ꓪꓴ-ꓢ ꓬꓲ ꓫꓱꓸ ꓤ ꓠꓲꓹ ꓑꓮꓲꓽ

ꓢꓲ ꓒ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓠꓯꓸꓼ ꓗꓪ ꓓꓵꓽ ꓙꓽ ꓠꓬꓲˍ ꓕꓯ ꓣꓳ ꓮ ꓕꓯ ꓟꓲ ꓟꓲ ꓡꓰꓹ ꓗꓷ ꓟꓽ ꓓ ꓟ꓾ ꓢꓴ ꓡꓰ ꓣꓳ ꓔꓯ ꓫꓱꓸ ꓤˍ ꓟ ꓟꓳꓸ ꓖꓶˍ ꓟ꓾ ꓢꓴ ꓡꓰ ꓣꓳ ꓔꓯ ꓬꓰ ꓙ ꓗꓷ ꓟ꓾ ꓢꓴ ꓡꓰ ꓣꓳ ꓔꓯ ꓠꓲꓹ ꓟ ꓠꓹˍ ꓟ ꓑꓶꓸ ꓓꓴ ꓫꓱꓸ ꓤ ꓥꓳꓽ ꓫꓸ ꓕꓱˍ ꓟ꓾ ꓢꓯꓼ ꓖꓶˍ ꓟ ꓕꓱ ꓟ ꓔꓯ ꓣꓳ ꓮ ꓔꓯ ꓟꓲ ꓟꓲ ꓡꓰꓹ ꓗꓷ ꓟꓽ ꓓꓻ= ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓣꓳ ꓢꓳ ꓗꓳꓸ ꓡ ꓟ ꓕꓳꓽ ꓶ꓾ ꓣꓳ ꓬꓰ ꓗꓳꓸ ꓡ ꓟ꓾ ꓢꓴ ꓡꓰ ꓣꓳ ꓔꓯ ꓟꓸ ꓖꓶ ꓡ ꓟ ꓔꓯ ꓠꓬ ꓣꓳ ꓟꓲ ꓡꓰꓹ ꓗꓷ ꓗꓴꓸˍ ꓡꓳ=

ꓖꓳ ꓡꓱ ꓐꓯ ꓥˍ ꓟꓲ ꓢꓴ ꓡꓰ ꓣꓳ ꓔꓯ ꓫꓱꓸ ꓤ ꓠꓲꓹ ꓡꓰ ꓬꓰ ꓖꓶ ꓡ ꓟ ꓫꓱꓸ ꓤ ꓠꓲꓹ ꓕꓱ ꓟ ꓔꓯ ꓣꓳ ꓮ ꓔꓯ ꓟꓲ ꓟꓲ ꓡꓰꓹ ꓗꓷ ꓟꓽ ꓓꓻ= ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯ ꓠꓬ꓾ ꓫꓱꓸ ꓤ ꓠꓲꓹ ꓖꓳ ꓟ ꓠꓬ ꓠꓬꓲꓸ ꓠꓬꓲ ꓣꓳ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓡꓱ ꓡꓱ ꓡꓰꓽ ꓓꓵꓽ ꓙ ꓟꓶˍ ꓕ ꓑꓳꓸꓼ꓾ ꓝꓮꓲ ꓕꓲ ꓧꓪꓹ ꓓꓵꓽ ꓙꓽˍ ꓕ ꓑꓳꓸꓼ ꓡꓱ ꓡꓱ ꓡꓰꓽ ꓗꓹ ꓐ ꓡ ꓝꓲˍ ꓟ ꓠꓵꓻ ꓠꓲꓹ ꓥ ꓡꓳ= ꓫꓱꓸ ꓤ ꓠꓲꓹ ꓥ ꓡꓳ= ꓮ ꓘꓶꓸ ꓓꓵꓽ ꓙ ꓟꓶ ꓓꓴ ꓓꓵꓽ ꓙꓽ ꓮ ꓓꓴ ꓕꓲ ꓫꓵꓽ ꓥ ꓡꓳ= 

