ꓬꓰ‐ꓢꓴ ꓫꓵꓻ ꓠ, ꓟ ꓐꓯ ꓟ. ꓖꓶˍ ꓟ (Sunday reflection)

ꓬꓰ‐ꓢꓴ ꓫꓵꓻ ꓠ, ꓟ ꓐꓯ ꓟ. ꓖꓶˍ ꓟ (Sunday reflection)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ 5 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ (12ꓽ20‐33) ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓢꓲ ꓠꓬꓲ ꓠꓬ ꓢꓽ ꓦꓬꓼ ꓕꓯ ꓝꓮꓲ ꓢꓯꓼ ꓬꓯꓼ ꓡ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓫꓱ ꓫꓵ. ꓕꓲ ꓢꓶꓽ ꓠꓬ ꓟꓲ ꓠꓯ ꓗꓪ ꓞꓰꓻ ꓓꓵꓽ ꓡꓰ ꓢꓲ ꓛꓵꓽ ꓡꓰ ꓢꓲ ꓠꓬꓲ ꓬꓲ ꓢꓶꓽ ꓮ ꓟꓬ, ꓓꓱ ꓡ ꓟ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓬꓲ ꓧꓪꓽ ꓖꓳ ꓓꓱ ꓥ ꓟꓲ ꓫꓵꓻ ꓢꓲ ꓠꓬꓲ ꓢꓽ ꓦꓬꓼ ꓗ. ꓠꓯ ꓢꓯꓼ ꓬꓲꓼ ꓡ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿    

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓗ. ꓠꓯ ꓢꓲ ꓗꓪ ꓛꓳꓽ ꓠ, ꓟ ꓘꓴ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓡꓯ ꓐꓳ ꓔꓶ ꓓꓴ ꓙꓻ ꓖꓴ ꓔꓯ ꓐꓱ ꓢꓲ ꓠꓬꓲ ꓬꓲ ꓗ. ꓠꓯ ꓛꓳꓽ ꓠ, ꓟ ꓘꓴ ꓔ ꓟ ꓥ ꓡꓳ꓿ ꓬꓲ ꓡꓰ ꓬꓲ ꓗ. ꓠꓯ ꓛꓳꓽ ꓢꓴ ꓐꓴ ꓮ ꓙꓵꓽ ꓔꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓖꓶ ꓟ ꓚꓱ, ꓔꓯ ꓥ ꓟꓲ ꓟ. ꓖꓶ ꓡ ꓟ ꓥ ꓡꓳ꓿ ꓜ ꓚꓲ. ꓚꓲ. ꓟ ꓙꓵ, ꓗꓪ ꓜ ꓚꓲ. ꓚꓲ ꓢꓲ ꓠꓬꓲ ꓪꓽ ꓘꓴ ꓟ ꓗꓪ ꓮ ꓟꓬ, ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓙꓲ ꓟ ꓟꓬꓱꓽ ꓗ ꓪꓮ ꓟꓬ, ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓝꓴꓲ ꓙꓳ ꓢꓴ ꓟꓲ  ꓠꓯ ꓡ ꓞꓳ ꓮ ꓟꓬ, ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓪꓴ. ꓠꓬꓲ ꓣꓳ ꓝꓴꓲ ꓐꓱ ꓶ ꓫꓵꓻ ꓙ ꓗꓷ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓔꓯ ꓠꓵꓻ ꓠꓲ, ꓟ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓲ ꓠꓯ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓕꓯ ꓫ. ꓓꓴ ꓟꓷꓽ ꓓꓴ ꓮ ꓟꓬ, ꓔꓳ, ꓜꓳ ꓡ ꓥ  ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓛꓳꓽ ꓢꓲ ꓠꓬꓲ ꓫꓵꓻ ꓗꓪ ꓛꓲ ꓢꓯ. ꓔꓬ ꓗꓷ ꓠꓬ ꓢꓲꓺ ꓒ ꓡꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓖꓶ ꓡ ꓓꓴ ꓥꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓢꓲꓺ ꓒ ꓐꓯ ꓘꓶꓽ ꓔꓯ ꓛꓳ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓠꓲ, ꓟ ꓗꓽ ꓘꓶꓽ ꓒꓴ ꓖꓶ ꓓꓴ ꓬꓰ ꓡꓯ꓿