ꓟ-ꓕ_ ꓐꓰ ꓟ-ꓡꓲ

ꓬꓲ ꓚꓰꓸꓸ ꓬꓲ ꓪꓴꓸ ꓕꓳꓽ ꓶ 18: 1-10

ꓖꓳ ꓗ ꓠꓯ ꓟꓳꓼ ꓡꓳ ꓞꓻ ꓝꓲ ꓗꓪ ꓮ-ꓐ-ꓡ-ꓦ ꓠꓬ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓠꓬꓲꓸ ꓠꓸ ꓔꓬ ꓕꓯ꓾ ꓬꓰ-ꓧꓳ-ꓧꓪ ꓡꓰ ꓟꓯ-ꓟꓷ ꓗꓪ ꓟ ꓒꓯꓼ ꓐꓬꓼ ꓗꓪ ꓮ-ꓐ-ꓡ-ꓦ ꓔꓯ ꓟꓳꓸ ꓖꓶ ꓡ_ ꓡꓳ꓿ ꓮ-ꓐ-ꓡ-ꓦ ꓔꓺ ꓥ ꓐꓰ ꓡꓳꓸ ꓠꓬꓲ ꓠꓬ꓾ ꓠꓬꓲ ꓠꓹ꓾ ꓬꓲ ꓒ ꓕꓲꓸꓼ ꓗꓪ ꓡ ꓞꓳ ꓢ ꓣꓳ ꓦꓰꓼ ꓞ_ ꓡꓳ꓿ ꓬꓲ ꓪ ꓔꓯ ꓟꓳ ꓗꓷ ꓕꓯ꓾ ꓬꓲ ꓠꓬ ꓬꓲ ꓪ ꓔꓯ ꓞꓵꓺ ꓬꓰ ꓠꓹ ꓟ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓐꓰ ꓔꓷꓹ ꓙꓰ ꓢꓲ꓾ ꓟꓲ ꓛꓬ ꓗꓪ ꓟꓳꓼ ꓔ_ ꓡꓳ꓿ ꓬꓲ ꓪ ꓔꓯ꓾ ꓥꓪ ꓢꓲ ꓒꓽꓳ꓾ ꓥꓪ ꓠꓬ ꓠꓴ ꓒꓬꓱꓽ ꓕꓯ ꓗꓪ ꓣꓱ ꓛꓰ ꓟꓶ_ ꓐꓭ ꓠꓬ꓾ ꓠꓴ ꓚꓳ ꓑ ꓔꓯ ꓐꓰ ꓕꓽ ꓗꓳꓸ ꓙꓰ꓾ ꓐꓰ ꓠꓴ ꓔꓯ ꓓꓰꓽ_ ꓡꓳ꓿ ꓬꓲ ꓙꓬ ꓮ ꓔꓯꓸꓼ ꓔꓯꓹ ꓡ ꓝꓲ ꓢꓲ꓾ ꓠꓴ ꓛꓲ ꓒꓯ ꓞꓲꓽ ꓢꓲ ꓠꓬꓲ꓾ ꓢꓲꓹ ꓜꓲ ꓠꓯꓸ ꓘꓪ ꓗꓪ ꓪꓴꓽ ꓧꓶ ꓠꓽ ꓡꓯ꓿ ꓠꓴ ꓪ ꓔꓯ ꓢꓰꓺ ꓡꓰ ꓝꓲ ꓠꓹ ꓟ ꓥꓪ ꓠꓬ ꓫꓪ ꓒꓵꓼ ꓮ ꓔꓲꓸ ꓤ ꓔꓯꓹ ꓖꓶ ꓡ_ ꓥꓳ꓿ ꓖꓳ ꓗ ꓠꓯ ꓠꓴ ꓪ ꓙꓰ ꓛꓵ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓬ ꓠꓴ ꓚꓳ ꓑ ꓥꓪ ꓔꓯ ꓡ_ ꓡꓳ꓾ ꓐꓯ_ ꓡꓳ꓿ ꓬꓲ ꓪ ꓡꓰ꓾ ꓠꓴ ꓐꓯ_ ꓟ_ ꓡꓰ ꓐꓰ ꓬꓰ ꓛꓵ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓢꓲ ꓮ-ꓐ-ꓡ-ꓦ ꓠꓬ ꓠꓲꓹ ꓞ ꓟꓶ ꓔꓶꓸ ꓦꓲ ꓠꓯꓸꓼ ꓗꓪ ꓢ-ꓣ ꓔꓯ ꓙꓰ ꓢꓲ꓾ ꓬꓲ ꓔꓯ꓾ ꓠꓴ ꓮ ꓟꓲꓸ ꓟꓲꓸ ꓫꓪ ꓧꓶꓽ ꓢ ꓢꓲ-ꓬ ꓣꓴ ꓢꓲ ꓑꓵꓹ ꓢꓲ ꓠꓬꓲ ꓫꓪ ꓒꓵꓼ ꓫꓬꓹ꓾ ꓐꓯ_ ꓡꓳ꓿ ꓮ-ꓐ-ꓡ-ꓦ ꓠꓬ ꓙꓱꓽ ꓤ ꓜꓴ ꓗꓪ ꓔꓷꓹ ꓙꓰ ꓢꓲ꓾ ꓡꓯꓸ_ ꓟ ꓐꓰ ꓙꓲ_ ꓟ ꓮ ꓠꓬꓲꓽ ꓤ ꓕꓲ ꓘꓹ ꓖꓳꓻ ꓔꓯꓹ ꓡ ꓢꓲ ꓠꓬꓲ꓾ ꓚꓳ ꓑ ꓕꓲ ꓣꓳ ꓔꓯ ꓡꓯꓼ ꓙꓱ ꓗꓷ ꓠꓬ ꓬꓲ ꓡꓰ ꓠꓲꓹ ꓞ ꓙꓽ ꓖꓶ_ ꓡꓳ꓿ ꓮ ꓚꓵꓹ ꓞꓶ_ ꓐꓰ ꓮ ꓚꓵꓹ ꓬꓲꓻ_ ꓐꓰ ꓙ ꓖꓶ ꓔ_ ꓟ ꓮ ꓠꓬꓲ ꓧꓪꓽ ꓔꓯ ꓬꓲ ꓔꓯꓹ ꓡ ꓢꓲ꓾ ꓬꓲ ꓪ ꓟꓲ ꓙꓬ ꓗꓪ ꓲꓹ ꓖꓶ_ ꓡꓳ꓿ ꓬꓲ ꓪ ꓜ ꓜ ꓔꓬ_ ꓕꓯ ꓬꓲ ꓠꓬ ꓢꓲꓹ ꓜꓲ ꓠꓯꓸ ꓘꓪ ꓬꓲ ꓪ ꓒ ꓕꓲꓸꓼ ꓗꓪ ꓦꓰꓼ ꓞ_ ꓡꓳ꓿ ꓬꓲ ꓪ ꓡꓰ ꓬꓲ ꓔꓯ꓾ ꓠꓴ ꓤ ꓟꓶ ꓢ-ꓣ ꓠꓬ ꓮ ꓡꓲ ꓗꓪ ꓔꓬ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓟꓶ ꓔꓶꓸ ꓦꓲ ꓠꓯꓸꓼ ꓗꓪ ꓔꓬ_ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓬꓲ ꓡꓰ꓾ ꓠꓯꓸ ꓦꓯ ꓕꓱ ꓕꓲ ꓝꓲ ꓗꓪ ꓥꓪ ꓕꓱ ꓗꓪ ꓠꓴ ꓔꓯ ꓚꓱꓹ ꓬꓲꓼ ꓡ_ ꓥꓳ꓿ ꓠꓴ ꓤ ꓟꓶ ꓠꓬ ꓤꓽ ꓕꓲ ꓣꓳ ꓦꓵꓻ ꓡ_ ꓥꓳ꓾ ꓐꓯ_ ꓡꓳ꓿ ꓢ-ꓣ ꓠꓬ ꓖꓳ ꓕꓲ ꓣꓳ ꓗ ꓠꓯ ꓢꓲ ꓗꓪ꓾ ꓟꓶ ꓔꓶꓸ ꓦꓲ ꓗ ꓘꓶ ꓓꓴꓽ ꓗꓪ ꓬꓲ ꓐꓯ ꓘꓶ ꓔꓯ ꓑ ꓙ_ ꓡꓳ꓿

ꓗꓳ-ꓡꓳ-ꓫꓲ ꓕꓳꓽ ꓶ 1: 24-28