ꓖꓳ ꓡꓱ ꓠꓬꓲ ꓢ ꓠꓯ ꓠꓬ Divine Mercy ꓐꓯ ꓟ ꓪꓴ-ꓢ ꓬꓲ ꓫꓱꓸ ꓤ ꓠꓲꓹ ꓑꓮꓲꓽ ꓥ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓫꓱꓸ ꓤ ꓓꓰ ꓡꓰ ꓟ ꓑꓶꓸ ꓓꓴ꓾ ꓪꓴ-ꓢ ꓠꓬ ꓣꓳ ꓔꓯ ꓠꓲꓹ ꓠꓵꓻˍ ꓟ ꓡꓰꓽ ꓟꓽ ꓞꓲꓺ ꓫꓱꓸ ꓤ ꓟ ꓑꓶꓸ ꓓꓴ ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓛꓲ ꓡ ꓢꓲ ꓞꓳ ꓤ ꓔꓯ ꓚꓬꓴꓸ ꓗꓷꓳ= ꓣꓳ ꓓꓻˍ ꓟ ꓑꓶꓸ ꓓꓴ꓾ ꓣꓳ ꓙꓵꓽ ꓪ ꓙꓳˍ ꓟ ꓑꓶꓸ ꓓꓴ꓾ ꓣꓳ ꓢꓲꓽ ꓫꓬꓹ ꓟ ꓑꓶꓸ ꓓꓴ꓾ ꓪꓽ ꓠꓬꓲˍ ꓟ ꓑꓶꓸ ꓓꓴ ꓫꓱꓸ ꓤˍ ꓟ ꓟꓶ ꓒꓵꓽˍ ꓟ ꓟꓽ ꓥ ꓥ꓾ ꓪꓴ-ꓢ ꓬꓲ ꓫꓱꓸ ꓤ ꓠꓲꓹ ꓕꓲꓽ ꓟˍ ꓡꓰꓽ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡ ꓢꓲ ꓠꓬꓲ ꓞꓳ ꓤ ꓔꓯ ꓚꓬꓴꓸ ꓗꓷ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓢꓸ ꓠꓯ ꓠꓽ ꓦꓬꓼ ꓠꓬꓲ꓾ ꓢꓲ ꓒ ꓬꓰ-ꓢꓴ ꓢꓯꓸ ꓬꓲꓼ ꓙꓰ ꓗ ꓠꓯꓸ ꓝꓮꓲ ꓕꓲꓽ ꓠꓽ ꓠꓽ ꓦꓬꓼ ꓠꓬꓲ ꓥ ꓟ ꓢꓸ ꓠꓯ ꓠꓬ Divine Mercy ꓐꓯ ꓟ꓾ ꓪꓴ-ꓢ ꓬꓲ ꓫꓱꓸ ꓤ ꓠꓲꓹ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ= 

