ꓝꓲ ꓓꓴ ꓐꓴ ꓔꓯ ꓟꓳꓸ ꓖꓶˍ ꓟ

(ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓬꓳ-ꓦ 24ꓽ35-48) ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓫꓸ ꓙꓵ ꓜꓲꓽ ꓢꓲ ꓫꓵꓻ ꓗꓷ ꓟ ꓫꓵꓽ ꓪꓴ ꓔꓯ ꓙꓳꓺ ꓔꓬ ꓠꓬꓲ꓾ ꓬꓴ-ꓔ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓬꓲ ꓪ ꓔꓯ ꓧꓪ ꓡˍ ꓟ ꓔꓯ ꓙꓳꓺˍ ꓟ ꓑꓶꓸ ꓓꓴ꓾ ꓬꓲ ꓪ ꓐꓴ ꓠꓬ ꓗꓹ ꓘꓶꓽ ꓚꓲꓸ ꓢꓲ ꓑꓬ ꓔꓬ ꓖꓴˍ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓗꓳ ꓡꓳ ꓗꓪ ꓓꓳꓻ ꓡ ꓕꓯ ꓬꓲ ꓪ ꓠꓽ ꓮ ꓘꓶꓸ ꓙꓳꓺ ꓡꓰˍ ꓡꓳ= ꓬꓲ ꓪ ꓡꓰ ꓢꓷꓸˍ ꓟ ꓢꓲ ꓒ ꓠꓬ꓾ ꓬꓲ ꓪ ꓖꓼ ꓛꓳ ꓗꓷ ꓟ ꓢꓲ ꓒ ꓠꓬ ꓫꓵꓻ ꓢꓲ ꓔꓵꓸ ꓗꓷ ꓟ ꓢꓽ ꓠꓬꓲ ꓙꓳ ꓡꓰ ꓥ ꓟꓲ꓾ ꓢꓲ ꓒ ꓠꓬ ꓬꓲ ꓪ ꓗꓳ ꓡꓳ ꓗꓪ ꓓꓳꓻ ꓡ ꓕꓯ꓾ ꓕꓱ ꓟ ꓠꓬ ꓫꓵꓻ ꓗꓴꓸ ꓫꓵꓻ ꓦ ꓥ ꓡꓳ ꓐꓰ ꓓꓵꓽ ꓙ ꓢꓲ꓾ ꓮ ꓘꓶꓸ ꓙꓳꓺ ꓡꓰꓳ= ꓬꓲ ꓪ ꓠꓬ ꓚꓵ ꓚꓵ ꓠꓲꓽ ꓔꓯ ꓟꓳꓻˍ ꓟ ꓥ ꓡ? ꓟꓽ ꓥ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓬꓴ-ꓔ ꓙꓵꓽ ꓪ ꓙꓳ ꓢꓴ ꓐꓴ꓾ ꓟꓯꓼ ꓐꓴ ꓡꓰ ꓘꓶ ꓙꓵ ꓔꓬ ꓕꓯ꓾ ꓬꓲ ꓫꓸ ꓙꓵ ꓔꓬ ꓕꓯ ꓝꓲ ꓓꓴ ꓐꓴ ꓠꓬ ꓛꓰꓹ ꓑꓬ ꓙꓰ ꓗꓷ ꓟ ꓑꓶꓸ ꓓꓴ ꓫꓵꓻ ꓗꓴꓸ ꓫꓵꓻ ꓦ ꓡꓰ ꓬꓲ ꓪ ꓔꓯ ꓝꓳꓹ ꓡˍ ꓟ ꓥ ꓡ?

"ꓠꓴ ꓪ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙ ꓫꓸ ꓔꓬ ꓡ? ꓐꓯ ꓢꓲ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓠꓺ ꓠꓬꓲˍ ꓡꓳ= ꓬꓲ ꓖꓳ ꓡꓱ ꓠꓺ ꓠꓬꓲˍ ꓟ ꓠꓬ ꓝꓲ ꓓꓴ ꓐꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙ ꓫꓸ ꓔꓬ ꓟ ꓔꓯ ꓬꓲ ꓟꓽ ꓢꓷꓸ ꓟ ꓪꓴꓸ ꓠꓬꓲ ꓠꓺ ꓠꓬꓲ ꓔꓬ ꓟ ꓟꓽ ꓥ= ꓖꓳ ꓟ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓢꓷꓸˍ ꓥ ꓟꓲ꓾ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓪ ꓚꓲꓸ ꓛꓬ ꓬꓲ ꓪ ꓓꓵꓽ ꓙ ꓙꓽ ꓜꓲꓼ ꓝꓲ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓥ ꓡꓳ=

