ꓡꓲꓽ ꓒꓰꓼ ꓔꓯ ꓮ ꓡꓰ ꓗꓽ ꓕꓽ ꓠꓯˍ ꓟ (Dialogue with culture)

ꓬꓲ ꓚꓱꓹ ꓪꓴꓽ_ ꓟ ꓡꓲꓽ ꓒꓰꓼ ꓔꓯ ꓣꓳ ꓮ ꓡꓰ ꓐꓰ ꓗꓽ ꓕ ꓠꓯꓹ ꓡ꓾

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓡꓲ-ꓢꓴ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓚꓲ ꓛꓬ ꓞꓳ ꓡꓱ ꓤ ꓐꓴ ꓤ ꓫꓵꓸ ꓤ ꓠꓱ ꓐꓴ ꓔꓯ ꓡꓲ-ꓢꓴ ꓥꓳꓽ ꓕꓱ꓾ ꓡꓲ-ꓢꓴ ꓶꓼ ꓖꓪ ꓖꓪ ꓐꓯ_ ꓟ ꓡꓰ ꓟꓽ ꓓ꓾ ꓮ ꓡꓰ ꓐꓰ ꓣꓳ ꓢꓯꓼ ꓕꓵꓼ ꓠ ꓔ ꓡ꓾ ꓐꓯ ꓠꓬ ꓣꓳ ꓡꓲꓽ ꓒꓰꓼ꓾ ꓣꓳ ꓥꓳꓽ ꓫꓵꓽ ꓔꓯ ꓬꓲꓸ ꓫꓸ ꓕꓱ ꓡꓱ ꓗꓷ ꓡ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ= ꓬꓲꓸ ꓫꓸ ꓐꓯ ꓟ ꓮ ꓫꓵ ꓔꓯ ꓐꓯ_ ꓡ꓾ ꓡꓲꓦꓲꓠꓖ ꓡꓮꓠꓖꓴꓮꓖꓰ꓾ꓡꓲꓦꓲꓠꓖ ꓚꓴꓡꓔꓴꓣꓰ ꓐꓯ_ ꓟ ꓫꓸ ꓓ_ ꓟ ꓡꓲꓽ ꓒꓰꓼ꓾ ꓫꓸ ꓓ_ ꓟ ꓥꓳꓽ ꓫꓵꓽ ꓕꓱ ꓡꓱ ꓐꓰ ꓗꓷ ꓠꓹ ꓟ ꓣꓳꓸ ꓚꓵ_ ꓡꓳ= ꓣꓳ ꓡꓲꓽ ꓒꓰꓼ ꓫꓵ ꓓꓽ ꓟ꓾ ꓣꓳ ꓥꓳꓽ ꓫꓵ ꓓ ꓟ ꓔꓯ ꓡꓳꓸ ꓠꓬꓲ ꓕꓯ ꓬꓲ ꓪ ꓠꓬ ꓓꓰꓮꓔꓧ ꓡꓮꓠꓖꓴꓮꓖꓰ ꓐꓯ_ ꓟ ꓬꓲ ꓫꓵꓻ ꓟꓽ ꓥ꓾ ꓮ ꓕꓯ ꓟꓲ ꓫꓸ ꓓ_ ꓡꓳ꓾ ꓔꓯ ꓥꓳꓽ ꓐꓯ ꓠꓬ ꓧꓪ ꓒꓴ ꓫꓵ ꓥꓳꓽ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓕꓲ ꓫꓵ ꓐꓰ ꓕꓲ ꓫꓵ ꓥꓳꓽ ꓫꓵ ꓟ ꓕꓱ ꓡꓱ ꓓꓳ ꓡ ꓡꓳ꓾

