ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ (daily reflection)

ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ (daily reflection)

ꓟꓵꓽ ꓗꓳꓹ ꓓꓵ ꓓꓵ ꓞꓳ ꓫꓵꓽ ꓮꓽ ꓙꓵ ꓔꓯ ꓬꓲ ꓟꓲꓽ ꓙꓬꓽ ꓗꓪ ꓘꓴꓻ ꓜꓲꓼ ꓔ ꓥꓳ꓿ ꓬꓲ ꓠꓬ꓾ ꓮ ꓣꓳ ꓡꓳꓸ ꓢꓴ ꓡꓰ ꓮ ꓣꓳˍ ꓐꓰ ꓮ ꓛꓵꓼ ꓔꓯ ꓐꓱꓻˍ ꓟ ꓡꓰ ꓐꓰ꓾ ꓬꓲ ꓪꓽ ꓔꓯ ꓐꓱꓻˍ ꓥꓳ꓿ ³³ ꓖꓳ ꓡꓱ ꓢꓲ ꓮ ꓣꓳ ꓔꓯ ꓠꓬ ꓡꓯꓼ ꓙ ꓕꓲ ꓛꓱꓽ ꓗꓪ꓾ ꓮ ꓛꓵꓼ ꓔꓯ ꓠꓬ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓔꓬ ꓝꓲˍ ꓥꓳ꓿ ³⁴ ꓖꓳ ꓕꓯ ꓪ ꓔꓲ ꓠꓬ ꓬꓲ ꓡꓯꓼ ꓙ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ꓾ ꓥꓪ ꓐꓹ ꓐ ꓡꓰ ꓖꓶ ꓡ ꓟ ꓶꓼ ꓤ ꓫꓱꓹ ꓤ ꓟꓶ ꓢꓴ ꓠꓴ ꓪꓽ ꓠꓬ꓾ ꓟꓵꓽ ꓚꓰꓼ ꓟꓲ ꓚꓰꓼ ꓕꓯˍ ꓡꓰ ꓠꓴ ꓪꓽ ꓐꓱ ꓶ ꓙꓽ ꓖꓶ ꓔ ꓟ ꓡꓯꓼ ꓪ ꓗꓴꓷꓼ ꓘꓳ ꓣꓴ ꓡꓯ꓿ ³⁵ ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼˍ ꓕꓯ ꓠꓴ ꓪꓽ ꓥꓪ ꓔꓯ ꓖꓶ ꓜꓽ ꓡꓺꓳ꓿

ꓥꓪ ꓢꓲꓼˍ ꓕꓯ ꓠꓴ ꓪꓽ ꓥꓪ ꓔꓯ ꓖꓶ ꓓꓳꓻ ꓡꓺꓳ꓿ ꓥꓪ ꓞꓳ ꓬꓯꓼ ꓟꓴˍ ꓕꓯ ꓠꓴ ꓪꓽ ꓥꓪ ꓔꓯ ꓘꓳ ꓣꓴ ꓡꓺꓳ꓿ ³⁶ ꓥꓪ ꓙꓬꓽ ꓡꓯꓽ ꓟ ꓗꓪ ꓠꓴ ꓪꓽ ꓥꓪ ꓔꓯ ꓖꓶ ꓖꓪꓽ ꓡꓺꓳ꓿ ꓥꓪ ꓠꓻˍ ꓕꓯ ꓠꓴ ꓪꓽ ꓥꓪ ꓔꓯ ꓠꓬꓲꓺ ꓙ ꓡꓺꓳ꓿ ꓐꓱ ꓓꓴꓽ ꓗꓪ ꓔꓬ ꓕꓯ ꓠꓴ ꓪꓽ ꓥꓪ ꓔꓯ ꓔꓱꓹ ꓠꓬꓲ ꓡꓺꓳ꓾ ꓐꓰ ꓐꓯˍ ꓥꓳ꓿ ³⁷ ꓖꓳ ꓕꓯ ꓔꓱꓹ ꓜꓳꓽ ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓮ ꓕꓯꓽ ꓠꓴ ꓦꓰꓼ ꓟꓷꓼˍ ꓟ ꓟꓳꓻ ꓢꓲ ꓠꓴ ꓔꓯ ꓖꓶ ꓜꓽ ꓗꓷ ꓡ? ꓠꓴ ꓢꓲꓼˍ ꓟ ꓟꓳꓻ ꓢꓲ ꓠꓴ ꓔꓯ ꓖꓶꓽ ꓓꓳꓻ ꓗꓷ ꓡ? ³⁸ ꓮ ꓕꓯꓽ ꓠꓴ ꓞꓳ ꓬꓯꓼ ꓟꓴˍ ꓟ ꓟꓳꓻ ꓢꓲ꓾ ꓠꓴ ꓔꓯ ꓘꓳ ꓣꓴ ꓗꓷ ꓡ? ꓠꓴ ꓙꓬꓽ ꓡꓯꓽ ꓟ ꓗꓪ ꓠꓴ ꓔꓯ ꓮ ꓕꓯꓽ ꓖꓶ ꓖꓪ ꓗꓷ ꓡ? ³⁹ ꓮ ꓕꓯꓽ ꓠꓴ ꓠꓻ ꓔꓬ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ ꓕꓯ꓾ ꓠꓴ ꓔꓯ ꓔꓱꓹ ꓠꓬꓲ ꓗꓷ ꓡ?꓾ ꓐꓰ ꓒꓳꓹ ꓖꓶ ꓡ ꓥꓳ꓿ ⁴⁰ ꓖꓳ ꓕꓯ ꓪ ꓔꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓮꓸ ꓫꓵ ꓚꓬꓹ ꓟꓽ ꓒꓵꓽˍ ꓟ ꓕꓲ ꓣꓳ ꓔꓯ ꓬꓰ ꓙˍ ꓟ ꓠꓬ ꓥꓪ ꓔꓯ ꓬꓰ ꓙˍ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓥꓳ꓿ ⁴¹ ꓖꓳ ꓕꓯ ꓬꓲ ꓠꓬ ꓡꓯꓼ ꓶꓸ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ꓾ ꓙꓱꓽ ꓔ ꓢꓴ ꓠꓴ ꓪꓽꓳ꓾ ꓥꓪ ꓔꓯˍ ꓐꓰ ꓧꓹ ꓙꓰ ꓢꓲ꓾ ꓠꓲꓽ ꓪ ꓔꓲˍ ꓐꓰ ꓬꓲ ꓝꓲ ꓓꓴ ꓐꓴ ꓐꓱ ꓶ ꓙꓽ ꓖꓶ ꓔ ꓟ꓾ ꓕꓲ ꓞꓲꓼ ꓕꓲ ꓑ ꓟ ꓮꓸ ꓔꓳꓸ ꓗꓪ ꓓꓵꓽ ꓙꓰ꓿ ⁴²

 ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼˍ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓖꓶ ꓜꓽ ꓡ꓿ ꓥꓪ ꓢꓲꓼˍ ꓕꓯ ꓥꓪ ꓔꓯ ꓟꓽ ꓖꓶ ꓓꓳꓻ ꓡ꓿ ⁴³ ꓥꓪ ꓞꓳ ꓬꓯꓼ ꓟꓴˍ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓘꓳ ꓣꓴ ꓡ꓾ ꓙꓬꓽ ꓡꓯ ꓟꓴ ꓗꓹ ꓕꓯ ꓠꓴ ꓪꓽ ꓥꓪ ꓔꓯ ꓟꓽ ꓖꓶ ꓖꓪꓽ ꓡ꓿ ꓠꓻ ꓔꓬ ꓕꓯˍ ꓟꓲ꓾ ꓐꓱ ꓓꓴꓽ ꓗꓪ ꓔꓬ ꓕꓯˍ ꓟꓲ꓾ ꓠꓴ ꓪꓽ ꓥꓪ ꓔꓯ ꓟꓽ ꓔꓱꓹ ꓠꓬꓲ ꓡ꓾ ꓐꓰ ꓐꓯˍ ꓥꓳ꓿ ⁴⁴ ꓖꓳ ꓕꓯ ꓬꓲ ꓪꓽˍ ꓟꓲ ꓕꓱ ꓡꓱ ꓒꓳꓹ ꓖꓶˍ ꓥꓳ꓿ ꓢꓲ ꓒꓽꓳ꓾ ꓥꓪ ꓠꓴ ꓮ ꓕꓯꓽ ꓕꓲ ꓝꓲꓸ ꓗꓪ꓾ ꓠꓴ ꓦꓰꓼ ꓟꓷꓼˍ ꓟ꓾ ꓥ ꓠꓬ ꓢꓲꓼˍ ꓟ꓾ ꓥ ꓠꓬ ꓞꓳ ꓬꓯꓼ ꓟꓴˍ ꓟ꓾ ꓥ ꓠꓬ ꓙꓬꓽ ꓡꓯꓽ ꓟ꓾ ꓥ ꓠꓬ ꓠꓻˍ ꓟ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ ꓟ ꓔꓯ ꓟꓳꓻ ꓢꓲ꓾ ꓠꓴ ꓔꓯ ꓟꓽ ꓣꓱꓽ ꓙ ꓬꓰ ꓗꓷ ꓡ?꓾ ꓐꓰ ꓐꓯˍ ꓥꓳ꓿ ⁴⁵ ꓬꓲ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓴ ꓪꓽ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓮꓸ ꓫꓵ ꓚꓬꓹ ꓟꓽ ꓒꓵꓽ ꓟ ꓕꓲ ꓣꓳ ꓔꓯ ꓟꓽ ꓬꓰ ꓙ ꓟ ꓠꓬ꓾ ꓥꓪ ꓔꓯ ꓟꓽ ꓬꓰ ꓙˍ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓥꓳ꓿ ⁴⁶ ꓖꓳ ꓡꓱ ꓠꓬꓲ ꓕꓱ ꓕꓲ ꓧꓳꓽ ꓟ ꓠꓬ ꓕꓲ ꓞꓲꓼ ꓕꓲ ꓑ ꓛꓬ ꓒꓵꓽ ꓟꓶˍ ꓟ ꓗꓪ ꓓꓵꓽ ꓙꓰˍ ꓥꓳ꓿ ꓔꓱꓹ ꓜꓳꓽˍ ꓟ ꓖꓳ ꓕꓲ ꓧꓳꓽ ꓠꓽ꓾ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓓꓵꓽ ꓙꓰˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓡꓰ ꓣꓳꓺ ꓓꓲ ꓡꓰ ꓢꓴ ꓝꓮꓲ ꓡ ꓞꓳ ꓡꓰ ꓡꓳ ꓔ ꓢꓴ ꓔꓯ ꓬꓰ ꓙ ꓔꓳꓹ ꓙ ꓠꓹ ꓟ ꓐꓯ ꓔ ꓟ ꓥ ꓡꓳ= ꓦꓰꓼ ꓟꓷꓼ ꓔꓬ ꓢꓴ ꓐꓴ ꓐꓰ ꓔꓬ ꓖꓴ ꓟꓽ ꓙꓳ ꓢꓴ ꓐꓴ ꓔꓯ ꓥ ꓟꓲ ꓬꓰ ꓟ ꓠꓬ ꓢꓲꓺ ꓒ ꓔꓯ ꓬꓰ ꓙ ꓟ ꓡꓰ ꓐꓰ ꓫꓱ ꓡꓯꓽ ꓘꓳꓹ ꓟ ꓪꓴꓸ ꓔꓯ ꓟꓸ ꓖꓶ ꓔ ꓟ ꓥ ꓡꓳ= ꓢꓲꓺ ꓒ ꓐꓯ ꓘꓶꓽ ꓔꓯ ꓠꓹ ꓡꓳ ꓓꓴ ꓬꓰ ꓡꓯ=