ꓤ ꓠꓬꓲꓽ ꓫꓵ. ꓔꓯ ꓥꓳꓽ (Sunday reflection)

#rvalisu #Photo #Fr.Joseph and Deacon Clement #Zang yaw

Sunday, October 01, 2023

ꓤ ꓠꓬꓲꓽ ꓫꓵ. ꓔꓯ ꓥꓳꓽ (Sunday reflection)

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (27) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 21ꓽ28‐32 ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓤ ꓠꓬꓲꓽ ꓫꓵ. ꓔꓯ ꓥꓳꓽ ꓥ ꓡꓳ꓿ ꓛꓰꓼ ꓡꓱꓼ ꓐꓱ ꓶ ꓟꓬꓱꓽ ꓬꓰ ꓝꓲ ꓟ ꓤ ꓠꓬꓲꓽ ꓫꓲ. ꓔꓯ ꓥꓳꓽ ꓥ ꓡꓳ꓿ ꓤ ꓪꓴꓽ ꓠꓬ ꓬꓲ. ꓐ, ꓐ ꓡꓰ ꓛꓰꓼ ꓡꓱ ꓐꓱ ꓗꓪ ꓟꓬꓱꓽ ꓬꓰ ꓠ, ꓟ ꓝꓲ ꓟ ꓙꓵ, ꓕꓯ ꓟꓽ ꓙꓰ ꓐꓰ ꓐꓯ ꓥ ꓟꓲ ꓗ. ꓠꓯ ꓠꓬ ꓟꓬꓱꓽ ꓗꓪ ꓙꓰ ꓟ ꓥ ꓡꓳ꓿