ꓬꓲ ꓠꓬ ꓬꓲ ꓪ ꓐꓴ ꓐꓰ ꓕꓲ ꓪ ꓢꓺ ꓘꓳꓼ ꓔꓬ ꓗꓷ ꓢꓲ ꓢꓷꓸ ꓡꓰ ꓓꓴ꓾ ꓓꓵꓽ ꓙꓽ ꓮ' ꓡꓰ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓟꓸ ꓖꓶ ꓗꓷꓳ= ꓬꓲ ꓠꓬ ꓙꓲ-ꓢꓴ ꓥ ꓟ ꓐꓰ꓾ ꓬꓲ ꓠꓬ ꓪꓴ-ꓢ ꓬꓲ ꓤ ꓔꓲꓸ ꓥ ꓟ ꓔꓯˍ ꓟꓲ ꓐꓯ ꓟꓸ ꓖꓶ ꓗꓷꓳ= ꓬꓲ ꓚꓲꓸ ꓛꓬ ꓠꓬ ꓫꓵꓻ ꓢꓲ ꓢꓯꓸ ꓬꓲꓼ ꓡˍ ꓥꓳ꓾ ꓐꓯ ꓟ ꓔꓯˍ ꓟꓲ ꓟꓽ ꓛꓲ ꓟꓽ ꓡꓯꓼ ꓕꓯ ꓡꓰ ꓐꓯ ꓟꓸ ꓖꓶ ꓗꓷꓳ= ꓖꓳ ꓡꓱ ꓠꓬ ꓬꓲ ꓝꓲ ꓓꓴ ꓐꓴ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙꓽ ꓫꓸ ꓛꓵˍ ꓡ? ꓬꓲ ꓠꓬ ꓢꓯꓼ ꓟꓬ ꓐꓰ ꓫꓵꓻˍ ꓟ ꓬꓲ ꓢꓲꓺ ꓒ ꓥ ꓟ ꓔꓯ ꓬꓲ ꓪ ꓐꓴ ꓟꓲ ꓡꓰꓹ ꓗꓷ ꓡ?

ꓖꓳ ꓡꓱ ꓠꓬꓲ ꓣꓳ ꓥˍ ꓟꓲ ꓮ ꓫꓵꓽ ꓪꓴꓸ ꓠꓬꓲ ꓓꓵꓽ ꓙꓽ ꓫꓸ ꓔꓬ ꓡ? ꓠꓺ ꓠꓬꓲ ꓘꓶꓽ ꓕꓱ ꓟ ꓠꓬ ꓮ ꓟꓶ ꓕꓯ ꓣꓳꓽ ꓔꓯˍ ꓟꓲ ꓠꓺ ꓠꓬꓲ ꓔꓬ ꓡꓳ= ꓣꓳ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓚꓱꓹ ꓔꓯ ꓣꓳ ꓠꓬ ꓪꓴ-ꓢ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓮ ꓟꓬꓹ ꓧꓪꓹ ꓠ ꓠꓹ ꓟꓶ ꓡꓰꓳ= ꓔꓲ ꓒ ꓔꓲ ꓟ ꓐꓴ꓾ ꓟꓸ ꓒ ꓟꓸ ꓟ ꓐꓴ ꓡꓰ ꓚ ꓟꓸ ꓖꓶ ꓡˍ ꓟ ꓗꓪ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓟꓸ ꓟꓲꓽ ꓔꓯ ꓮ ꓟꓬꓹ ꓢꓳ ꓣꓴ ꓟꓶ ꓡꓰꓳ= ꓖꓳ ꓡꓱ ꓥ ꓟꓲ ꓣꓳ ꓐꓴ ꓠꓬ ꓠꓻ ꓫꓵꓽ ꓠꓻ ꓙꓰꓽ ꓑꓶꓸ ꓓꓴ꓾ ꓟꓵꓽ ꓟꓽ ꓢꓲ ꓡꓲ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓮ ꓘꓶꓸ ꓙꓳꓺ ꓛꓱꓽ ꓔꓬ ꓢꓰꓽ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓤꓹ ꓠꓬꓲ ꓫꓵꓽ ꓠꓬꓲ ꓓꓴ ꓔꓳꓹ ꓜꓳꓽ ꓡ ꓕꓯ ꓣꓳ ꓐꓴ ꓠꓬ ꓢꓲ ꓒ ꓔꓯ ꓡꓳ ꓒꓰꓹ ꓗꓷˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓠꓬ ꓕꓱ ꓟ ꓔꓯ ꓢꓷꓸˍ ꓡꓳ= ꓣꓳꓽ ꓟꓽ ꓐꓲ ꓜꓲꓼ ꓟ ꓔꓯ ꓬꓲ ꓡꓰ ꓢꓷꓸˍ ꓡꓳ= ꓣꓳ ꓔꓯ ꓙꓵꓻ ꓠꓲꓹ ꓮ ꓔꓲꓸ ꓤ ꓡꓰꓽ ꓙꓳˍ ꓥ ꓟꓲ꓾ ꓖꓳ ꓟ ꓠꓬ ꓢꓲ ꓒ ꓟꓲꓽ ꓙꓬ ꓗꓪ ꓚꓵꓺ ꓔ ꓟꓽ ꓐ ꓡ= ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓡꓳꓹ ꓬꓰˍ ꓗꓪ ꓛꓲ ꓣꓳ ꓐꓴ ꓐꓰ ꓕꓲ ꓪ ꓔꓬ ꓥꓳ꓾ ꓐꓰ ꓕꓵꓼ ꓪ ꓖꓶ ꓔ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓐꓴ ꓙꓳꓺ ꓛꓱꓽ ꓡ ꓕ ꓑꓳꓸꓼ ꓬꓲ ꓠꓵꓻ ꓠꓲꓹ ꓠꓬ ꓣꓳ ꓗꓳ ꓡꓳ ꓗꓪ ꓙꓳ ꓔꓬ ꓡꓳ ꓐꓯ ꓟ ꓔꓯ ꓐꓯ ꓖꓶ ꓡ ꓠꓹ ꓟ ꓣꓳ ꓔꓯ ꓡꓺˍ ꓡꓳ=

