ꓠꓱꓸ ꓐꓯꓼ ꓢꓴ ꓔꓯ ꓗꓸ ꓧꓪꓺ ꓢꓲ ꓟꓬꓱꓺ ꓓꓳꓽ ꓪꓴꓽ ꓜˍ ꓕꓯ ꓠꓽ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓲ꓾ ꓢꓰꓼ ꓗꓷˍ ꓟ ꓥꓳ

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓪꓴ-ꓢ ꓢꓲꓽ ꓫꓬ ꓕꓳꓽ ꓶꓽ ꓗꓪ ꓣꓳꓽ ꓔꓯ ꓮꓸ ꓫꓵꓽ ꓐꓯ ꓟꓸ ꓖꓶꓽ ꓔꓬꓹ꓾ ꓣꓳꓽ ꓔꓯ ꓠꓬꓲ ꓟꓳ ꓓꓴ ꓮ ꓡꓰ ꓐꓰ ꓡꓬꓸ ꓖꓶꓽ ꓔꓬꓹ ꓐꓯˍ ꓟ ꓔꓯ ꓣꓳꓽ ꓕꓲꓽ ꓑꓹ ꓤ ꓓꓵꓽ ꓙ ꓠꓬꓲ ꓡꓯ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶꓽ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲꓸ ꓝꓲ ꓓꓴ ꓞꓲ ꓠꓬꓲ ꓣꓳ ꓗꓪ ꓟ ꓕꓲꓽ ꓣꓳ ꓥ ꓟ꓾ ꓘꓹ-ꓡꓲꓳ ꓟꓬꓱꓻ ꓔ ꓟ ꓬꓴ-ꓓ ꓡꓰ ꓬꓲꓸ ꓔꓯ ꓪꓴꓽ ꓜˍ ꓟ ꓟꓶˍ ꓡꓳ=ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ꓾ ꓬꓲꓸ ꓮ ꓘꓶꓸ ꓠꓲꓹ ꓠꓵˍ ꓟ ꓝꓲ-ꓓꓴ ꓞꓲ ꓠꓬꓲ ꓣꓳ ꓗꓪ ꓟ ꓬꓴ-ꓓ ꓠꓬ ꓬꓲꓸ ꓔꓯ ꓪꓴꓽ ꓙ ꓗꓷˍ ꓕꓯ ꓬꓲꓸ ꓠꓲꓹ ꓟ ꓮꓽ ꓘꓶꓸ ꓫꓸ ꓡꓳ= ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳꓽ ꓔꓯ ꓮꓸ ꓫꓵꓽ ꓟꓸ ꓖꓶꓽ ꓡ ꓔꓬꓹ ꓐꓯˍ ꓠꓬ꓾ ꓣꓳꓽ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓴ ꓒꓬꓱꓼ ꓗꓷ ꓗꓴˍ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓴ꓾ ꓬꓰ-ꓢꓴ ꓟꓬꓱꓻ ꓒꓬꓹ ꓢꓴ ꓮ ꓡꓰ ꓐꓰ ꓒꓬꓱꓼ ꓡˍ ꓥ ꓐꓯˍ ꓠꓬ꓾ ꓣꓳꓽ ꓠꓬ ꓠꓱꓸ ꓐꓯꓼ ꓟꓽ ꓙꓲꓻ ꓟ ꓐꓯˍ ꓕꓯ꓾ ꓠꓱꓸ ꓐꓯꓼ ꓢꓴ ꓔꓯ ꓗꓸ ꓧꓪꓸ ꓕꓯ꓾ꓠꓱꓸ ꓐꓯꓼ ꓢꓴ ꓔꓯ ꓟꓽ ꓔꓱꓹ ꓟꓽ ꓜꓳꓽ ꓟ ꓢꓷꓸ ꓙ ꓟꓳ ꓙˍ ꓕꓯ꓾ ꓣꓳꓽ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓪꓴꓽ ꓜꓽ ꓢꓴ ꓕꓲꓽ ꓣꓳ ꓒꓬꓱꓼ ꓡˍ ꓥꓳ=

ꓮ ꓟꓶ ꓜꓻ ꓝꓲꓸ ꓧꓪꓽ ꓝꓲˍ ꓟ ꓦꓬꓼ ꓠꓬꓲ ꓗꓪ꓾ ꓣꓳꓽ ꓠꓬ ꓮ ꓟ ꓔꓯ꓾ ꓟꓽ ꓙꓲꓻ ꓟ ꓐꓯ ꓗꓷ ꓟ꓾ ꓟꓬꓱꓻ ꓓꓳꓽ ꓒꓬꓹ ꓗꓷ ꓟ꓾ ꓟꓽ ꓔꓱꓹ ꓟ ꓢꓷꓸ ꓙ ꓟꓳ ꓙˍ ꓟ ꓔꓯ ꓮ ꓟꓬ ꓧꓪꓹ ꓬꓰ ꓗꓷ ꓟ ꓔꓯ ꓣꓳꓽ ꓕꓲꓽ ꓑꓹ ꓤ ꓓꓵꓽ ꓙ ꓠꓬꓲ ꓡꓯ= ꓠꓱꓸ ꓐꓯꓼ ꓢꓴ ꓟꓬꓱꓻ ꓓꓳꓽ ꓒꓬꓹ ꓕꓯ꓾ ꓗꓸ ꓧꓪꓸ ꓕꓯ ꓠꓽ ꓣꓳꓽ ꓠꓬ ꓬꓲꓸ ꓪ ꓐꓴ ꓔꓯ ꓪꓴꓽ ꓜꓽˍ ꓟ ꓥ ꓡꓳ꓾ ꓢꓰꓼ ꓗꓷˍ ꓟ ꓥ ꓡꓳ=

ꓔꓲꓺ ꓒꓽ ꓪ ꓔꓲ ꓝꓣꓮꓠꓚꓲꓢ ꓡꓰ ꓾ ꓣꓳꓽ ꓠꓬ ꓠꓱꓸ ꓐꓯꓼ ꓟꓽ ꓙꓲꓻ ꓟ ꓔꓯ ꓐꓯˍ ꓕꓯ ꓠꓽ꓾ ꓣꓳꓽ ꓬꓲ ꓔꓯ ꓢꓰꓼ ꓗꓷˍ ꓟ ꓥ ꓡꓳ꓾ ꓐꓰ ꓟꓸ ꓖꓶꓽ ꓔ ꓡꓳ= ꓣꓳ ꓠꓬ꓾ ꓣꓳꓽ ꓠꓶꓽ ꓛꓳꓽ ꓕꓲꓽ ꓛꓳꓽ ꓐꓴ ꓔꓯ ꓗꓸ ꓧꓪꓸ ꓕꓯ ꓾ ꓬꓲꓸ ꓪ ꓐꓴ ꓔꓯ ꓪꓴꓽ ꓜꓽˍ ꓟ ꓥ ꓢꓲ ꓾ ꓢꓲꓺ ꓒ ꓬꓰ-ꓢꓴ ꓔꓯˍ ꓟꓲ ꓪꓴꓽ ꓜˍ  ꓟ ꓥ ꓡꓳ=

