ꓬꓳ‐ꓦ ꓡꓰ ꓬꓰ‐ꓢꓴ ꓙ ꓖꓴ ꓐꓯ ꓟ. ꓖꓶˍ ꓟ (Sunay reflection)

#creditphoto #Mary Jesus and Joseph #Merry Christmass

Sunday, December 17, 2023

ꓬꓳ‐ꓦ ꓡꓰ ꓬꓰ‐ꓢꓴ ꓙ ꓖꓴ ꓐꓯ ꓟ. ꓖꓶˍ ꓟ (Sunay reflection)

ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓶ ꓘꓳꓼ ꓠꓯ ꓗꓪ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓦꓵꓻ ꓡ ꓟ ꓔꓯ ꓡꓳ ꓠꓬꓲ ꓔꓬ ꓟ ꓙꓵ, ꓮꓓꓦꓰꓠꓔꓴ ꓙꓵ, ꓢ ꓫꓵꓽ ꓠ, ꓟ ꓢꓲꓽ ꓫꓬ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ 1ꓽ6‐8ꓲ 19‐28 ꓝꓲ ꓗꓪ ꓥ ꓢꓲ ꓠꓬꓲ ꓬꓳ‐ꓦ ꓡꓰ ꓬꓰ‐ꓢꓴ ꓙ ꓖꓴ ꓐꓯ ꓟ. ꓖꓶ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿

ꓢꓲꓽ ꓫꓬ ꓕꓳ ꓶ ꓗꓪ ꓒ‐ꓡꓲ‐ꓢꓷ ꓐꓴ ꓡꓰ ꓬꓲ ꓔꓯ ꓠ ꓠꓬꓲ ꓠ, ꓟ ꓝꓲ ꓩꓴ ꓡ ꓢꓴ ꓐꓴ ꓡꓰ ꓠꓴ ꓠꓬ ꓙꓲ‐ꓢꓴ ꓟꓲ ꓟꓽ ꓥ ꓬꓲ‐ꓡꓲ‐ꓬ ꓟꓲ ꓟꓽ ꓥ ꓟꓷꓽ ꓠꓷ, ꓝ. ꓢꓴ ꓖꓳ ꓕꓲ ꓣꓳ ˍ ꓟꓲ ꓟꓽ ꓥ ꓠꓬ ꓠꓴ ꓮ ꓫꓵꓽ ꓪꓴ. ꓠꓬꓲ ꓖꓳ ꓓꓱ ꓔꓲ, ꓖꓶ ꓡ ꓐꓰ ꓠ ꓠꓬꓲˍ ꓡꓳ꓿ ꓬꓳ‐ꓦ ꓡꓰ ꓬꓲ ꓪ ꓔꓯ ꓒꓳ, ꓖꓶ ꓢꓴꓲ ꓥꓪ ꓠꓬ ꓬꓲꓻ ꓙꓬ ꓡꓰ ꓖꓳ ꓓꓱ ꓔꓲ, ꓖꓶ ꓡꓳ꓿ ꓠꓴ ꓪ ꓟꓽ ꓢꓷ. ꓟ ꓕꓲ ꓣꓳ ꓠꓽ ꓠ ꓪ ꓗꓳ ꓡꓳ ꓗꓪ ꓦꓰꓼ ꓞ, ꓡꓳ ꓐꓰ ꓐꓯ ꓖꓶ ꓢꓲ ꓠꓬꓲ ꓥꓪ ꓠꓬ ꓬꓲ ꓛꓲ ꓠꓲ ꓦꓲꓻ ꓚ ꓒꓶ ꓖꓶ ꓠ, ꓟ ꓟꓲ ꓟꓽ ꓒꓵꓽ ꓐꓯ ꓖꓶˍ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓛꓲ ꓡ ꓟ ꓙꓵ, ꓠꓶꓽ ꓡ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓛꓲ ꓡ ꓙꓵ, ꓠꓶ ꓡ ꓟ ꓥ ꓟ ꓪꓴ. ꓠꓬꓲ ꓝꓴꓲ ꓔꓯ ꓓꓵ ꓙ ꓒꓳ, ꓡꓶꓼ ꓡ ꓠ, ꓟ ꓟ. ꓟꓲꓽ ꓚꓺ ꓗꓷ ꓟ ꓥ ꓡꓳ꓿ ꓖꓳ ꓓꓱ ꓔꓲ, ꓒ ꓬꓳ‐ꓦ ꓡꓰ ꓟ. ꓟꓲꓽ ꓚꓺ ꓗꓷ ꓟ ꓪꓴ. ꓠꓬꓲ ꓫ. ꓓꓴ ꓟꓶ ꓢꓴ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓫ. ꓕꓱ ꓘꓶꓼ ꓐꓰ ꓞꓳ ꓙꓳ ꓚꓱ, ꓒꓳ, ꓡꓶ ꓡ ꓟ ꓔꓯ ꓗꓴꓷꓼ ꓔꓯ ꓙꓵꓽ ꓢꓴ ꓢꓲꓽ ꓒ ꓐꓴ ꓡꓳ. ꓟꓳ ꓢꓷ. ꓡꓰ ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓙꓵꓽ ꓗ ꓟ. ꓒ ꓐꓴ ꓒ‐ꓡꓷ‐ꓢꓷ ꓐꓴ ꓠꓬ ꓬꓳ‐ꓦ ꓔꓯ ꓬꓲ ꓮ ꓟ ꓥ ꓟ ꓠ ꓠꓬꓲ ꓝꓲ ꓟ ꓥ ꓡꓳ꓿ ꓖꓳ ꓓꓱ ꓔꓲ, ꓒ ꓬꓳ‐ꓦ ꓠꓬ ꓬꓲꓻ ꓙꓬ ꓗꓪ ꓐꓰ ꓖꓳ ꓓꓱ ꓔꓲ, ꓖꓶ ꓟ ꓥ ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓽ‐ꓫꓬ‐ꓟ‐ꓦ ꓟ ꓗꓪ ꓐꓰ ꓖꓳ ꓓꓱ ꓔꓲ, ꓖꓶ ꓡ ꓓꓴ ꓥꓳ ꓐꓰ ꓬꓳ‐ꓦ ꓡꓰ ꓗ, ꓛꓲ ꓛꓲ ꓡꓰ ꓐꓯ ꓖꓶ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠꓴ ꓥꓪ ꓔꓯ ꓣꓳ ꓠꓯ ꓗꓪ ꓥ ꓟꓲ ꓙꓲ ꓟ ꓚꓱ, ꓗꓪ ꓢꓴ ꓔꓯ ꓟ. ꓖꓶ ꓠ, ꓟ ꓐꓯ ꓖꓶ ꓡ ꓟ ꓥ ꓡꓳ꓿