 ꓮ ꓟꓶ ꓥꓪ ꓠꓴ ꓪ ꓐꓱ ꓶ ꓫ ꓙꓵ_ ꓟ ꓗꓪ ꓐꓰ ꓗꓹ ꓛꓲ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓧꓪꓽ ꓖꓳ ꓓꓱ ꓗꓪ ꓙꓲ-ꓢꓴ ꓖꓳ ꓓꓱ ꓐꓱ ꓶ ꓫ ꓙꓵ_ ꓟ ꓟꓽ ꓡꓳꓼ ꓟ ꓔꓯ ꓥꓪ ꓐꓲꓺ ꓡ ꓝꓲ_ ꓥꓳ꓿ ꓬꓲ ꓖꓳ ꓓꓱ ꓐꓯ_ ꓟ ꓠꓬ ꓘꓴ ꓜꓲꓼ ꓞꓳ ꓥ ꓡꓳ꓿ ꓪꓴ-ꓢ ꓐꓯ ꓘꓶ ꓐꓲꓺ ꓡꓰ ꓝꓲ ꓠꓹ ꓟ꓾ ꓠꓴ ꓪ ꓐꓱ ꓶ ꓪꓴ-ꓢ ꓡꓰ ꓥꓪ ꓔꓯ ꓣꓱꓽ ꓙ ꓟꓬꓱꓽ ꓮ ꓡꓲ ꓡꓯꓼ ꓙꓱ ꓔ_ ꓠꓬ꓾ ꓘꓴ ꓜꓲꓼ ꓞꓳ ꓔꓯ ꓮ ꓡꓲ ꓣꓱꓽ ꓙ ꓢꓴ ꓬꓰ ꓝꓲ_ ꓟ ꓥ ꓡꓳ꓿ ꓐꓯ ꓘꓶ ꓕꓱ ꓟ ꓠꓬ ꓕꓲ ꓞꓲꓼ ꓕꓲ ꓑ ꓚꓵ ꓔ_ ꓟ ꓚꓵꓺ ꓘꓶꓽ ꓥ ꓢꓲ꓾ ꓮ ꓟꓶ ꓠꓽ ꓬꓲ ꓢꓲꓽ ꓫꓬ ꓢꓴ ꓐꓴ ꓔꓯ ꓟꓳꓸ ꓖꓶ ꓗꓷ ꓟ ꓥꓳ꓿ ꓐꓶꓽ ꓞꓳ ꓗꓳ ꓡꓳ ꓗꓪ ꓚꓵꓺ ꓘꓶꓽ ꓕꓱ ꓟ ꓬꓲ ꓟꓬꓱ ꓓꓳꓽ ꓮ ꓘꓶ ꓛꓲ ꓐꓳꓺ ꓞ_ ꓟ꓾ ꓪꓴ-ꓢ ꓡꓰ ꓢꓲꓽ ꓫꓬ ꓢꓴ ꓐꓴ ꓔꓯ ꓢꓷ ꓡꓰ ꓝꓲ ꓠꓲꓹ ꓒꓴ_ ꓡꓳ꓿ ꓚꓵꓺ ꓘꓶꓽ ꓕꓱ ꓟ ꓠꓽ ꓙꓲ-ꓢꓴ ꓠꓴ ꓪ ꓠꓯꓸꓼ ꓗꓪ ꓔꓬ_ ꓟ ꓥ ꓢꓲ꓾ ꓬꓲ ꓠꓬ ꓟꓬꓱ ꓓꓳꓽ ꓟꓶ ꓠꓹ ꓟ ꓥꓳ ꓡꓳꓸ ꓔ ꓓꓴ ꓥ ꓡꓳ꓿ ꓥꓪ ꓠꓴꓽ ꓠꓬ ꓬꓲ ꓙ ꓖꓴ ꓚ ꓟꓸ ꓖꓶ ꓢꓲ꓾ ꓙꓽ ꓗꓴ ꓠꓲꓹ ꓮ ꓙꓵ ꓟ ꓣꓱꓽ ꓢꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓘꓶꓸ ꓖꓶ ꓢꓲ ꓠꓬꓲ꓾ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓟꓸ ꓖꓶ_ ꓡꓳ꓿ ꓥꓪ ꓠꓴꓽ ꓕꓱ ꓡꓱ ꓬꓰ_ ꓟ ꓠꓬ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓲ-ꓢꓴ ꓠꓯꓸꓼ ꓗꓪ ꓪꓴꓽ ꓓꓰꓺ ꓡꓰ ꓢꓴ ꓒꓬꓱꓼ ꓡ ꓝꓲ ꓢꓲ꓾ ꓪꓴ-ꓢ ꓟꓲꓽ ꓙꓬ ꓗꓪ ꓧꓳꓽ ꓛꓲ ꓬꓰ ꓝꓲ ꓠꓹ ꓟ ꓥ ꓡꓳ꓿

