ ꓡ ꓞꓳ ꓠꓬ ꓬꓲ ꓕꓰ ꓡꓰ ꓗꓹ ꓡꓳ꓾ ꓐꓯˍ ꓡꓳ=

Add new comment

15 + 3 =

Please wait while the page is loading