ꓤ ꓣꓳ ꓢꓴ ꓕꓲ ꓣꓳ ꓠꓬ ꓬꓲ. ꓐ, ꓐ ꓡꓰ ꓟꓬꓱꓽ ꓬꓰ ꓠ, ꓟ ꓙꓰ ꓠ, ꓟ ꓐꓯ ꓕꓯ ꓙꓰ ꓓꓴ ꓥꓳ ꓐꓰ ꓐꓯ ꓥ ꓟꓲ ꓟꓽ ꓙꓰ ꓟ ꓥ ꓡꓳ꓿ ꓟꓬꓱꓽ ꓬꓰ ꓟ ꓠꓬ ꓫ. ꓕꓱ ꓘꓶꓽ ꓗꓪ ꓐꓰ ꓟ ꓥ ꓚꓲ. ꓛꓬ ꓡꓰ ꓟꓬꓱꓽ ꓬꓰ ꓠ, ꓟ ꓐꓯ ꓔ ꓟ ꓥ ꓡꓳ꓿ ꓔꓱ, ꓚꓵ ꓟ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓝꓲ. ꓫ ꓢꓴ ꓐꓴ ꓐꓰ ꓖꓳ ꓪꓴꓽ ꓢꓴ ꓐꓴ ꓪꓴ‐ꓢ ꓗꓴꓷꓼ ꓗꓪ ꓛꓲ ꓬꓰ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓝꓴꓲ ꓬꓰ ꓗꓷ ꓥ ꓟꓲ ꓪꓴ‐ꓢ ꓠꓯ, ꓡ ꓢꓲ ꓠꓬ ꓣꓳ ꓬꓰ ꓗꓷ ꓟ ꓝꓴꓲ ꓔꓯ ꓓꓵꓽ ꓙ ꓒꓳ, ꓡꓶꓽ ꓡ ꓠ, ꓟ ꓥ ꓡꓳ꓿ ꓣꓳ ꓝꓴꓲ ꓬꓰ ꓗꓷ ꓟ ꓙꓵ, ꓕꓯ ꓣꓳ ꓝꓴꓲ ꓔꓯ ꓭ. ꓢꓲ ꓠꓬꓲ ꓔꓱ ꓚꓵ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓙꓲˍ ꓟ ꓕꓲ ꓒꓳ, ꓗꓪ ꓙꓽ ꓫꓱ ꓠ, ꓟ ꓣꓳ ꓚꓵ. ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓮ ꓡꓰ ꓐꓰ ꓙꓽ ꓣꓳ ꓟ ꓠꓲ, ꓟ ꓙꓳˍ ꓠ, ꓟ ꓢꓲꓺ ꓒ ꓬꓰ‐ꓢꓴ ꓔꓯꓺ ꓢꓳꓻ ꓠ, ꓟ ꓣꓳ ꓚꓵ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓤ ꓠꓬꓲꓽ ꓫꓵ. ꓔꓯ ꓥꓳꓽ ꓗꓪ ꓐꓰ ꓮ ꓡꓰ ꓐꓰ ꓙꓽ ꓣꓳ ꓟ ꓠꓲ, ꓟ ꓙꓳˍ ꓠꓯ, ꓟ ꓔꓯ ꓟ. ꓖꓶ ꓡ ꓡꓳ꓿ ꓤ ꓪꓴꓽ ꓠꓬ ꓟꓬꓱꓽ ꓬꓰ ꓐꓰ ꓝꓲ ꓟ ꓙꓵ, ꓕꓯ ꓟꓽ ꓙꓰ ꓐꓰ ꓐꓯ ꓥ ꓟꓲ ꓗ. ꓠꓯ ꓬꓰ ꓙꓰ ꓗꓷ ꓟ ꓥ ꓡꓳ꓿ ꓖꓳ ꓟ ꓡꓰ ꓢꓲꓺ ꓒ ꓬꓰ‐ꓢꓴ ꓡꓰ ꓫ. ꓕꓱ ꓘꓶꓽ ꓗꓪ ꓐꓰ ꓟꓷꓼ ꓠꓶꓼ ꓗꓪ ꓐꓰ ꓬꓲ ꓔꓯ ꓙꓵꓻ ꓢꓴ ꓔꓯ ꓪꓴ‐ꓢ ꓟꓽ ꓠꓲ, ꓒꓴ ꓐꓰ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓔꓯ ꓦꓻ ꓡꓱ ꓢꓲ ꓫꓬ ꓔꓱ ꓔꓱ ꓛꓳꓽ ꓫꓱ ꓠ, ꓔꓯ ꓠꓲ, ꓒꓴ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓝꓮꓲ ꓤ ꓪꓴꓽ ꓠꓬ ꓬꓲ. ꓪꓴ. ꓕꓯ ꓬꓲ. ꓐ, ꓐ ꓐꓯ ꓘꓶꓽ ꓔꓯ ꓟꓽ ꓠꓻ ꓡꓳ ꓗꓷ ꓥ ꓟꓲ ꓗ. ꓠꓯ ꓬꓲ ꓠꓬ ꓬꓲ ꓐ, ꓐ ꓡꓰ ꓐꓯ ꓔ ꓟ ꓔꓯ ꓬꓰ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓥ ꓟꓲ ꓤ ꓪꓴꓽ ꓔꓯ ꓔꓯꓺ ꓢꓳ ꓠ, ꓟ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓝꓴꓲ ꓬꓰ ꓛꓬ, ꓡꓰ ꓥ ꓟꓲ ꓤ ꓪꓴꓽ ꓡꓰ ꓐꓰ ꓓꓵꓽ ꓙ ꓒꓳ, ꓡꓶꓽ ꓡ ꓢꓲ ꓠꓬꓲ ꓪꓴ‐ꓢ ꓠꓲ, ꓒꓴ ꓟ ꓟꓬꓱꓽ ꓗꓪ ꓬꓰ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬ ꓫ. ꓕꓱ ꓘꓶꓽ ꓗꓪ ꓡꓰ ꓪꓴ‐ꓢ ꓔꓯ ꓙꓵꓻ ꓡꓳ ꓐꓰ ꓐꓯ ꓢꓴ ꓔꓯ ꓟꓽ ꓠꓲ, ꓒꓴ ꓟ ꓚꓱ, ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ. ꓫ ꓢꓴ ꓐꓰ ꓖꓳ ꓪꓴꓽ ꓟ ꓐꓴ ꓠꓬ ꓪꓴ‐ꓢ ꓗꓴꓷꓼ ꓗꓪ ꓠꓴ ꓪ ꓟꓲ ꓕꓯꓽ ꓢꓲ ꓓꓵꓽ ꓡꓰ ꓥꓳ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓟꓲ ꓠꓯ ꓡ ꓞꓳ ꓐꓴ ꓟꓽ ꓓꓵꓽ ꓙ ꓔ ꓟ ꓚꓱ, ꓔꓯ ꓫ. ꓕꓱ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓠꓲ, ꓫꓵˍ ꓟ ꓠꓬ ꓟꓲ ꓠꓯ ꓗꓪ ꓜꓴꓻ ꓮ ꓟꓬ, ꓗꓪ ꓝꓴꓲ ꓙꓳ ꓢꓴ ꓐꓴ ꓐꓰ ꓥꓳꓽ ꓡꓰ ꓢꓴ ꓔꓯ ꓖꓽ ꓖꓶ ꓖꓶ ꓟ ꓔꓯ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓲ ꓠꓬꓲ ꓚꓲ ꓛꓬ ꓟꓬꓱꓽ ꓬꓰ ꓟ ꓙ ꓫꓱ ꓠ, ꓟ ꓠꓲ, ꓒꓴ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓤ ꓪꓴꓽ ꓠꓬ ꓮ ꓡꓰ ꓐꓰ ꓓꓵꓽ ꓙ ꓒꓳ, ꓡꓶꓽ ꓡ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓣꓳ ꓙꓵꓻ ꓠꓲ, ꓔꓯ ꓟꓲ ꓙꓲ ꓟ ꓕꓲ ꓒꓳ, ꓗꓪ ꓞꓳ ꓫꓱ ꓪ ꓠ, ꓟ ꓙꓵꓻ ꓠꓲ, ꓠꓬ ꓣꓳ ꓚꓵ. ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓚꓱ, ꓔꓯ ꓣꓳ ꓠꓲ, ꓟ ꓗꓪ ꓗꓶ ꓔ ꓓꓴ ꓬꓰ ꓡꓯ꓿ ꓝꓴꓲ ꓬꓰ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓠꓯ, ꓗꓪ ꓡ ꓢꓲ ꓠꓬꓲ ꓣꓳ ꓝꓴꓲ ꓭ. ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ, ꓡꓯ꓿