ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓪꓽ ꓧꓪˍ ꓟ ꓔꓯ ꓥꓳꓽ

ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓪꓽ  ꓧꓪˍ ꓟ ꓔꓯ ꓥꓳꓽ

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓘꓴ ꓜꓲꓼ ꓞꓳ ꓟꓵ ꓘꓳꓼ ꓠꓯ, ꓗꓪ ꓐꓰ (25) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ (20ꓽ1‐16) ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓧꓪ, ꓟ ꓟ. ꓟꓲꓽ ꓥ ꓡꓳ꓿ ꓟꓬꓱꓽ ꓢꓲꓺ ꓒ ꓠꓬ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓕꓲ ꓠꓬꓲꓽ ꓪꓽ ꓒꓵꓽ ꓓꓲ‐ꓠ‐ꓡꓲ ꓕꓲ ꓒꓯ ꓖꓶ ꓠ, ꓟ ꓐꓯ ꓔ ꓟ  ꓥ ꓡꓳ꓿ ꓝꓮꓲ ꓛꓱꓼ ꓡꓱꓼ ꓐꓱ ꓢꓲꓺ ꓒ ꓠꓬ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓪꓽ ꓡꓯ ꓘꓳ ꓟ ꓪꓽ ꓒꓵꓽ ꓖꓶ ꓢꓲ ꓠꓬꓲ ꓬꓲ. ꓠꓬꓲ ꓔꓱ ꓚꓵ ꓟ ꓥ ꓟ ꓔꓯ ꓢꓷ. ꓡꓰ ꓝꓲ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓪꓽ ꓡꓯ ꓘꓳ ꓟ ꓪꓽ ꓒꓵꓽ ꓖꓶ ꓟ ꓠꓬ ꓟꓬꓱꓽ ꓢꓲꓺ ꓒ ꓠꓬ ꓔꓱ ꓚꓵ ꓟ ꓟꓬꓱꓽ ꓢꓲꓺ ꓒ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓝꓮꓲ ꓟꓬꓱꓽ ꓬꓰ ꓢꓴ ꓮ ꓙꓵꓽ ꓕꓲ ꓠꓲ, ꓕꓲ ꓪ ꓢꓯꓼ ꓕꓵꓼ ꓟ ꓠꓬ ꓟꓬꓱꓽ ꓔꓯ ꓞ ꓞ ꓬꓰ ꓓꓳˍ ꓡꓰ ꓟ ꓔꓯ ꓟ. ꓖꓶ ꓔ ꓡꓳ꓿ ꓝꓮꓲ ꓪꓽ ꓡꓯ ꓘꓳ ꓟ ꓡꓯ ꓫꓴꓻ ꓘꓳ ꓣꓴ ꓟꓶ ꓟ ꓚꓱ, ꓔꓯ ꓥ ꓟꓲ ꓟ. ꓖꓶ ꓡ ꓡꓳ꓿

ꓛꓱꓼ ꓡꓯꓼ ꓐꓱ ꓢꓲꓺ ꓒ ꓔꓱ, ꓚꓵ ꓟ ꓐꓰ ꓣꓱ ꓛꓰ ꓡꓯ ꓫꓴ ꓠꓬ ꓢꓲꓽ ꓫꓬ ꓕꓳ ꓶ ꓗꓪ ꓟꓬꓱꓽ ꓢꓲꓺ ꓒ ꓠꓬ ꓟꓽ ꓓꓵ ꓙ ꓔ ꓟ ꓥ ꓟꓲ ꓔꓱ ꓚꓵ ꓟ ꓢꓲꓺ ꓒ ꓥ ꓟ ꓔꓯ ꓢꓲꓺ ꓒ ꓕꓳ ꓶ ꓝꓲ ꓗꓪ ꓐꓰ ꓡꓳ. ꓟꓳ ꓪ ꓟ ꓥ ꓡꓳ꓿ ꓟꓬꓱꓽ ꓢꓲꓺ ꓒ ꓠꓬ ꓠꓱ. ꓐꓯꓼ ꓢꓴ ꓔꓯ ꓮ ꓕꓯ ꓥ ꓟꓲ ꓠꓵꓻ ꓠꓲ, ꓟ. ꓐꓱ ꓫꓱ. ꓤ ꓠꓲ, ꓙꓳ ꓢꓴ ꓥ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟꓬꓱꓽ ꓢꓲꓺ ꓒ ꓠꓬ ꓫꓱ. ꓤ ꓠꓲ, ꓐꓰ ꓙ ꓗꓳ ꓠꓲ, ꓟ ꓙꓳˍ ꓟ ꓥ ꓢꓲ ꓠꓬꓲ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓙꓵ, ꓕꓯ ꓮ ꓡꓰꓳ ꓫꓵꓽ ꓙꓵꓽ ꓗ ꓗꓪ ꓐꓰ ꓧꓳꓽ ꓣꓴ ꓔꓬ ꓟ ꓔꓯ ꓚˍ ꓠꓬꓲ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿

ꓕꓲ ꓠꓲ, ꓕꓲ ꓪ ꓫꓱ. ꓡꓯ ꓘꓳ ꓐꓯ ꓟ ꓠꓬ  ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓪꓽ ꓘꓴ ꓦꓲꓻ ꓗꓪ ꓖꓶꓻ ꓗꓷ ꓟ ꓮ ꓡꓴ ꓔꓯ ꓟꓳ. ꓣꓳ ꓮ ꓡꓰꓳ ꓫꓵꓽ ꓠꓲ, ꓟ ꓗꓪ ꓐꓰ ꓖꓶꓻ ꓔ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓗꓪ ꓕꓲ ꓠꓬꓲ ꓡꓱ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓟꓬꓱꓽ ꓠꓽ ꓡꓰ ꓕꓯ ꓬꓲ ꓪ ꓠꓬ ꓮ ꓘꓶ. ꓢꓯꓼ ꓕꓵꓼ ꓗꓷ ꓟ ꓪꓴ. ꓠꓬꓲ ꓟꓬꓱꓽ ꓢꓲꓺ ꓒ ꓔꓯ ꓒꓴ ꓮ ꓟꓬ, ꓓꓰꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓢꓲꓺ ꓒ ꓠꓬ ꓠꓴ ꓪꓽ ꓒꓵꓽ ꓔꓯ ꓔꓯꓺ ꓢꓲ ꓙꓰ ꓐꓰ ꓐꓯ ꓖꓶ ꓟ ꓥ ꓡꓳ꓿ ꓐꓯ  ꓠꓲ, ꓫꓵˍ ꓟ ꓠꓬ ꓣꓳ ꓘꓳ ꓣꓴ ꓟꓶ ꓟ ꓣꓱ ꓛꓰ ꓡꓯ ꓫꓴ ꓔꓯ ꓠꓲ, ꓘꓪ ꓫꓵˍ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓘꓴ ꓟꓶ ꓡꓰ ꓢꓴ ꓐꓴ ꓠꓬ ꓬꓲ ꓟꓶ ꓕꓯ ꓪꓽ ꓒꓵꓽ ꓪ ꓗꓷ ꓟ ꓪꓴ. ꓠꓬꓲ ꓟꓬꓱꓽ ꓢꓲꓺ ꓒ ꓔꓯ ꓮ ꓘꓶ ꓛꓲ ꓫ. ꓟꓳ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓮ ꓙꓵꓽ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓥ ꓡꓳ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓔꓯ ꓶꓽ ꓥꓳꓽ ꓙꓱ ꓖꓶ ꓔꓬ ꓟ ꓥ ꓡꓳ꓿ ꓪꓴ‐ꓢ ꓡꓰ ꓣꓳ ꓔꓯ ꓖ ꓔ ꓟ ꓡꓯ ꓫꓴ ꓔꓯ ꓣꓳ ꓓꓵ ꓙ ꓠꓬꓲ ꓢꓲ ꓠꓬꓲ ꓪꓴ‐ꓢ ꓔꓯ ꓫ. ꓟꓳ ꓓꓴ ꓬꓰ ꓡꓯ꓿ ꓕꓱ ꓟ ꓠꓬ ꓣꓳ ꓮ ꓙꓵꓽ ꓔꓯ ꓗ, ꓛꓲ ꓓꓴ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓪꓴ‐ꓢ ꓣꓳ ꓔꓯ ꓮ ꓘꓶ. ꓠꓲ, ꓠꓵ ꓟ ꓔꓯ ꓓꓴ ꓙ ꓓꓴ ꓬꓰ ꓡꓯ꓿ ꓫ. ꓟꓳ ꓪ