ꓠꓴ ꓥꓪ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓛꓲ ꓡ ꓟ ꓙꓵ, ꓗꓪ ꓣꓳ ꓠꓲ, ꓟ ꓔꓯ ꓢꓲꓽ ꓢꓲꓽ ꓫꓬ ꓫꓬ ꓡꓰ ꓙꓳ ꓝꓲ ꓡ ? ꓝꓮꓲ ꓣꓳ ꓝꓴꓲ ꓔꓯ ꓓꓵ ꓙ ꓒꓳ, ꓡꓶ ꓔꓬ ꓡ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓠ ꓠꓬꓲ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓟꓲ ꓠꓯ ꓗꓪ ꓬꓯꓼ ꓡ ꓙꓵ, ꓔꓯ ꓡꓳ. ꓠꓬꓲ ꓔꓬ ꓟ ꓙꓵ, ꓗꓪ ꓢꓲꓺ ꓒ ꓔꓯ ꓔꓬ ꓔꓲ. ꓖꓶ ꓓꓴ ꓬꓰ ꓡꓯ꓿ ꓖꓳ ꓓꓱ ꓔꓲ, ꓒ ꓬꓳ‐ꓦ ꓡꓰ ꓐꓰ ꓗ, ꓛꓲ ꓛꓲ ꓡꓰ ꓢꓲꓺ ꓒ ꓐꓯ ꓘꓶꓽ ꓔꓯ ꓚꓺ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