ꓡꓲꓽ ꓒꓰꓼ ꓔꓯ ꓒꓴ ꓒꓴ ꓡꓯ ꓡꓯ ꓟ. ꓖꓶ ꓠ, ꓟ ꓚꓱ, (Dialogue with culture)

Tuesday, March 14, 2023

ꓡꓲꓽ ꓒꓰꓼ ꓔꓯ ꓒꓴ ꓒꓴ ꓡꓯ ꓡꓯ ꓟ. ꓖꓶ ꓠ, ꓟ ꓚꓱ, ( Dialogue with culture)

ꓗꓳ. ꓗꓷ ꓟ ꓕꓲ ꓫꓵꓽ ꓠꓽ ꓕꓯ ꓡꓲꓽ ꓒꓰꓼ ꓔꓯ ꓪꓴꓽ ꓟꓴ ꓡ ꓠ, ꓟ ꓝꓮꓲ ꓗꓽ ꓕꓽ ꓙ ꓠ, ꓟ ꓚꓱ, ꓔꓯ ꓐꓯ ꓟ. ꓖꓶ ꓗꓷꓳ꓿ ꓡꓲꓽ ꓒꓰꓼ ꓠꓬ ꓡ ꓞꓳ ꓕꓲ ꓣꓳ ꓐꓰ ꓗꓴꓷꓼ ꓕꓲ ꓗꓴꓷꓼ ꓐꓱ ꓶ ꓮ ꓘꓶ. ꓛꓲ ꓣ. ꓚꓲ ꓟ ꓕꓲ ꓫꓵꓽ ꓥ ꓡꓳ꓿ ꓗꓴꓷꓼ ꓘꓴꓽ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓑ ꓫꓬ ꓐꓴ ꓮ ꓡꓰ ꓐꓰ ꓢꓯ. ꓔꓬ ꓟ ꓚꓱ, ꓔꓯ ꓟ. ꓖꓶ ꓠ, ꓟ ꓥ ꓡꓳ꓿

ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓠꓬ ꓬꓲ. ꓒꓵꓽ ꓮ ꓟꓬ, ꓒꓵꓽ ꓟ ꓕꓲ ꓫꓵꓽ ꓥ ꓡꓳ꓿ ꓞꓳ ꓫꓵꓽ ꓟꓽ ꓪ ꓡꓯ ꓘꓳ, ꓫꓵꓽ ꓙꓳ ꓟ ꓗꓴꓷꓼ ꓗꓪ ꓟꓽ ꓪ ꓡꓯ ꓘꓳ, ꓟ ꓡꓲꓽ ꓒꓰꓼ ꓔꓯ ꓛꓳ ꓢꓲ ꓠꓬꓲ ꓒꓴ ꓒꓴ ꓡꓯ ꓡꓯ ꓙꓽ ꓫ. ꓓꓴ ꓟꓽ ꓙꓳ ꓙꓴꓻ ꓓꓴ ꓟꓽ ꓙꓳ ꓟ. ꓐ ꓡ ꓠ, ꓡꓲꓽ ꓒꓰꓼ ꓚꓱ, ꓠꓬ ꓢꓴ ꓗꓴꓷꓼ ꓕꓯ ꓢꓲ ꓗꓪ ꓮ ꓟꓬ, ꓪꓴꓽ ꓡꓳ ꓬꓰ ꓟ ꓚꓱ, ꓔꓯ ꓟ. ꓐꓽ ꓡ ꓓꓴ ꓥ ꓡꓳ꓿

ꓕꓯꓻ ꓥꓳꓽ ꓐꓯ ꓠꓬ ꓢꓲ ꓪꓰꓼ ꓐꓱ ꓗꓪ ꓢꓲ ꓪꓰꓼ ꓕꓲ ꓫꓵꓽ ꓡꓰ ꓔꓶꓻ ꓔ ꓟ ꓕꓯ ꓢꓲ ꓢꓲ ꓪꓰꓼ ꓮ ꓟꓬ, ꓔꓶ ꓔ ꓟ ꓠꓬ ꓮ ꓘꓶ, ꓛꓲ ꓡꓳ. ꓐꓲˍ ꓟ ꓥ ꓡꓳ꓿ ꓖꓳ ꓟ ꓡꓰ ꓐꓰ ꓞꓳ ꓤ ꓠꓯˍ ꓗꓪ ꓥ ꓟꓲ ꓞꓳ ꓫꓵꓽ ꓮ ꓟꓬ, ꓔꓬ ꓢꓲ ꓡꓲꓽ ꓒꓰꓼ ꓮ ꓟꓬ, ꓔꓯ ꓟ. ꓖꓶ ꓐꓽ ꓡ ꓕꓯ ꓢꓲ ꓠꓬꓲ ꓗꓴꓷꓼ ꓠꓬ ꓟꓬ, ꓠꓬꓲ ꓡꓳ. ꓐꓲˍ ꓟ ꓗꓴꓷꓼ ꓕꓲ ꓗꓴꓷꓼ ꓒꓬꓱꓼ ꓡ ꓓꓴ ꓥꓳ꓿