ꓡꓴ-ꓘ ꓕꓳꓽ ꓶ 10: 38-42

ꓙ ꓖꓴ ꓗꓪ ꓬꓲ ꓪ ꓙꓰ_ ꓕꓯ꓾ ꓬꓰ-ꓢꓴ ꓠꓬ ꓘꓹ ꓕꓲ ꓘꓹ ꓗꓪ ꓓꓵ ꓙꓰ_ ꓡꓳ꓿ ꓖꓳ ꓗꓪ ꓟ-ꓕ ꓟꓬꓱꓺ ꓔ_ ꓟ ꓤ ꓟꓶ ꓤ ꓕꓲ ꓣꓳ ꓡꓰ ꓬꓰ-ꓢꓴ ꓔꓯ ꓬꓲ ꓦꓲꓻ ꓗꓪ ꓘꓳ ꓣꓴ ꓓꓵ ꓡꓰ_ ꓡꓳ꓿ ꓬꓲ ꓠꓬꓲ ꓟ ꓠꓬ ꓟ-ꓡꓲ ꓟꓬꓱꓺ ꓔ_ ꓟ ꓕꓲ ꓣꓳ ꓙꓳ_ ꓡꓳ꓿ ꓬꓲ ꓠꓬ ꓬꓰ-ꓢꓴ ꓛꓲ ꓔꓲ ꓗꓪ ꓠꓬꓲꓸ ꓠꓸ ꓢꓲ ꓬꓲ ꓐꓯ ꓘꓶ ꓠ ꓠꓹ_ ꓡꓳ꓿ ꓟ-ꓕ ꓠꓽ ꓣꓱ ꓙ_ ꓟ ꓟꓬꓱꓽ ꓟꓬꓽ ꓠꓬꓲ꓾ ꓠꓲꓹ ꓟ ꓟꓬꓼ ꓡꓯꓼ ꓗ ꓢꓲ꓾ ꓬꓲ ꓔꓯ ꓡ ꓢꓲ ꓠꓬꓲ ꓕꓱ ꓡꓱ ꓐꓯ_ ꓡꓳ꓾ ꓢꓲꓺ ꓒꓽꓳ꓾ ꓥꓪ ꓠꓬꓲꓺ ꓟ ꓕꓱ ꓟ ꓥꓪ ꓕꓲ ꓣꓳ ꓔꓯ_ ꓡꓰꓽ ꓣꓱ ꓙ ꓔꓬ ꓝꓲ_ ꓠꓬ꓾ ꓠꓴ ꓟꓽ ꓙ ꓫꓸ ꓡꓺꓽ꓿ ꓖꓳ ꓡꓱ ꓠꓬꓲ ꓬꓲ ꓥꓪ ꓔꓯ ꓬꓰ ꓙ ꓡ ꓠꓹ ꓟ ꓐꓯ ꓖꓶ꓾ ꓐꓯ_ ꓡꓳ꓿ ꓢꓲꓺ ꓒ ꓠꓽ ꓒꓳꓹ ꓖꓶ ꓢꓲ꓾ ꓬꓲ ꓔꓯ꓾ ꓟ-ꓕꓺꓳ꓾ ꓟ-ꓕꓺꓳ꓾ ꓠꓴ ꓠꓬ ꓟꓬꓱꓽ ꓮ ꓟꓬꓹ ꓟ ꓪꓴꓸ ꓠꓬꓲ ꓙꓽ ꓫꓸ ꓔꓬ_ ꓡꓳ꓿ ꓟꓽ ꓙꓳꓻ ꓟꓽ ꓓ ꓟ ꓠꓽ ꓕꓲ ꓫꓵ_ ꓡꓰꓽ ꓙꓳ_ ꓡꓳ꓿ ꓟ-ꓡꓲ ꓠꓬ ꓙꓲ_ ꓟ ꓖꓳ ꓕꓲ ꓐꓱ ꓔꓯ ꓢꓲꓺ ꓔ_ ꓠꓬꓲ꓾ ꓬꓲ ꓔꓯ ꓐꓰ ꓣꓴ ꓔꓯꓹ ꓙꓰ ꓟꓽ ꓓ꓾ ꓐꓯ_ ꓡꓳ꓿ ꓖꓳ ꓡꓱ ꓥ_ꓟꓲ ꓟꓽ ꓙꓳ ꓟꓽ ꓓ ꓠꓽ ꓕꓲ ꓫꓵ_ ꓡꓰꓽ ꓙꓳ_ ꓡꓳ= ꓟ-ꓡꓲ ꓠꓬ ꓟꓬꓽꓠꓬꓲ ꓙꓲ_ ꓟ ꓖꓳ ꓕꓲ ꓐꓱꓸꓹ ꓔꓯ ꓢꓲ ꓣꓴ ꓗꓷ ꓠꓬꓲ-ꓸ ꓬꓲ ꓔꓯ_ ꓐꓰ ꓣꓴ ꓔꓯꓹ ꓙꓰ ꓟꓽ ꓓ-ꓸ ꓐꓯ ꓖꓶ_ ꓡꓳ=