ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓡꓰ ꓬꓰ‐ꓢꓴ ꓦꓵꓻ ꓡ ꓠ, ꓟ ꓓꓳꓽ ꓟ. ꓟꓲꓽ ꓚꓺ ꓟ (Christmas reflection)

#creditphoto #Jesus was born #Christmass

Sunday, December 24, 2023

ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓡꓰ ꓬꓰ‐ꓢꓴ ꓦꓵꓻ ꓡ ꓠ, ꓟ ꓓꓳꓽ ꓟ. ꓟꓲꓽ ꓚꓺ ꓟ

ꓮ ꓙꓵꓽ ꓢꓴ ꓔꓯ ꓗ, ꓛꓲ ꓟ ꓚꓬꓴ ꓢꓲꓺ ꓒ ꓬꓰ‐ꓢꓴ ꓦꓵꓻ ꓑꓮꓲꓽ ꓥꓳ ꓐꓰ ꓧꓪ, ꓧꓪ ꓐꓯ ꓩꓴ ꓡ ꓥꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟ. ꓖꓶ ꓡ ꓟ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓣꓳ ꓐꓱ ꓶ ꓐ, ꓐ ꓪꓴ‐ꓢ ꓡꓰ ꓖꓶ ꓡ ꓟ ꓡꓯꓽ ꓫꓴ ꓥ ꓡꓳ꓿ ꓣꓳ ꓮ ꓙꓵꓽ ꓠꓬ ꓚꓬꓴ ꓢꓲꓺ ꓒ ꓦꓵꓻ ꓡ ꓟ ꓙꓵ, ꓔꓯ ꓡꓳ. ꓔꓬ ꓟ (4) ꓫꓵꓽ ꓠꓽ ꓗꓪ ꓣꓳ ꓠꓲ, ꓟ ꓐꓰ ꓣꓳ ꓞꓳ ꓫꓱ, ꓚꓱ, ꓔꓯ ꓮ ꓘꓶ. ꓛꓲ ꓙꓲ ꓟ ꓕꓲ ꓒꓳ, ꓗꓪ ꓢꓯ. ꓔꓬ ꓠ, ꓟ ꓢꓯꓼ ꓕꓵꓼ ꓗꓷꓳ꓿ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯꓽ ꓫꓴ ꓗꓪ ꓐꓰ ꓡꓰ ꓣꓳ ꓠꓬ ꓚꓬꓴ ꓢꓲꓺ ꓒ ꓦꓵꓻ ꓡ ꓟ ꓚꓱ, ꓔꓯ ꓘꓳ, ꓣꓴ ꓔꓬ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓚꓬꓴ ꓢꓲꓺ ꓒ ꓟ, ꓟ ꓒꓬꓱꓼ ꓡ ꓠ, ꓟ ꓟꓴ ꓗꓪ ꓝꓲ ꓓꓴ ꓡꓰ ꓟ, ꓟ ꓟ‐ꓡꓲ ꓔꓯ ꓓꓳꓽ ꓐꓯ ꓟ. ꓖꓶ ꓟ ꓙꓵ, ꓔꓯ ꓟ, ꓟ ꓟ‐ꓡꓲ ꓠꓲ, ꓟ ꓠꓬ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓓꓴ ꓒꓬꓱꓼ ꓡ ꓗꓷꓳ꓿ ꓕꓱ ꓓꓳꓽ ꓠꓬ ꓮ ꓘꓶ. ꓛꓲ ꓪꓴꓽ ꓟ ꓐꓰ ꓟꓲ ꓠꓯ ꓡ ꓞꓳ ꓓꓵꓽ ꓙ ꓚꓱ, ꓗꓪ ꓐꓰ ꓒꓬꓱꓼ ꓡ ꓟꓽ ꓓ ꓟ ꓥ ꓡꓳ꓿

ꓟ, ꓟ ꓟ‐ꓡꓲ ꓠꓬ ꓮ ꓕꓯ ꓥ ꓟꓲ ꓪꓴ‐ꓢ ꓟꓲ ꓙꓯ ꓗꓪ ꓙꓽ ꓣꓳ ꓟ ꓠꓲ, ꓟ ꓙꓳ ꓢꓴ ꓮ ꓕꓯ ꓥ ꓟꓲ ꓪꓴ‐ꓢ ꓔꓯ ꓬꓲ ꓙꓵ, ꓖꓶ ꓢꓴ ꓮ ꓘꓶ. ꓛꓲ ꓙꓵꓻ ꓠꓲ ꓙꓳ ꓢꓴ ꓕꓲ ꓣꓳ ꓥ ꓡꓳ꓿ ꓐ, ꓐ ꓪꓴ‐ꓢ ꓠꓬ ꓟ‐ꓡꓲ ꓠꓬ ꓢꓲꓽ ꓫꓬ ꓟ ꓐꓰ ꓤ ꓟꓶ ꓡꓯ ꓚꓵ. ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓟ, ꓟ ꓒꓬꓱꓼ ꓡ ꓠ, ꓟ ꓢꓲ ꓗꓷ ꓟ ꓥ ꓡꓳ꓿

ꓣꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓢꓯ. ꓔꓬ ꓟ ꓤꓶꓻ ꓗꓪ ꓪꓴ‐ꓢ ꓡꓰ ꓖꓶ ꓡ ꓠ, ꓟ ꓣꓱ ꓛꓰ ꓡꓯ ꓫꓴ ꓠꓬ ꓮ ꓘꓶ. ꓛꓲ ꓐꓲ ꓞ ꓟ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓥ ꓟꓲ ꓣꓳ ꓢꓯ. ꓔꓬ ꓟ ꓤꓶꓻ ꓗꓪ ꓮ ꓘꓶ. ꓛꓲ ꓣꓳꓺ ꓚꓵ. ꓟ ꓐ, ꓐ ꓪꓴ‐ꓢ ꓡꓰ ꓖꓶ ꓔ ꓟ ꓡꓯꓽ ꓫꓴ ꓥ ꓡꓳ꓿

ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓔꓯ ꓟꓲ ꓠꓯ ꓡꓰ ꓟ. ꓖꓶ ꓡ ꓟ ꓠꓴ ꓟꓽ ꓠꓲ, ꓧꓯ ꓥꓳ ꓐꓯ ꓐꓳ ꓡ ꓟꓽ ꓓ꓾ ꓠꓴ ꓟ ꓟꓽ ꓩꓴ ꓠꓬ ꓠꓴ ꓠꓲ, ꓟ ꓠꓬꓲ ꓕꓱ ꓟꓽ ꓬꓰ ꓠꓬ ꓐꓳ ꓡ ꓟꓽ ꓓ ꓐꓰ ꓣꓳ ꓔꓯ ꓟ. ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓡꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓠꓲ, ꓠꓵ ꓠ, ꓟ ꓐꓰ ꓣꓳ ꓤꓶꓻ ꓗꓪ ꓚꓲ ꓛꓬ ꓔꓯ ꓠꓲ, ꓠꓵ ꓟ ꓡꓰ ꓐꓰ ꓢꓴ ꓔꓯ ꓟꓲ ꓠꓲ, ꓠꓵ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓟ, ꓟ ꓟ‐ꓡꓲ ꓔꓯ ꓕꓯ ꓢꓳ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿

ꓟ, ꓟ ꓟ‐ꓡꓲ ꓠꓬꓬ ꓥꓪ ꓠꓬ ꓢꓲ ꓒꓽ ꓚꓳ ꓟ ꓥ ꓳ꓿ ꓠꓴ ꓐꓯ ꓟ ꓡꓰ ꓐꓰ ꓥꓪ ꓖꓳ ꓓꓱꓽ ꓗꓪ ꓒꓻꓱ ꓗ ꓝꓲ ꓐꓰ ꓐꓯ ꓟ ꓡꓰ ꓐꓰ ꓐꓯ ꓔ ꓟ ꓡꓰ ꓐꓰ ꓣꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓮ ꓡꓰ ꓐꓰ ꓬꓲ ꓐꓰ ꓕꓲ ꓪ ꓞꓳ ꓙꓳ ꓠ, ꓟ ꓘꓴ ꓡ ꓝꓮꓲ ꓣꓳ ꓤꓶꓻ ꓗꓪ ꓮ ꓡꓰ ꓐꓰ ꓪꓴ‐ꓢ ꓐꓰ ꓙꓻ ꓡꓯꓽ ꓘꓳ ꓠ, ꓟ ꓣꓳ ꓔꓯ ꓘꓴ ꓔꓬ ꓡ ꓐꓰ ꓣꓳ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓠ, ꓟ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿

ꓟꓽ ꓙꓲ ꓟꓽ ꓜꓳ ꓟ ꓚꓱ, ꓮ ꓙꓵꓽ ꓔꓯ ꓡꓳ ꓗꓷ ꓢꓴ ꓢꓲ ꓚꓬꓴ ꓢꓲꓺ ꓒ ꓦꓵꓻ ꓡ ꓟ ꓮ‐ꓐꓲ ꓤ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓘꓳ,ꓣꓴ ꓡꓯ꓿ ꓣꓳ ꓠꓲ, ꓟ ꓔꓯ ꓢꓲꓽ ꓫꓬꓽ ꓙꓳ ꓝꓲ ꓡꓯ꓿ ꓢꓲꓺꓒ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓿ ꓤ ꓫꓵꓼ ꓤ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓮ ꓙꓵꓽ ꓢꓴ ꓕꓯ ꓢꓲ ꓶ ꓥꓳꓽ ꓙꓱ ꓖꓶ ꓝꓲ ꓫ. ꓟꓳ ꓪ꓿