ꓢꓲ, ꓒꓬꓽ ꓑꓶꓺ ꓖꓶꓽ ꓑꓮꓲꓽ (Palm Sunday)

ꓢꓲ, ꓒꓬꓽ ꓑꓶꓺ ꓖꓶꓽ ꓑꓮꓲꓽ (Palm Sunday)

ꓠꓲ, ꓠꓵ ꓟ ꓣꓦꓮ ꓡꓲ‐ꓢꓴ ꓢꓯꓼ ꓠ, ꓠ ꓔꓬ ꓢꓴ ꓐꓴ ꓬꓲ ꓤ ꓠꓬꓲ ꓤ ꓐꓴ ꓠꓬꓲ. ꓠꓬꓲ ꓠꓬ ꓢꓲ, ꓒꓬꓽ ꓑꓶꓺ ꓖꓶꓽ ꓑꓮꓲꓽ (Palm Sunday) ꓦꓬꓼ ꓠꓬꓲ ꓥ ꓡꓳ꓿ ꓜꓽ ꓚꓵ. ꓚꓵ. ꓟ ꓙꓵ, ꓬꓲ. ꓟꓶ ꓕꓲ ꓫꓵꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓢꓲ ꓠꓬꓲ  ꓡ ꓟ ꓕꓲ ꓫꓵꓽ ꓠ, ꓟ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓯ. ꓬꓲ ꓡ ꓟ ꓑꓮꓲꓽ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ (ꓟ‐ꓕꓲ 21ꓽ1‐11) ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓓꓵꓽ ꓙꓰˍ ꓟ ꓔꓯ ꓣꓳ ꓐꓴ ꓠ, ꓡꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓕꓳꓽ ꓡ ꓟꓴꓽ ꓤꓶ ꓢꓲ ꓠꓬꓲ ꓙꓱ‐ꓣꓴ‐ꓢ‐ꓡꓱ ꓗꓪ ꓡ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪ ꓔꓲ ꓟꓲ ꓥ ꓡꓳ ꓐꓯ ꓟ ꓢꓷ. ꓡꓰ ꓓꓴ ꓥ ꓡꓳ꓿ ꓝꓮꓲ ꓪꓴ‐ꓢ ꓟꓲ ꓥ ꓡꓳ ꓐꓯ ꓟ ꓢꓷ. ꓡꓰ ꓓꓴ ꓟꓲ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓙꓱ‐ꓣꓴ‐ꓢ ꓡꓱ ꓗꓪ ꓡ ꓟ ꓙꓵ, ꓕꓯ ꓞꓳ ꓜꓴꓻ ꓞꓳ ꓟꓯꓼ ꓕꓲ ꓐꓱ ꓠꓬ ꓙ ꓖꓴ ꓗꓪ ꓬꓲ ꓪ ꓐꓵ ꓞꓲꓽ ꓘꓳꓽ ꓖꓶ ꓕꓲ ꓐꓱ ꓠꓬ ꓢꓲ, ꓒꓬꓽ ꓑꓳ ꓛꓵ ꓔꓯ, ꓡ ꓢꓲ ꓠꓬꓲ ꓘꓳꓽ ꓖꓶ ꓟ ꓥ ꓡꓳ꓿ ꓖꓳ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓪ ꓔꓲ ꓥ ꓡꓳ ꓐꓰ ꓐꓯ  ꓟ ꓥ ꓡꓳ꓿

ꓝꓮꓲ ꓞꓳ ꓜꓴꓻ ꓞꓳ ꓟꓯ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓢꓲ ꓒ ꓟꓬꓱꓽ ꓗꓪ ꓐꓰ ꓡ ꓢꓴ ꓠꓬ ꓶꓽ ꓙꓳ ꓫꓱ, ꓙꓳ ꓝꓲ ꓿ ꓟꓴ ꓡꓳ, ꓬꓰ ꓟ ꓪꓴ‐ꓢ ꓔꓯ ꓫꓱ. ꓖꓶ꓾ ꓐꓰ ꓘꓴˍ ꓟ  ꓥ ꓡꓳ꓿ ꓟꓽ ꓟꓶ ꓫꓵꓺ ꓟ ꓙꓵ, ꓕꓯ ꓕꓱ ꓞꓳ ꓜꓴꓻ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓢꓰꓼ ꓠ, ꓟ ꓬꓰ ꓢꓴ ꓐꓴ ꓥ ꓡꓳ꓿

