ꓤ ꓟꓶ ꓝꓱ ꓑꓮꓲ ꓔꓯ ꓥꓳꓽ (Sunday reflection)

#photo #Mr.Paul Yemi #Weeding #Putao #Kachin #Myanmar

Sunday, October 15, 2023

ꓤ ꓟꓶ ꓝꓱ ꓑꓮꓲ ꓔꓯ ꓥꓳꓽ

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ ꓗꓪ ꓐꓰ (28) ꓫꓵꓽ ꓠ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ (22ꓽ1‐14) ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓤ ꓟꓶ ꓝꓱ ꓑꓮꓲ ꓔꓯ ꓥꓳꓽ ꓔꓯ ꓣꓳ ꓔꓯ ꓐꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓴꓷꓼ ꓗꓪ ꓪ ꓔꓲ ꓬꓲ ꓤ ꓐꓱ ꓶ ꓤ ꓟꓶ ꓝꓱ ꓑꓮꓲ ꓬꓰ ꓔꓬ ꓟ ꓐꓰ ꓔꓯ ꓔ ꓟ ꓥ ꓡꓳ꓿ ꓘꓶꓼ ꓫꓵꓼ ꓡꓵ ꓗꓪ ꓪꓴ‐ꓢ ꓡꓰ ꓢꓲ ꓔ ꓟ ꓞꓳ ꓫꓵꓽ ꓠꓬ ꓬꓰ‐ꓢꓶ‐ꓡꓲ ꓞꓳ ꓫꓵꓽ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓤ ꓟꓶꓼ ꓝꓱꓼ ꓑꓮꓲ ꓗꓪ ꓘꓴ ꓔ ꓢꓴ ꓐꓴ ꓠꓬ ꓮ ꓘꓶ. ꓓꓴ ꓙ ꓟꓶ ꓢꓴ ꓐꓴ ꓔꓯ ꓘꓴ ꓔ ꓟ ꓥ ꓡꓳ꓿ ꓙꓲꓻ ꓢꓴ ꓐꓴ ꓐꓰ ꓟꓽ ꓙꓲ ꓢꓴ ꓮ ꓙꓵꓽ ꓔꓯ ꓤ ꓟꓶ ꓤ ꓑꓮꓲ ꓗꓪ ꓘꓴ ꓔ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿

ꓖꓳ ꓡꓱ ꓥ ꓟꓲ ꓪꓴ‐ꓢ ꓡꓰ ꓢꓲ ꓔ ꓟ ꓤꓳ ꓫꓵꓽ ꓐꓴ ꓠꓬ ꓪꓴ‐ꓢ ꓡꓰ ꓡꓳ ꓙ ꓔ ꓙ ꓥ ꓟꓲ ꓪꓴ‐ꓢ ꓔꓯ ꓟꓽ ꓠꓲ, ꓠꓵꓻ ꓪꓴ‐ꓢ ꓔꓯ ꓟꓽ ꓙꓲ ꓢꓴ ꓙꓳˍ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓖꓳ ꓟ ꓡꓰ ꓐꓰ ꓤ ꓟꓶ ꓝꓱ ꓑꓮꓲ ꓗꓪ ꓘꓴ ꓔ ꓢꓴ ꓐꓴ ꓥ ꓟꓲ ꓑꓮꓲ ꓬꓰ ꓠ, ꓟ ꓮ ꓘꓶ. ꓡꓳ. ꓐꓲ ꓠ, ꓟ ꓙꓽ ꓖꓶ ꓔ ꓥ ꓟꓲ ꓘꓴ ꓔ ꓢꓴ ꓠꓬ ꓟꓽ ꓛꓲ ꓡ ꓟ ꓔꓯ ꓡꓳ. ꓟꓳ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓛꓲ ꓑꓮꓲ ꓔꓯ ꓡ ꓠ, ꓟ ꓘꓴ ꓢꓴ ꓐꓴ ꓔꓯ ꓕꓲ ꓐꓱ ꓔ ꓠꓬ ꓢꓰꓼ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪ ꓔꓲ ꓠꓬ ꓬꓲ ꓤ ꓐꓱ ꓶ ꓤ ꓟꓶ ꓝꓱ ꓑꓮꓲ ꓗꓪ ꓘꓴ ꓔ ꓢꓴ ꓐꓴ ꓠꓬ ꓘꓴ ꓟꓽ ꓒꓵꓽ ꓐꓴ ꓓꓵ ꓙ ꓗꓷ ꓟ ꓥ ꓡꓳ꓿ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓻ ꓖꓴ ꓗꓪ ꓡꓳ. ꓟꓳ ꓢꓴ ꓮ ꓙꓵꓽ ꓔꓯ ꓤ ꓟꓶ ꓝꓱ ꓑꓮꓲ ꓗꓪ ꓡ ꓠ, ꓟ ꓘꓴ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓑꓮꓲ ꓗꓪ ꓡ ꓢꓴ ꓕꓲ ꓣꓳ ꓠꓬ ꓑꓮꓲ ꓐꓵ ꓞꓲꓽ ꓟꓽ ꓖꓪꓽ ꓖꓪꓽ ꓡ ꓟ ꓔꓯ ꓪ ꓔꓲ ꓡꓳ. ꓟꓳ ꓗꓷ ꓠꓬ ꓬꓲ ꓔꓯ ꓑꓮꓲꓽ ꓗꓪ ꓐꓰ ꓗꓼ ꓓꓳꓺ ꓗꓷꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓐꓯ ꓟ. ꓖꓶ ꓡ ꓟ ꓤ ꓟꓶ ꓝꓱ ꓑꓮꓲꓽ ꓐꓵ ꓞꓲꓽ ꓐꓯ ꓟ ꓠꓬ ꓮ ꓫꓵꓽ ꓔꓯ ꓐꓯ ꓔ ꓟ ꓥ ꓡ? ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓕꓲ ꓖ ꓐꓰ ꓕꓲ ꓖ ꓗꓪ ꓙꓰ ꓟ ꓙꓵ, ꓕꓯ ꓣꓳ ꓖꓪꓽ ꓟ ꓐꓵ ꓞꓲꓽ ꓝꓮꓲ ꓜ ꓫꓵꓽ ꓓꓳꓻ ꓫꓵꓽ ꓐꓰ ꓫ. ꓕꓱ ꓘꓶꓽ ꓐꓴ ꓥ ꓟꓲ ꓟꓽ ꓪ ꓡꓯ ꓘꓳ ꓟ ꓥ ꓡꓳ꓿ꓡꓯꓽ ꓒꓯ ꓝ. ꓑꓮꓲ ꓗꓪ ꓖꓪ ꓟ ꓐꓵ ꓞꓲꓽ ꓐꓯ ꓟ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓢꓴ ꓐꓴ ꓖꓪꓽ ꓟ ꓖꓪ ꓫꓵꓽ ꓔꓯ ꓐꓯ ꓟ ꓥ ꓡꓳ꓿ ꓝꓮꓲ ꓢꓲꓽ ꓫꓬ ꓢꓴ ꓐꓴ ꓖꓪꓽ ꓟ ꓖꓪꓽ ꓫꓵꓽ ꓔꓯ ꓐꓯ ꓔ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓖꓪꓽ ꓫꓵꓽ ꓐꓯ ꓟ ꓠꓬ ꓞꓳ ꓙꓳˍ ꓚꓱ, ꓔꓯ ꓐꓯ ꓔ ꓟ ꓥ ꓡꓳ꓿ ꓖꓪꓽ ꓫꓵꓽ ꓐꓰ ꓪꓽ ꓡꓯꓽ ꓘꓳ, ꓟ ꓞꓳ ꓙꓳˍ ꓚꓱ, ꓔꓯ ꓐꓯ ꓔ ꓟ ꓥ ꓡꓳ꓿ ꓐ, ꓐ ꓪꓴ‐ꓢ ꓡꓰ ꓟꓲ ꓠꓯ ꓞꓳ ꓤ ꓮ ꓙꓵꓽ ꓔꓯ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓠ, ꓟ ꓘꓴ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬ ꓟꓴ ꓗꓪ ꓗꓴꓷꓼ ꓗꓪ ꓤ ꓑꓮꓲꓽ ꓗꓪ ꓣꓳ ꓐ ꓠ, ꓟ ꓠꓬ ꓣꓳ ꓟꓲ ꓠꓯ ꓗꓪ ꓞꓳ ꓙꓳˍ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓟ. ꓖꓶ ꓔ ꓟ ꓚꓱ, ꓔꓯ ꓛꓳꓽ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓯ ꓠ, ꓟ ꓣꓳ. ꓚꓵ. ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓪꓴ‐ꓢ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓛꓳꓽ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓪꓴ‐ꓢ ꓡꓰ ꓣꓳ ꓔꓯ ꓖꓶ ꓔ ꓟ ꓪꓴ‐ꓢ ꓙꓵꓽ ꓗ ꓞꓲ ꓙꓵꓽ ꓐꓰ ꓠꓵꓻꓠꓲ, ꓔꓯ ꓣꓳ ꓠꓲ, ꓟ ꓠꓯ, ꓗꓪ ꓓꓯꓺ ꓝꓲ ꓡꓯ꓿ ꓣꓳ ꓟꓲ ꓠꓯ ꓗꓪ ꓞꓳ ꓙꓳˍ ꓢꓯ. ꓔꓬ ꓟ ꓙꓵ, ꓔꓯ ꓫ. ꓓꓴ ꓟꓶ ꓓꓴ ꓔꓳ, ꓜꓳꓽ ꓡ ꓟ ꓙꓵ, ꓔꓯ ꓪꓴ‐ꓢ ꓐꓯ ꓘꓶꓽ ꓔꓯ ꓛꓳꓽ ꓢꓲ ꓢꓯ. ꓔꓬ ꓓꓴ ꓬꓰ ꓡꓯ꓿ ꓣꓳ ꓙꓲ‐ꓢꓴ ꓢꓲꓺ ꓒ ꓒꓬꓱꓼ ꓡ ꓗ. ꓠꓯ ꓪꓴ‐ꓢ ꓡꓰ ꓠꓴ ꓥꓪ ꓐꓱ ꓶ ꓟꓴ ꓗꓪ ꓗꓴꓷꓼ ꓗꓪ ꓤ ꓑꓮꓲꓽ ꓗꓪ ꓘꓴ ꓔ ꓟꓶ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓬꓰ ꓠ, ꓟ ꓕꓲ ꓫꓵꓽ ꓙꓳ ꓢꓲ ꓡꓳ ꓖꓳ ꓟ ꓥ ꓠꓬ ꓑꓮꓲ ꓐꓵ ꓞꓲꓽ ꓖꓪꓽ ꓠ, ꓟ ꓥ ꓡꓳ꓿ ꓑꓮꓲ ꓐꓵ ꓞꓲ ꓐꓯ ꓟ ꓠꓬ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓙꓵ, ꓔꓯ ꓪꓴ‐ꓢ ꓡꓰ ꓣꓳ ꓔꓯ ꓐꓯ ꓟ ꓖꓶ ꓡ ꓚꓱ, ꓔꓯ ꓙꓲꓻ ꓟ ꓕꓲ ꓒꓳ, ꓗꓪ ꓞꓳ ꓙꓳ ꓠ, ꓟ ꓣꓳ ꓚꓵ. ꓔꓯ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓪꓴ‐ꓢ ꓔꓯ ꓧꓪ ꓡꓯ꓿ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓪ ꓗꓼ ꓘꓶꓼ ꓒꓴ ꓖꓶ ꓡꓯ꓿ ꓑꓮꓲ ꓐꓵ ꓞꓲꓽ ꓖꓪ ꓓꓴ ꓬꓰ ꓡꓯ꓿ =