ꓣꓳ ꓠ ꓠꓹ ꓪ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓬꓳ-ꓦ 20ꓽ19-31) ꓗꓪ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓬꓯꓼ ꓡ ꓢꓲ ꓠꓬꓲ ꓬꓲ ꓪ ꓔꓯ ꓢꓯꓼ ꓖꓶˍ ꓟ ꓟꓸ ꓟꓲꓽ ꓥ ꓡꓳ= ꓬꓲ ꓝꓲ ꓓꓴ ꓐꓴ ꓠꓬ ꓬꓴ-ꓔ ꓡ ꓞꓳ ꓐꓴ ꓔꓯ ꓙꓳꓺ ꓛꓱꓽ ꓠꓬꓲ꓾ ꓗ ꓘꓶꓽ ꓚꓲꓸ ꓢꓲ ꓔꓬ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓟꓲꓽ ꓙꓬꓼ ꓗꓪ ꓡ ꓢꓲ ꓠꓬꓲ ꓬꓲ ꓪ ꓔꓯ ꓢꓲ ꓡꓲ ꓟ ꓙꓳ ꓝꓲ꓾ ꓐꓰ ꓐꓯ ꓢꓲ ꓠꓬꓲ ꓢꓯꓼ ꓖꓶˍ ꓡꓳ= ꓖꓳ ꓕꓲ ꓝꓲꓸ ꓗꓪ ꓝꓲ ꓓꓴ ꓕꓳ-ꓟ ꓠꓬ ꓖꓳ ꓗꓪ ꓟꓽ ꓔꓬ= ꓖꓳ ꓡꓱ ꓠꓬꓲ ꓕꓳ-ꓟ ꓠꓬ ꓬꓰ-ꓢꓴ ꓔꓯ ꓠꓻ ꓓꓴ ꓑ ꓗꓪ ꓡꓯꓼ ꓠꓬꓲ ꓡꓰ ꓟꓽ ꓗꓸ ꓪ ꓡꓰ ꓕ ꓑꓳꓸꓼ ꓥꓪ ꓟꓽ ꓙꓵꓻ ꓐꓰ ꓬꓲ ꓡꓰ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓔꓯ ꓝꓮꓲ ꓕꓲ ꓧꓪꓹ ꓟꓳꓸ ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳ ꓑ ꓙꓽ ꓪˍ ꓡꓳ= ꓪꓴ-ꓢ ꓠꓵꓻ ꓠꓲꓹ ꓠꓬ ꓮ ꓡꓲ ꓪꓴꓽ ꓛꓲ ꓓꓹ ꓡ ꓐꓯ ꓟ ꓣꓳ ꓟꓳꓻ ꓪˍ ꓡꓳ=

ꓙꓵꓻ ꓠꓲꓹ ꓢꓯꓼ ꓐꓽ ꓢꓴ꓾ ꓬꓲ ꓔꓯ ꓟꓳꓻ ꓟꓽ ꓘꓴ ꓢꓴ ꓔꓯ ꓥ ꓟꓲ ꓬꓲ ꓠꓬ ꓠꓲꓹ ꓟ ꓫꓵ ꓫꓵ ꓡꓰꓽ ꓘꓳꓹ ꓣꓴˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓣꓳ ꓤꓶꓻ ꓗꓪ ꓔꓳꓹ ꓜꓳꓽ ꓠ ꓔ ꓟ ꓣꓳ ꓔꓯ ꓙꓳˍ ꓟ ꓙꓵꓻ ꓠꓲꓹ꓾ ꓓꓵꓽ ꓙꓽ ꓚꓱꓹ ꓬꓲ ꓔꓯ ꓬꓲꓼ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓕꓲꓽ ꓠꓬꓲ ꓕꓲꓽ ꓠꓬꓲ ꓢꓯꓼ ꓕꓵꓼˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓫꓱꓸ ꓤ ꓠꓲꓹ ꓥ ꓡꓳ= ꓣꓳ ꓠꓬ ꓙꓵꓻ ꓠꓲꓹ ꓣꓱꓽ ꓢꓲ ꓠꓬꓲ ꓪꓴ-ꓢ ꓣꓳ ꓔꓯ ꓫꓱꓸ ꓤ ꓡˍ ꓟ ꓔꓯ ꓟꓳꓻ ꓘꓴ ꓠꓹ ꓟ ꓬꓳꓸ ꓚꓵ ꓓꓰ ꓡꓰ ꓟ ꓥ ꓡꓳ= 

