ꓬ-ꓗꓴ_ ꓐꓰ ꓬꓳ-ꓦ ꓟꓹ ꓟ ꓓꓰꓽ ꓘꓶꓽ

Wednesday, March 11, 2020

ꓟ-ꓕꓲ ꓕꓳꓽ ꓶ 20: 17-28

ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ_ ꓕꓯ꓾ ꓙ ꓖꓴ ꓗꓪ ꓬꓲ ꓛꓳ ꓒꓯ ꓞꓲ ꓠꓬꓲꓽ ꓣꓳ ꓔꓯ ꓘꓳ ꓫꓱ ꓫꓱ_ ꓗꓪ ꓧꓳꓽ ꓙꓰ ꓢꓲ꓾ ꓬꓲ ꓪ ꓔꓯ ꓕꓱ ꓡꓱ ꓐꓯ_ ꓡꓳ꓾ ꓠ ꓠꓹ ꓔ꓾ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓓꓯ ꓙꓰ_ ꓡꓳ꓿ ꓡ ꓞꓳ ꓮ ꓐꓲ ꓔꓯ ꓠꓬ꓾ ꓔꓲ ꓒ ꓪꓴ ꓓꓵ ꓣꓱꓽ ꓢꓴ ꓐꓴ_ ꓐꓰ ꓕꓳ ꓶ ꓐꓳ ꓒ ꓐꓴ ꓔꓯ ꓡꓯꓼ ꓙꓱ ꓗꓷ_ ꓥꓳ꓿ ꓖꓳ ꓡꓱ ꓢꓲ ꓬꓲ ꓪ ꓬꓲ ꓔꓯ ꓫꓵꓻ ꓝꓴꓲ ꓐꓯ ꓞꓷꓹ ꓢꓲ꓾ ꓐꓶꓽ ꓞꓳ ꓠꓬ ꓬꓲ ꓔꓯ ꓤꓲꓺ ꓢꓲ ꓠꓬꓲ꓾ ꓧꓶꓹ ꓢꓲ꓾ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓢꓰꓼ ꓗꓷ ꓠꓹ ꓟ꓾ ꓬꓲ ꓔꓯ ꓐꓶꓽ ꓞꓳ ꓡꓯ ꓒꓯ ꓗꓪ ꓡꓯꓼ ꓙꓱ ꓗꓷ_ ꓥꓳ꓿ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓠꓬ ꓬꓲ ꓔꓯ ꓢꓯꓸ ꓬꓲꓼ ꓡ ꓝꓲ_ ꓥꓳ꓾ ꓐꓯ_ ꓡꓳ꓿ ꓖꓳ ꓕꓯ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬꓲ ꓪ ꓟꓹ ꓟ ꓠꓬ ꓬꓲ ꓤ ꓠꓬꓲꓽ ꓫꓵꓸ_ ꓐꓰ ꓡ ꓢꓲ꓾ ꓬꓰ-ꓢꓴ ꓔꓯ ꓪꓴ ꓓꓵ ꓕꓱꓼ ꓢꓲ ꓠꓬꓲ꓾ ꓬꓲ ꓔꓯ ꓕꓲ ꓫꓵꓽ ꓓꓰꓽ_ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓮ ꓫꓵ ꓠꓵ_ ꓡꓳꓺꓽ꓾ ꓐꓯ_ ꓡꓳ꓿ ꓬꓲ ꓡꓰ ꓬꓲ ꓔꓯ꓾ ꓠꓴ ꓗꓴꓷꓼ ꓠꓯꓸꓼ ꓗꓪ꓾ ꓥꓪ ꓤꓽ ꓕꓱ ꓠꓬꓲꓽ ꓫꓵꓸ ꓔꓯ ꓠꓴ ꓡꓯꓼ ꓙ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓠꓴ ꓡꓯ ꓶꓸ ꓕꓲ ꓛꓱꓽ ꓗꓪ ꓕꓲ ꓣꓳ꓾ ꓠꓬꓲꓸ ꓠꓸ ꓠꓹ ꓟ ꓕꓵꓼ ꓪ ꓖꓶ ꓡꓯ꓾ ꓐꓯ_ ꓡꓳ꓿ ꓬꓰ-ꓢꓴ ꓠꓽ ꓕꓱ ꓡꓱ ꓒꓳꓹ ꓖꓶ_ ꓡꓳ꓾ ꓠꓴ ꓪ ꓮ ꓫꓵ ꓓꓰꓽ_ ꓟ ꓠꓴ ꓪ ꓟꓽ ꓢꓷ꓿ ꓥꓪ ꓓꓳꓻ_ ꓐꓰ ꓬꓰ_ ꓟ ꓡꓴ ꓗꓶꓸ ꓠꓴ ꓪ ꓓꓳꓻ ꓐ ꓡ_ ꓡꓺꓽ꓾ ꓐꓯ_ ꓡꓳ꓿ ꓬꓲ ꓪ ꓡꓰ ꓬꓲ ꓔꓯ꓾ ꓥꓪ ꓠꓴꓽ ꓐ ꓡ_ ꓡꓳ꓾ ꓐꓯ_ ꓡꓳ꓿ ꓬꓲ ꓬꓲ ꓪ ꓔꓯ ꓐꓯ_ ꓡꓳ꓾ ꓥꓪ ꓡꓴ ꓗꓶꓸ ꓠꓬ ꓠꓴ ꓪ ꓚꓵ ꓚꓵ ꓓꓳꓻ_ ꓥꓳ꓿ ꓖꓳ ꓡꓱ ꓥ_ ꓟꓲ ꓥꓪ ꓡꓯꓼ ꓙ ꓕꓲ ꓛꓱꓽ ꓗꓪ_ ꓐꓰ꓾ ꓥꓪ ꓡꓯ ꓶꓸ ꓕꓲ ꓛꓱꓽ ꓗꓪ ꓠꓬꓲꓸ ꓠꓸ ꓠꓹ ꓟ ꓠꓽ꓾ ꓥꓪ ꓖꓶ ꓓ_ ꓡꓳ ꓫꓵ ꓟꓽ ꓥ꓿ ꓥꓪ ꓐꓹ ꓐ ꓡꓰ ꓮꓽ ꓟ ꓐꓱ ꓶ ꓙ ꓖꓶ ꓔ_ ꓠꓬ ꓮꓽ ꓟ ꓐꓱ ꓶ ꓥ ꓡꓳ꓾ ꓐꓯ_ ꓡꓳ꓿ ꓬꓲ ꓪ ꓖꓳ ꓞꓲꓻ ꓣꓳ ꓑ ꓙ ꓗꓷ ꓠꓬ꓾ ꓬꓲ ꓪ ꓠꓬꓲꓽ ꓫꓵꓸ ꓔꓯ ꓠꓲꓹ ꓟ ꓦꓶ ꓪꓴꓸ ꓔꓴ_ ꓡꓳ꓿ ꓬꓰ-ꓢꓴ ꓠꓽ ꓬꓲ ꓪ ꓔꓯ ꓘꓴꓻ ꓔꓯꓹ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ ꓐꓶꓽ ꓞꓳ ꓙꓵꓽ ꓢꓲꓽ ꓒ ꓐꓴ ꓠꓽ ꓑ ꓫꓬ ꓔꓯ ꓙꓵꓽ ꓒꓬꓱꓽ ꓟꓳꓸ ꓖꓶ_ ꓟ_ ꓐꓰ꓾ ꓬꓲ ꓪ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓬꓲ ꓪ ꓔꓯ ꓠꓬꓲꓸ ꓤꓲ_ ꓟ ꓠꓴ ꓪ ꓢꓷ_ ꓡꓳ꓿ ꓠꓴ ꓪ ꓗꓳ ꓡꓳ ꓗꓪ ꓠꓽ ꓖꓳ ꓡꓱ ꓬꓰ ꓟꓽ ꓓ꓿ ꓠꓴ ꓪ ꓗꓳ ꓡꓳ ꓗꓪ ꓮꓽ ꓟ ꓪꓴꓽ_ ꓟ ꓬꓰ ꓠꓲꓹ ꓫꓵ_ ꓠꓬ꓾ ꓠꓴ ꓪ ꓔꓯ ꓣꓱꓽ ꓙ ꓢꓴ ꓬꓰ ꓠꓯ_ ꓡꓳ꓿ ꓠꓴ ꓪ ꓗꓳ ꓡꓳ ꓗꓪ ꓪꓴ ꓓꓵ ꓣꓱꓽ ꓢꓴ ꓮ ꓟ ꓬꓰ ꓠꓲꓹ ꓫꓵ_ ꓠꓬ꓾ ꓠꓴ ꓪ ꓚꓳ ꓑ ꓬꓰ ꓠꓯ_ ꓡꓳ꓿ ꓕꓱ ꓟ ꓠꓬ ꓡ ꓞꓳ ꓮ ꓐꓲ_ ꓡꓰ ꓐꓰ ꓥ ꓡꓳ꓿ ꓬꓲ ꓠꓬ ꓢꓴꓻ ꓡꓰ ꓬꓲ ꓔꓯ ꓣꓱꓽ ꓙ ꓠꓹ ꓟ ꓡ_ ꓡꓳ ꓟꓽ ꓥ꓾ ꓢꓴ ꓔꓯ ꓣꓱꓽ ꓙ ꓠꓹ ꓟ_ ꓐꓰ꓾ ꓬꓲ ꓢꓯꓼ ꓟꓬ ꓡꓰ ꓮ ꓟꓬꓹ ꓣꓳ ꓐꓱ ꓶ ꓫꓴꓹ ꓣꓴ ꓒꓵꓽ ꓖꓶ ꓠꓹ ꓟ ꓡ_ ꓡꓳ꓾ ꓐꓯ_ ꓡꓳ꓿