ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓯꓹ ꓟ

ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓯꓹ ꓟ

ꓡꓴ-ꓘ ꓕꓳꓽ ꓶ 6: 27-38

 ꓖꓳ ꓡꓱ ꓥ_ ꓟꓲ ꓠ ꓠꓹ ꓔꓬ ꓢꓴ ꓠꓴ ꓪ ꓔꓯ ꓥꓪ ꓐꓯ ꓖꓶ_ ꓠꓬꓲ꓾ ꓠꓴ ꓪ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ꓾ ꓠꓴ ꓪ ꓔꓯ ꓠꓲꓹ ꓜꓳ ꓢꓴ ꓔꓯ ꓙꓲ_ ꓟ ꓬꓰ ꓖꓶ꓿ ꓠꓴ ꓪ ꓔꓯ ꓙꓱꓽ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ꓿ ꓠꓴ ꓪ ꓔꓯ ꓘꓶꓻ ꓙꓵ ꓢꓴ ꓐꓱ ꓶ ꓪꓽ ꓘꓴ ꓙ꓿ ꓠꓴ ꓒꓬꓱꓽ ꓟꓬ ꓕꓱ ꓕꓲ ꓒꓳꓹ ꓗꓪ ꓓꓶꓽ ꓢꓴ ꓔꓯ ꓠꓬ꓾ ꓖꓳ ꓕꓲ ꓒꓳꓹ_ ꓟꓲ ꓟꓳꓸ ꓖꓶ꓿ ꓠꓴ ꓐꓵ ꓞꓶꓽ ꓕꓯ ꓢꓲ ꓕꓲ ꓘꓳꓹ ꓟ ꓦꓴꓺ ꓡ ꓢꓴ ꓔꓯ ꓠꓬ꓾ ꓠꓯꓸ ꓘꓪ ꓕꓲ ꓘꓳꓹ ꓟ_ ꓟꓲ ꓟꓽ ꓖꓶ ꓐꓰ ꓕꓽ ꓬꓰ꓿ ꓠꓴ ꓔꓯ ꓓꓰꓽ ꓢꓴ ꓥ ꓕ ꓑꓳ ꓔꓯ ꓖꓶ꓾ ꓠꓴ ꓖꓴꓽ ꓙꓴꓽ ꓦꓴ ꓔꓯꓹ ꓙꓰ ꓢꓴ ꓔꓯ ꓠꓬ꓾ ꓝꓮꓲ ꓕꓽ ꓧꓪ ꓔꓯꓹ ꓬꓲꓼ ꓡꓯ꓿ ꓠꓴ ꓪ ꓠꓬ ꓞꓳ ꓤ ꓡꓰ ꓠꓴ ꓪ ꓔꓯ ꓮ ꓡꓲ ꓬꓰ ꓖꓶ ꓝꓲ ꓠꓲꓹ ꓫꓵ_ ꓠꓬ꓾ ꓠꓴ ꓪ_ ꓟꓲ ꓬꓲ ꓪ ꓔꓯ ꓬꓲ ꓖꓳ ꓡꓱ ꓬꓰ ꓖꓶ꓿ ꓠꓴ ꓪ ꓠꓬ ꓠꓴ ꓪ ꓔꓯ ꓠꓲꓹ ꓠꓵ ꓢꓴ ꓔꓯ_ ꓡꓰꓽ ꓠꓲꓹ ꓠꓵ_ ꓠꓬ ꓮ ꓫꓵ ꓣꓱ ꓛꓰ ꓙꓳ_ ꓡꓳꓺꓽ꓿ ꓮ ꓡꓲꓳ ꓐꓯ ꓠꓬ ꓝꓴꓲ ꓙꓳ ꓢꓴ_ ꓟꓲ ꓬꓲ ꓪ ꓔꓯ ꓠꓲꓹ ꓠꓵ ꓢꓴ ꓔꓯ ꓠꓲꓹ ꓠꓵ_ ꓡꓳ꓿ ꓠꓴ ꓪ ꓠꓬ ꓠꓴ ꓪ ꓔꓯ ꓙꓲ_ ꓟ ꓬꓰ ꓖꓶ ꓡ ꓢꓴ ꓔꓯ_ ꓡꓰꓽ ꓙꓲ_ ꓟ ꓬꓰ ꓖꓶ_ ꓠꓬ꓾ ꓮ ꓫꓵ ꓣꓱ ꓛꓰ ꓙꓳ_ ꓡꓳꓺꓽ꓿ ꓮ ꓡꓲꓳ ꓐꓯ ꓠꓬ ꓝꓴꓲ ꓬꓰ ꓢꓴ_ ꓟꓲ ꓬꓲ ꓕꓱ ꓡꓱ ꓬꓰ_ ꓡꓳ꓿ ꓠꓴ ꓪ ꓠꓬ ꓬꓲ ꓐꓶꓹ ꓖꓶ ꓡ ꓢꓴ ꓔꓯ_ ꓡꓰꓽ ꓛꓵꓽ ꓖꓶ_ ꓠꓬ꓾ ꓮ ꓫꓵ ꓣꓱ ꓛꓰ ꓙꓳ_ ꓡꓳꓺꓽ꓿ ꓝꓴꓲ ꓬꓰ ꓢꓴ_ ꓟꓲ ꓬꓲ ꓐꓶꓹ ꓟꓶ ꓠꓹ ꓟ ꓝꓴꓲ ꓬꓰ ꓢꓴ ꓔꓯ ꓛꓵꓽ ꓖꓶ_ ꓡꓳ꓿ ꓠꓴ ꓪ ꓠꓽ ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓢꓲ꓾ ꓬꓲ ꓪ ꓔꓯ ꓙꓲ_ ꓟ ꓬꓰ ꓖꓶ꓿ ꓝꓮꓲ ꓠꓬ ꓢꓴ ꓔꓯ ꓛꓵꓽ ꓖꓶ_ ꓠꓬ꓾ ꓬꓲ ꓐꓶꓹ ꓟꓶ_ ꓟ ꓔꓯ ꓕꓽ ꓡꓳꓸ꓿ ꓖꓳ ꓡꓱ ꓠꓬ ꓠꓴ ꓪ ꓡꓯꓼ ꓫꓴ ꓠꓽ ꓬꓲ ꓓꓽ ꓟ ꓥ ꓡꓳ꓿ ꓠꓴ ꓪ ꓠꓬ ꓟꓴ-ꓡꓳꓹ-ꓬꓰ-ꓢꓴ ꓬꓲ ꓤ ꓠꓱ ꓬꓰ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓬꓲ ꓣꓱ ꓛꓰ ꓔꓯ ꓟꓲꓺ ꓡꓰ ꓢꓴ ꓐꓴ_ ꓐꓰ ꓞꓳ ꓥꓶ ꓐꓴ ꓔꓯ ꓙꓽ ꓗꓳ_ ꓡꓳ꓿ ꓠꓴ ꓪ ꓐꓹ ꓐ ꓡꓰ ꓞꓳ ꓤ ꓔꓯ ꓮ ꓡꓲ ꓫꓱꓸ ꓤ_ ꓠꓬ꓾ ꓠꓴ ꓪ_ ꓟꓲ ꓖꓳ ꓟ_ ꓡꓰ ꓐꓰ ꓢꓴ ꓔꓯ ꓫꓱꓸ ꓤ ꓠ ꓗ_ ꓡꓳ꓿ ꓠꓴ ꓪ ꓠꓬ ꓢꓴ ꓔꓯ ꓕꓽ ꓙꓽ ꓘꓶꓽ꓿ ꓖꓳ ꓡꓱ ꓠꓬ ꓢꓴ_ ꓟꓲ ꓠꓴ ꓪ ꓔꓯ ꓟꓽ ꓙꓽ ꓘꓶꓽꓳ꓿ ꓢꓴ ꓛꓬꓻ_ ꓟ ꓕꓽ ꓞꓷꓹ꓾ ꓖꓳ ꓡꓱ ꓠꓬ ꓢꓴ_ ꓟꓲ ꓠꓴ ꓪ ꓛꓬꓻ_ ꓟ ꓟꓽ ꓞꓷꓹꓳ꓿ ꓢꓴ ꓔꓯ ꓖꓽ ꓖꓶ꓾ ꓖꓳ ꓡꓱ ꓠꓬ ꓢꓴ_ ꓟꓲ ꓠꓴ ꓪ ꓔꓯ ꓖꓽ ꓖꓶ ꓡ_ ꓥꓳ꓿ ꓠꓴ ꓪ ꓠꓬ ꓢꓴ ꓔꓯ ꓖꓶꓽ꓾ ꓖꓳ ꓡꓱ ꓠꓬ ꓢꓴ_ ꓟꓲ ꓠꓴ ꓪ ꓔꓯ ꓖꓶ ꓡ_ ꓥꓳ꓿ ꓝꓮꓲ ꓠꓬ ꓙꓳꓻ ꓓꓴ ꓪꓴꓽ_ ꓟ ꓗꓪ ꓷꓹ ꓠꓬꓲ ꓠꓬꓲꓸ ꓠꓬꓲ꓾ ꓡꓶꓽ ꓡꓶꓽ_ ꓡꓰꓽ ꓙꓳꓻ ꓢꓲ ꓠꓴ ꓪ ꓒꓱꓺ ꓫꓬꓸ ꓗꓪ ꓧꓳꓽ ꓖꓶ ꓡ_ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓮ ꓡꓲ ꓫꓵꓽ ꓙꓳꓻ ꓓꓴ ꓡꓰ ꓢꓴ ꓔꓯ ꓙꓳꓻ ꓖꓶ_ ꓠꓬ꓾ ꓢꓴ_ ꓟꓲ ꓖꓳ ꓡꓱ ꓫꓵ ꓙꓳꓻ ꓓꓴ ꓡꓰ ꓠꓴ ꓪ ꓔꓯ ꓙꓳꓻ ꓖꓶ ꓡ_ ꓢꓰꓽ ꓥꓳ꓾ ꓐꓯ_ ꓡꓳ꓿

 

Add new comment

8 + 9 =

Please wait while the page is loading