ꓙꓲꓻ ꓟ ꓮ ꓣꓳ ꓡꓳ. ꓒ ꓔꓯ ꓥꓳꓽ (The good shepherd)

#creditphoto #Good shepherd #credit to owner

Sunday, April 21, 2024

ꓙꓲꓻ ꓟ ꓮ ꓣꓳ ꓡꓳ. ꓒ ꓔꓯ ꓥꓳꓽ (The good shepherd)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗ. ꓠꓯ (4) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓬꓳ‐ꓦ 10ꓽ 11‐18) ꓝꓲ ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓬꓲ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒ ꓥ ꓟ ꓔꓯ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟ. ꓖꓶ ꓟ ꓢꓲꓽ ꓫꓬ ꓕꓳ ꓶ ꓝꓲ ꓥ ꓡꓳ꓿ ꓪꓽ ꓤꓽ ꓠ ꓮ ꓣꓳ ꓡꓳ. ꓒ ꓚꓵ. ꓟꓽ ꓐꓰ ꓬꓲ ꓡꓰ ꓐꓯ ꓔ ꓟ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓕꓯ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓟꓲ ꓠꓯ ꓚꓱ, ꓔꓯ ꓮ ꓙꓵꓽ ꓢꓷ. ꓢꓴ ꓕꓲ ꓣꓳ ꓟꓲ ꓟꓽ ꓔꓬ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓣꓳ ꓠꓬ ꓟꓲ ꓠꓯ ꓚꓱ, ꓔꓯ ꓮ. ꓓꓲ ꓤ ꓡꓰ ꓢꓷ. ꓢꓴ ꓐꓴ ꓥ ꓡꓳ꓿ ꓣꓳ ꓡꓰ ꓥ ꓟ ꓪꓴ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓕꓯ ꓮ ꓣꓳ ꓤ ꓡꓰ ꓐꓰ ꓫꓱ, ꓡꓯꓽ ꓘꓳ, ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿

ꓣꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓗꓪ ꓣꓳ ꓢꓯ. ꓔꓬ ꓟ ꓙꓵ, ꓔꓯ ꓣꓳ ꓔꓯ ꓐꓬ ꓡꓰ ꓝꓲ ꓢꓴ ꓥ ꓟ ꓪꓰ ꓕꓳ, ꓮ ꓟꓬ, ꓔꓬ ꓟ ꓪꓴ. ꓠꓬꓲ ꓣꓳ ꓠꓬ ꓮ ꓕꓯ ꓥ ꓟꓲ ꓐꓬ ꓡꓰ ꓟꓶ ꓡꓰ ꓗꓴ ꓢꓴ ꓥ ꓟ ꓔꓯ ꓣꓳ ꓔꓯ ꓟ. ꓖꓶ ꓔ ꓟ ꓟꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓔꓯ ꓔꓱ ꓚꓵ ꓟ ꓙ ꓖꓴ ꓔꓯ ꓟ. ꓖꓶ ꓐ ꓡ ꓢꓴ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓥ ꓡꓳ꓿

ꓙꓲˍ ꓟ ꓮ ꓣꓳ ꓡꓳ. ꓒ ꓠꓬ ꓮ ꓡꓰ ꓐꓰ ꓢꓯ. ꓔꓬ ꓟ ꓐꓰ ꓟꓽ ꓙꓲˍ ꓟ ꓮ ꓣꓳ. ꓡꓳ. ꓒꓽ ꓐꓴ ꓠꓬ ꓮ ꓡꓰ ꓐꓰ ꓞꓳ ꓙꓳˍ ꓢꓯ. ꓔꓬ ꓟ ꓚꓱ, ꓔꓯ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓣꓳ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓙꓲˍ ꓟ ꓮ ꓣꓳ ꓡꓳ. ꓒ ꓠꓬ ꓮ ꓣꓳ ꓜꓴꓻ ꓔꓯ ꓜꓽ ꓓꓴ ꓓꓳꓻ ꓓꓴ ꓮ ꓟꓬ, ꓜ ꓪ ꓠ, ꓟ ꓢꓲ ꓡꓲ ꓐꓰ ꓢꓯ. ꓔꓬ ꓟ ꓪꓴ ꓠ, ꓟ ꓡꓳ. ꓙ ꓖꓶ ꓢꓲ ꓠꓬꓲ ꓛꓴ ꓙꓳˍ ꓢꓴ ꓔꓬ ꓟ ꓙꓵ, ꓕꓯ ꓥ ꓟꓲ ꓬꓲ ꓢꓯꓼ ꓟꓬ, ꓖꓶ ꓢꓲ ꓠꓬꓲ ꓬꓲ ꓮ ꓣꓳ ꓜꓴꓻ ꓔꓯ ꓗꓽ ꓕꓽ ꓖꓶ ꓟ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓐ, ꓐ ꓠꓯ, ꓗꓪ ꓐꓰ ꓠꓵꓻ ꓠꓲ, ꓔꓯ ꓘꓳ, ꓣꓴ ꓢꓲ ꓠꓬꓲ ꓬꓲ ꓮ ꓣꓳ ꓡꓳ. ꓟ ꓟꓬꓱꓽ ꓔꓯ ꓬꓰ ꓟ ꓥ ꓡꓳ꓿