ꓠꓬꓲꓽ ꓫꓵꓽ ꓕꓲꓽ ꓫꓵꓽ ꓟ ꓠꓬ꓾ ꓢꓲꓽ ꓫꓬ ꓕꓳꓽ ꓶꓽ ꓗꓪ ꓣꓳꓽ ꓔꓯ ꓟꓸ ꓖꓶꓽ ꓡ ꓔꓬꓹ ꓟ ꓠꓬ꓾ ꓕꓲꓽ ꓖꓻ ꓕꓲꓽ ꓧꓪꓹ ꓣꓳꓽ ꓠꓬ ꓙꓲꓻˍ ꓟ ꓾ ꓧˍ ꓟ ꓬꓰꓹ ꓥ ꓟꓲ꓾ ꓠꓱꓸ ꓐꓯꓼ ꓕꓲꓽ ꓣꓳ ꓡꓰ ꓣꓳꓽ ꓔꓯ ꓟꓽ ꓧꓺ ꓟ ꓐꓯ ꓡ ꓢꓴ ꓙꓳˍ ꓡꓳ= ꓣꓳꓽ ꓔꓯ ꓗꓸ ꓧꓪꓺ ꓢꓲ꓾ ꓣꓳꓽ ꓟꓬꓱꓻ ꓓꓳꓽ ꓒꓬꓹ ꓢꓴ ꓙꓳˍ ꓡꓳ= ꓕꓱ ꓟ ꓔꓯ ꓣꓳꓽ ꓔꓳꓹ ꓜꓳꓽˍ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓘꓳꓹ ꓣꓴ ꓠꓹ ꓟ ꓔꓯ ꓟꓸ ꓖꓶꓽ ꓡˍ ꓡꓳ=

ꓢꓲꓺ ꓒ ꓬꓰ-ꓢꓴ ꓔꓯ ꓔꓯꓺ ꓢꓳꓻ ꓠꓹ ꓟ ꓣꓳꓽ ꓔꓯ ꓠꓬꓲ ꓟꓳ ꓓꓴ ꓡꓬꓸ ꓖꓶꓽ ꓡ ꓔꓬꓹ ꓡꓳ= ꓢꓲꓺ ꓒ ꓬꓰ-ꓢꓴ ꓥˍ ꓟꓲ꓾ ꓬꓲꓸ ꓮ ꓘꓶꓸ ꓠꓲꓹ ꓠꓵˍ ꓟ꓾ ꓝꓲ-ꓓꓴ ꓞꓲ ꓠꓬꓲ ꓣꓳ ꓗꓪ ꓟ ꓬꓴ-ꓓ ꓘꓹ-ꓡꓲꓳ ꓡꓰ ꓬꓲꓸ ꓔꓯ꓾ ꓪꓴꓽ ꓜꓽ ꓗꓷ ꓟ ꓟꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓬ ꓘꓹ-ꓡꓲꓳ ꓔꓯ꓾ ꓟꓽ ꓐꓯ ꓞꓷꓹ꓾ ꓠꓴ ꓬꓰ ꓙꓲꓼ ꓙꓳˍ ꓟ ꓟꓬꓱꓽ ꓬꓰ꓾ ꓐꓰ ꓬꓲꓸ ꓔꓯ ꓐꓯ ꓖꓶꓽˍ ꓡꓳ=

ꓖꓳ ꓡꓱ ꓠꓬꓲ ꓣꓳꓽ ꓤꓶꓻ ꓗꓪ ꓥˍ ꓟꓲ꓾ ꓠꓱꓸ ꓐꓯꓼ ꓕꓲꓽ ꓣꓳ ꓠꓬ ꓣꓳꓽ ꓔꓯ ꓗꓸ ꓧꓪꓸ ꓕꓯ꓾ ꓣꓳꓽ ꓟꓬꓱꓻ ꓓꓳꓽ ꓪꓴꓽ ꓜꓽˍ ꓕꓯ꓾ ꓣꓳ ꓔꓯ ꓡꓳꓸ ꓟꓽ ꓟꓵꓺ ꓔꓰˍ ꓕꓯ꓾ ꓠꓲꓸ ꓟ ꓕꓽ ꓙꓬꓻ= ꓢꓲꓺ ꓒꓽ ꓬꓰ-ꓢꓴ ꓬꓲ ꓚꓲꓸ ꓛꓬ ꓥˍ ꓟꓲ ꓕꓱ ꓟ ꓔꓯ ꓗꓹ ꓛꓲꓽ ꓛꓲꓽ ꓘꓳꓹ ꓣꓴˍ ꓟ ꓡꓰ ꓐꓰ꓾ ꓣꓳ ꓥˍ ꓟꓲ ꓘꓳꓹ ꓣꓴ ꓠꓹ ꓟ ꓣꓳꓸ ꓚꓵˍ ꓡꓳ= ꓮ ꓟꓶ ꓢꓯꓸ ꓬꓲꓼ ꓡ ꓑꓮꓲꓽ ꓛꓲꓺ ꓡˍ ꓟ ꓦꓬꓼ ꓠꓬꓲ ꓗꓪ꓾ ꓣꓳꓽ ꓢꓲꓺ ꓒ ꓬꓰ-ꓢꓴ ꓐꓰ ꓕꓲꓽ ꓡꓰꓹ ꓒꓵꓽ ꓒꓵꓽ ꓡꓰ ꓪꓺ ꓔꓹ ꓠꓹ ꓟ ꓾ ꓬꓰ-ꓢꓴ ꓐꓰ ꓕꓲꓽ ꓪꓺꓽ ꓗꓹ ꓛꓲꓽ ꓠꓹ ꓟ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ꓾ ꓮ ꓡꓰ ꓐꓰ ꓙꓽ ꓜꓲꓼ ꓔ ꓟ ꓔꓯ ꓓꓵꓽ ꓙ ꓠꓬꓲ ꓡꓯ=