ꓣꓳ ꓡꓲ-ꓢꓴ ꓘꓴ ꓠꓯꓼ ꓗꓪ ꓥ ꓟꓲ ꓡꓲꓽ ꓒꓰꓼ ꓜꓴꓻ ꓚꓰꓻ꓾ ꓥꓳꓽ ꓫꓵ ꓜꓴꓻ ꓚꓰꓻ ꓕꓱ ꓡꓱ ꓙꓳ_ ꓡꓳ= ꓡꓲ-ꓢꓴ ꓘꓴꓽ ꓗꓪ ꓣꓳ ꓡꓳꓸ ꓠꓬꓲ ꓕꓯ ꓕꓱ ꓟ ꓠꓬ ꓮ ꓘꓶꓸ ꓢꓯꓼ ꓐ ꓡ ꓟ ꓔꓯ ꓡꓳꓸ ꓟꓳ_ ꓡꓳ= ꓡꓲ-ꓢꓴ ꓥꓳꓽ ꓕꓱ꓾ ꓡꓲ-ꓢꓴ ꓫꓵꓽ ꓗꓪ ꓐꓰ ꓚꓵ ꓔꓴ ꓡꓯ ꓐꓰ ꓐꓯ ꓥ ꓟꓲ ꓡꓲ-ꓢꓴ ꓥꓳꓽ ꓔꓯ ꓮ ꓡꓰ ꓐꓰ ꓕꓲ ꓠꓲꓹ ꓕꓲ ꓪꓼ ꓕꓱ ꓟ ꓔꓯ ꓕꓱ ꓡꓱ ꓣꓱꓽ ꓡꓯ ꓐꓰ ꓐꓯ ꓐ ꓡ ꓫꓵ ꓟꓽ ꓙꓳ꓾ ꓮ ꓡꓰ ꓫꓵ ꓥꓳꓽ ꓫꓵ ꓗꓪ ꓡꓳꓸ ꓠꓬꓲ ꓥ ꓟꓲ ꓓꓲꓚꓔꓲꓳꓠꓮꓣꓬ ꓐꓰ ꓐꓯ ꓢꓲ ꓠꓬꓲ ꓕꓱ ꓟ ꓔꓯ ꓕꓱ ꓡꓱ ꓣꓱꓽ ꓡꓯ꓾ ꓐꓰ ꓐꓯ ꓢꓲ ꓠꓬꓲ ꓥꓳꓽ ꓫꓵ ꓔꓯ ꓟꓳꓸ ꓬꓲ ꓪ ꓫꓬꓹ ꓔꓶ ꓥ ꓫꓵ ꓙꓳ_ ꓡꓳ꓾ ꓣꓳ ꓡꓲ-ꓢꓴ ꓘꓴꓽ ꓠꓯꓼ ꓗꓪ ꓕꓱ ꓡꓱ ꓫꓵ ꓐꓲ ꓐꓲ ꓜꓲꓼ ꓜꓲꓼ ꓡꓰ ꓫꓵ ꓟꓽ ꓙꓳ ꓢꓰꓽ꓾ ꓖꓳ ꓡꓱ ꓠꓬꓲ ꓡꓲꓽ ꓒꓰꓼ ꓜꓴꓻ ꓔꓯ ꓡꓳꓸ ꓔꓬ ꓢꓴ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓕꓱ ꓟ ꓔꓯ ꓓꓵꓽ ꓙ ꓠꓬꓲ ꓠ ꓗꓹ ꓡꓳ= ꓮ ꓡꓰꓳ ꓐꓯ ꓠꓬ ꓬꓲ ꓪ ꓡꓰ ꓫꓬꓹ ꓔꓶ ꓕꓯ ꓠꓽ ꓮ ꓙꓵ ꓠꓬ ꓕꓲ ꓠꓲꓹ ꓕꓲ ꓪꓼ ꓣꓱ_ ꓟ ꓡꓰ ꓥꓳ= ꓖꓳ ꓡꓱ ꓠꓬꓲ ꓞꓳ ꓪꓴꓽ ꓞꓳ ꓔꓲ ꓐꓴ ꓥ ꓟꓲ ꓚꓲ ꓛꓬ ꓥꓳꓽ ꓔꓯ ꓬꓲ ꓫꓵ ꓟꓽ ꓗꓷ ꓡꓰ ꓢꓲ ꓠꓬꓲ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓟꓲ ꓠꓯ ꓗꓪ ꓒꓳꓹ ꓡꓶꓸ ꓔꓬ ꓟꓔꓯ ꓡꓳꓸ ꓠꓬꓲ ꓢꓲ ꓚꓲ ꓛꓬ ꓥꓳꓽ ꓫꓵ ꓔꓯ ꓥ ꓟꓲ ꓕꓱ ꓕꓲ ꓘꓶꓽ ꓟ ꓕꓯ ꓠꓬ ꓕꓱ ꓡꓱ ꓐꓰ ꓘꓴ ꓡꓯ꓾ ꓐꓯ ꓢꓲ ꓠꓬꓲ ꓬꓲ ꓪ ꓫꓬꓹ ꓔꓶ ꓗꓷ ꓥꓳ ꓐꓯ ꓠꓬ꓾ ꓡꓲ-ꓢꓴ ꓫꓵ ꓐꓱ ꓶ ꓙꓲ ꓖꓴ ꓙꓳ_ ꓡꓳ꓾ ꓣꓳ ꓡꓲꓽ ꓒꓰꓼ ꓔꓯ ꓟꓳꓸ ꓥ ꓟꓲ ꓕꓱ ꓟ ꓠꓬ ꓮ ꓠꓱ ꓕꓯ ꓡꓰ ꓙꓳ ꓗꓴꓸ ꓡ ꓟ ꓑꓶ ꓓꓴ ꓕꓱ ꓡꓰ ꓐꓰ ꓫꓬꓹ ꓔꓶ ꓡꓯ꓾ ꓐꓯ ꓢꓲ ꓬꓲ ꓡꓲꓽ ꓒꓰꓼ ꓢꓷꓸ ꓢꓴ ꓢꓷꓸ ꓠꓲꓹ ꓢꓷꓸ ꓢꓴ ꓔꓯ ꓘꓴ ꓢꓲ ꓠꓬꓲ ꓡꓲꓽ ꓒꓰꓼ ꓜꓴꓻ ꓚꓰꓻ ꓥ ꓟꓲ ꓢꓯꓼ ꓕꓵꓼ ꓠ ꓗꓹ ꓡꓳ=

ꓖꓳ ꓕꓯ ꓢꓲ ꓞꓳ ꓡꓱ ꓐꓴ ꓬꓲ ꓪ ꓠꓲꓹ ꓟ ꓠꓯꓼ ꓗꓪ ꓓꓵꓽ ꓡ ꓢꓲ ꓔꓬ ꓪ ꓡ ꓢꓲ ꓠꓬꓲ ꓣꓳ ꓡꓲꓽ ꓒꓰꓼ ꓣꓳ ꓥꓳꓽ ꓫꓵ ꓪꓴ ꓡ ꓟꓴ ꓡ ꓥꓳ꓾ ꓞꓳ ꓫꓵ ꓕꓲ ꓫꓵ ꓪꓴ ꓡ ꓟꓴ ꓡ ꓠꓹ ꓟ ꓐꓱ ꓶ ꓬꓲ ꓪ ꓓꓵꓽ ꓙ ꓚꓱꓹ ꓮ ꓘꓶꓸ ꓣꓳꓸ ꓚꓵ_ ꓟ ꓣꓳ ꓢꓷꓸ ꓪ ꓡꓳ= ꓖꓳ ꓡꓱ ꓠꓬꓲ ꓣꓳ ꓥꓳꓽ ꓫꓵ ꓠꓬ ꓮ ꓠꓶꓸ ꓞ ꓡꓰ ꓙꓳ ꓕꓯ ꓣꓳ ꓥꓳꓽ ꓫꓵ ꓠꓬ ꓗ ꓕ ꓓꓴ ꓮ ꓟꓬꓹ ꓙꓳ ꓕꓯ ꓣꓳ ꓓꓵꓽ ꓙ ꓚꓱꓹ ꓠꓬ ꓣꓳ ꓓ ꓫꓵ ꓥꓳ꓾ ꓖꓳ ꓡꓱ ꓠꓬꓲ ꓥꓳꓽ ꓫꓵ ꓔꓯ ꓟꓳꓸ ꓥ ꓟꓲ ꓕꓱ ꓡꓱ ꓐꓰ ꓕꓲ ꓠꓲꓹ ꓕꓲ ꓪ ꓞꓳ ꓪꓴ ꓞꓳ ꓔꓲ ꓐꓴ ꓖꓪ ꓙꓱ ꓡꓯꓼ ꓘꓳ ꓢꓲ ꓠꓬꓲ ꓡꓲ-ꓢꓴ ꓥꓳꓽ ꓫꓵ ꓔꓯ ꓕꓲ ꓘꓳꓼ ꓡꓲ ꓕꓲ ꓘꓳꓼ ꓫꓬꓹ ꓔꓶ ꓠꓹ ꓟ ꓢꓯꓼ ꓕꓵꓼ ꓠ ꓗꓹ ꓡꓳ= ꓕꓱ ꓟ ꓡꓰ ꓐꓰ ꓣꓳ ꓶ ꓖꓪ ꓔꓯ ꓥ ꓟꓲ ꓮ ꓡꓰ ꓬꓰ ꓠꓬ ꓮ ꓡꓰ ꓟꓬ ꓠꓬꓲ ꓐꓲ ꓡ ꓡ꓾ ꓮ ꓡꓰ ꓬꓰ ꓠꓬ ꓮ ꓡꓰ ꓣꓳ ꓫꓵ ꓪꓴꓽ ꓡ ꓡ꓾ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓬꓰ ꓠ ꓗꓹ ꓡꓳ= ꓕꓱ ꓡꓱ ꓕꓯ ꓢꓲ ꓚꓴꓡꓔꓴꓣꓰ ꓪꓮꓦꓰ ꓐꓯ_ ꓟ꓾ ꓚꓳ ꓡꓳ ꓚꓳ ꓫꓵ ꓗꓪ ꓓ_ ꓟ꓾ ꓡꓲꓽ ꓒꓰꓼ ꓕꓲ ꓟ ꓐꓴ ꓐꓲꓸ ꓔꓲꓸ ꓗꓷ ꓟ ꓗꓪ ꓐꓰ ꓕꓷ ꓕꓷ ꓞ ꓞ ꓡꓰ ꓦꓬꓼ ꓞ ꓐ ꓡ ꓥꓳ꓾ ꓖꓳ ꓡꓱ ꓟꓽ ꓥ ꓠꓬ ꓬꓲ ꓫꓵꓻ ꓕꓱ ꓡꓱ ꓓ ꓕꓯ ꓠꓬ ꓣꓳ ꓥꓳꓽ ꓫꓵ ꓔꓯ ꓣꓳ ꓠꓬ ꓫꓸ ꓕꓱ ꓥ ꓟꓲ ꓫꓸ ꓕꓱ ꓕꓲ ꓖꓼ ꓟꓽ ꓟꓶ ꓫꓵ ꓕꓯ ꓠꓬ ꓟꓶꓽ ꓡꓰ ꓠꓹ ꓟ ꓬꓲꓸ ꓚꓱꓹ ꓡꓲ ꓗꓷ ꓡꓰ_ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓷꓸ ꓠꓲꓹ ꓙꓳ ꓕ ꓑꓳꓸ ꓢꓯꓼ ꓪ ꓙꓳ ꓕ ꓑꓳꓸ ꓕꓲ ꓠꓲꓹ ꓕꓲ ꓪ ꓡꓰ ꓢꓯꓼ ꓕꓵꓼ ꓥꓳ ꓐꓯ ꓠꓬꓣꓳ ꓫꓵ ꓪꓴ ꓡ ꓟꓴ ꓡ ꓥꓳ ꓐꓰ ꓡꓳꓸ ꓟꓳ_ ꓡꓳ=