ꓪꓴ-ꓢ ꓗꓴꓷꓼ ꓗꓪ ꓮꓽ ꓟ ꓪꓴꓽ_ ꓟ

ꓪꓴ-ꓢ ꓗꓴꓷꓼ ꓗꓪ ꓮꓽ ꓟ ꓪꓴꓽ_ ꓟ

ꓟ-ꓕꓲ ꓕꓳꓽ ꓶ 18: 1-5, 10, 12-14

 ꓖꓳ ꓕꓲ ꓝꓲꓸ ꓗꓪ ꓛꓳ ꓒꓯ ꓐꓴ ꓠꓬ ꓬꓰ-ꓢꓴ ꓔꓯ ꓡ ꓢꓲ꓾ ꓟꓴ ꓗꓪ ꓗꓴꓷ ꓠꓯꓸꓼ ꓗꓪ ꓪ ꓜꓲ ꓪꓴꓽ_ ꓟ ꓮ ꓟ ꓥ ꓡꓳꓺꓽ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓬ ꓤ ꓠꓱ ꓤ ꓕꓲ ꓣꓳ ꓘꓴꓻ ꓔꓯꓹ ꓡ ꓢꓲ꓾ ꓬꓲ ꓪ ꓗꓳ ꓡꓳ ꓗꓪ ꓦꓰꓼ ꓞꓹ ꓝꓲ ꓢꓲ ꓠꓬꓲ ꓕꓱ ꓡꓱ ꓐꓯ_ ꓡꓳ꓾ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓠꓴ ꓪ ꓒꓳꓹ ꓬꓲꓼ ꓡ ꓢꓲ ꓤ ꓠꓱ ꓤ_ ꓡꓰ ꓐꓰ ꓟꓽ ꓒꓬꓱꓼ ꓡ ꓠꓬ꓾ ꓮ ꓡꓲ ꓥ_ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓠꓴ ꓪ ꓓꓵꓽ ꓡꓰ ꓟꓽ ꓓ꓿ ꓖꓳ ꓡꓱ ꓠꓬꓲ ꓮ ꓟ ꓥ_ ꓟꓲ ꓤ ꓠꓱ ꓤ ꓕꓱ ꓟ_ ꓡꓰ ꓐꓰ ꓚꓲ ꓛꓬ ꓙꓻ ꓣꓳ_ ꓠꓬ꓾ ꓬꓲ ꓠꓽ ꓟꓴ ꓗꓪ ꓗꓴꓷ ꓠꓯꓸꓼ ꓗꓪ ꓪ ꓜꓲ ꓪꓴꓽ_ ꓟ ꓥ ꓡꓳ꓿ ꓮ ꓟ_ ꓟꓲ ꓥꓪ ꓟꓬꓱꓺ ꓗꓪ ꓐꓰ ꓕꓱ ꓡꓱ ꓫꓵꓽ ꓤ ꓠꓱ ꓤ ꓕꓲ ꓣꓳ ꓔꓯ ꓘꓳ ꓣꓴ_ ꓠꓬ꓾ ꓥꓪ ꓔꓯ ꓘꓳ ꓣꓴ_ ꓡꓳ꓿ ꓤ ꓟꓳ꓾ ꓤ ꓠꓱ ꓤ ꓕꓱ ꓟꓬ ꓟ ꓗꓪ ꓕꓲ ꓣꓳ ꓔꓯ ꓠꓴ ꓪ ꓟꓳꓻ ꓟꓽ ꓟꓵ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴ ꓪ ꓔꓯ ꓐꓯ ꓖꓶ_ ꓠꓬꓲ꓾ ꓬꓲ ꓪ ꓔꓯ ꓔ ꓙ ꓢꓴ ꓟꓴ ꓗꓪ ꓝꓲ ꓓꓴ ꓠꓬ꓾ ꓮ ꓕꓯ ꓟꓲ ꓟꓴ ꓗꓪ ꓗꓪ ꓔꓬ_ ꓟ ꓥꓪ ꓐꓹ ꓐ ꓬꓲ ꓒꓬꓱꓽ ꓔꓯ ꓟꓳ_ ꓡꓳ꓿ ꓡ ꓞꓳ ꓕꓲ ꓣꓳ ꓠꓬ ꓮ ꓣꓳ ꓕꓲ ꓦꓬꓻ ꓙꓳ ꓢꓲ꓾ ꓕꓲ ꓟ ꓪꓴꓸ ꓙꓰ ꓠꓬ꓾ ꓠꓴ ꓪ ꓮ ꓡꓲ ꓓꓵ ꓙ_ ꓡꓳꓺꓽ꓿ ꓬꓲ ꓠꓬ ꓗꓴꓺ ꓞꓲ ꓗꓴ ꓟ ꓔꓯ ꓡꓳꓺ ꓔ ꓬꓰ ꓢꓲ꓾ ꓪꓼ ꓚꓲ ꓗꓪ ꓙꓰ ꓢꓲ ꓠꓬꓲ꓾ ꓒꓲꓼ ꓬꓰ ꓟ ꓖꓳ ꓕꓲ ꓟ ꓔꓯ ꓧꓪ ꓙꓰ_ ꓡꓳ ꓟꓽ ꓥ ꓡꓺꓽ꓿ ꓥꓪ ꓠꓴ ꓪ ꓔꓯ ꓔꓱꓹ ꓔꓱ_ ꓐꓰ ꓐꓯ ꓖꓶ_ ꓠꓬꓲ꓾ ꓧꓪ ꓟꓶ ꓗꓷ ꓐꓭ ꓠꓬ꓾ ꓬꓲ ꓠꓽ ꓮ ꓣꓳ ꓕꓱ ꓕꓲ ꓟ ꓑꓶ ꓓꓴ ꓗꓹ ꓛꓲ_ ꓟ ꓠꓬ꓾ ꓟꓽ ꓪꓴꓸ ꓙꓰ ꓟ ꓖꓳ ꓗꓴꓺ ꓞꓲ ꓗꓴ ꓟ ꓑꓶ ꓓꓴ ꓗꓹ ꓛꓲ_ ꓟ ꓢꓶꓸ ꓟꓽ ꓞꓲ ꓗꓹ ꓛꓲ_ ꓡꓳ꓿ ꓖꓳ ꓟ_ ꓡꓰ ꓐꓰ ꓤ ꓠꓱ ꓤ ꓕꓱ ꓟꓬ ꓗꓪ ꓟ ꓕꓲ ꓣꓳ ꓬꓲ ꓢꓯꓼ ꓟꓬ ꓒꓲꓼ ꓬꓰ_ ꓟ ꓠꓬ꓾ ꓟꓴ ꓗꓪ ꓗꓪ ꓔꓬ_ ꓟ ꓠꓴ ꓪ ꓐꓹ ꓐ ꓠꓲꓹ ꓡꓶ ꓟꓽ ꓥ꓿

 

Add new comment

1 + 5 =

Please wait while the page is loading