ꓣꓳꓽ ꓟꓲꓺ ꓠꓯꓺ ꓞꓳ ꓤ ꓐꓴ ꓠꓬ꓾ ꓗꓹ ꓛꓲꓽ ꓓꓴ ꓔꓯ ꓡꓰꓽ ꓠꓲꓹ ꓠꓵ ꓢꓲ ꓧꓪꓸ ꓡꓳ= ꓕꓱ ꓟ ꓠꓬ ꓪꓴ-ꓢ ꓡꓲꓽ ꓪꓴ-ꓢ ꓚꓱꓹ ꓟꓽ ꓥ= ꓬꓰ-ꓢꓴ ꓠꓬ ꓬꓲꓸ ꓚꓲ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ꓾ ꓗ-ꓡ-ꓪ-ꓣꓲ ꓪ ꓚꓲꓺ ꓗꓪ ꓓꓯꓺ ꓙꓰˍ ꓟ ꓡꓰ ꓐꓰ꓾ ꓣꓳꓽ ꓥˍ ꓟꓲ ꓣꓳꓽ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓢꓲ ꓠꓬꓲ꓾ ꓬꓲꓸ ꓗꓸ ꓠꓯꓸ ꓢꓲꓺ ꓗꓪ ꓛꓳ ꓙꓰ ꓠ ꓗꓹ ꓡꓳ= ꓕꓱ ꓟ ꓠꓬ ꓔꓱꓹ ꓜꓳꓽˍ ꓟ ꓘ-ꓣꓲ-ꓢ-ꓔꓴ ꓢꓲꓺ ꓤ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓟꓸ ꓟꓲꓽ ꓑꓶꓽ ꓗꓪ ꓣꓳꓽ ꓔꓯ ꓟꓸ ꓖꓶꓽ ꓔꓬꓹ ꓟ ꓡꓰ ꓐꓰ꓾ ꓣꓳꓽ ꓢꓯꓼ ꓕꓵꓼ ꓡꓯ= ꓣꓳꓽ ꓥˍ ꓟꓲ꓾ ꓠꓯꓸ ꓐꓯꓼ ꓔꓯ ꓟꓽ ꓙꓲꓻ ꓟ ꓐꓯˍ ꓟ ꓾ ꓟꓬꓱꓻ ꓓꓳꓽ ꓒꓬꓹ ꓟ ꓠꓽ ꓗꓷ ꓢꓲ꓾ ꓙꓲꓻˍ ꓟ ꓔꓯꓸ ꓡꓰꓽ ꓐꓯ ꓢꓲ꓾ ꓢꓲꓺ ꓒ ꓔꓯ ꓔꓯꓺ ꓢꓳꓻ ꓡꓯ= ꓢꓲꓺ ꓒ ꓠꓲꓹ ꓟ ꓔꓯ ꓔꓯꓺ ꓢꓳꓻ ꓙꓰ ꓡꓯ= ꓖꓳ ꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓡꓰ ꓣꓳꓽ ꓔꓯ ꓟꓽ ꓙꓲꓻ ꓟ ꓐꓯꓸ ꓥˍ ꓟꓲ꓾ ꓗꓸ ꓧꓪꓸ ꓥˍ ꓟꓲ꓾ ꓠꓲꓹ ꓪꓴꓽ ꓪꓴꓽ ꓗꓹ ꓛꓲꓽ ꓛꓲꓽ ꓡꓰ ꓐꓰ ꓘꓳꓹ ꓣꓴ ꓢꓲ ꓾ ꓢꓲꓺ ꓒꓽ ꓐꓰ ꓕꓲꓽ ꓪꓺꓽ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔ ꓢꓲ꓾ ꓗ-ꓡ-ꓪ-ꓣꓲ ꓪ ꓚꓲꓺ ꓗꓪ ꓙꓰ ꓡꓯ=

ꓕꓲꓽ ꓠꓬꓲ ꓙꓳˍ ꓠꓬ꓾ ꓢꓲꓺ ꓒ ꓬꓰ-ꓢꓴ ꓠꓬ ꓣꓳꓽ ꓔꓯ ꓗꓹ ꓛꓲꓽ ꓛꓲꓽ ꓡꓰ ꓘꓳꓹ ꓣꓴ ꓡˍ ꓥꓳ= ꓕꓲꓽ ꓠꓬꓲ ꓙꓳˍ ꓠꓬ꓾ ꓣꓳꓽ ꓢꓲꓺ ꓒꓽ ꓬꓰ-ꓢꓴ ꓐꓰ ꓕꓲꓽ ꓪꓺꓽ ꓔꓬꓹ ꓥꓳ= ꓕꓱ ꓟ ꓠꓬ ꓣꓳꓽ ꓟꓲꓺ ꓠꓯꓺ ꓗꓪ ꓢꓯꓸ ꓔꓬꓹ ꓟ ꓞꓳ ꓤ ꓤꓶꓻ ꓬꓲꓸ ꓔꓶꓻ ꓙꓱꓼ ꓥ ꓡꓳ= ꓬꓲꓸ ꓧꓶꓹ ꓚꓺ ꓥ ꓡꓳ= ꓣꓳꓽ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓟ ꓢꓯꓼ ꓟꓬꓻ ꓟꓽ ꓟꓶ ꓕꓯ ꓠꓽ꓾ꓟꓲꓺ ꓠꓯꓺ ꓗꓪ ꓙꓳˍ ꓟ ꓖꓴꓽ ꓙꓴꓽ ꓮꓽ ꓙꓵꓽ ꓠꓽ ꓣꓳꓽ ꓔꓯ ꓚꓬꓴꓸ ꓟꓽ ꓐ ꓡ꓾ ꓬꓰ-ꓢꓴ ꓡꓰꓽ ꓣꓳ ꓔꓯ ꓚꓬꓴꓸ ꓐ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲꓸ ꓙꓻ ꓖꓴ ꓫꓱꓽ ꓢꓲ ꓬꓲꓸ ꓔꓯ ꓔꓯꓺ ꓢꓳꓻ ꓢꓲ ꓠꓬꓲ꓾ ꓬꓲꓸ ꓗꓸ ꓠꓯꓸ ꓛꓳꓺ ꓢꓲ꓾ ꓕꓲꓽ ꓞꓲꓼ ꓕꓲꓽ ꓑ ꓢꓲꓺ ꓡꓲꓺ ꓟ ꓢꓯꓼ ꓟꓬꓻ ꓟꓶˍ ꓟ ꓙꓻ ꓖꓴ ꓗꓪ ꓙꓰ ꓡꓯ ꓾ ꓐꓰ ꓮ ꓙꓵꓽ ꓔꓯ ꓬꓲꓼ ꓠꓬꓲꓸ ꓖꓶꓽ ꓠꓲꓸ ꓫꓵˍ ꓡꓳ=

Bro Joseph ꓛꓪ-ꓔ

Add new comment

6 + 1 =