ꓚꓲ. ꓚꓲ ꓟ ꓙꓵ, ꓠꓬꓲꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ (Sunday reflection)

#Tranfiguration of Jesus #creditphoto

Sunday, February 25, 2024

ꓚꓲ. ꓚꓲ ꓟ ꓙꓵ, ꓠꓬꓲꓽ ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ (Transfiguration of Jesusu)

ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓘꓳ ꓕꓳ ꓶ (9ꓽ1‐9) ꓝꓲ ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓐꓬꓱ ꓑꓶ ꓡꓰ ꓟ ꓢꓲꓽ ꓫꓬ ꓕꓳ ꓶ ꓝꓲ ꓥ ꓡꓳ꓿ ꓟꓲ ꓠꓯ ꓗꓪ ꓙꓳˍ ꓟ ꓮ ꓫꓵꓽ ꓕꓲ ꓫꓵꓽ ꓠꓬ ꓣꓳ ꓪꓴ‐ꓢ ꓔꓯ ꓟꓳ. ꓠ, ꓟ ꓣꓳ ꓔꓯ ꓗꓽ ꓕꓽ ꓔꓬ ꓡ ꓐꓰ ꓣꓳ ꓓꓴ ꓙ ꓠ, ꓟ ꓥ ꓡꓳ꓿

ꓕꓱ ꓟ ꓠꓬ ꓝꓴꓲ ꓐꓰ ꓬꓲ ꓔꓯ ꓣꓳ ꓟꓽ ꓙꓵꓻ ꓟ ꓗꓪ ꓐꓰ ꓥ ꓡꓳ꓿ ꓣꓳ ꓙꓵꓻ ꓠꓲ, ꓟꓬ ꓢꓶ ꓠꓬ ꓡ ꓞꓳ ꓟꓬ, ꓢꓶ ꓡꓰ ꓟꓳ.ꓪ ꓟꓽ ꓓ ꓟ ꓔꓯ ꓡꓳ. ꓟꓳ ꓓ ꓟ ꓥ ꓡꓳ꓿ ꓙꓵꓻ ꓠꓲ, ꓗꓪ ꓚꓱ, ꓗꓪ ꓮ‐ꓦ‐ꓡ‐ꓦ ꓠꓬ ꓪꓴ‐ꓢ ꓡꓰ ꓬꓲ ꓔꓯ ꓘꓴˍ ꓟ ꓔꓯ ꓢꓷ. ꓡꓰ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓣꓳ ꓐꓰ ꓬꓲ ꓛꓳꓽ ꓒꓯꓽ ꓐꓴ ꓔꓯ ꓥ ꓟꓲ ꓪꓴ‐ꓢ ꓘꓴ ꓟ ꓢꓯꓼ ꓔꓯ ꓦꓻ ꓟꓬ ꓢꓶ ꓗꓪ ꓐꓰ ꓢꓷ. ꓪ ꓓ ꓟ ꓥ ꓡꓳ꓿

ꓮ‐ꓐ‐ꓡ‐ꓦ ꓠꓬ ꓙꓵꓻ ꓠꓲ, ꓮ ꓘꓶ. ꓙꓳ ꓢꓴ ꓥ ꓡꓳ꓿ ꓕꓱ ꓡꓱ ꓐꓰ ꓬꓲ ꓠꓬ ꓪꓴ‐ꓢ ꓔꓯ ꓙꓵꓻ ꓟ ꓙꓵꓻ ꓠꓲ, ꓗꓪ ꓪꓴ‐ꓢ ꓡꓰ ꓖꓶ ꓔ ꓟ ꓟꓵꓽ ꓗꓪ ꓛꓲ ꓙꓰ ꓡꓰ ꓟ ꓥ ꓡꓳ꓿ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓥ ꓟꓲ ꓣꓳ ꓟꓲ ꓠꓯ ꓡ ꓞꓳ ꓔꓯ ꓬꓲ ꓠꓬ ꓪꓴ‐ꓢ ꓮ‐ꓐꓲ ꓚꓵ ꓥ ꓟꓲ ꓬꓲ ꓒꓬꓱꓼ ꓑꓶ ꓟ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓬꓲ ꓐꓰ ꓣꓳ ꓠꓬ ꓕꓲ ꓪ ꓙ ꓫꓱ, ꓠꓬ ꓕꓲ ꓠꓬꓲ ꓣꓳ ꓥ ꓟꓲ ꓪꓴ‐ꓢ ꓔꓬ ꓗꓪ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓬꓲ ꓒꓬꓱ ꓑꓶ ꓡꓰ ꓟ ꓟ. ꓖꓶ ꓟ ꓠꓬ ꓟꓷꓼ ꓠꓷꓼ ꓝ. ꓢꓴ ꓐꓴ ꓡꓰ ꓐꓯ ꓔ ꓟ ꓡꓰ ꓐꓰ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓡ ꓟ꓾ ꓡꓯ ꓐꓳ ꓔꓲ ꓓꓴ ꓗꓪ ꓫꓵꓻ ꓠ, ꓟ ꓐꓰ ꓢꓽ ꓦꓬꓼ ꓗ. ꓠꓯ ꓢꓯꓼ ꓬꓲꓼ ꓡ ꓟ ꓚꓱ, ꓔꓯ ꓟ. ꓖꓶ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓡꓯ ꓐꓳ ꓔꓶ ꓓꓴ ꓚꓺ ꓓꓴ ꓗꓪ ꓚꓺ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓡꓯ ꓐꓳ ꓔꓶ ꓓꓴ ꓚꓺ ꓖꓴ ꓠꓬ ꓫ. ꓓꓴ ꓟꓶ ꓓꓴ ꓮ ꓘꓶ. ꓙꓳ ꓟ ꓥ ꓢꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓲ, ꓫꓵˍ ꓟ ꓚꓱ, ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓧꓪ ꓓꓴ ꓬꓰ ꓡꓯ꓿ ꓜ ꓚꓲ. ꓚꓲ. ꓢꓲ ꓠꓬꓲ ꓮ ꓟꓬ, ꓪꓽ ꓘꓴ ꓓꓴ ꓬꓰ ꓡꓯ꓿

ꓣꓳ ꓠꓬ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓡ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓡꓯ ꓐꓳ ꓔꓶ ꓓꓴ ꓙ ꓖꓴ ꓗꓪ ꓚ ꓢꓲ ꓠꓬꓲ ꓚꓬꓴ ꓢꓲꓺ ꓒ ꓡꓰ ꓖꓶ ꓔ ꓟ ꓢꓯꓼ ꓟꓬ, ꓝ ꓟ ꓚ ꓖꓴ ꓗꓪ ꓙꓰ ꓔꓬ ꓟ ꓥ ꓡꓳ꓿ ꓪꓴ‐ꓢ ꓡꓰ ꓧꓪ ꓡꓰ ꓟ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ꓿ ꓮ ꓕꓯ ꓥ ꓟꓲ ꓪꓴ‐ꓢ ꓐꓰ ꓕꓲ ꓪ ꓙ ꓫꓱ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