ꓝꓲ ꓓꓴ ꓒꓲ‐ꓕꓱ ꓡꓰ ꓢꓲꓺ ꓒ ꓠꓴ ꓟꓽ ꓥ ꓠꓬ ꓥꓪ ꓠꓴ ꓠꓬ ꓠꓱ. ꓐꓯꓼ ꓢꓲꓽ ꓒꓽ ꓠꓯ, ꓗꓪ ꓮ ꓡꓰ ꓙꓰ ꓠꓯ, ꓡ ꓐꓰ ꓐꓯ ꓔ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓙꓲ ꓟ ꓮ ꓣꓳ ꓡꓳ. ꓒ ꓥ ꓟ ꓔꓯ ꓬꓲ ꓠꓬ ꓚꓵ ꓚꓵ ꓢꓷ. ꓢꓴ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓟ. ꓖꓶ ꓡ ꓟ ꓚꓱ, ꓗꓪ ꓙꓳ ꓡꓰ ꓐ, ꓐ ꓠꓯ, ꓗꓪ ꓛꓲ ꓪ ꓓꓽ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓮ ꓣꓳ ꓜꓴꓻ ꓠꓬ ꓮ ꓣꓳ ꓡꓳ. ꓒ ꓢꓯꓼ ꓔꓯ ꓢꓷ. ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓚꓱ, ꓝꓮꓲ ꓬꓲ ꓡꓰ ꓟ. ꓔ ꓟ ꓟ. ꓟꓲ ꓮ ꓙꓵꓽ ꓗꓪ ꓐꓰ ꓬꓲ ꓠꓬ ꓮ ꓣꓳ ꓡꓳ. ꓒ ꓕꓲ ꓣꓳ ꓠꓯ, ꓗꓪ ꓔꓬ ꓝꓲ ꓠꓲ, ꓫꓵˍ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓠꓬ ꓙꓲ‐ꓢꓴ ꓠꓬ ꓬꓲ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒꓽ ꓥ ꓟ ꓔꓯ ꓬꓲ ꓢꓯꓼ ꓟꓬ ꓔꓯ ꓝꓴꓲ ꓙꓳˍ ꓢꓴ ꓟꓲ ꓠꓯ ꓡ ꓞꓳ ꓐꓱ ꓶ ꓫꓵꓻ ꓙ ꓗꓷ ꓟ ꓗꓪ ꓐꓰ ꓬꓲ ꓠꓬ ꓙꓲˍ ꓟ ꓮ ꓣꓳ. ꓒꓽ ꓥ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓙꓵꓽ ꓗꓽ ꓟ. ꓒꓽ ꓐꓴ ꓠꓬ ꓬꓲ ꓪ ꓢꓯꓼ ꓟꓬ ꓔꓯ ꓖꓶ ꓗꓷ ꓗꓪ ꓛꓲ ꓡ ꓞꓳ ꓔꓯ ꓟꓽ ꓠꓲ, ꓠꓵ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓥ ꓟꓲ ꓣꓳ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒꓽ ꓠꓯ, ꓗꓪ ꓛꓳꓽ ꓔꓬ ꓡ ꓝꓮꓲ ꓣꓳ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒꓽ ꓡꓰ ꓟ. ꓖꓶ ꓔ ꓟ ꓟ. ꓟꓲꓽ ꓔꓯ ꓛꓳꓽ ꓔꓬ ꓡ ꓐꓰ ꓣꓳ ꓓꓵ ꓙ ꓠ, ꓟ ꓐꓯ ꓔꓬ ꓟ ꓥ ꓡꓳ꓿ ꓙꓲˍ ꓟ ꓮ ꓣꓳ ꓡꓳ. ꓒꓽ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓿