ꓟꓽ ꓕꓱꓹ ꓟ ꓦꓲ ꓙꓵꓽ ꓢꓴ ꓔꓯ ꓥꓳꓽ

ꓟꓽ ꓕꓱꓹ ꓟ ꓦꓲ ꓙꓵꓽ ꓢꓴ ꓔꓯ ꓥꓳꓽ

 ꓬꓰ-ꓢꓴ ꓠꓬ ꓛꓳ ꓒꓯꓹ ꓐꓴ ꓔꓯ ꓕꓱ ꓡꓱ ꓐꓯ_ ꓢꓰꓽ ꓡꓳ꓾ ꓞꓳ ꓐꓳ ꓕꓲ ꓣꓳ ꓠꓬ ꓦꓲ ꓙꓵꓽ ꓢꓴ ꓕꓲ ꓣꓳ ꓙꓳ ꓢꓲ꓾ ꓬꓲ ꓠꓬ ꓬꓲ ꓢꓲꓺ ꓒ ꓖꓴ ꓙꓴ ꓮꓽ ꓔꓳ ꓔꓳ ꓒꓬꓹ ꓔꓬ_ ꓡꓳ꓾ ꓐꓰ ꓬꓲ ꓔꓯ ꓓꓰꓺ ꓢꓴ ꓙꓳ_ ꓡꓳ꓿ ꓬꓲ ꓢꓲꓺ ꓒ ꓠꓬ ꓬꓲ ꓔꓯ ꓘꓴ ꓔꓯꓹ ꓡ ꓢꓲ꓾ ꓥꓪ ꓑ ꓙ_ ꓟ꓾ ꓠꓴ ꓬꓰ_ ꓟ ꓕꓱ ꓟ ꓠꓬ ꓮ ꓡꓲ ꓥꓳ ꓪꓺꓽ꓿ ꓠꓴ ꓙꓵꓽ_ ꓟ ꓶ ꓡꓯꓼ ꓢꓪꓹ ꓟꓸ ꓖꓶ ꓡꓯ꓿ ꓕꓱ ꓡꓱ ꓖꓳ ꓑꓳ ꓠꓴ ꓠꓽ ꓥꓪ ꓦꓲ ꓙꓵꓽ ꓢꓴ ꓬꓰ ꓟꓽ ꓓ꓾ ꓐꓰ ꓐꓯ_ ꓡꓳ꓿ ꓦꓲ ꓙꓵꓽ ꓢꓴ ꓖꓳ ꓕꓲ ꓣꓳ ꓠꓬ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓢꓲꓺ ꓒ ꓥꓪ ꓔꓯ ꓬꓲ ꓦꓲ ꓙꓵꓽ ꓢꓴ ꓟꓽ ꓬꓰ ꓝꓲ ꓠꓬꓲ꓾ ꓥꓪ ꓮ ꓡꓲ ꓬꓰ ꓓꓳꓺꓽ꓾ ꓦ ꓟꓲ ꓘꓪ ꓐꓯꓺꓽ꓾ ꓥꓪ ꓢꓯꓼ ꓟꓽ ꓙꓳ꓿ ꓜ ꓓꓰꓽ_ ꓐꓯꓺꓽ꓾ ꓥꓪ ꓫꓸ ꓔꓳ꓿ ꓥꓪ ꓔꓯ ꓦꓲ ꓙꓵꓽ_ ꓟ ꓟꓬꓱꓽ ꓠꓽ ꓡꓰ ꓝꓲ_ ꓕꓯ꓾ ꓢꓴ ꓡꓰ ꓬꓲ ꓪ ꓦꓲꓻ ꓗꓪ ꓥꓪ ꓔꓯ ꓘꓳ ꓣꓴ ꓡ ꓠꓹ ꓟ꓾ ꓮ ꓡꓲ ꓬꓰ ꓠꓯꓹ ꓟ ꓥꓪ ꓢꓷ ꓡꓰꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓢꓲꓺ ꓒ ꓔꓯ ꓶꓻ ꓡꓯꓼ ꓐꓵ ꓢꓴ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓘꓴ ꓔꓯꓹ ꓡ ꓢꓲ꓾ ꓬꓲ ꓪꓴꓸ ꓕꓲ ꓣꓳ ꓔꓯ꓾ ꓠꓴ ꓠꓬ ꓥꓪ ꓢꓲꓺ ꓒ ꓔꓯ ꓮ ꓟꓬ ꓛꓲ ꓐꓵꓺ ꓞ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓮ ꓛꓬꓽ ꓞꓶ ꓕꓲ ꓦꓬ ꓬꓲꓻ ꓪꓴꓻ ꓐꓵ_ ꓡꓳ꓾ ꓐꓯ_ ꓡꓳ꓿ ꓦꓲ ꓙꓵꓽ ꓢꓴ ꓠꓬ ꓬꓲ ꓔꓯ꓾ ꓠꓴ ꓶꓻ ꓡꓯꓼ ꓕꓳ ꓶ ꓮ ꓟꓲꓸ ꓟꓲꓸ ꓣꓴ ꓢꓲ꓾ ꓠꓬꓲꓸ ꓠꓸ ꓢꓲ ꓠꓬꓲ꓾ ꓥꓪꓽ ꓞꓲ꓾ ꓐꓰ ꓐꓳ꓾ ꓐꓯ_ ꓡꓳ꓿ ꓝꓮꓲ ꓕꓲ ꓣꓳ ꓔꓯ꓾ ꓠꓴ ꓮ ꓟꓬ ꓛꓲ ꓐꓵ_ ꓡꓳꓺꓽ꓾ ꓐꓰ ꓠ ꓠꓬꓲ_ ꓡꓳ꓿ ꓬꓲ ꓠꓽ꓾ ꓫꓪ ꓕꓲ ꓦꓬ ꓙꓳꓻ ꓐꓵ_ ꓡꓳ꓾ ꓐꓯ_ ꓡꓳ꓿ ꓦꓲ ꓙꓵꓽ ꓢꓴ ꓠꓬ ꓬꓲ ꓔꓯ꓾ ꓠꓴ ꓶ ꓡꓯꓼ ꓕꓳ ꓶ ꓣꓴ ꓢꓲ꓾ ꓦꓰꓼ ꓞꓲ꓾ ꓐꓰ ꓐꓳ꓾ ꓐꓯ_ ꓡꓳ꓿ ꓟꓽ ꓔꓱꓹ ꓟ ꓦꓲ ꓙꓵꓽ ꓢꓴ ꓕꓱ ꓕꓲ ꓣꓳ ꓠꓬ ꓚꓴ ꓬꓲꓹ ꓙꓳ ꓙꓳ_ ꓡꓰꓽ ꓬꓰ_ ꓠꓬꓲ꓾ ꓬꓲ ꓢꓲꓺ ꓒ ꓠꓬ ꓬꓲ ꓔꓯ ꓫꓱꓸ ꓖꓶ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓤ ꓠꓱ ꓐꓴ ꓠꓽ꓾ ꓬꓲ ꓪ ꓕꓲ ꓤꓶ ꓗꓪ꓾ ꓠꓬꓲ ꓟꓳ ꓓꓴ ꓤ ꓠꓱ ꓐꓴ ꓢꓶꓸ ꓟꓽ ꓞꓲ ꓚꓴ ꓬꓲꓹ ꓙꓳ_ ꓡꓳ꓿ ꓥꓪ ꓝꓮꓲ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓒꓴ ꓤ ꓫꓵ ꓤ ꓔꓯ ꓦ ꓡꓱ ꓟꓽ ꓐꓳ ꓟ ꓦꓬꓼ ꓠꓬꓲ ꓛꓲ ꓡ_ ꓕꓯ꓾ ꓕꓲ ꓞꓲ ꓕꓲ ꓑ ꓟ ꓦꓲꓻ ꓗꓪ ꓬꓲ ꓪ ꓠꓴ ꓪ ꓔꓯ ꓘꓳ ꓣꓴ ꓠꓹ ꓟ꓾ ꓟꓽ ꓙꓲ ꓫꓬ ꓟ ꓒꓴꓻ ꓤ ꓫꓵ ꓤ ꓡꓰ ꓗꓪ ꓛꓳ ꓑꓺ꓿ ꓡ ꓞꓳ ꓠꓬ ꓮ ꓓꓲ ꓣꓳꓺ_ ꓟ ꓫꓵꓽ ꓪꓴ ꓗꓪ ꓦ ꓡꓱ ꓐꓳ_ ꓠꓬ꓾ ꓫꓵꓽ ꓪꓴ ꓓꓽ ꓟ ꓗꓪ_ ꓟꓲ ꓦ ꓡꓱ ꓐꓳ_ ꓥꓳ꓿ ꓮ ꓓꓲ ꓣꓳꓺ_ ꓟ ꓗꓪ ꓟꓽ ꓔꓱꓹ ꓠꓬ꓾ ꓬꓲ ꓓꓽ ꓟ ꓗꓪ_ ꓟꓲ ꓟꓽ ꓔꓱꓹ꓿ ꓖꓳ ꓡꓱ ꓠꓬꓲ ꓠꓴ ꓪ ꓠꓬ ꓟꓽ ꓙꓲ ꓫꓬ ꓟ ꓒꓴ ꓤ ꓫꓵ ꓤ ꓣꓱꓽ_ ꓟ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓔꓱꓹ_ ꓟ ꓒꓴꓻ ꓤ ꓫꓵ ꓤ ꓠꓬ ꓮꓽ ꓟ ꓡꓰ ꓠꓴ ꓪ ꓔꓯ ꓡꓯꓼ ꓙꓱ ꓖꓶ ꓡ_ ꓥꓳ ꓪꓺꓽ꓿ ꓠꓴ ꓪ ꓠꓬ ꓢꓴ ꓖꓴꓽ ꓙꓴꓽ ꓗꓪ ꓦ ꓡꓱ ꓟꓽ ꓐꓳ ꓕꓯ ꓠꓽ꓾ ꓠꓴ ꓪ ꓚꓲ ꓛꓬ ꓔꓯ ꓟ ꓠꓬ꓾ ꓮꓽ ꓟ ꓡꓰ ꓠꓴ ꓪ ꓔꓯ ꓖꓶ ꓡ_ ꓥꓳ ꓪꓺꓽ꓿ ꓚꓳ ꓑ ꓕꓲ ꓣꓳ ꓠꓬ ꓢꓲꓺ ꓒ ꓠꓬꓲꓽ ꓣꓳ ꓔꓯ ꓣꓱꓽ ꓙ ꓟꓽ ꓐ ꓡ꓿ ꓬꓲ ꓠꓬ ꓕꓱ ꓕꓲ ꓣꓳ ꓔꓯ ꓠꓲꓹ ꓜꓳ ꓢꓲ꓾ ꓖꓳ ꓕꓲ ꓣꓳ ꓔꓯ ꓠꓲꓹ ꓠꓵ_ ꓥꓳ꓿ ꓥ ꓠꓬ ꓕꓱ ꓕꓲ ꓣꓳ ꓔꓯ ꓟꓳꓻ ꓟꓵ ꓢꓲ꓾ ꓖꓳ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓐꓰ ꓗ_ ꓥꓳ꓿ ꓠꓴ ꓪ ꓠꓬ ꓪꓴ-ꓢ ꓔꓯ_ ꓟꓲ ꓣꓱꓽ ꓙ꓾ ꓒꓴ-ꓤ-ꓫꓵ-ꓤ ꓔꓯ_ ꓟꓲ ꓣꓱ ꓙ꓾ ꓐꓰ ꓬꓰ ꓟꓽ ꓒꓬꓱꓼ ꓡ꓾ ꓐꓯ_ ꓡꓳ꓿  ꓡꓴ-ꓘ ꓕꓳꓽ ꓶ 16: 1-13

Add new comment

14 + 4 =

Please wait while the page is loading