ꓝꓮꓲ ꓞꓳ ꓤ ꓡ ꓠꓲ, ꓫꓵˍ ꓟ ꓗꓴꓷꓼ ꓕꓲ ꓗꓴꓷꓼ ꓒꓬꓱꓼ ꓡ ꓓꓴ ꓥꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓞꓳ ꓫꓵꓽ ꓮ ꓟꓬ, ꓔꓬ ꓟ ꓗꓴꓷꓼ ꓗꓪ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓡꓲꓽ ꓒꓰꓼ ꓚꓱ, ꓗꓪ ꓪꓴꓽ ꓟꓴ ꓡ ꓠ, ꓟ ꓐꓱ ꓶ ꓬꓰ ꓙ ꓔꓳ, ꓙ ꓙꓵꓽ ꓪ ꓖꓶ ꓢꓲ ꓠꓬꓲ ꓟ. ꓖꓶ ꓠ, ꓟ ꓣ. ꓚꓲ ꓡꓳ꓿

ꓝꓮꓲ ꓗꓴꓷꓼ ꓙꓵꓽ ꓚꓱ, ꓗꓪ ꓥ ꓟꓲ ꓡꓲꓽ ꓒꓰꓼ ꓚꓱ, ꓔꓯ ꓪꓴꓽ ꓓꓵꓻ ꓛ ꓢꓲ ꓠꓬꓲ ꓐꓳ ꓕꓯ ꓡꓲꓽ ꓒꓰꓼ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓪꓴꓽ ꓡ ꓟꓴ ꓡ ꓟ ꓐꓰ ꓗꓴꓷꓼ ꓘꓴꓽ ꓗꓪ ꓢꓲ ꓡꓲ ꓟ ꓗꓴꓷꓼ ꓕꓲ ꓗꓴꓷꓼ ꓒꓬꓱꓼ ꓡ ꓓꓴ ꓥꓳ꓿

ꓗꓴꓷꓼ ꓐꓯ ꓟ ꓠꓬ ꓟꓽ ꓪ ꓡꓯ ꓘꓳ, ꓓꓴ ꓡꓲꓽ ꓒꓱꓼ ꓚꓱ, ꓮ ꓙꓵꓽ ꓔꓯ ꓬꓲ. ꓧꓶꓻ ꓚꓻ ꓢꓲ ꓠꓬꓲ ꓐꓯ ꓔ ꓟ ꓥ ꓡꓳ꓿ꓗꓴꓷꓼ ꓞꓳ ꓙꓳ ꓢꓯ. ꓔꓬ ꓚꓱ, ꓶꓻ ꓡꓯꓼ ꓟꓴ ꓚꓱ, ꓗꓴꓷꓼ ꓙꓵꓽ ꓚꓱ, ꓮ ꓙꓵꓽ ꓠꓬ ꓞꓳ ꓫꓵꓽ ꓞꓳ ꓙꓵꓽ ꓡꓲꓽ ꓒꓰꓼ ꓔꓯ ꓟ. ꓖꓶ ꓟ ꓒꓬꓱꓼ ꓠ, ꓔ ꓡꓳ꓿

ꓖꓳ ꓡꓱ ꓥ ꓟꓲ ꓪꓴ. ꓠꓬꓲ ꓗꓴꓷꓼ ꓙꓵꓽ ꓚꓱ, ꓡꓲꓽ ꓒꓰꓼ ꓚꓱ, ꓶꓻ ꓡꓯꓼ ꓟꓴ ꓚꓰ, ꓗꓪ ꓠꓴ ꓢꓲ ꓟꓬꓽ ꓠꓬꓲ ꓙꓵꓽ ꓪ ꓙꓳ ꓥ ꓥꓪ ꓢꓲ ꓟꓬ, ꓠꓬꓲ ꓙꓵꓽ ꓪ ꓙꓳ ꓡꓳ ꓐꓰ ꓐꓯ ꓓꓴ ꓟꓽ ꓙꓳ ꓕꓲ ꓡꓰ ꓐꓰ ꓙꓵꓽ ꓪ ꓙꓳ ꓕꓯ ꓢꓲ ꓗꓴꓷꓼ ꓘꓴꓽ ꓗꓪ ꓪꓴꓽ ꓟꓴ ꓡ ꓓꓴ ꓙꓳ ꓡ ꓓꓴ ꓥꓳ꓿