ꓪꓴ-ꓢ ꓠꓵ ꓠꓲꓹ ꓔꓯ ꓛꓬ ꓗꓷ ꓟ ꓠꓬ ꓝꓴꓲꓸ ꓓꓽ ꓟ ꓥ ꓡꓳ=

ꓬꓲ-ꓫꓲ-ꓚꓰ ꓕꓳꓽ ꓶꓽ (37ꓽ21-28) ꓗꓪ ꓠꓬ ꓾ ꓪꓴ-ꓢ ꓠꓵ ꓠꓲꓹ ꓓꓽ ꓟ ꓠꓬ ꓣꓳꓽ ꓕꓯꓽ ꓢꓲꓺ ꓗꓪ ꓮ ꓕꓯ ꓥˍ ꓟꓲ ꓟꓽ ꓐꓬꓺ ꓡꓰ= ꓬꓲꓸ ꓑ ꓫꓬꓼ ꓐꓴ ꓘꓴ ꓢꓯꓼ ꓔꓯ ꓮ ꓕꓯ ꓟꓲ ꓓꓽ ꓔꓳꓹ ꓡꓳ ꓐꓰ ꓐꓯ ꓔ ꓡꓳ= ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓠꓻ ꓡꓳꓸ꓾ ꓪꓴ-ꓢ ꓠꓲꓹ ꓡꓶꓽ ꓔꓯˍ ꓟꓲ ꓟꓽ ꓛꓳꓺ꓾ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓰꓽ ꓛꓳꓺ ꓢꓲ꓾ ꓥꓶˍ ꓟ ꓟꓽ ꓙꓲꓻ ꓟ ꓟꓬꓱꓽ ꓬꓰ ꓢꓲ꓾ ꓪꓴ-ꓢ ꓔꓯ ꓒꓳꓹ ꓔꓴ ꓡˍ ꓕꓯ꓾ ꓪꓴ-ꓢ ꓠꓽ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓔꓯ ꓠꓱꓸ ꓐꓯꓼ ꓟꓵꓽ ꓗꓪ ꓚꓳꓺ ꓑ ꓒꓬꓱꓼ ꓬꓰ ꓝꓲˍ ꓡꓳ=

ꓕꓱ ꓡꓰ ꓐꓰ ꓪꓴ-ꓢ ꓡꓰ ꓚꓳꓺ ꓑ ꓒꓬꓱꓼ ꓬꓰ ꓝꓲˍ ꓟ ꓠꓽ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓔꓯ ꓟꓽ ꓠꓲꓹ ꓠꓵ ꓢꓲ ꓬꓰˍ ꓟ ꓟꓽ ꓥ= ꓪꓴ-ꓢ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓔꓯ ꓝꓴꓲꓸ ꓗꓪ ꓐꓰ ꓒꓳꓹ ꓬꓲꓼ ꓡ ꓠꓹ ꓟ꓾ ꓟꓽ ꓙꓲꓻ ꓟ ꓬꓰˍ ꓟ ꓗꓪ ꓐꓰ ꓒꓳꓹ ꓬꓲꓼ ꓡ ꓠꓹ ꓟ ꓐꓱ ꓶ ꓬꓲꓸ ꓪ ꓐꓴ ꓔꓯ ꓚꓳꓺ ꓑ ꓒꓬꓱꓼ ꓬꓰ ꓝꓲˍ ꓟ ꓥ ꓡꓳ=

ꓚꓳꓺ ꓑ ꓒꓬꓱꓼ ꓬꓰ ꓗꓷ ꓟ ꓬꓲ-ꓢꓷ-ꓡꓲ ꓐꓴ ꓠꓬ꓾ ꓠꓱꓸ ꓐꓯꓼ ꓟꓵꓽ ꓢꓴ ꓐꓴ ꓡꓰ ꓘꓶꓻ ꓠꓬꓲ ꓓꓶꓽ ꓠꓬꓲ ꓬꓰ ꓖꓶꓽ ꓡˍ ꓟ ꓔꓯ ꓫꓸ ꓙꓵꓺ ꓢꓲ ꓙꓽ ꓫꓸ ꓪꓺ ꓡꓰꓳ= ꓖꓳ ꓟ ꓑꓶꓸ ꓓꓴ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓠꓽ꓾ ꓪꓴ-ꓢ ꓔꓯ ꓘꓴꓻ ꓓꓰꓽˍ ꓟ ꓠꓬ꓾ “ꓪꓴ-ꓢꓺ ꓳ꓾ ꓥꓪ ꓠꓴꓽ ꓔꓯ ꓚꓳꓺ ꓑ ꓟꓵꓽ ꓗꓪ ꓐꓰ ꓚꓬꓴꓸ ꓓꓳꓺ ꓖꓶꓽ꓾ ꓥꓪ ꓠꓴꓽ ꓔꓯ ꓚꓳꓺ ꓑ ꓗꓪ ꓐꓰ ꓡꓲꓹ ꓗꓷ ꓐꓻ ꓡ ꓝꓲ ꓡꓯ”꓾ ꓐꓰ ꓘꓴꓺ ꓓꓰꓽˍ ꓕꓯ ꓾ ꓪꓴ-ꓢ ꓠꓽ ꓠꓵ ꓠꓲꓹ ꓓꓽ ꓟ ꓡꓰ꓾ ꓬꓲꓸ ꓑ ꓫꓬ ꓐꓴ ꓘꓴꓺ ꓓꓰꓽˍ ꓟ ꓔꓯ ꓓꓽ ꓔꓳꓹ ꓠꓻ ꓡꓳꓸ ꓖꓶꓽˍ ꓡꓳ=

ꓕꓱ ꓟ ꓠꓬ ꓟꓷꓽ ꓠꓷꓹ ꓝ ꓒꓽ ꓐꓴ ꓡꓰ ꓐꓯ ꓔꓲꓸ ꓔ ꓟ ꓐꓯ ꓘꓶꓽ ꓥ ꓡꓳ= ꓟꓷꓽ ꓠꓷꓹ ꓝ ꓒꓽ ꓐꓴ ꓡꓰ ꓟꓲꓽ ꓕꓯꓽ ꓢꓲꓺ ꓗꓪ ꓥˍ ꓟꓲ ꓾ ꓟꓲꓺ ꓠꓯꓺ ꓕꓲꓽ ꓟ ꓡꓱꓸꓼ ꓔꓯ ꓚꓬꓴꓸ ꓢꓴ꓾ ꓢꓲꓺ ꓒ ꓬꓰ-ꓢꓴ ꓘ-ꓣꓲ-ꓢ-ꓔꓴ ꓣꓳꓽ ꓔꓯ ꓚꓬꓴꓸ ꓙ ꓠꓹ ꓟ ꓪꓴ-ꓢ ꓡꓰ ꓝꓲ ꓩꓴ ꓡˍ ꓥꓳ ꓾ꓐꓯˍ ꓟ ꓔꓯ ꓥˍ ꓟꓲ ꓐꓯ ꓟꓸ ꓖꓶꓽ ꓔꓬꓹ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓬꓲꓸ ꓬꓲ-ꓢꓷ-ꓡꓲ ꓞꓳ ꓫꓵꓽ ꓐꓱ ꓶˍ ꓡꓰꓽ ꓡ ꓢꓲ ꓚꓬꓴꓸ ꓙˍ ꓟ ꓟꓽ ꓥ꓾ꓟꓲꓺ ꓠꓯꓺ ꓕꓲꓽ ꓟ ꓡꓱꓸꓼ ꓔꓯ ꓚꓬꓴꓸ ꓠꓹ ꓟ ꓬꓯꓼ ꓡˍ ꓟ ꓥ ꓡꓳ= ꓪꓴ-ꓢ ꓠꓬ ꓬꓲꓸ ꓮꓸ ꓣꓳ ꓜꓴꓻ ꓔꓯ ꓠꓬꓲ ꓙ ꓡꓳꓸ ꓙ ꓢꓲ꓾ꓬꓲ ꓮꓸ ꓣꓳ ꓜꓴꓻ ꓔꓯ ꓕꓲꓽ ꓠꓲꓹ ꓕꓲꓽ ꓪꓽ ꓗꓷ ꓡꓰ ꓝꓲˍ ꓡꓳ꓾ ꓐꓰ ꓬꓲ-ꓫꓲ-ꓚꓰ ꓕꓳꓽ ꓶꓽ ꓗꓪ ꓣꓳꓽ ꓑ ꓙꓽˍ ꓟ ꓕꓲꓽ ꓡꓰꓹ ꓐꓰ꓾ ꓶꓼ ꓓꓳꓽ ꓫꓱꓹ ꓓꓳꓽ ꓕꓳꓽ ꓶꓽ ꓗꓪ ꓥˍ ꓟꓲ꓾ ꓢꓲꓺ ꓒ ꓬꓰ-ꓢꓴ ꓠꓬ ꓫꓵꓻ ꓢꓲ ꓢꓯꓸ ꓬꓲꓼ ꓡˍ ꓟ ꓗꓪ ꓐꓰ꓾ ꓟꓲꓺ ꓠꓯꓺ ꓞꓳ ꓤ ꓐꓴ ꓔꓯ ꓝꓴꓲꓸ ꓗꓪ ꓐꓰ ꓚꓬꓴꓸ ꓓꓳ ꓗꓷ ꓢꓲ ꓠꓬꓲ꓾ ꓪꓴ-ꓢ ꓐꓰ ꓠꓲꓹ ꓧꓳꓹ ꓫꓵꓽ ꓧꓳꓹ ꓝꓲˍ ꓟ ꓔꓯ ꓥˍ ꓟꓲ ꓣꓳꓽ ꓢꓷꓸ ꓪˍ ꓡꓳ=ꓕꓱ ꓟ ꓠꓬ ꓪꓴ-ꓢ ꓡꓰ ꓣꓳꓽ ꓔꓯ ꓮ ꓡꓰ ꓘꓶ ꓛꓲ ꓠꓲꓹ ꓠꓵˍ ꓟ ꓔꓯ ꓢꓷ ꓪˍ ꓟ ꓥ ꓡꓳ=

ꓪꓴ-ꓢ ꓠꓬ ꓬꓲꓸ ꓕꓲꓽ ꓣꓳˍ ꓟ ꓤ ꓔꓲ ꓬꓰ-ꓢꓴ ꓘ-ꓣꓲ-ꓢ-ꓔꓴ ꓔꓯ ꓟꓲꓺ ꓠꓯꓺ ꓗꓪ ꓝꓲ ꓩꓴ ꓗꓷ ꓢꓲ꓾ ꓫꓵꓻ ꓢꓲ ꓝꓮꓲ ꓢꓯꓸ ꓬꓲꓼ ꓡˍ ꓟ ꓗꓪ ꓐꓰ ꓣꓳꓽ ꓔꓯ ꓝꓴꓲꓸ ꓗꓪ ꓐꓰ ꓡꓲꓹ ꓗꓷ ꓝꓲ ꓢꓲ ꓠꓬꓲ꓾ ꓐꓹ ꓐ ꓪꓴ-ꓢ ꓐꓰ ꓠꓲꓹ ꓧꓳꓹ ꓫꓵꓽ ꓧꓳꓹ ꓡꓯꓽ ꓘꓳ ꓝꓲˍ ꓡꓳ= ꓐꓹ ꓐ ꓪꓴ-ꓢ ꓐꓰ ꓙ ꓡꓯꓽ ꓘꓳꓹ ꓟ ꓟꓶ ꓝꓲˍ ꓡꓳ=

