ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽ_ ꓟ

ꓟ-ꓕꓲ ꓕꓳꓽ ꓶ 25: 31-46
ꓡ ꓞꓳ ꓮ ꓐꓲ ꓠꓬ ꓐꓬꓱꓼ ꓡꓱꓼ ꓡꓱ_ ꓐꓰ ꓡ ꓢꓲ꓾ ꓟꓴ ꓗꓪ ꓝꓲ ꓓꓴ ꓮ ꓙꓵ ꓬꓲ_ ꓐꓰ ꓬꓯꓼ ꓡ_ ꓕꓯ꓾ ꓬꓲ ꓠꓬ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓙꓵꓽ ꓠꓬꓲꓸ ꓕꓲ ꓗꓪ ꓠꓬꓲꓸ ꓠꓸ ꓔꓬ ꓢꓲ꓾ ꓟꓵ ꓗꓳꓹ ꓓꓵ ꓓꓵ ꓟ ꓞꓳ ꓫꓵꓽ ꓮ ꓙꓵ ꓔꓯ ꓬꓲ ꓟꓲꓽ ꓙꓬ ꓗꓪ ꓘꓴ ꓜꓲꓼ ꓔ_ ꓥꓳ꓿ ꓬꓲ ꓠꓬ꓾ ꓮ ꓣꓳ ꓡꓳꓸ ꓢꓴ ꓡꓰ ꓮ ꓣꓳ_ ꓐꓰ ꓮ ꓛꓵꓼ ꓔꓯ ꓐꓱ_ ꓟ_ ꓡꓰ ꓐꓰ꓾ ꓬꓲ ꓪ ꓔꓯ ꓐꓱꓻ ꓡ_ ꓥꓳ꓿ ꓖꓳ ꓡꓱ ꓢꓲ ꓮ ꓣꓳ ꓠꓬ ꓬꓲ ꓡꓯꓼ ꓙ ꓕꓲ ꓛꓱꓽ ꓗꓪ꓾ ꓮ ꓛꓵꓼ ꓠꓬ ꓬꓲ ꓡꓯ ꓶꓸ ꓕꓲ ꓛꓱꓽ ꓗꓪ ꓔꓬ ꓝꓲ_ ꓥꓳ꓿ ꓖꓳ ꓕꓯ ꓪ ꓔꓲ ꓠꓬ ꓬꓲ ꓡꓯꓼ ꓙ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ ꓕꓱ ꓡꓱ ꓐꓯ_ ꓥꓳ꓾ ꓥꓪ ꓐꓹ ꓐ ꓡꓰ ꓖꓶ ꓡ_ ꓟ ꓶꓼ ꓤ ꓫꓱꓹ ꓤ ꓟꓶ ꓢꓴ ꓠꓴ ꓪ ꓠꓬ꓾ ꓟꓵꓽ ꓚꓰꓼ ꓟꓲ ꓚꓰꓼ ꓔ ꓕ ꓑꓳ ꓠꓴ ꓪ ꓐꓱ ꓶ ꓙꓽ ꓖꓶ ꓔ_ ꓟ ꓗꓴꓷꓼ ꓘꓳ ꓣꓴ ꓡꓯ꓿ ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼ_ ꓕꓯ ꓠꓴ ꓪ ꓥꓪ ꓔꓯ ꓖꓶ ꓜꓽ_ ꓡꓳ꓿ ꓥꓪ ꓢꓲꓼ_ ꓕꓯ ꓠꓴ ꓪ ꓥꓪ ꓔꓯ ꓖꓶ ꓓꓳꓻ_ ꓡꓳ꓿ ꓥꓪ ꓞꓳ ꓬꓯꓼ ꓟꓴ_ ꓕꓯ ꓠꓴ ꓪ ꓥꓪ ꓔꓯ ꓘꓳ ꓣꓴ_ ꓡꓳ꓿ ꓥꓪ ꓖꓳ ꓓꓱ ꓙꓬꓽ ꓡꓯꓽ ꓟ ꓗꓪ ꓠꓴ ꓪ ꓥꓪ ꓔꓯ ꓖꓶ ꓖꓪꓽ ꓡ_ ꓡꓳ꓿ ꓥꓪ ꓠꓻ_ ꓕꓯ ꓠꓴ ꓪ ꓥꓪ ꓔꓯ ꓠꓬꓲ ꓙ_ ꓡꓳ꓿ ꓐꓱ ꓓꓴꓽ ꓗꓪ ꓔꓬ ꓕꓯ ꓠꓴ ꓪ ꓥꓪ ꓔꓯ ꓔꓱꓹ ꓠꓬꓲ ꓡ_ ꓡꓳ꓾ ꓐꓯ_ ꓡꓳ꓿ ꓖꓳ ꓕꓯ ꓙꓲ ꓫꓬ ꓢꓴ ꓡꓰ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓮ ꓕꓯ ꓕꓲ ꓝꓲꓸ ꓗꓪ ꓠꓴ ꓦꓰꓼ ꓟꓷꓼ_ ꓟ ꓟꓳꓻ ꓢꓲ ꓠꓴ ꓔꓯ ꓖꓶ ꓜꓽ꓾ ꓠꓴ ꓢꓲꓼ_ ꓟ ꓗꓪ ꓠꓴ ꓔꓯ ꓖꓶ ꓓꓳꓻ_ ꓡꓳꓺꓽ꓿ ꓮ ꓕꓯ ꓕꓲ ꓝꓲꓸ ꓗꓪ ꓠꓴ ꓞꓳ ꓬꓯꓼ ꓟꓴ_ ꓟ ꓟꓳꓻ ꓢꓲ ꓠꓴ ꓔꓯ ꓘꓳ ꓣꓴ_ ꓡꓳꓺꓽ꓿ ꓠꓴ ꓖꓳ ꓓꓱ ꓙꓬꓽ ꓡꓯꓽ ꓟ ꓗꓪ ꓠꓴ ꓔꓯ ꓖꓶ ꓖꓪꓽ_ ꓡꓳꓺꓽ꓿ ꓮ ꓕꓯ ꓕꓲ ꓝꓲꓸ ꓗꓪ ꓠꓴ ꓠꓻ ꓔꓬ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ_ ꓕꓯ꓾ ꓠꓴ ꓔꓯ ꓔꓱꓹ ꓠꓬꓲ ꓡ_ ꓡꓳꓺꓽ꓾ ꓐꓯ_ ꓡꓳ꓿ ꓪ ꓔꓲ ꓠꓬ ꓬꓲ ꓪ ꓔꓯ ꓕꓱ ꓡꓱ ꓒꓳꓹ ꓖꓶ_ ꓥꓳ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓠꓴ ꓪ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓣꓳꓺ ꓓꓰ_ ꓟ ꓕꓲ ꓣꓳ ꓔꓯ ꓬꓰ ꓙ_ ꓟ ꓠꓬ꓾ ꓥꓪ ꓔꓯ ꓬꓰ ꓙ_ ꓟ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓕꓯ ꓬꓲ ꓠꓬ ꓡꓯ ꓶꓸ ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ ꓐꓯ_ ꓥꓳ꓾ ꓙꓱꓽ ꓔ ꓢꓴ ꓠꓴ ꓪꓽꓳ꓾ ꓥꓪ ꓔꓯ ꓐꓰ ꓧꓹ ꓙꓰ ꓢꓲ꓾ ꓠꓲꓽ ꓪ ꓔꓲ_ ꓐꓰ ꓬꓲ ꓝꓲ ꓓꓴ ꓐꓴ ꓐꓱ ꓶ ꓙꓽ ꓖꓶ ꓔ_ ꓟ꓾ ꓕꓲ ꓞꓲ ꓕꓲ ꓑ ꓟ ꓮꓸ ꓔꓳꓸ ꓗꓪ ꓓꓵꓽ ꓙꓰ꓿ ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼ_ ꓕꓯ ꓠꓴ ꓪ ꓥꓪ ꓔꓯ ꓟꓽ ꓖꓶ ꓜꓽ ꓡ꓿ ꓥꓪ ꓢꓲꓼ_ ꓕꓯ ꓥꓪ ꓔꓯ ꓟꓽ ꓖꓶ ꓓꓳꓻ ꓡ꓿ ꓥꓪ ꓞꓳ ꓬꓯꓼ ꓟꓴ_ ꓕꓯ ꓠꓴ ꓪ ꓥꓪ ꓔꓯ ꓟꓽ ꓘꓳ ꓣꓴ꓿ ꓙꓬꓽ ꓡꓯꓽ ꓟ ꓗꓪ ꓠꓴ ꓪ ꓥꓪ ꓔꓯ ꓟꓽ ꓖꓶ ꓖꓪꓽ ꓡ꓿ ꓠꓻ ꓢꓲ ꓐꓱ ꓓꓴꓽ ꓗꓪ ꓔꓬ ꓕꓯ ꓠꓴ ꓪ ꓥꓪ ꓔꓯ ꓟꓽ ꓠꓬꓲ ꓙ ꓡ꓾ ꓐꓯ_ ꓡꓳ꓿ ꓖꓳ ꓕꓯ ꓬꓲ ꓪ_ ꓟꓲ ꓕꓱ ꓡꓱ ꓒꓳꓹ ꓖꓶ_ ꓥꓳ꓾ ꓢꓲ ꓒꓽꓳ꓾ ꓥꓪ ꓠꓴꓽ ꓠꓬ ꓮ ꓕꓯ ꓕꓲ ꓝꓲꓸ ꓗꓪ ꓠꓴ ꓦꓰꓼ ꓟꓷꓼ_ ꓟ꓾ ꓥ ꓠꓬ ꓢꓲꓼ_ ꓟ꓾ ꓥ ꓠꓬ ꓞꓳ ꓬꓯꓼ ꓟꓴ_ ꓟ꓾ ꓥ ꓠꓬ ꓖꓳ ꓓꓱ ꓙꓬꓽ ꓡꓯꓽ ꓟ꓾ ꓥ ꓠꓬ ꓠꓻ_ ꓟ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬ_ ꓟ ꓔꓯ ꓟꓳꓻ ꓢꓲ ꓠꓴ ꓔꓯ ꓟꓽ ꓣꓱ ꓙ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓠꓬ ꓬꓲ ꓪ ꓔꓯ ꓕꓱ ꓡꓱ ꓒꓳꓹ ꓖꓶ_ ꓥꓳ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓠꓴ ꓪ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓣꓳꓺ ꓓꓰ_ ꓟ ꓕꓲ ꓣꓳ ꓔꓯ ꓟꓽ ꓬꓰ ꓙ ꓟ ꓠꓬ꓾ ꓥꓪ ꓔꓯ ꓟꓽ ꓬꓰ ꓙ ꓟ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓕꓱ ꓕꓲ ꓧꓳ ꓠꓽ ꓕꓲ ꓞꓲ ꓕꓲ ꓑ ꓛꓬꓻ ꓒꓵꓽ ꓟꓶ_ ꓟ ꓗꓪ ꓙꓰ_ ꓥꓳ꓿ ꓙꓲ ꓫꓬ_ ꓟ ꓖꓳ ꓕꓲ ꓧꓳꓽ ꓠꓬ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓗꓪ ꓙꓰ_ ꓥꓳ꓾ ꓐꓰ ꓐꓯ ꓖꓶ_ ꓡꓳ꓿
 
 
 
 
 
 

Add new comment

8 + 0 =