ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓯꓹ ꓟ

ꓠꓬꓲꓸ ꓠꓬꓲ ꓟ ꓢꓲ-ꓫꓬ ꓕꓳ ꓝꓲꓼ

 ꓶ ꓓꓳ ꓫꓱꓸ ꓓꓳ ꓟ-ꓕꓲ 5ꓽ43-48

ꓠꓶꓽ ꓛꓳ ꓕ ꓛꓳꓽ ꓔꓯ ꓠꓲꓹ ꓠꓵ ꓢꓲ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓜꓳ-ꓸ ꓐꓯ_ ꓟ ꓠꓴ ꓪ ꓑ ꓙꓽ ꓠꓬꓲꓳ= ꓖꓳ ꓡꓱ ꓥ_ ꓟꓲ ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ-ꓸ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ-ꓸ ꓠꓴ ꓪ ꓔꓯ ꓗꓸ ꓧꓪ ꓢꓴ ꓐꓱ ꓶ ꓪꓽ ꓘꓴ ꓙ= ꓕꓱ ꓡꓰ ꓬꓰ_ ꓠꓬ ꓠꓴ ꓪ ꓠꓽ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐꓹ ꓐꓽ ꓬꓲ ꓤ ꓠꓱ ꓒꓬꓱꓼ ꓡ_ ꓥꓳ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓟꓲꓽ ꓟꓲ ꓠꓬ ꓞꓳ ꓙꓲ_ ꓐꓰ ꓞꓳ ꓥꓶ ꓔꓯ ꓕꓲ ꓡꓰꓹ_ ꓐꓰ ꓣꓳꓸꓸꓖꓶ_ ꓡꓳ= ꓟꓶꓽ ꓦ_ ꓟꓲ ꓙꓲ ꓫꓬ ꓢꓴ_ ꓐꓰ ꓟꓽ ꓙꓲ ꓫꓬ ꓢꓴ ꓔꓯ ꓕꓲ ꓡꓰꓹ_ ꓐꓰ ꓦ ꓖꓶ_ ꓡꓳ= ꓠꓴ ꓪ ꓠꓬ ꓠꓴ ꓪ ꓔꓯ ꓠꓲꓹ ꓠꓵ ꓢꓴ ꓔꓯ_ ꓡꓰꓽ ꓠꓲꓹ ꓠꓵ_ ꓕꓯ ꓠꓽ ꓮ ꓫꓵꓽ ꓡꓯꓼ ꓫꓴ ꓟꓽ ꓙꓳ= ꓝꓲꓸ ꓫ ꓢꓴ_ ꓟꓲ ꓕꓱ ꓡꓱ ꓬꓰ_ ꓡꓳ ꓟꓽ ꓥ ꓡ? ꓠꓴ ꓪ ꓠꓬ ꓠꓴ ꓪ ꓬꓲꓼ ꓠꓴ ꓪ ꓠꓬꓲ ꓔꓯ_ ꓡꓰ ꓒꓵꓽ ꓗ ꓬꓰ_ ꓠꓬ-ꓸ ꓠꓱꓸ ꓐꓯꓼ ꓢꓴ_ ꓐꓰ ꓟꓽ ꓫꓱꓸ ꓡꓯ ꓘꓳ ꓓꓴ ꓮ ꓫꓵꓽ ꓙꓳ_ ꓡ? ꓟꓽ ꓙꓵꓸꓹ ꓢꓴ ꓐꓴ_ ꓟꓲ ꓖꓳ ꓡꓱ ꓬꓰ_ ꓡꓳ ꓟꓽ ꓥ ꓡ? ꓖꓳ ꓡꓱ ꓠꓬꓲ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐꓹ ꓐꓽ ꓜꓳꓽ ꓓꓰ_ ꓟ_ ꓡꓰ-ꓸ ꓠꓴ ꓪ_ ꓟꓲ ꓜꓳꓽ ꓓꓰ ꓡꓰ ꓠ ꓗꓹ ꓡꓳ=