ꓠꓬꓲ. ꓠꓬꓲ ꓣꓳ ꓓꓵꓽ ꓙ ꓠ, ꓟ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓘꓴꓽ ꓗꓪ ꓓꓴ ꓡ ꓠ, ꓟ ꓣꓳ ꓘꓴˍ ꓗꓷ ꓡ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓪ ꓔꓲ ꓥꓳꓽ ꓙꓵꓽ ꓙ ꓗꓷ ꓡ ? ꓣꓳ ꓓꓴ ꓙ ꓫꓪꓽ ꓠꓬꓲ ꓓꓴ ꓬꓰ ꓡꓯ꓿

ꓣꓳ ꓚꓬꓴ ꓢꓲꓺ ꓒ ꓔꓯ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓡ ? ꓝꓮꓲ ꓣꓳ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳ ꓠꓲ, ꓫꓵˍ ꓢꓴ ꓒꓬꓱꓼ ꓠꓲ, ꓫꓵˍ ꓡ? ꓣꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓞꓳ ꓜꓴꓻ ꓡꓰ ꓐꓰ ꓓꓳ ꓟꓴ ꓢꓲ ꓠꓬꓲ ꓫ. ꓓꓴ ꓔꓳ, ꓜꓳ ꓡ ꓟ ꓙꓵ, ꓕꓯ ꓢꓲꓺ ꓒ ꓔꓯ ꓡꓳꓻ ꓗꓷ ꓢꓴ ꓥ ꓡ? ꓣꓳ ꓓꓴ ꓙ ꓓꓴ ꓬꓰ ꓡꓯ꓿

ꓕꓱ ꓕꓲ ꓫꓵꓽ ꓠꓽ ꓟ ꓠꓬ ꓢꓲꓽ ꓫꓬ ꓟ ꓕꓲ ꓫꓵꓽ ꓠ ꓟ ꓥ ꓟ ꓪꓴ. ꓠꓬꓲ ꓣꓳ ꓮ ꓘꓶ. ꓪꓽ ꓘꓴ ꓓꓴ ꓬꓰ ꓡꓯ꓿ ꓣꓳ ꓢꓲꓺ ꓒ ꓬꓰ‐ꓢꓴ ꓢꓲꓽ ꓫꓬ ꓖꓳꓽ ꓓꓱ ꓔꓯ ꓘꓳ, ꓣꓴ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓢꓲꓺ ꓒ ꓐꓰ ꓕꓲꓽ ꓪ ꓙꓰ‐ꓣꓴ‐ꓢ‐ꓡꓱ ꓗꓪ ꓓꓵꓽ ꓙꓰˍ ꓓꓴ ꓬꓰ ꓡꓯ꓿ ꓢꓲ ꓒ ꓠꓬ ꓣꓳꓽ ꓐꓱ, ꓶ ꓫ. ꓙꓵꓽ ꓟꓶ ꓙꓵꓽ ꓠ, ꓟ ꓬꓲ. ꓙꓰˍ ꓟ ꓑꓶ. ꓓꓴ ꓬꓲ. ꓠꓵ ꓠꓲ, ꓔꓯ ꓣꓳꓽ ꓮ ꓘꓶ. ꓓꓵꓽ ꓙ ꓟ ꓦꓬꓼ ꓠꓬꓲ  ꓕꓲꓽ ꓠꓬꓲˍ ꓟꓲ  ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓖꓶ ꓡ ꓠꓲ, ꓥꓳꓻ ꓟ ꓢꓲ ꓡꓲ ꓟ ꓣꓱ ꓛꓱ  ꓠꓬ ꓣꓳꓽ ꓘꓳ, ꓣꓴ ꓟꓶ ꓓꓴ ꓥꓳ꓿