ꓡ ꓞꓳ ꓮ ꓟꓬꓹ ꓠꓬ ꓟꓲ ꓠꓯ ꓕꓱ ꓟ ꓗꓪ ꓠꓵꓻ ꓠꓲꓹ ꓟꓽ ꓟꓶ ꓟ ꓑꓶꓸ ꓓꓴ꓾ ꓫꓱꓸ ꓤ ꓠꓲꓹ ꓟꓽ ꓟꓶ ꓟ ꓑꓶꓸ ꓓꓴ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓧꓶꓽ ꓛꓵꓽ ꓫꓵꓻ ꓔꓬ ꓟ ꓮ ꓟꓬꓹ ꓙꓳˍ ꓡꓳ= ꓠꓵꓻ ꓠꓲꓹ ꓕꓱ ꓟ ꓢꓲꓼ ꓔꓬ ꓡꓳ= ꓫꓱꓸ ꓤ ꓠꓲꓹ ꓕꓱ ꓟ ꓟꓷꓼ ꓔꓬ ꓡꓳ= ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓣꓳ ꓔꓯ ꓮ ꓘꓶꓸ ꓠꓲꓹ ꓠꓵˍ ꓡꓳ꓾ ꓮ ꓘꓶꓸ ꓫꓱꓸ ꓤˍ ꓡꓳ ꓐꓯ ꓟ ꓔꓯ ꓢꓷꓸ ꓠꓹ ꓟ ꓠꓬ ꓟꓽ ꓓ ꓬꓳꓸ ꓚꓵ ꓓꓰ ꓡꓰ ꓟ ꓥ ꓡꓳ= ꓣꓳ ꓔꓯ ꓬꓲ ꓡꓰ ꓚꓰꓼ ꓔ ꓢꓲ ꓠꓬꓲ ꓬꓲ ꓣꓳ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓠꓬꓲ ꓙ ꓡꓳꓸ ꓙ ꓔꓬ ꓡꓳ=

ꓥ ꓡꓳ꓾ ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓫꓸ ꓙꓵ ꓟꓶꓽ ꓙꓵˍ ꓟ ꓔꓳꓹ ꓜꓳꓽ ꓪˍ ꓥꓳ= ꓓꓵꓽ ꓙꓽ ꓟꓬꓽ ꓓꓵꓽ ꓙꓽ ꓪꓴꓽ ꓧꓶ ꓓꓴ ꓔꓯ ꓘꓳ ꓗꓳꓸ ꓪˍ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓫꓱꓸ ꓤ ꓠꓲꓹ ꓠꓬ ꓮ ꓕꓯ ꓟꓲ ꓟꓽ ꓡꓳꓹ ꓬꓰ ꓟ ꓔꓯ ꓣꓳ ꓢꓷꓸ ꓠ ꓗꓹ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠꓴꓻ ꓥꓪ꓾ ꓪꓴ-ꓢ ꓫꓱꓸ ꓤˍ  ꓟ ꓔꓯ ꓘꓳꓹ ꓣꓴ ꓟꓶ ꓢꓴ ꓣꓳ ꓠꓬ꓾ ꓪꓴ-ꓢ ꓬꓲ ꓫꓱꓸ ꓤˍ ꓟ ꓔꓯ ꓠꓱꓸ ꓐꓯꓼ ꓢꓴ ꓔꓯ ꓐꓯ ꓟꓳꓸ ꓖꓶ ꓗꓴꓸˍ ꓟ꓾ ꓪꓴ-ꓢ ꓫꓱꓸ ꓤ ꓠꓲꓹ ꓔꓯ ꓣꓱꓽ ꓢꓲ ꓠꓬꓲ꓾ ꓣꓳ ꓝꓴꓲꓸ ꓮ ꓙꓵꓽ ꓔꓯ ꓖꓼ ꓖꓶˍ ꓟ ꓪꓴ-ꓢ꓾ ꓣꓳ ꓔꓯ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓙꓻ ꓖꓴ ꓟꓳꓸ ꓖꓶˍ ꓟ ꓪꓴ-ꓢ ꓙ ꓖꓴ ꓔꓯ ꓣꓳ ꓛꓳꓻ ꓢꓲ ꓠꓬꓲ ꓪꓴ-ꓢ ꓬꓲ ꓫꓱꓸ ꓤ ꓠꓲꓹ ꓔꓯ ꓟꓬꓽ ꓠꓬꓲ ꓐꓷꓹ ꓠꓬꓲ ꓑꓶ ꓙꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ ꓐꓰ꓾ ꓮ ꓙꓵꓽ ꓔꓯ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=