ꓡꓲꓽ ꓒꓰꓼ ꓐꓰ ꓫ. ꓕꓱ ꓟ ꓠꓯ, ꓗꓪ ꓐꓰ ꓡꓲꓽ ꓒꓰꓼ ꓕꓲ ꓟ ꓞꓳ ꓫꓵꓽ ꓕꓲ ꓫꓵꓽ ꓙꓵꓻ ꓠꓲ, ꓠꓯ, ꓗꓪ ꓮ ꓡꓰ ꓐꓰ ꓪꓴꓽ ꓡ ꓐ ꓡ ꓡ? (Dialogue with culture)

ꓡꓲꓽ ꓒꓰꓼ ꓐꓰ ꓫ. ꓕꓱ ꓟ ꓠꓯ, ꓗꓪ ꓐꓰ ꓡꓲꓽ ꓒꓰꓼ ꓕꓲ ꓟ ꓞꓳ ꓫꓵꓽ ꓕꓲ  ꓫꓵꓽ ꓙꓵꓻ ꓠꓲ, ꓠꓯ, ꓗꓪ ꓮ ꓡꓰ ꓐꓰ ꓪꓴꓽ ꓡ ꓐ ꓡ ꓡ? (Dialogue with culture)

ꓡꓲꓽ ꓒꓰꓼ ꓕꓲ ꓟ ꓞꓳ ꓫꓵꓽ ꓕꓲ ꓫꓵꓽ ꓙꓵꓻ ꓠꓲ, ꓠꓯ, ꓗꓪ ꓮ ꓡꓰ ꓐꓰ ꓪꓴꓽ ꓡ ꓐ ꓡ ꓡ ꓐꓯ ꓟ ꓔꓯ ꓟ. ꓖꓶ ꓓꓴ ꓥꓳ꓿ ꓞꓳ ꓫꓵꓽ ꓕꓲ ꓫꓵꓽ ꓬꓲ ꓥꓳꓽ ꓫꓵꓽ ꓐꓯ ꓟ ꓠꓬ ꓮ ꓘꓶ. ꓛꓲ ꓣꓳꓺ ꓚꓵ. ꓟ ꓥ ꓡꓳ꓿ ꓮ ꓟ ꓥ ꓟꓲ ꓚꓲ. ꓛꓬ ꓥꓳꓽ ꓫꓵꓽ ꓗꓪ ꓐꓰ ꓫ. ꓕꓱ ꓡ ꓠꓬ ꓗ, ꓛꓲ ꓟ ꓥ ꓡꓳ꓿ ꓮ ꓠꓱꓽ ꓕꓯ ꓠꓱ. ꓐꓯꓼ ꓟꓵꓽ ꓗꓪ ꓐꓰ ꓧꓪꓽ ꓒꓴ ꓫꓵꓽ ꓟ. ꓒꓽ ꓟ. ꓟ ꓐꓴ ꓔꓲꓺ ꓒ ꓔꓲꓺ ꓟ ꓐꓴ ꓡꓳ‐ꓟꓲ ꓗꓴꓷꓼ ꓗꓪ ꓡ ꓢꓲ ꓠꓬꓲ ꓣꓳ ꓥꓳꓽ ꓫ. ꓕꓱ ꓡ ꓣꓳ ꓶꓻ ꓖꓪ ꓖꓪꓽ ꓢꓲ ꓠꓬꓲ ꓣꓳ ꓔꓯ ꓟ. ꓟꓲꓽ ꓚꓺ ꓡ ꓕꓯ ꓮ ꓘꓶ. ꓛꓲ ꓗ, ꓛꓲ ꓠꓲ, ꓒꓴ ꓓꓴ ꓙꓳ ꓡꓰ ꓟ ꓥ ꓡꓳ꓿