2 ꓘꓳ-ꓡꓱ-ꓴ 8ꓽ1-9

ꓬꓲꓼ ꓤ ꓠꓬꓲ ꓤ ꓐꓴꓳ-ꓸ ꓪꓴ-ꓢ ꓡꓰ ꓟ-ꓢꓲ-ꓓꓳ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓔꓯ ꓖꓶ ꓗꓷ ꓟ ꓣꓱ ꓛꓰ ꓔꓯ ꓟꓳꓸ ꓠꓴ ꓪ ꓕꓯ_ ꓟꓲ ꓢꓷꓸ ꓡꓰ ꓝꓲ ꓠꓲꓹ ꓫꓵ_ ꓡꓳ= ꓫꓸ ꓙꓵ_ ꓟ ꓡꓰ ꓬꓲ ꓪ ꓔꓯ ꓮꓽ ꓘꓶꓸ ꓤꓹ ꓠꓬꓲ_ ꓕꓯ-ꓸ ꓬꓲ ꓪ ꓠꓬ ꓫꓸ ꓓꓰꓸꓸ ꓡꓰ_ ꓟꓲ ꓗꓹ ꓛꓲ_ ꓟ ꓐꓲ ꓡꓶꓽ ꓡꓰ ꓢꓲ-ꓸ ꓬꓲ ꓪ ꓮ ꓡꓲ ꓐ ꓡ ꓠꓬ ꓖꓳ ꓡꓱ ꓠꓲꓹ ꓡꓳ ꓡꓳ_ ꓡꓰ ꓢꓴ ꓔꓯ ꓮ ꓘꓶꓸ ꓬꓰ ꓙ_ ꓡꓳ= ꓝꓮꓲ ꓠꓬ ꓐ ꓡ- ꓟ ꓕꓯꓽ ꓢꓲ_ ꓟꓲ-ꓸ ꓬꓲ ꓪ ꓠꓬ ꓣꓱꓽ ꓙ_ ꓟ ꓟꓬꓱꓽ ꓗꓪ ꓠꓲꓹ ꓡꓱ ꓢꓲ ꓢꓯꓼ ꓕꓵꓼ ꓗꓷꓳ-ꓸ ꓐꓰ ꓥꓪ ꓢꓷꓸ ꓙ ꓟꓳ ꓙ ꓠꓲꓹ ꓫꓵ_ ꓡꓳ= ꓬꓲ ꓪ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓦ ꓡꓱ ꓢꓴ ꓐꓴ ꓔꓯ ꓣꓱꓽ ꓙ_ ꓟ ꓠꓬꓱꓽ ꓗꓪ ꓔ ꓪ ꓡꓰ ꓠꓹ ꓟ-ꓸ ꓥꓪ ꓠꓴꓽ ꓯ ꓠꓲꓹ ꓡꓱ ꓡꓱ_ ꓡꓰꓽ ꓓꓰꓽ ꓡꓸꓸꓳ= ꓝꓮꓲ ꓠꓬ ꓥꓪ ꓠꓴꓽ ꓟꓽ ꓥꓳ ꓡꓳꓸ ꓔ ꓟ ꓗꓪ-ꓸ ꓬꓲ ꓪ ꓠꓬ ꓕꓲ ꓖꓳ ꓓꓱ ꓕꓲ ꓠꓲꓹ ꓟ ꓡꓱꓸꓼ ꓢꓲ ꓒ ꓔꓯ ꓧꓶꓸ ꓕꓯ ꓡꓯꓼ ꓙꓱ ꓖꓶ ꓢꓲ-ꓸ ꓪꓴ-ꓢ ꓠꓲꓹ ꓡꓶꓽ ꓗꓪ ꓐꓰ ꓥꓪ ꓠꓴꓽ ꓔꓯ_ ꓟꓲ ꓬꓰ ꓙ ꓡꓸꓸꓳ= ꓟꓬꓱꓽ ꓕꓱ ꓟ ꓬꓰ ꓪꓴꓸ ꓔꓴ ꓢꓴ ꓠꓬ ꓕꓲ-ꓔꓳ ꓥ ꓠꓬꓲ-ꓸ ꓣꓱꓽ ꓙ_ ꓟ ꓟꓬꓱꓽ ꓕꓱ ꓟ ꓠꓴ ꓪ ꓗꓳ ꓡꓳ ꓗꓪ_ ꓟꓲ ꓬꓰ ꓓꓳ ꓡꓰ ꓝꓲ ꓠꓹ ꓟ-ꓸ ꓥꓪ ꓠꓴꓽ ꓡꓰ ꓬꓲ ꓔꓯ ꓢꓯꓼ ꓖꓶ ꓗꓷꓳ= ꓠꓴ ꓪ ꓠꓬ ꓙꓵꓸꓹ ꓠꓲꓸ_ ꓐꓰ ꓐꓯ ꓙꓸꓹ_ ꓐꓰ ꓢꓷꓸ ꓠꓲꓹ_ ꓐꓰ ꓠꓲꓹ ꓟ ꓡꓱ_ ꓟ ꓮ ꓙꓵꓽ_ ꓐꓰ-ꓸ ꓠꓴ ꓪ ꓠꓯꓸꓼ ꓗꓪ ꓥꓪ ꓠꓴꓽ ꓐꓱ ꓶ ꓠꓵ ꓠꓲꓹ ꓐꓲ ꓞꓹ ꓟ_ ꓡꓰ ꓐꓰ ꓣꓱꓽ ꓙ_ ꓟ ꓣꓱ ꓛꓱ ꓕꓱ ꓕꓲ ꓫꓵꓽ ꓗꓪ_ ꓟꓲ ꓐꓲ ꓡꓶꓽ ꓡꓰ ꓝꓲ= ꓥꓪ ꓕꓱ ꓡꓱ ꓐꓯ_ ꓟ ꓠꓬ ꓠꓴ ꓪ ꓔꓯ ꓕꓵꓼ ꓪ ꓖꓶ_ ꓟ ꓟꓽ ꓥ= ꓠꓱꓸ ꓐꓯꓼ ꓢꓴ ꓠꓲꓹ ꓟ ꓡꓱ_ ꓟ ꓔꓯ ꓖꓴ ꓢꓲ-ꓸ ꓠꓴ ꓪ_ ꓟꓲ ꓠꓵ ꓠꓲꓹ ꓚꓵ ꓙꓳ ꓟꓽ ꓙꓳ ꓔꓯꓸꓸ ꓠꓬꓲ ꓠꓹ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓬꓲ ꓣꓱ ꓛꓰ ꓔꓯ ꓠꓴ ꓪ ꓢꓷꓸ_ ꓡꓳ= ꓬꓲ ꓠꓬ ꓞꓳ ꓐꓳ ꓞꓳ ꓬꓲꓼ ꓥ_ ꓟꓲ-ꓸ ꓬꓲ ꓫ_ ꓟ ꓗꓪ ꓐꓰ ꓠꓴ ꓪ ꓔꓯ ꓐꓳ ꓡꓰ ꓝꓲ ꓠꓹ ꓟ ꓬꓲ ꓠꓬ ꓞꓳ ꓫꓸ ꓒꓬꓱꓼ ꓡꓸꓸꓳ=