"ꓠꓴ ꓪ ꓢꓲ  ꓡꓲ ꓟ ꓟꓶ ꓝꓲ" ꓐꓯ ꓘꓶꓽ ꓕꓱ ꓟ ꓠꓬ ꓬꓲ ꓝꓲ ꓓꓴ ꓐꓴ ꓙꓳꓺ ꓛꓱꓽ ꓔꓬ ꓕꓯ꓾ ꓬꓲ ꓪ ꓔꓯ ꓠꓲꓹ ꓪꓴꓽ ꓡꓰ ꓝꓲˍ ꓟ ꓐꓯ ꓘꓶꓽ ꓥ ꓡꓳ= ꓕꓱ ꓟ ꓠꓬ ꓣꓳ ꓮ ꓙꓵꓽ ꓐꓱ ꓶ ꓮ ꓟꓶ ꓕꓯ ꓡꓰ ꓐꓯ ꓖꓶ ꓡ ꓔꓬ ꓟ ꓬꓲ ꓐꓯ ꓘꓶꓽ ꓡꓯꓼ ꓫꓴ ꓕꓲ ꓟˍ ꓟꓲ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓔꓯ "ꓟꓲ ꓠꓯ ꓡꓰ ꓖꓶꓽ ꓟꓽ ꓐ ꓡ ꓟ ꓢꓲ ꓡꓲ ꓟ ꓖꓶˍ ꓥꓳ" ꓐꓰ (ꓬꓳ-ꓦ 14ꓽ27) ꓗꓪ ꓐꓯ ꓔ ꓡꓳ= ꓕꓱ ꓟ ꓥˍ ꓟꓲ ꓣꓳ ꓮ ꓙꓵꓽ ꓐꓱ ꓶ ꓙ ꓟꓳ ꓘꓶꓽ ꓕꓲ ꓟ ꓥ ꓡꓳ=

ꓟꓸ ꓟꓲꓽ ꓐꓴ ꓔꓯ ꓙꓽ ꓜꓲꓼ ꓡꓰ ꓠꓹ ꓟ ꓐꓱ ꓶ ꓝꓲ ꓓꓴ ꓐꓴ ꓠꓲꓹ ꓟ ꓒꓴ ꓖꓶˍ ꓟ ꓡꓰ ꓐꓰ꓾ ꓣꓳ ꓐꓴ ꓠꓲꓹ ꓟ ꓔꓯ ꓥˍ ꓟꓲ ꓢꓲ ꓒ ꓡꓰ ꓒꓴ ꓖꓶ ꓡ ꓢꓲ꓾ ꓣꓳ ꓐꓴ ꓔꓯ ꓬꓲ ꓢꓲ ꓡꓲ ꓟ ꓡꓴꓽ ꓖꓶ ꓡˍ ꓕꓯ ꓣꓳ ꓐꓴ ꓠꓬ ꓮ ꓟꓬ ꓛꓲ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓡˍ ꓥ ꓟꓲ ꓙꓳꓺ ꓟꓽ ꓛꓵꓺꓳ= ꓢꓲ ꓒ ꓬꓲ ꓢꓲ ꓡꓲ ꓟ ꓠꓬ ꓣꓳ ꓠꓯꓸꓼ ꓗꓪ ꓓꓹ ꓠꓬꓲ ꓣꓳ ꓠꓬ ꓙꓳꓺ ꓛꓱꓽ ꓟꓽ ꓛꓵꓳ= ꓠꓲꓹ ꓪꓴꓽ ꓪꓴꓽ ꓡꓰꓽ ꓔꓬ ꓛꓵˍ ꓡꓳ ꓐꓰ꓾ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓐꓯ ꓖꓶ ꓡ ꓔꓬ ꓡꓳ=