ꓛꓳꓽ ꓒꓯꓹ ꓫꓵꓽ ꓞꓲ ꓣꓳ ꓔꓯ ꓝꓲ ꓩꓴ ꓗꓷˍ ꓟ

ꓛꓳꓽ ꓒꓯꓹ ꓫꓵꓽ ꓞꓲ ꓣꓳ ꓔꓯ ꓝꓲ ꓩꓴ ꓗꓷˍ ꓟ

ꓛꓳꓽ ꓒꓯꓹ ꓫꓵꓽ ꓞꓲ ꓣꓳ ꓔꓯ ꓝꓲ ꓩꓴ ꓗꓷˍ ꓟ

ꓕꓱ ꓟꓬ ꓫꓵꓽ ꓗ ꓠꓯꓸ꓾ ꓢꓲ ꓒ ꓡꓰ ꓠꓱꓸ ꓐꓯꓼ ꓫꓵꓽ ꓞꓲ ꓣꓳ ꓢꓲ ꓚꓰꓸ ꓗꓷ ꓢꓲ꓾ ꓬꓲ ꓚꓲ ꓛꓬ ꓙꓰˍ ꓐꓰ ꓬꓰˍ ꓟ ꓟꓵꓽ ꓕꓲ ꓡꓳ ꓒꓱ ꓡꓰ ꓕꓲ ꓡꓳ ꓒꓱ ꓗꓪ꓾ ꓬꓲ ꓪ ꓔꓯ ꓠꓬꓲꓽ ꓣꓳ ꓠꓬꓲꓽ ꓣꓳ ꓐꓰ ꓬꓲꓸ ꓟꓲ ꓕꓯꓽ ꓢꓲ ꓝꓲ ꓩꓴ ꓗꓷˍ ꓡꓳ=ꓬꓲ ꓠꓬ ꓬꓲ ꓪ ꓔꓯ꓾ ꓫ ꓠꓯ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓚꓵ ꓚꓵ ꓟꓬꓽˍ ꓡꓳ= ꓖꓳ ꓡꓱ ꓥˍ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ=ꓖꓳ ꓡꓱ ꓠꓬꓲ ꓜ ꓫ ꓢꓲ ꓒ ꓡꓰ ꓜꓽ ꓪꓳꓽ ꓡꓳ ꓪꓳꓽ ꓫ ꓢꓴ ꓝꓲ ꓩꓴ ꓗꓷ ꓠꓹ ꓟ ꓬꓲ ꓔꓯ ꓓꓰꓽ= ꓠꓴ ꓪ ꓙꓰ ꓨꓽ=ꓠ ꓠꓹ꓾ ꓪꓰ ꓕꓳꓹ ꓜꓴ ꓗꓳ ꓡꓳ ꓗꓪ ꓮ ꓣꓳ ꓤ ꓔꓯ ꓝꓲ ꓩꓴˍ ꓟ ꓡꓰ ꓐꓰ ꓥꓪ ꓡꓰ ꓠꓴ ꓪ ꓔꓯ ꓝꓲ ꓩꓴ ꓗꓷˍ ꓟ ꓥ ꓡꓳ=ꓠꓴ ꓪ ꓠꓬ ꓒꓴ ꓗꓶ ꓓꓴ ꓕꓽ ꓔꓯꓹ ꓡꓯꓼ ꓔꓲꓸˍ ꓟꓲ꓾ ꓛꓲ ꓠꓲˍ ꓟꓲ ꓕꓽ ꓔꓯꓹ=ꓙ ꓖꓴ ꓗꓪ ꓮꓽ ꓟ ꓔꓯˍ ꓟꓲ ꓒꓵꓽ ꓗ ꓕꓽ ꓬꓰ=ꓮ ꓡꓲ ꓕꓲꓽ ꓦꓲ ꓗꓪ ꓓꓵꓽ ꓡꓰˍ ꓟꓲ꓾ ꓖꓳ ꓕꓲ ꓦꓲ ꓗꓪ ꓢꓲ ꓡꓲ ꓟ ꓙꓳ ꓝꓲ꓾ ꓐꓰ ꓧꓶꓸ ꓕꓯ ꓐꓯ ꓖꓶ= ꓖꓳ ꓡꓱ ꓢꓲ ꓢꓲ ꓡꓲ ꓟ ꓟꓶ ꓒꓵꓽ ꓢꓴ ꓖꓳ ꓗꓪ ꓔꓬ ꓠꓬ꓾ꓠꓴ ꓪ ꓓꓰꓽˍ ꓟ ꓢꓲ ꓡꓲ ꓟ ꓠꓬ ꓖꓳ ꓕꓲꓽ ꓦꓲ ꓗꓪ ꓬꓯꓼ ꓡˍ ꓥꓳ=ꓟꓽ ꓥ ꓠꓬ ꓠꓴ ꓪ ꓔꓯ ꓚꓱꓹ ꓬꓲꓼ ꓡˍ ꓥꓳ=ꓖꓳ ꓕꓲ ꓦꓲ ꓗꓪ ꓔꓬ ꓢꓲ ꓬꓲ ꓪ ꓡꓰ ꓮ ꓫꓵꓽ ꓖꓶꓽ ꓡˍ ꓠꓬ꓾ ꓖꓳ ꓫꓵꓽ ꓜꓽ=ꓮ ꓡꓲꓳ ꓐꓯ ꓠꓬ ꓪꓽ ꓤ ꓠꓬ ꓪꓽ ꓒꓵꓽ ꓟꓶ ꓒꓵꓽˍ ꓡꓳ=ꓕꓱ ꓕꓲ ꓦꓲ ꓗꓪ ꓐꓰ ꓖꓳ ꓕꓲ ꓦꓲ ꓗꓪ ꓕꓽ ꓚꓵꓸ ꓙꓰ= ꓮ ꓡꓲ ꓕꓲ ꓡꓳ ꓒꓱ ꓗꓪ ꓓꓵꓽ ꓙꓰˍ ꓟꓲ꓾ ꓬꓲ ꓪ ꓡꓰ ꓠꓴ ꓪ ꓔꓯ ꓘꓳ ꓣꓴ ꓢꓲ꓾ ꓮ ꓫꓵꓽ ꓖꓶ ꓡ ꓠꓬ ꓖꓳ ꓫꓵꓽ ꓜꓽ=ꓖꓳ ꓗꓪ ꓟ ꓞꓳ ꓠꓻ ꓔꓯ ꓫꓬꓹ ꓖꓶꓽ ꓢꓲ꓾ ꓪꓴ-ꓢ ꓗꓴꓷꓼ ꓠꓬ ꓠꓴ ꓪ ꓔꓯ ꓠꓶꓽ ꓡꓻꓳ꓾ ꓐꓯ ꓖꓶ= ꓮ ꓡꓲ ꓕꓲ ꓡꓳ ꓒꓱ ꓗꓪ ꓠꓴ ꓪ ꓔꓯ ꓟꓽ ꓘꓳ ꓣꓴ ꓡ ꓠꓬ꓾ ꓡꓳ ꓒꓱ ꓙ ꓖꓴ ꓗꓪ ꓓꓳ ꓙꓰ ꓢꓲ ꓬꓲ ꓪ ꓔꓯ꓾ ꓥꓪ ꓠꓴꓽ ꓛꓲ ꓒꓯꓹ ꓗꓪ ꓠꓷꓼ ꓞꓹ ꓟ ꓠꓴ ꓪ ꓡꓳ ꓒꓱ ꓗꓪ ꓟ ꓠꓱꓸ ꓦꓱꓽ ꓧꓶꓽˍ ꓟꓲ꓾ ꓠꓴ ꓪ ꓔꓯ ꓔꓳꓹ ꓢꓲ ꓢꓷꓸ ꓙ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓥꓪ ꓠꓴꓽ ꓠꓬ ꓠꓴ ꓪ ꓟꓲ ꓙꓬꓽ ꓗꓪ ꓟꓱꓸ ꓦꓻ ꓗꓷˍ ꓥꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓗꓴꓷꓼ ꓠꓶꓽ ꓡˍ ꓟ ꓔꓯ ꓠꓽ ꓠꓴ ꓪ ꓚꓵ ꓚꓵ ꓢꓷꓸ ꓠꓯꓹ ꓡꓳ꓾ ꓐꓰ ꓐꓯ ꓖꓶ=ꓠꓴ ꓪ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓦꓬꓼ ꓠꓬꓲ ꓖꓳ ꓟ ꓗꓪ ꓡꓳ ꓒꓱ ꓖꓳ ꓕꓲ ꓟ ꓔꓯ ꓗꓷ ꓡꓰ ꓠꓹ ꓟ ꓠꓬ꓾ ꓢꓳ-ꓓꓳ-ꓟ ꓔꓯ ꓗꓷ  ꓡꓰ ꓟ ꓢꓶꓸ ꓟꓽ ꓞꓲ ꓡꓲꓽˍ ꓥꓳ꓾ ꓐꓯˍ ꓡꓳ=

ꓡꓴ-ꓘ = 10ꓽ 1-12

Add new comment

14 + 5 =

Please wait while the page is loading