ꓢꓲ ꓒ ꓬꓰ-ꓢꓴ ꓬꓲ ꓕꓵꓼ ꓪ ꓓꓽ ꓟ

ꓟ-ꓘꓳ 16ꓽ15-20

ꓬꓲ ꓠꓬ ꓬꓲ ꓪꓽ ꓔꓯ꓾ ꓠꓴ ꓪꓽ ꓠꓬ ꓟꓵꓽ ꓗꓳꓹ ꓓꓵ ꓓꓵꓽ ꓙꓰ ꓢꓲ꓾ ꓞꓳ ꓫꓵꓽ ꓞꓳ ꓙꓰꓽ ꓥ ꓕ ꓑꓳꓸ ꓔꓯ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ꓿ ꓙꓵꓻ ꓢꓲ ꓖꓳ ꓓꓱ ꓔꓲꓹ ꓟꓶ ꓢꓴ ꓠꓽ ꓢꓯꓼ ꓟꓬ ꓝ ꓟꓶˍ ꓥꓳ꓿ ꓟꓽ ꓙꓵꓻ ꓢꓴ ꓠꓽ ꓛꓬꓻ ꓒꓵꓽ ꓟꓶˍ ꓥꓳ꓿ ꓙꓵꓻ ꓢꓴ ꓔꓯ ꓠꓽ ꓢꓷꓸ ꓡꓰ ꓓꓴ ꓕꓱ ꓟꓬ ꓙꓰꓽ ꓛꓳ ꓡ ꓥꓳ꓿ ꓬꓲ ꓪꓽ ꓠꓬ ꓥꓪ ꓟꓬꓱ ꓗꓪ ꓐꓰ ꓠꓲꓽ ꓖꓼˍ ꓥꓳ꓿ ꓬꓲ ꓪꓽ ꓠꓬ ꓥꓳꓽ ꓬꓲ ꓫꓵꓼ ꓫꓸ ꓕꓱˍ ꓥꓳ꓿ ꓩꓴꓺ ꓔꓯˍ ꓟꓲ ꓬꓲ ꓪꓽ ꓣꓴˍ ꓥꓳ꓿ ꓬꓲ ꓪꓽ ꓮ ꓡꓲ ꓫꓵꓽ ꓓꓳꓼ ꓓꓳꓻ ꓪˍ ꓟꓲ ꓮ ꓡꓲ ꓟꓽ ꓗꓷ ꓡꓰ꓿ ꓬꓲ ꓪꓽ ꓡꓰ ꓠꓻ ꓢꓴ ꓒꓬꓼ ꓢꓴ ꓔꓯ ꓡꓯꓼ ꓒꓯꓹ ꓚꓰꓹ ꓖꓶˍ ꓠꓬ ꓓꓻ ꓡꓰˍ ꓥꓳ꓾ ꓐꓯˍ ꓡꓳ꓿ 

ꓢꓲ ꓒꓽ ꓬꓰ-ꓢꓴ ꓬꓲ ꓪꓽ ꓔꓯ ꓫꓸ ꓕꓱ ꓓꓳ ꓡꓰ ꓠꓬ꓾ ꓬꓲ ꓔꓯ ꓟꓴꓽ ꓗꓪ ꓗꓪ ꓔꓯꓹ ꓓꓯ ꓙꓰ ꓢꓲ꓾ ꓪꓴ-ꓢ ꓡꓯꓼ ꓙ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓡꓰꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓓꓳ ꓙꓰ ꓢꓲ꓾ ꓮ ꓡꓲ ꓗꓪˍ ꓟꓲ ꓟꓸ ꓟꓲꓽ ꓚ ꓟꓸ ꓖꓶꓽ ꓙꓰˍ ꓡꓳ꓿ ꓢꓲ ꓒꓽ ꓠꓬ ꓬꓲ ꓪꓽ ꓐꓰ ꓕꓲ ꓪꓺꓼ ꓟꓬꓱꓽ ꓬꓰ ꓢꓲ꓾ ꓬꓲ ꓪꓽ ꓚ ꓟꓸ ꓖꓶˍ ꓟ ꓐꓯ ꓘꓶꓽ ꓔꓯ ꓢꓷꓸ ꓡꓰ ꓓꓴ ꓛꓳ ꓩꓴ ꓡ ꓟ ꓗꓪ ꓐꓰ ꓗꓸ ꓚꓵ ꓬꓰ ꓢꓲ꓾ ꓕꓶꓻ ꓡꓰ ꓝꓲˍ ꓡꓳ꓿

*******

ꓙꓵꓻ ꓢꓴ ꓮ ꓙꓵꓽ ꓠꓬ ꓚꓬꓴꓸ ꓟꓶˍ ꓟ ꓪꓴꓸ ꓠꓬꓲ꓾ ꓢꓲ ꓒ ꓬꓲ ꓟꓸ ꓖꓶˍ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓐꓴ ꓔꓯ ꓚꓺ ꓒꓬꓱꓺ ꓙꓰ ꓠꓹ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓐꓴ ꓔꓯ ꓐꓯ ꓟꓸ ꓖꓶ ꓔꓬ ꓡꓳ=

ꓪꓴ-ꓢ ꓔꓯ ꓙꓵꓻ ꓢꓴ ꓐꓴ ꓠꓬ ꓠꓻ ꓫꓬꓹ ꓖꓶ ꓢꓴ ꓐꓰ ꓠꓲꓽ ꓖꓼ ꓓꓳ ꓖꓶ ꓢꓴ ꓒꓬꓱꓼ ꓡ ꓓꓻˍ ꓡꓳ= ꓢꓲ ꓒ ꓔꓯ ꓙꓵꓻ ꓢꓲ ꓬꓲ ꓚꓱꓹ ꓗꓪ ꓛꓳ ꓫꓱꓽ ꓢꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓰ ꓗꓷ ꓟˍ ꓡꓰ ꓐꓰ ꓠꓻ ꓫꓬꓹ ꓖꓶ ꓐ ꓡˍ ꓡꓳ= ꓠꓲꓽ ꓔꓯˍ ꓟꓲ ꓖꓼ ꓓꓳ ꓗꓷ ꓐ ꓡˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓠꓯꓸꓼ ꓗꓪ ꓔꓬ ꓢꓲ ꓟꓬꓱꓽ ꓬꓰ ꓔꓬ ꓟ ꓑꓶꓸ ꓓꓴ ꓥ ꓡꓳ=

ꓢꓲ ꓒ ꓔꓯ ꓙꓵꓻ ꓢꓲ ꓦꓻ ꓡꓱ ꓢꓴ ꓐꓴ ꓐꓱ ꓶ ꓮ ꓫꓵꓽ ꓗꓪˍ ꓟꓲ ꓢꓻ ꓢꓻ ꓡꓰꓽ ꓗꓷ ꓡꓰˍ ꓡꓳ= ꓫꓸ ꓓꓴ ꓔꓳꓹ ꓜꓳꓽ ꓡˍ ꓟꓲ꓾ ꓫꓵꓽ ꓪꓴ ꓔꓳꓹ ꓜꓳꓽ ꓡ ꓥˍ ꓟꓲ ꓖꓳ ꓟ ꓠꓬ ꓢꓻ ꓢꓻ ꓡꓰꓽ ꓡꓳꓹ ꓬꓰˍ ꓥꓳ꓾ ꓗꓳꓸ ꓙꓰˍ ꓥꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=