ꓖꓳ ꓡꓱ ꓠꓬ ꓥꓳꓽ ꓫꓵꓽ ꓕꓲ ꓟ ꓠꓬ ꓣꓳ ꓙꓵꓻ ꓠꓲ, ꓚꓱ, ꓥ ꓟꓲ ꓮ ꓡꓱ ꓫꓵꓽ ꓞꓳ ꓫꓵꓽ ꓔꓯ ꓪꓴ‐ꓢ ꓟ. ꓟꓲ ꓚꓺ ꓟꓲ ꓖꓶ ꓔꓬ ꓥ ꓟꓲ ꓬꓲ ꓪ ꓥꓳꓽ ꓫꓵꓽ ꓕꓱ ꓡꓱ ꓐꓰ ꓣꓱ ꓐ ꓡ ꓠ, ꓟ ꓮ ꓘꓶ. ꓛꓲ ꓣꓳꓺ ꓚꓵ. ꓟ ꓥ ꓡꓳ꓿ ꓔꓯꓺ ꓥꓳꓽ ꓐꓱ ꓠꓬ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓟꓬ‐ꓟ ꓗꓴꓷꓼ ꓗꓪ ꓛꓲ ꓡ ꓟ ꓠꓬ (500) ꓘꓳꓼ ꓟꓽ ꓞꓲ ꓙꓳ ꓡꓰ ꓥ ꓟꓲ ꓮ ꓠꓱ ꓕꓯ ꓪꓽ ꓘꓴ ꓟ ꓚꓱ, ꓠꓬ ꓣꓳ‐ꓟ ꓡ‐ꓔꓲ ꓥꓳꓽ ꓗꓪ ꓐꓰ ꓪꓽ ꓘꓴ ꓢꓲ ꓠꓬꓲ ꓕꓱ ꓡꓰ ꓐꓰ ꓬꓲ ꓪ ꓥꓳꓽ ꓬꓲ ꓪ ꓡꓲꓽ ꓒꓰꓼ ꓚꓱ, ꓗꓪ ꓐꓰ ꓧꓳꓽ ꓣꓱ ꓔꓬ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓗꓪ ꓛꓲ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓟꓬ‐ꓟ ꓗꓴꓷꓼ ꓗꓪ ꓮ ꓟꓬ, ꓛꓲ ꓟꓽ ꓔꓬ ꓟ ꓔꓯ ꓡꓳ. ꓟꓳ ꓪ ꓡꓳ꓿

ꓖꓳ ꓡꓰ ꓥ ꓟꓲ ꓬꓲ ꓤ ꓠꓬꓲ ꓤ ꓐꓴ ꓘꓴ ꓜꓲꓼ ꓞꓳ ꓗꓪ ꓠꓬ ꓬꓲ ꓪ ꓟ. ꓒ ꓐꓴ ꓟ. ꓟ ꓐꓴ ꓠꓬ ꓣꓳ ꓡꓲ‐ꓢꓴ ꓡꓲꓽ ꓒꓰꓼ ꓥꓳꓽ ꓔꓯ ꓣꓱ ꓢꓲ ꓠꓬꓲ ꓟ. ꓟꓲꓽ ꓚꓺ ꓪꓴ. ꓔꓴ ꓕꓯ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓪꓴ‐ꓢ ꓦꓻ ꓡꓱ ꓢꓴ ꓒꓬꓱꓼ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓥꓳꓽ ꓫꓵꓽ ꓐꓰ ꓡꓲꓽ ꓒꓰꓼ  ꓠꓬ ꓮ ꓘꓶ. ꓛꓲ ꓣꓳꓺ ꓚꓵ. ꓟ ꓥ ꓡꓳ꓿ ꓶꓻ ꓖꓪ ꓥ ꓟꓲ ꓞꓳ ꓫꓵꓽ ꓕꓲ ꓫꓵꓽ ꓬꓲ ꓒꓵꓽ ꓥ ꓡꓳ꓿ ꓞꓳ ꓫꓵꓽ ꓕꓲ ꓫꓵꓽ ꓠꓱ. ꓐꓯꓼ ꓞꓳ ꓫꓵꓽ ꓐꓰ ꓟꓽ ꓫꓱ, ꓟ ꓔꓯ ꓟꓳ. ꓖꓶ ꓟ ꓶꓻ ꓖꓪ ꓕꓲ ꓫꓵꓽ ꓢꓷ. ꓡꓰ ꓓꓴ ꓕꓲ ꓫꓵꓽ ꓥ ꓡꓳ꓿ ꓚꓲ. ꓛꓬ ꓶꓻ ꓖꓪ ꓖꓪꓽ ꓥꓳꓽ ꓫꓵꓽ ꓕꓱ ꓢꓲ ꓠꓬꓲ ꓟ. ꓟꓲꓽ ꓚꓺ ꓡ ꓟ ꓔꓯ ꓠꓬ ꓮ ꓟ ꓥ ꓟꓲ ꓮ ꓘꓶ. ꓛꓲ ꓠꓲ, ꓒꓴ ꓟ ꓘꓳ, ꓣꓴ ꓟ ꓥ ꓡꓳ꓿

ꓣꓳ ꓥ ꓟꓲ ꓠꓱ. ꓐꓯꓼ ꓢꓴ ꓔꓯ ꓟ. ꓟꓲꓽ ꓚꓺ ꓥ ꓟꓲ ꓪꓴ‐ꓢ ꓟꓬꓱꓽ ꓬꓰ ꓥ ꓟꓲ ꓬꓲ ꓪ ꓥꓳꓽ ꓫ. ꓕꓱ ꓠꓬ ꓬꓲ ꓪ ꓶꓻ ꓖꓪ ꓖꓪꓽ ꓕꓯ ꓠꓬ ꓞꓳ ꓫꓵꓽ ꓖꓳ ꓕꓲ ꓫꓵꓽ ꓟ ꓠꓬ ꓗ, ꓛꓲ ꓟ ꓡꓰ ꓐꓰ ꓥ ꓡꓳ꓿  ꓖꓳ ꓡꓱ ꓠꓬ ꓙꓵꓻ ꓠꓲ, ꓘꓴꓽ ꓠꓯ, ꓗꓪ ꓥꓳꓽ ꓫꓵꓽ ꓐꓰ ꓶꓻ ꓖꓪ ꓥ ꓟꓲ ꓣꓳꓺ ꓚꓵ. ꓡꓳ ꓝꓮꓲ ꓕꓲ ꓫꓵꓽ ꓟ ꓠꓬ ꓡꓲꓽ ꓒꓰꓼ ꓥ ꓡꓳ꓿

ꓡꓲꓽ ꓒꓰꓼ ꓠꓬ ꓙꓵꓻ ꓠꓲ, ꓘꓴꓽ ꓗꓪ ꓮ ꓡꓰ ꓐꓰ ꓢꓯꓼ ꓓ ꓝꓲ ꓠ, ꓟ ꓣꓳ ꓙ ꓝꓲ ꓠꓯ, ꓟ ꓥ ꓡꓳ꓿ ꓔꓯꓺ ꓥꓳꓽ ꓐꓯ ꓠꓬ ꓮ‐ꓒꓴ ꓞꓳ ꓫꓵꓽ ꓐꓴ ꓠꓬ ꓬꓲ ꓪ ꓠꓲꓽ ꓦꓻ ꓡꓱ ꓢꓴ ꓦꓬꓼ ꓠꓬ ꓗꓪ ꓟ ꓣꓱ ꓟ ꓡꓲꓽ ꓒꓰꓼ ꓮ ꓙꓵꓽ ꓔꓯ ꓪꓴ‐ꓢ ꓔꓯ ꓒꓳ, ꓡꓶ ꓡ ꓗ. ꓠꓯ ꓡꓳ ꓩꓴ ꓗꓷ ꓟ ꓟꓽ ꓥ ꓥ ꓐꓰ ꓬꓲ ꓪ ꓠꓲꓽ ꓖꓴꓻ ꓟ ꓗꓪ ꓪꓴ‐ꓢ ꓔꓯ ꓔꓲ ꓖꓶ ꓟ ꓡꓰ ꓐꓰ ꓑ ꓙꓰ ꓗꓷ ꓟ ꓥ ꓡꓳ꓿

ꓖꓳ ꓡꓱ ꓠꓬ incarceration ꓐꓯ ꓟ ꓡꓰ ꓐꓰ ꓬꓲ ꓪ ꓕꓱ ꓡꓰ ꓒꓳ, ꓡꓰ ꓐ ꓡ ꓟ ꓥ ꓡꓳ꓿ ꓣꓳ ꓗꓪ ꓥ ꓟꓲ ꓕꓱ ꓡꓰ ꓐꓰ ꓬꓰ ꓐ ꓡ ꓠ, ꓟ ꓬꓰ ꓠ, ꓟ ꓙꓳ ꓡꓳ ꓟꓽ ꓥ ꓡ?ʼ꓿ ꓣꓳ ꓡꓲ‐ꓢꓴ ꓐꓴ ꓗꓪ ꓥ ꓟꓲ ꓮ ꓠꓱ ꓠꓲꓽ ꓔꓯ ꓦꓻ ꓡꓰ ꓟ ꓠꓲꓽ ꓖꓴ ꓟ ꓦꓬꓼ ꓠꓬꓲ ꓗꓪ ꓠꓲꓽ ꓔꓯ ꓔꓲ ꓟ ꓠꓲꓽ ꓟꓴ ꓖꓪ ꓖꓪ ꓟ ꓬꓳ‐ꓬꓲ‐ꓬꓲ ꓟ ꓚꓱ, ꓮ ꓟꓬ, ꓫꓵꓽ ꓔꓯ ꓪꓴ‐ꓢ ꓔꓯ ꓦꓻ ꓡꓱ ꓟ ꓗꓪ ꓣꓱ ꓠ, ꓟ ꓬꓰ ꓠ, ꓟ ꓣꓳꓺ ꓚꓵ. ꓟ ꓥ ꓡꓳ꓿ ꓣꓳ ꓡꓲꓽ ꓒꓰꓼ ꓔꓯ ꓪꓴꓽ ꓟꓴ ꓡ ꓠ, ꓟ  ꓢꓯꓼ ꓕꓵꓼ ꓠ, ꓟ ꓬꓰ ꓠ, ꓟ ꓬꓰ ꓠꓯ, ꓟ ꓥ ꓡꓳ꓿