ꓢꓲꓺ ꓒ ꓬꓰ-ꓢꓴ ꓣꓳꓽ ꓐꓱ ꓶꓼ ꓫꓵꓻ ꓙ ꓢꓲ ꓚꓬꓴꓸ ꓙ ꓖꓶꓽˍ ꓟ ꓠꓬ꓾ ꓣꓳ ꓠꓬ ꓐꓹ ꓐ ꓪꓴ-ꓢ ꓔꓯ ꓮ ꓐꓽ ꓐꓰ ꓘꓴꓻ ꓒꓵꓽ ꓪˍ ꓟ ꓤ ꓠꓱꓻ ꓒꓬꓱꓼ ꓡ ꓝꓲˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓬꓲꓸ ꓠꓵ ꓠꓲꓹ ꓓꓽ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓪꓴ-ꓢ ꓠꓵ ꓠꓲꓹ ꓕꓯꓽ ꓢꓲꓺ ꓗꓪ ꓪꓴꓽˍ ꓟ ꓠꓽ ꓟꓽ ꓙꓳ= ꓣꓳꓽ ꓝꓴꓲꓸ ꓬꓰˍ ꓕꓯ ꓮ ꓘꓶꓸ ꓪꓴꓽ ꓓꓰꓺ ꓡꓰˍ ꓟ ꓝꓴꓲꓸ ꓠꓬ ꓪꓴ-ꓢ ꓛꓬ ꓗꓷ ꓕꓯ ꓠꓽ ꓣꓳꓽ ꓓ ꓟ ꓬꓰ ꓗꓷ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳꓽ ꓠꓬ ꓪꓴ-ꓢ ꓠꓵ ꓠꓲꓹ ꓔꓯ ꓟꓽ ꓛꓬ ꓗꓷ ꓠꓹ ꓟ꓾ ꓮ ꓕꓯˍ ꓟꓲ ꓓꓵꓽ ꓙ ꓧꓪꓸ ꓛꓲꓽ ꓔ ꓠ ꓗˍ ꓡꓳ=

ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳꓺ ꓢꓲ꓾ ꓪꓴ-ꓢ ꓔꓯ ꓡꓰꓽ ꓠꓷꓼ ꓞꓹ ꓠ ꓔ ꓡꓳ=ꓪꓴ-ꓢ ꓣꓱꓽ ꓛꓰꓽ ꓔꓯ ꓵꓻ ꓔꓬꓹ ꓢꓲ ꓠꓬꓲ ꓪꓴ-ꓢ ꓐꓯ ꓘꓶꓽ ꓔꓯ ꓠꓻ ꓡꓳꓸ ꓛꓳꓺ ꓒꓵꓽ ꓔꓬꓹ ꓕꓯ ꓠꓽ ꓣꓳ ꓠꓬ ꓪꓴ-ꓢ ꓠꓯꓸꓼ ꓗꓪ ꓔꓬꓹ ꓢꓲ꓾ ꓮꓸ ꓫꓵꓽ ꓔꓳꓹ ꓜꓳꓽ ꓡˍ ꓥˍ ꓟꓲ꓾ ꓪꓴ-ꓢ ꓠꓬ ꓣꓳꓽ ꓔꓯ ꓓꓽ ꓔꓳꓹ ꓠꓻ ꓡꓳꓸ ꓖꓶꓽ ꓔꓬꓹ ꓟ ꓔꓯ ꓣꓳꓽ ꓢꓷꓸ ꓪˍ ꓡꓳ=

ꓖꓳ ꓟ ꓑꓶꓸ ꓓꓴ ꓣꓳꓽ ꓟꓲꓺ ꓠꓯꓺ ꓞꓳ ꓤ ꓠꓬ ꓪꓴ-ꓢ ꓠꓵ ꓠꓲꓹ ꓠꓯꓸꓼ ꓗꓪ ꓢꓯꓸ ꓔꓬꓹ ꓢꓲ꓾ ꓬꓲꓸ ꓠꓲꓹ ꓡꓶꓽ ꓔꓯ ꓛꓳꓺ ꓔꓬꓹ ꓕꓯ ꓠꓽ ꓾ ꓕꓲꓽ ꓞꓲꓼ ꓕꓲꓽ ꓑ ꓟ ꓢꓯꓼ ꓟꓬꓻ ꓡꓯꓼ ꓫꓴꓻ ꓟꓶꓻ ꓪˍ ꓥꓳ ꓾ ꓐꓯˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶꓽ ꓗꓪ ꓐꓰ ꓣꓳꓽ ꓔꓯ ꓐꓯ ꓟꓳꓸ ꓖꓶꓽ ꓡ ꓔꓬꓹ ꓟ ꓥ ꓡꓳ=

Bro Dominic GU-T