ꓝꓮꓲ ꓕꓲ ꓫꓵꓽ ꓟ ꓠꓬ ꓡꓲꓽ ꓒꓰꓼ ꓟꓶ ꓫꓵꓽ ꓟꓶ ꓙꓵꓽ ꓥ ꓡꓳ꓿ ꓣꓳ ꓡꓲꓽ ꓒꓰꓼ ꓟꓶ ꓫꓵꓽ ꓥ ꓟ ꓡꓲ‐ꓢꓴ ꓙ‐ꓑꓶ ꓙꓲ‐ꓡꓴ ꓔꓲ‐ꓳ‐ꓟ ꓮ ꓟꓬ, ꓫꓵꓽ ꓔꓯ ꓣꓳ ꓪꓴ‐ꓢ ꓔꓯ ꓓꓳꓻ ꓟꓴ ꓗꓪ ꓙꓵ, ꓕꓯ ꓣꓱ ꓠ, ꓟ ꓢꓯꓼ ꓕꓵꓼ ꓠ, ꓟ ꓣꓳ ꓬꓰ ꓠ, ꓟ ꓔ ꓡꓳ꓿ ꓮ ꓠꓱ. ꓟ ꓧꓪ‐ꓒꓴ ꓫꓵꓽ ꓞꓳ ꓫꓵꓽ ꓐꓴ ꓠꓬ ꓬꓰ‐ꓢꓴ ꓦꓵꓻ ꓑꓮꓲꓽ ꓥ ꓟꓲ 12 ꓦ ꓟ 25 ꓠꓬꓲ ꓕꓯ ꓠꓲꓽ ꓑꓮꓲꓽ ꓓꓽ ꓟ ꓠꓬ ꓟ ꓥ ꓡꓳ꓿

ꓕꓱ ꓦꓬꓼ ꓠꓬꓲ ꓠꓬ ꓟꓲ‐ꓟꓲ ꓠꓲꓽ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓔꓲꓺ ꓒ ꓪ ꓔꓲ ꓡꓰ ꓕꓱ 12 ꓦ ꓟ 25 ꓠꓬꓲ ꓔꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓦꓵꓻ ꓦꓬꓼ ꓠꓬꓲ ꓐꓰ ꓐꓯ ꓖꓶ ꓢꓲ ꓠꓬꓲ ꓟꓬꓱꓺ ꓖꓶ ꓗꓷ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓦꓵꓻ ꓦꓬꓼ ꓠꓬꓲ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿

ꓕꓱ ꓡꓰ ꓐꓰ ꓣꓳ ꓡ‐ꓢꓴ ꓡꓲꓽ ꓒꓰꓼ ꓗꓪ ꓥ ꓟꓲ ꓮ ꓠꓱ ꓣꓳ ꓮ‐ꓑ ꓮ‐ꓬ ꓐꓴ ꓡꓰ ꓣꓱ ꓗꓷ ꓟ ꓠꓲꓽ ꓔꓯ ꓔꓲ ꓟ ꓦꓬꓼ ꓠꓬꓲ ꓗꓪ ꓣꓱ ꓗꓷ ꓟ ꓮ ꓟꓬ, ꓫꓵꓽ ꓔꓯ ꓪꓴ‐ꓢ ꓔꓯ ꓔꓲ ꓖꓶ ꓢꓲ ꓠꓬꓲ ꓪꓴ‐ꓢ ꓔꓯ ꓓꓳꓻ ꓟꓴ ꓟ ꓪꓽ ꓘꓴ ꓟ ꓙꓵ, ꓕꓯ ꓣꓳ ꓡꓲꓽ ꓒꓰꓼ ꓔꓯ ꓣꓱ ꓐ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